Umawat a Siyayaman Mangted a Naimpusuan
MASEKNAN a mismo kadatayo ti nailangitan nga Amatayo a ni Jehova. Ipanamnama kadatayo ti Sao ti Dios nga isu ket maseknan unay kadagiti agserserbi kenkuana. (1 Ped. 5:7) Ti maysa a pamay-an nga ipakpakita ni Jehova ti pannakaseknanna ket ti panangtulongna kadatayo iti nadumaduma a wagas tapno simamatalek a makapagserbitayo kenkuana. (Isa. 48:17) Kayat ni Jehova a magunggonaantayo iti ipapaayna a tulong nangruna no mapaspasarantayo dagiti nakaro a parikut. Dayta a kinapudno ket iyilustrar ti Mosaiko a Linteg.
Babaen iti Linteg, nangipaay ni Jehova iti naayat a tulong iti “naparigatan” a kas iti ulila, balo, ken ganggannaet. (Lev. 19:9, 10; Deut. 14:29) Ammona a dadduma kadagiti agserserbi kenkuana ket mabalin nga agkasapulan iti tulong dagiti kapammatianda. (Sant. 1:27) Gapuna, dagiti agserserbi kenkuana dida koma bumdeng nga umawat iti tulong dagidiay tinignay ni Jehova a mangted iti kasta. Ngem uray no umawattayo iti tulong, aramidentay dayta buyogen ti umiso a kababalin.
Maigiddato iti dayta, itampok ti Sao ti Dios nga adda met gundaway ti ili ti Dios a mangted. Lagipem ti salaysay maipapan iti “marigrigat a balo a babai” a napaliiw ni Jesus idiay templo sadi Jerusalem. (Luc. 21:1-4) Posible nga isu ket nagunggonaan kadagiti naayat nga urnos ni Jehova para kadagiti balo kas sagudayen ti Linteg. Ngem uray no marigrigat dayta a balo, isu ket malaglagip, saan a kas maysa nga immawat, no di ket kas maysa a nangted. Naragsak la ketdi dayta a balo ta nakairuamannan ti mangted agsipud ta kinuna ni Jesus nga “ad-adu ti kinaragsak iti panangted ngem iti panangawat.” (Ara. 20:35) Bayat a sipapanunotka iti dayta, kasanom a ‘mayugali ti mangted’ tapno agbalinka a naragsak?—Luc. 6:38.
“Ania ti Isupapakko ken Jehova?”
Pinampanunot ti salmista: “Ania ti isupapakko ken Jehova gapu kadagiti amin a gunggonana kaniak?” (Sal. 116:12) Ania dagiti naawatnan a gunggona? Isu ket kanayon a tinulongan ni Jehova bayat ti “rigat ken ladingit.” Kasta met nga inalaw ni Jehova ti kararua dayta a salmista manipud ken patay. Ita, uray kaskasano, kayatna met koma a ‘supapakan’ ni Jehova. Ania ngarud ti aramiden ti salmista? Kinunana: “Dagiti karik tungpalekto ken Jehova.” (Sal. 116:3, 4, 8, 10-14) Isu ket determinado a mangaramid iti amin nga annongenna ken mangtungpal iti amin nga inkarina ken Jehova.
Maaramidmo met ti kasta. Kasano? Babaen ti kanayon a panangitunosmo iti biagmo kadagiti linteg ken prinsipio ti Dios. Gapuna, ipangpangrunam ti panagdayawmo ken Jehova ken agpaiwanwanka iti espirituna iti amin nga aramidem. (Ecl. 12:13; Gal. 5:16-18) Siempre, dimonto pulos naan-anay a masupapakan dagiti inaramid ni Jehova para kenka. Kaskasdi a ‘maparag-om ti pusona’ no makitana a naimpusuan ti panagserbim kenkuana. (Prov. 27:11) Nagsayaat la ketdi a pribilehio ti mangparagsak ken Jehova iti kasta a pamay-an!
