“Dika Agbuteng. Siak Tulongankanto”

PINAKDAARAN ni Jesus dagiti pasurotna: “Ti Diablo agtultuloyto a mangipisok iti sumagmamano kadakayo iti pagbaludan tapno naan-anay a masubokkayo.” Ngem sakbay dayta a pakdaar, kinuna ni Jesus: “Dika pagamkan ti bambanag a dandanimon sagabaen.” Gapu ta agtultuloy nga us-usaren ni Satanas ti pangta ti pannakaibalud tapno mapasardengna ti pannakaikasaba ti Pagarian, posible a mapasaran dagiti pudno a Kristiano ti panangidadanes ti gobierno. (Apoc. 2:10; 12:17) Ania ngarud ti makatulong tapno nakasaganatayo kadagiti gakat ni Satanas ken ‘di agamak,’ kas imbalakad ni Jesus?

Siempre, kaaduan kadatayo ti nakariknan iti buteng. Kaskasdi, ipasigurado ti Sao ti Dios a maparmektayo ti buteng babaen ti tulong ni Jehova. Kasano? Ti maysa a pamay-an a tulongannatayo ni Jehova a nakasagana a mangsango iti ibubusor ket ti panangibutaktakna kadagiti taktika nga us-usaren ni Satanas ken dagiti ahentena. (2 Cor. 2:11) Kas panangyilustrar iti dayta, usigentayo ti maysa a pasamak idi tiempo ti Biblia. Kitaentayo met ti dadduma a moderno a kapadasan dagiti matalek a kapammatiantayo a ‘nakapagtakder a sititibker maibusor kadagiti pangallilaw a pamuspusan ti Diablo.’​—Efe. 6:11-13.

Naipasango iti Dakes nga Agturay ti Maysa nga Ari nga Agdaydayaw iti Dios

Idi maikawalo a siglo K.K.P., adu a nasion ti agsasaruno a pinarmek ti dakes nga ari ti Asiria a ni Senaquerib. Gapu iti dayta, sikokompiansa nga inturongna ti atensionna iti nasion ni Jehova ken iti kabesera a siudad, ti Jerusalem, nga iturturayan ti managbuteng iti Dios a ni Ari Ezekias. (2 Ar. 18:1-3, 13) Awan duadua a ginundawayan ni Satanas dayta a situasion, a sinugsoganna ni Senaquerib a mangitungpal kadagiti planona tapno matalipupos ti pudno a panagdayaw ditoy daga.​—Gen. 3:15.

Nangibaon ni Senaquerib iti grupo a mapan idiay Jerusalem tapno pasukuenda dayta a siudad. Karaman iti dayta a grupo ni Rabsaque, a nagserbi kas kangrunaan a pannakangiwat ti ari.a (2 Ar. 18:17) Panggep ni Rabsaque a pakapuyen ti pakinakem dagiti Judio tapno saanen a gandaten dagitoy ti lumaban ket sumukoda lattan. Ania a taktika ti inusar ni Rabsaque tapno maimulana ti panagbuteng iti puso dagiti Judio?

Matalek iti Laksid ti Pannakaiputong

Kinuna ni Rabsaque kadagiti pannakabagi ni Ezekias: “Daytoy ti kinuna ti naindaklan nga ari, ti ari ti Asiria: ‘Ania daytoy panagtalek a nagtalkam? . . . Adtoy! inkabilmo ti panagtalekmo iti saranay daytoy naparpar a runo, iti Egipto, a, no ti maysa a tao isadagna koma ti bagina iti dayta, sigurado a tumudok iti dakulapna ket salputenna dayta.’” (2 Ar. 18:19, 21) Di umiso ti akusasion ni Rabsaque gapu ta saan a nakialiansa ni Ezekias iti Egipto. Kaskasdi, ipamatmat ti akusasion no ania ti kayat ni Rabsaque a panunoten dagiti Judio: ‘Awan ti tumulong kadakayo.’

Iti moderno a panawen, dagiti bumusbusor iti pudno a panagdayaw us-usarenda met ti pangta ti pannakaiputong tapno imulada ti panagbuteng iti puso dagiti pudno a Kristiano. Maysa a kabsat a babai a naibalud gapu iti pammatina ken naisina kadagiti kapammatianna iti sumagmamano a tawen, insalaysayna no ania ti nakatulong kenkuana a mangparmek iti buteng. Kinunana: “Nakatulong kaniak ti panagkararag tapno ad-adda a sumingedak ken Jehova . . . Nalagipko ti pammatalged ti Isaias 66:2, a kumitkita ti Dios ‘iti daydiay naparigatan ken sibababawi ti espirituna.’ Dayta ti nangted kaniak iti bileg ken dakkel a liwliwa.” Kinuna met ti maysa a kabsat a lalaki nga adu a tawen a naipisok iti naiputputong a pagbaludan: “Nabigbigko a posible nga agbalin a kasla uniberso ti bassit a selda no ti maysa ket addaan iti nasinged a relasion iti Dios.” Wen, ti nasinged a relasion ken Jehova ti nangted kadagita a dua a Kristiano iti bileg a mangdaer iti pannakaiputputong. (Sal. 9:9, 10) Dagiti manangidadanes kabaelanda nga isina dagiti Saksi manipud kadagiti pamilia, gagayyem, ken kapammatianda. Nupay kasta, ammo dagiti naibalud a Saksi nga awan a pulos ti makaisina kadakuada manipud ken Jehova.​—Roma 8:35-39.

Gapuna, anian a nagpateg nga aprobetsarentayo ti tunggal gundaway a mangpabileg iti relasiontayo ken Jehova! (Sant. 4:8) Kanayon koma nga isaludsodtayo iti bagitayo: ‘Kombinsidoak kadi nga adda a talaga ni Jehova? Ikabkabilangak kadi dagiti sasaona no mangaramidak kadagiti pangngeddeng, bassit man wenno dakkel?’ (Luc. 16:10) No ikagumaantayo a taginayonen ti nasinged a relasiontayo iti Dios, awan ti panggapuantayo nga agbuteng. No maipapan kadagiti naparigatan a Judio, kinuna ni propeta Jeremias: “Inawagak ti naganmo, O Jehova, manipud iti kaadalman a kita ti abut . . . Immasidegka idi aldaw a panangaw-awagko kenka. Kinunam: ‘Dika agbuteng.’”​—Un. 3:55-57.

Saan nga Agballigi ti Panangimula iti Panagduadua

Nagusar ni Rabsaque iti makaallilaw a panagrasrason tapno maimulana ti panagduadua. Kinunana: “Saan kadi [a ni Jehova] daydiay a dagiti nangato a dissona ken dagiti altarna inikkat ni Ezekias? . . . Kinuna kaniak ni Jehova a mismo, ‘Sumang-atka a maibusor iti daytoy a daga, ket masapul a dadaelem.’” (2 Ar. 18:22, 25) Iti kasta, ibagbaga ni Rabsaque a saan a salakniban ni Jehova ti ilina gapu ta saan a naay-ayo kadakuada. Ngem saan nga agpayso dayta. Naay-ayo ni Jehova ken ni Ezekias ken kadagiti Judio a nagsubli iti pudno a panagdayaw.​—2 Ar. 18:3-7.

Dagiti manangidadanes ita mangiranudda met kadagiti umiso nga impormasion a nairanta tapno panunoten ti maysa a mabalinna a tuladen ti ar-aramiden ti dadduma. Kalpasanna, sisisikap a laokanda dagita iti kinaulbod tapno makaimulada iti panagduadua. Kas pagarigan, adda dagiti gundaway a naibaga kadagiti naibalud a kakabsat a timmalikuden iti pammati ti mangimatmaton a kabsat iti pagilianda, isu nga awan dakesna no tuladenda met ti inaramidna. Ngem dagiti kasta a panagrasrason ket saan a nagballigi a mangpataud iti panagduadua kadagiti masirib a Kristiano.

Usigentayo ti napasamak iti maysa a kabsat a babai idi Gubat Sangalubongan II. Bayat ti pannakaibaludna, impakitada kenkuana ti maysa a dokumento a mamagparang a tinallikudan ti maysa a Saksi ti pammatina. Insaludsod ti imbestigador no isu ket agtalek iti dayta a Saksi a mangidadaulo kadakuada. Insungbat ti kabsat: “[Isu] ket maysa laeng nga imperpekto a tao.” Sa innayonna nga agingga nga an-annurotenna dagiti prinsipio ti Biblia, dayta a Saksi ket us-usaren ti Dios. “Ngem gapu ta maisalungasing iti Biblia ti insuratna, saankon nga ibilang a kabsat.” Dayta a matalek a kabsat a babai ti nainsiriban a nangipangag iti balakad ti Biblia: “Dikay ikabil ti panagtalekyo kadagiti natan-ok, wenno uray iti anak ti naindagaan a tao, a kenkuana awan pannakaisalakan.”​—Sal. 146:3.

Ti pannakaadda iti umiso a pannakaammo iti Sao ti Dios ken panangyaplikar iti balakadna tulongannatayo a mangilaksid iti nasikap a panagrasrason a mangpakapuy iti determinasiontayo nga agibtur. (Efe. 4:13, 14; Heb. 6:19) Gapuna, tapno maisaganatayo ti bagitayo nga agpanunot a silalawag iti sidong ti pakarigatan, masapul nga ipangpangrunatayo ti inaldaw a panagbasa iti Biblia ken personal a panagadal. (Heb. 4:12) Wen, itan ti tiempo a paunegentayo ti pannakaammotayo ken pabilgentayo ti pammatitayo. Maysa a kabsat nga adu a tawen a naipisok iti naiputputong a pagbaludan, kinunana: “Iparegtak iti tunggal maysa nga aprobetsarentayo ti amin a naespirituan a taraon a maipapaay kadatayo yantangay ditay ammo no kaanonto a kasapulantayo dagita.” Kinapudnona, no adalentayo a naimbag ti Sao ti Dios ken dagiti publikasion nga ipapaay ita ti klase adipen, ti nasantuan nga espiritu ‘ipalagipnanto’ dagiti naadaltayo no maipasangotayo kadagiti narigat a pakasuotan.​—Juan 14:26.

Masalakniban Manipud Pammutbuteng

Pinadas ni Rabsaque a butbutngen dagiti Judio. “Makipinnustaka, pangngaasim, iti apok nga ari ti Asiria,” kinunana, “ket bay-am a mangtedak kenka iti dua ribu a kabalio tapno kitaek no kabalinam, iti biangmo, ti mangikabil kadagiti sumasakay kadakuada. Kasano, ngarud, a mapagtallikudmo ti rupa ti maysa a gobernador dagiti kabassitan nga adipen ni apok?” (2 Ar. 18:23, 24) Iti panangmatmat ti tao, imposible a maliklikan ni Ezekias ken dagiti iturayanna ti panangparmek ti nabileg a buyot ti Asiria.

Agparang a nakabilbileg met dagiti manangidadanes ita, nangruna no supsuportaran ida ti gobierno. Kasta idi dagiti manangidadanes a Nazi bayat ti Gubat Sangalubongan II. Pinadasda a butbutngen ti adu nga adipen ti Dios. Maysa a kabsat nga adu a tawen a naibalud ti nangdeskribir iti panangbutbutengda idi kenkuana. Naminsan, insaludsod kenkuana ti opisial: “Nakitam kadi no kasano a napaltogan ti kapammatiam? Ania ti nasursurom iti dayta?” Kastoy ti sungbatna: “Maysaak a saksi ni Jehova ket agtalinaedak a kasta.” “Sika ngarud ti sumaruno a mapaltogan,” impangta ti opisial. Ngem natibker ti determinasion ti kabsattayo isu a nagsardeng a mangbutbuteng ti opisial. Ania ti timmulong iti kabsat a mangsango iti kasta a pamutbuteng? Insungbatna: “Nagtalekak iti nagan ni Jehova.”​—Prov. 18:10.

Babaen ti naan-anay a pammatitayo ken Jehova, addaantayo iti dakkel a kalasag a mangsalaknib kadatayo maibusor iti amin a pamuspusan ni Satanas tapno madangrannatayo iti naespirituan. (Efe. 6:16) Gapuna, pagsayaatantayo no ikararagtayo ken Jehova a tulongannatayo a mangpabileg iti pammatitayo. (Luc. 17:5) Masapul met nga aprobetsarentayo dagiti makapabileg-pammati nga urnos nga ipapaay ti klase matalek nga adipen. No maipasangotayo kadagiti pangta, mapabilegtayo no lagipentayo ti pammatalged ni Jehova ken ni propeta Ezequiel, a nangidanon iti mensahe kadagiti nasubeg a tattao. Kinuna kenkuana ni Jehova: “Pinagbalinko ta rupam nga apag-isu a katangtangken dagiti rupada ken ta mugingmo nga apag-isu a katangtangken dagiti mugingda. Pinagbalinko ti mugingmo a kas iti diamante, a natangtangken ngem iti pamulinawen.” (Ezeq. 3:8, 9) No kasapulan, kabaelannatayo ni Jehova a patibkeren a kas iti diamante, kas inaramidna idi ken Ezequiel.

Panangsaranget Kadagiti Sulisog

Natakuatan dagiti bumusbusor a no saan nga agballigi ti aniaman a pamuspusanda, mabalinda nga usaren dagiti makaallukoy a gunggona tapno dadaelenda ti kinatarnaw ti maysa. Inusar idi ni Rabsaque dayta a taktika. Kinunana kadagiti taga-Jerusalem: “Daytoy ti kinuna ti ari ti Asiria: ‘Sumukokayo kaniak, ket rummuarkayo nga agturong kaniak . . . agingga nga umayak ket pudno nga ipankayo iti maysa a daga a kas iti bukodyo a daga, maysa a daga ti bukbukel ken baro nga arak, maysa a daga ti tinapay ken dagiti kaubasan, maysa a daga dagiti kayo nga olibo-a-lana ken diro; ket agtultuloykayo nga agbiag tapno saankayo a matay.’” (2 Ar. 18:31, 32) Makaallukoy la ketdi ti kari a pannangan iti kalutluto a tinapay ken iyiinum iti baro nga arak para kadagiti napupok iti siudad!

Umasping iti dayta ti naitukon iti maysa a naibalud a misionero tapno kumapuy ti determinasionna. Inkarida kenkuana nga ipanda iti maysa a “komportable a balay” nga adda iti “napintas a hardin.” Agnaed sadiay iti innem a bulan tapno makapagpampanunot. Ngem nagtalinaed ti kabsat a naridam iti naespirituan ken dina inkompromiso dagiti Nakristianuan a prinsipio. Ania ti nakatulong kenkuana? Inlawlawagna idi agangay: “Kanayon a pampanunotek ti maipapan iti Pagarian kas pudno a namnama. . . . Gapu iti makapabileg a pannakaammo maipapan iti Pagarian ti Dios ken naan-anay a panagtalek iti dayta, saandak a naallukoy a makikompromiso.”

Talaga kadi a patiem a pudno ti Pagarian ti Dios? Ni patriarka nga Abraham, apostol Pablo, ken ni Jesus a mismo naibturanda dagiti narigat a pakasuotan gapu ta minatmatanda a pudno ti Pagarian. (Fil. 3:13, 14; