“Kasano Kabayag . . . a Masapul nga Agpatulongak?”
“Sumardeng koma metten ti ut-ot a marikriknak!” insangit ni Jayne. Agsagsagaba ni Jayne iti kanser ket agwarwarasen iti bagina. Tartarigagayan dagiti kapamilia ken gagayyemna nga umimbag koman tapno agsardengen ti panagtutuokna! Ikarkararagda iti Dios ti panagimbagna. Dumngeg ngata ti Dios? Maseknan kadi?
PAGAAMMO ti Dios ti kasasaad ti sangatauan. Kuna ti Biblia a Saona: “Ti intero a sangaparsuaan agtultuloy nga agas-asug a sangsangkamaysa ken agpapaut-ot a sangsangkamaysa.” (Roma 8:22) Ammo ti Dios a ginasgasut a milion a tattao a kas ken Jayne ti inaldaw a marigrigatan, mabalin nga iti pisikal, emosional, wenno mental. Makitkita ti Dios ti 800 a milion a tattao a rinabii a maturog lattan a mabisbisin, ti minilion a sabsabali pay nga agsagsagaba iti kinaranggas iti pagtaengan, ken adu a nagannak ti madandanagan iti masanguanan ken iti pagimbagan dagiti annakda. Napanunotmo kadin no agtignayto ngata ti Dios a mangrisut iti kasasaad? Siempre, yantangay kayattayo a tulongan dagiti ipatpategtayo iti biag, saan aya a kayat met ti Dios a tulongan ti sangatauan a pinarsuana?
Mabalin a maysaka kadagiti adu a tattao nga agsalsaludsod iti kasta. Nasurok a 2,600 a tawen ti napalabasen, maysa a matalek a lalaki nga agnagan Habakuk ti nangyimtuod met iti Dios: “Kasano kabayag, O Jehova, a masapul nga agpatulongak, ket saanka a dumngeg? Kasano kabayag nga umasugakto kenka iti tulong manipud kinaranggas, ket saanka a mangisalakan? Apay nga ipakitam kaniak ti makapasakit, ket kumitkitaka iti riribuk laeng? Ket apay nga adda iti sangok ti panangagaw ken kinaranggas, ken apay a mapasamak ti panagririri, ken tumanor ti ringgor?” (Habakuk 1:2, 3) Ti Hebreo a mammadto a ni Habakuk nasaksianna ti makapaaligaget a kinaranggas ken kinaulpit idi kaaldawanna. Ita, kasta met ti inaldaw a maipadpadamag a paspasamak a pakaupayan dagiti mannakipagrikna a tattao.
Tinagibassit kadi ti Dios dagiti pakaseknan ni Habakuk? Saan. Nagimdeng kadagiti napasnek a saludsod ni Habakuk sana liniwliwa ken pinabileg. Pinatibker ni Jehova a Dios ti pammati ni Habakuk babaen ti panangikarina a pagpatinggaenna ti panagsagaba. Ti mangyeg namnama a mensahe ti Dios mapabilegnaka met a kas iti panangpabilegna ken Jayne ken iti pamiliana. Kadagiti sumaganad nga artikulo, masungbatanto dagitoy a saludsod: Kasanotayo a masigurado a talaga a maseknan ti Dios kadatayo? Anianto ti aramiden ti Dios a mamagpatingga iti panagsagaba, ken kaano?