Umadanika iti Dios

Makarikna Kadi ti Dios iti Panagbabawi?

UK-UKOM 2:11-18

KAS imperpekto a tattao, adda dagiti gundaway nga agbabawitayo. Kas pagarigan, agbabawitayo kalpasan a maamiristayo a nakaaramidtayo iti biddut. Makapainteres ta kunaen ti Biblia a makarikna ni Jehova iti panagbabawi. ‘Ngem perpekto ti Dios,’ mabalin a kunaem. ‘Talaga a saan nga agbiddut!’ No kasta, iti ania nga anag a makarikna ti Dios iti panagbabawi? Ti sungbat dayta a saludsod tulongannatayo a mangtarus iti maysa a banag a nakaskasdaaw: Adda rikna ni Jehova, ket dagiti tignaytayo mabalin a makaapektar iti riknana. Usigem ti sasao a sagudayen ti Uk-ukom 2:11-18.

Salaysayen ti libro ti Biblia nga Uk-ukom ti nariribuk a panawen iti pakasaritaan ti Israel. Agnanaeden ti nasion ti Israel iti Canaan, ti daga nga inkari ti Dios ken Abraham. Iti sumaganad a sumagmamano a siglo, ti kabibiag ti Israel ket mabalin a magupgop iti uppat a maulit-ulit a paset: itatallikud, pannakairurumen, iyaararaw, ken pannakaispal.a

Itatallikud. Gapu iti impluensia dagiti Canaanita, dagiti Israelita “binaybay-anda ni Jehova” ket simmurotda kadagiti sabali a didios. Nangnangruna pay ketdin a “nagserbida ken Baal ken kadagiti ladawan ni Astoret.”b Panagapostata ti kasta nga itatallikud. Di ngarud pakasdaawan a ‘narurod ni Jehova,’ ti Dios a nangispal kadakuada manipud Egipto.​—Bersikulo 11-13; Uk-ukom 2:1

Pannakairurumen. Gapu iti nainkalintegan a pungtot ni Jehova, saannan a salakniban ti ilina a timmalikud kenkuana. Bay-anna a mayawat dagiti Israelita “iti ima dagiti kabusorda” a nangkamkam iti dagada.​—Bersikulo 14.

Iyaararaw. No marigrigatanen dagiti Israelita, pagbabawyanda ti kinadakesda sada agpakaasi iti tulong ti Dios. Dagiti ebkas a “panagasugda gapu kadagiti mangirurrurumen kadakuada” ipamatmatna ti iyaararawda. (Bersikulo 18) Ti iyaararawda iti Dios ti maysa kadagiti maulit-ulit a paset ti biagda. (Uk-ukom 3:9, 15; 4:3; 6:6, 7; 10:10) Ania ti inaramid ti Dios?

Pannakaispal. Imdengan ni Jehova ti panagasug ti Israel ket “agladingit” (wenno ‘agbabawi,’ Ti Biblia). Ti Hebreo a sao a naipatarus nga ‘agbabawi’ kaipapananna ti “panangbalbaliw iti panunot wenno panggep.” Kuna ti maysa a reperensia: “Gapu iti panagasugda, natignay ni Jehova a mangbalbaliw iti panggepna a mangdusa ket ispalenna ida.” Gapu iti asina, “imbangonan ida ni Jehova iti uk-ukom” a mangispal kadakuada.​—Bersikulo 18.

Nadlawmo kadi no ania ti nangtignay iti Dios nga agbabawi wenno mangbalbaliw iti panggepna? Maigapu dayta iti panagbalbaliw ti ilina. Panunotem daytoy: Ti maysa a naayat nga ama mabalin nga ikkatenna ti dadduma a pribilehio ti nagbiddut nga anakna kas panangdisiplina kenkuana. Ngem apaman a makitana a talaga nga agbabbabawi ti anakna, mabalin nga isublina dagiti pribilehio ti anakna.

Ania ti masursurotayo ken Jehova iti daytoy a salaysay? Nupay makapungtot kadagiti sipapakinakem nga agbasol, pakitaanna ida iti asi no talaga nga agbabawida. Makagutugot a panunoten a makaapektar iti rikna ti Dios ti aniaman nga aramidentayo. Apay a dimo ammuen no kasanom a ‘pagrag-oen ti puso’ ni Jehova? (Proverbio 27:11) Saanmonto a pulos pagbabawyan dayta.

[Footnotes]