Ti Kabibiag Dagiti Kristiano Idi Umuna a Siglo

“Managtrabaho iti Pagtaengan”

“Ita bayat a mapmapanda isu simrek iti maysa a purok. Ditoy maysa a babai a managan Marta ti immawat kenkuana kas sangaili iti balay. Daytoy a babai addaan met iti kabsat a babai a managan Maria, a, nupay kasta, nagtugaw iti sakaanan ti Apo ket nagim-imdeng iti saona. Ni Marta, iti sabali a bangir, nasinga iti panagasikaso iti adu nga annongen. Gapuna, immasideg ket kinunana: ‘Apo, saanmo kadi a pakaseknan a ti kabsatko binaybay-annak nga agmaymaysa a mangasikaso iti bambanag? Ngarud, ibagam kenkuana a tumulong kaniak.’ Kas sungbat kinuna kenkuana ti Apo: ‘Marta, Marta, maringgoran ken mariribukanka maipapan iti adu a banag. Nupay kasta, sumagmamano a banag ti kasapulan, wenno maysa laeng. Iti biangna, pinili ni Maria ti naimbag a bingay, ket saanto a maikkat kenkuana dayta.’”​—LUCAS 10:38-42.

NABATAD a nagaget a babai ni Marta. Gapuna, raraemen la ketdi ti sabsabali. Sigun iti tradision dagiti Judio idi umuna a siglo, ti pateg ti maysa a babai ket maibatay iti kinagagetna a mangaramid iti annongenna iti pagtaengan ken iti abilidadna nga agserbi iti pamiliana.

Naparegta met dagiti Kristiano idi umuna a siglo nga agbalin a “managtrabaho iti pagtaengan.” (Tito 2:5) Ngem addaanda iti kanayonan a pribilehio ken responsabilidad a mangisuro iti sabsabali maipapan iti Nakristianuan a pammatida. (Mateo 28:19, 20; Aramid 2:18) Ania ti dadduma kadagiti “adu nga annongen” ti Judio a babai idi umuna a siglo? Ken ania ti masursurotayo iti sasao ni Jesus maipapan ken Maria?

“Panangasikaso iti Adu nga Annongen” Nasapa a rugian ti Judio a babai ti trabahona a panagtagibalay, nalabit sakbay pay a sumingising ti init. (Proverbio 31:15) Kalpasan nga ilutuanna ti pamiliana iti simple a lugaw, mabalin nga itulodna dagiti annakna a lallaki iti eskuelaan ti sinagoga. Agtalinaed iti pagtaengan dagiti annakna a babbai tapno masursuruanda kadagiti paglaingan a kasapulan iti panagbalinda a responsable nga assawa.

Ti ina ken dagiti annakna a babbai mangrugida nga agtrabaho babaen ti panangaramidda kadagiti trabaho iti pagtaengan​—kargaanda iti lana dagiti lampara (1), sagadanda ti suelo (2), ken gatasanda ti kalding a taraken ti pamilia (3). Kalpasanna, aglutoda iti tinapay para iti dayta nga aldaw. Dagiti annak a babbai yakayakenda nga umuna ti binukel (4) sada gilingen babaen ti de mano a gilingan a bato (5). Alaen ti ina ti arina tapno danuman ken lebaduraanna. Gamasaenna ti arina (6) ket kalpasanna, bay-anna nga umalsa bayat nga aramidenna ti dadduma a trabaho. Kabayatanna, mabalin nga okupadonto dagiti annak a babbai a mangbatil iti kaal-alada a gatas ti kalding agingga a mapagbalinda a keso (7).

Iti umal-aldaw, mabalin a mapan makitienda dagiti agiina. Iti tiendaan, bayat ti panaggatang ti ina iti kasapulan iti dayta nga aldaw (8), masay-upna dagiti agduduma nga angot ti rekado ken mangngegna ti ariwawa dagiti dingnguen ken dagiti makitintinnawar a gumatgatang. Mabalin a karaman ti daing ken kappuros a nateng kadagiti lutuen ken idasarna. No Kristiano ti ina, mabalin a gundawayanna met nga iranud ti pammatina kadagiti makasaona iti tiendaan.​—Aramid 17:17.

Ti responsable nga ina usarenna dagiti gundaway a kas iti ipapan ken panaggapuda iti tiendaan tapno tulonganna dagiti annakna a mangadal ken mangipateg kadagiti Nainkasuratan a prinsipio. (Deuteronomio 6:6, 7) Mabalin met a pagsasaritaanda kadagiti annakna dagiti prinsipio a makatulong kadakuada nga agbalin a naekonomia no aggatangda.​—Proverbio 31:14, 18.

Ti panagsakdo ti sabali pay nga inaldaw a trabaho dagiti babbai ket ti panagsakdo (9). Agurnongda iti danum nga abasto ti pamilia, nalabit bayat a makisarsaritada kadagiti babbai a kagiddanda nga agsakdo. Inton makaawiden dagiti agiina, rugiandan ti agluto iti tinapay. Umuna, sukogenda ti masa tapno agbalin a daplat, sada ikabil iti napudoten nga urno (10) a kaaduanna a masarakan iti ruar. Bambantayanda ti lutlutuenda bayat nga agsasaritada ken saysay-upenda ti nabanglo nga ayamuom ti tinapay.

Kalpasanna, mapanda aglaba iti asideg a waig (11). Labaanda a nalaing dagiti kawes babaen ti turo (lye), sabon a sodium wenno potassium carbonate a naaramid iti dapo ti mula. Kalpasanna, gawgawan ken pespesenda dagiti kawes sada ibilag iti karuotan ken kabatbatuan.

Inton mayawiddan dagiti linabaanda, mapan dagiti agiina iti patag a tuktok ti balayda tapno sursianda (12) ti aniaman a napigis a kawes sakbay nga ikabilda dagita iti pagidulinan. Inton agangay, masuruan dagiti annak a babbai nga agburda ken agabel (13). Di agbayag, aglutodanto metten iti pangrabii (14). Gagangay ti kinamanagpadagus, isu a nakasagana ti pamilia a mangiranud iti simple a taraonda a tinapay, nateng, keso, daing, ken nalamiis a danum para kadagiti siasinoman a sangaili.

No rabiin, sakbay a maturog dagiti annak, sapsapuanda dagiti nadungiran a tumengda iti makapabang-ar a lana. Kalpasanna, babaen ti lawag ti lampara, mabalin a mangisalaysay dagiti nagannak iti estoria manipud iti Kasuratan sada agkararag a sangapamiliaan. Bayat ti kinaulimek iti nanumo a balay, ti asawa a lalaki naintiempuan nga iyebkasna ken baketna daytoy a pagaammo a sasao: “Ti makabael nga asawa a babai siasino ti makasarak? Ti pategna adayo nga ad-adda ngem iti pateg dagiti korales.”​—Proverbio 31:10.

Panangpili iti “Naimbag a Bingay” Awan duadua nga “adu ti annongen” dagiti responsable a babbai idi umuna a siglo, ket dayta ti namagbalin kadakuada nga okupado. (Lucas 10:40) Umasping iti dayta, okupado met ita dagiti babbai, nangruna dagiti inna. Nagbalin a nalaka nga aramiden ti dadduma a trabaho iti pagtaengan gapu kadagiti moderno nga imbension. Ngem gapu iti nagduduma a kasasaad, adu nga inna ti napilitan a mangged malaksid laeng iti panangaramidda iti trabahoda iti pagtaengan.

Iti laksid dagiti pakarigatanda, adu a Kristiano a babbai ita ti nangsurot iti ulidan ni Maria, a nadakamat iti rugrugi ti salaysay. Nakapatpateg kadakuada ti espiritualidad. (Mateo 5:3) Aywananda a naimbag ti pamiliada, kas iparparegta ti Kasuratan. (Proverbio 31:11-31) Ngem agbibiagda met a maitunos iti prinsipio a dinakamat ni Jesus ken Marta. Kas naespirituan a babai, impapuso la ketdi ni Marta dayta a naasi a palagip. Iti laksid ti adu a responsabilidad iti pagtaengan, dagiti Kristiano a babbai saanda a baybay-an dagiti gundaway a masursuroda ti maipapan iti Dios (15) wenno maisarita iti sabsabali ti maipapan iti pammatida. (Mateo 24:14; Hebreo 10:24, 25) Pinilida ngarud “ti naimbag a bingay.” (Lucas 10:42) Kas resulta, ipatpateg unay ida ti Dios, ni Kristo, ken dagiti pamiliada.​—Proverbio 18:22.