Tumulongka a Mangpasayaat iti Kongregasion
Awan duadua nga umanamongka a nagunggonaankan iti adu a pamay-an manipud iti kongregasion Kristiano. Babaen iti dayta, mangipapaay ni Jehova iti aglaplapusanan a naespirituan a taraon. Inawatmo ti kinapudno a nangwayawaya kenka manipud iti di umiso a sursuro ti relihion ken kinaignorante maipapan iti Dios ken iti panggepna. (Juan 8:32) Kadagiti gimong ti kongregasion, asamblea, ken kombension nga inyurnos ti “matalek ken masirib nga adipen,” nagun-odam ti pannakaammo a mangiturong iti agnanayon a biag iti paraiso a daga nga awanen ti rigat ken panagsagaba. (Mat. 24:45-47) Kabaelam kadi a bilangen dagiti amin a gunggona a naawatmon—ken maawatmonto pay—babaen iti kongregasion ti Dios? Ania ti mabalinmo nga isupapak iti kongregasion?
Insurat ni apostol Pablo: “Ti intero a bagi, gapu ta natunos ti pannakasangalna ken naaramid nga agtitinnulong babaen ti tunggal nagsuopan a mangipaay iti kasapulan, maitunos iti panagtignay ti tunggal sinaggaysa a kameng iti maitutop a rukod, agaramid a maipaay iti idadakkel ti bagi maipaay iti mismo a pannakapabilegna iti ayat.” (Efe. 4:15, 16) Nupay dayta a teksto ket nangnangruna nga agaplikar iti bagi dagiti napulotan a Kristiano, ti prinsipio dayta ket agaplikar iti amin a Kristiano ita. Wen, tunggal miembro ti kongregasion ket makatulong iti panangpasayaat ken panangparang-ay iti kongregasion. Kasano?
Maaramidantayo dayta babaen ti kanayon a panangikagumaantayo a mangparegta ken mangpabileg kadagiti sabsabali nga agserserbi iti Dios. (Roma 14:19) Makatulongtay met iti “idadakkel ti bagi” babaen ti panangpatanortayo iti bunga ti espiritu iti pannakilangentayo kadagiti kapammatiantayo. (Gal. 5:22, 23) Mabalintay met ti mangbirok kadagiti gundaway a ‘mangaramid iti naimbag kadagiti amin, ngem nangnangruna kadagidiay nainaig kadatayo iti pammati.’ (Gal. 6:10; Heb. 13:16) Tunggal maysa iti kongregasion—lalaki man wenno babai, ubing man wenno nataengan—ket makatulong iti ‘pannakapabileg ti bagi babaen iti ayat.’
Kanayonanna, mabalintay nga usaren dagiti saguday, pigsa, ken ik-ikutantayo iti pannakiramantayo iti mangispal-biag a trabaho nga itungtungpal ti kongregasion. “Inawatyo nga awan bayadna,” kinuna ni Jesu-Kristo. Ania ngay ti aramidentayo? Innayonna: “Itedyo nga awan bayadna.” (Mat. 10:8) Makiramantayo ngarud a naan-anay iti nagpateg a trabaho a panangikasaba iti Pagarian ken panangaramid iti adalan. (Mat. 24:14; 28:19, 20) Limitado kadi ti kabaelam a makipaset iti dayta a trabaho? Laglagipem ti marigrigat a balo a dinakamat ni Jesus. Limitado unay ti intedna ngem kinuna ni Jesus nga ad-adu dayta ngem iti inted ti sabsabali. Impaayna ti amin a kabaelanna nga ited sigun iti kasasaadna.—2 Cor. 8:1-5, 12.
Umawat Buyogen ti Umiso a Kababalin
Nupay kasta, nalabit adda dagiti gundaway a kasapulam ti umawat ti tulong ti kongregasion. Pulos a dika bumdeng nga umawat iti tulong ti kongregasion no marigrigatanka kadagiti parikut iti daytoy a sistema. Nangipaay ni Jehova kadagiti kualipikado ken naayat a lallaki a ‘mangipastor iti kongregasion’—a tumulong kenka no agpaspasarka iti rigat ken pakasuotan. (Ara. 20:28) Dagiti panglakayen ken dadduma pay iti kongregasion kayatdaka a liwliwaen, saranayen, ken salakniban kabayatan dagiti narigat a kasasaad.—Gal. 6:2; 1 Tes. 5:14.
Ngem siertuem nga umiso koma ti kababalinmo nga umawat iti kasapulam a tulong. Kanayon nga awatem ti tulong buyogen ti panagyaman. Matmatam ti kasta a tulong nga impaay dagiti kapammatiam kas ebkas ti di kaikarian a kinamanangngaasi ti Dios. (1 Ped. 4:10) Apay a napateg dayta? Gapu ta ditay kayat ti agbalin a kas iti adu iti lubong nga awanan panagyaman no makaawatda iti tulong.
Agbalin a Balanse ken Rasonable
Iti suratna iti kongregasion idiay Filipos, kastoy ti kinuna ni Pablo maipapan ken Timoteo: “Awanen kaniak ti sabali pay nga addaan kababalin a kas kenkuana a sipupudno a mangisakitto iti bambanag maipapan kadakayo.” Ngem innayon pay ni Pablo: “Amin dagiti dadduma sapsapulenda dagiti bukodda a pagimbagan, saan a dagidiay ken Kristo Jesus.” (Fil. 2:20, 21) No silalagiptayo iti dayta a napateg a kapaliiwan ni Pablo, kasanotay a maliklikan ita ti makumikom unay kadagiti ‘bukodtayo a pagimbagan’?
Pulos a ditay koma dagdagen ti sabsabali iti kongregasion a mangipaay iti panawen ken atensionda tapno tulongandatayo kadagiti problematayo. Apay? Panunotem daytoy: Napalaus la ketdi ti panagyamantayo no ti maysa a kabsat ket mangipaay iti material a tulong iti tiempo a kasapulantay unay dayta. Ngem dagdagentay kadi a mangipaay iti kasta a tulong? Siempre saan. Iti umasping a pamay-an, nupay kanayon a maragsakan dagiti kakabsat a tumulong kadatayo, nasken nga agbalintayo a balanse ken rasonable iti inanamaentayo nga ipaayda iti tiempo a maasikasoda dayta. Ngamin, kayattayo a sibubulos ti nakem dagiti kapammatiantayo a mangipaay iti tulong iti tiempo ti rigat.
Masiguradom a kanayon a nakasagana ken masindadaan a tumulong kenka dagiti kapammatiam. Kaskasdi nga adda dagiti tiempo a nalabit dida maipaay ti amin a kasapulam. No kasta ti mapasamak, makapagtalekka nga iti aniaman a pakasuotam, saranayennaka ni Jehova kas iti inaramidna iti salmista.—Sal. 116:1, 2; Fil. 4:10-13.
No kasta ngarud, dika bumdeng nga umawat a siyayaman iti aniaman a probision kenka ni Jehova—nangruna iti panawen ti rigat ken riribuk. (Sal. 55:22) Kayatna nga aramidem dayta. Ngem kayatna met nga agbalinka a “naragsak a manangited.” Gapuna, naan-anay koma nga ‘ikeddengmo iti pusom’ nga ipaay ti aniaman nga ipalubos ti kasasaadmo a mangsuporta iti pudno a panagdayaw. (2 Cor. 9:6, 7) Iti kasta, agpadpada a maaramidam ti umawat a siyayaman ken mangted a naimpusuan.
[Kahon/Dagiti Ladawan iti panid 31]
“Ania ti isupapakko ken Jehova gapu kadagiti amin a gunggonana kaniak?”—Sal. 116:12
▪ Mangbirokka kadagiti gundaway a ‘makaaramidka iti naimbag kadagiti amin’
▪ Ikagumaam ti agbalin a makaparegta ken makapabileg iti sabsabali nga agserserbi iti Dios
▪ Naan-anay a makiramanka iti trabaho a panangaramid iti adalan sigun iti kabaelam