Ti Tao a Nangbalbaliw iti Lubong
Binilbilionen a tattao ti nagbiag ken natay, ngem kas kadagiti tugot iti kadaratan, apagbiit a napukaw ti pakalaglagipan kadakuada. Nupay kasta, adda sumagmamano a tattao a dakkel ti nagapuananda iti intero a pakasaritaan—ken nalabit iti inaldaw a panagbiagmo.
KAS pagarigan, nagriingka iti agsapa ken nagsaganaka a mapan iti trabahom. Nagsilawka bayat ti panagsaganam. Nangalaka iti libro wenno magasin a basaem iti bus. Nalagipmo a tomaren ti naireseta nga antibiotiko a panglaban iti impeksion. No kasta, mangrugrugi pay laeng ti aldawmo ngem nagunggonaankan iti gapuanan ti sumagmamano a nalatak a tattao.
Michael Faraday Naipasngay idi 1791. Ingles a pisiko a nangimbento iti de koriente a motor ken ti dynamo. Nakatulong dagiti naimbentona tapno ad-adda a mapagnumaran dagiti tattao ti elektrisidad.
Ts’ai Lun Ti opisial iti imperio ti China a napadayawan gapu iti nadiskobrena a proseso ti panagaramid iti papel idi agarup 105 K.P. Nagresulta dayta iti pannakapataud ti nakaad-adu a papel.
Johannes Gutenberg Ti Aleman nga imbentor a nangaramid iti damo a movable type a pagimprentaan idi agarup 1450. Gapu iti dayta, saan unayen a nagastos ti panagimprenta, ket pimmartak ti pannakaisaknap ti nagduduma nga impormasion.
Alexander Fleming Managsirarak a taga Scotland a nakadiskobre idi 1928 iti maysa nga antibiotiko nga inawaganna iti penicillin. Nasaknap a maus-usar ita dagiti antibiotiko a pangagas kadagiti impeksion a gapuanan ti bakteria.
Gapu kadagiti nadiskobre ken naimbento ti sumagmamano a tattao, binilbilion ti nagunggonaan. Dadduma ti mangtagtagiragsak pay ketdi iti nasaysayaat a salun-at.
Nupay kasta, adda maysa a tao a naidumduma iti isuamin. Isu ket saan a nalatak gapu iti aniaman a nasientipikuan a takuat wenno dakkel a nagapuanan iti tay-ak ti medisina. Imbes ketdi, daytoy a nanumo a tao a pimmusay dandani 2,000 a tawen ti napalabasen, nangibati iti nabileg a mensahe a gubuayan ti namnama ken liwliwa. No maibatay iti kabileg ti mensahena iti biag dagiti tattao iti sangalubongan, adu ti umanamong nga isu a talaga ti tao a nangbalbaliw iti lubong.
Dayta a tao isu ni Jesu-Kristo. Ania a mensahe ti inkasabana? Ken ania ti mabalin nga epekto dayta a mensahe iti biagmo?