Surat Manipud South Africa

“Apay a Nagsardengda Ditoy?”

“DELIKADO A LUGAR​—AGRARAIRA TI PANAGTAKAW KEN PROSTITUSION,” imballaag ti karatula iti igid ti akikid a kalsada iti away. Impaigidmi ti luganmi tapno makikadua iti dadduma pay a lugan nga agur-uray iti sirok ti dakkel a karatula a mangipatpatuldo iti dalan nga agturong iti naluho a pagaliwaksayan ken pagsugalan. Linabsandakami dagiti agkakangina a lugan, ket nadlawmi a masmasdaaw dagiti nakalugan bayat a timmaliawda kadakami. Masmasdaawda, a kasla ibagbagada: ‘Apay a nagsardengda ditoy?’

Rimmuarkami iti luganmi tapno makikadua iti grupo dagiti nakadisente a kakaduami nga aglinlinong iti dakkel a karatula. Ti grupomi ket buklen dagiti indibidual nga agduduma ti puli ken kulturada. Manmano a makita ti kasta a grupo iti South Africa. Nagdaliasatkami a napan iti dayta a lugar nga agarup 100 a kilometro iti amianan a laud ti Johannesburg, a mangnamnama a mairanudmi dagiti kinapudno iti Biblia kadagiti pumurok sadiay.

Nagtataripnongkami biit iti igid ti kalsada tapno pagsasaritaanmi ti maysa a teksto ti Biblia ken iplanomi ti panagbalaybalaymi. Nagkararagkami sakbay a naglugankami manen. Manipud iti kapatagan, nakitami iti adayo ti nakuso a grupo dagiti balbalay ken abong-abong. Kasla nagbabassit dagita gapu kadagiti nangangato ken nangisit a muntuon manipud kadagiti pagminasan ti platinum. Nakapangpanglaw dagiti agindeg nupay nakabakbaknang iti mineral dayta a lugar.

Iti dayta nga agsapa, rinugianmi ti nagbalaybalay a kaduami ken baketko ti agassawa a taga-Alemania. Agarup kakatlo kadagiti agindeg ti awanan trabaho, isu a simple laeng ti balbalay iti dayta a lugar. Adu kadagita ti abong-abong a naatepan iti aglatlati a sim, ket dagiti narukop nga adigida napagkakapet babaen kadagiti dadakkel a lansa ken naipalok kadagiti napitpit a tansan ti beer tapno di lumsot ti lansa.

No umasidegkami iti ruangan ti kada balay, kumablaawkami, ket masansan a babai ti makasaomi iti balay. Magagaranda a dumngeg iti mensahemi, ken padayawandakami kas bisitada. No umal-aldaw ket mainaran ti sim iti kasta unay, agbalin a kasla urno ti balay. Masansan a maibaon dagiti ubbing nga agiruar kadagiti tugaw tapno adda pagtugawanmi iti sirok ti kayo.

Aguummong ti pamilia ken agtugawda kadagiti narusangger a tugaw wenno naipakleb a kahon. Dagiti agaayam nga ubbing naayabanda met nga umimdeng nga iggemda dagiti inimbentoda nga ay-ayamda. Nangibasakami iti sumagmamano a teksto iti Biblia ken inawismi dagiti ubbing a mangbasa kadagiti publikasion a naibatay iti Biblia. Dandani amin a makasaomi ket maragsakan a mangawat iti literatura, ken adu ti nagkiddaw a sarungkaranmi manen ida.

Idi agmatuon, nangaldawkami biit iti sandwich sa imminumkami iti nalamiis. Kalpasanna, sinarungkaranmi dagiti nakasaomi kadagiti immuna a gundaway. Umuna koma a sarungkaranmi ni Jimmy, maysa nga imigrante manipud Malawi ken agtartrabaho iti maysa kadagiti pagminasan ti platinum. Sumagmamanon a bulan a sarsarungkaranmi ni Jimmy. Kanayon a maragsakan no makitanakami, ken masansan a napaut ti saritaanmi maipapan iti Biblia. Maysa a Setswana ti asawa ni Jimmy ket adda dua a makaparagsak nga annakda. Awan ni Jimmy iti pagtaenganna iti naudi nga isasarungkarmi, isu a magagarankami a mangkomusta kenkuana.

Idi makaasidegkamin iti balay ni Jimmy, dagus a nadlawmi nga adda problema. Nasameken ti nakadaldalus idi a hardinna, nagangon dagiti maisna, ken awanen dagiti manok nga agkarkaraykay iti arubayanna. Nakandaduan ken nakawaran ti ruangan ti balay. Immasideg ti maysa a kaarrubana ket dinamagmi no ayan ni Jimmy. Naklaatkami idi imbagana a natayen ni Jimmy, ket nagawiden ti asawa ken annak ni Jimmy iti pamilia ni baketna.

Maibilang a kinaawan panagraem ti agpalutpot, ngem nagimtuodkami. “Nagsakit ni Jimmy, kalpasanna natay,” imbaga ti babai kadakami. “Adu ti sakit kadagitoy nga aldaw ket adu ti matmatay gapu iti dayta.” Nupay saan a nangdakamat iti espesipiko a sakit, ta manmano nga aramidenda dayta, ti umad-adu a kabbaro a tanem iti sementerio ti nabatad a mangpaneknek a pudno ti imbaga ti babai. Apagbiit nga insalaysaymi kenkuana ti namnama a panagungar, ket kalpasanna, napankami iti sumaganad a sarungkaranmi.

Napankami iti sabali a purok iti maudi nga intar dagiti balbalay nga ayan ti nangato a muntuon a nagtaud iti pagminasan. Nagsikkokami iti pungto ti kalsada. Nakabatbatad ti pannakaisurat dagitoy a sasao iti dakkel a bato nga adda iti hardin: “Adu a tiempo ti masaysayang ti maysa a tao a di makapangngeddeng.” Ni David,a a nangisurat iti dayta, inruarna ti ulona manipud iti tartarimaanenna a makina ti daan a luganna a Volkswagen. Nupay masisirap iti lawag ti lumlumnek nga init a namaggilap iti makinsango a ngipenna a nakalupkopan iti balitok, kasta unay ti isemna idi nabigbignakami. Pinunasanna dagiti imana ken kinablaawannakami.

“Komustakayo gagayyem! Naggapuanyo?” kinunana. Maragsakankami a makakita manen ken David. Nagpadispensar ta dinakami makasao iti mabayag ita ta adda trabahonan sipud idi naudi nga isasarungkarmi ket masapul a mapanen iti pagminasan. Kanayon a nakaisem ni David bayat ti naragsak a panagsasaritami. “Nagbaliw ti biagko sipud idi damo a panagsaritatayo!” kinunana a maragragsakan. “Ammoyo, diak la ammon no ania ti nagbambanagak no saankayo a dimteng.”

Pinanawanmi ni David a kasta unay ti ragsakmi. Bayat ti ilelennek ti init, nagbiahekamin a nagawid. Iti maudi a gundaway, timmaliawkami iti kapatagan ngem saanmi unayen a makita dagiti kabalbalayan gapu iti natapok nga angin a main-inaran. Pampanunotenmi no kasano a maidanon ti naimbag a damag iti amin nga agindeg ditoy. Pakaseknanmi unay ti anag ti sasao ni Jesus: “Adu ti anien, ngem bassit ti agani.”​—Lucas 10:2, Ti Baro a Naimbag a Damag Biblia.

[Footnote]

[Picture Credit Line iti panid 17]

Iti naasi a pammalubos ti South African Post Office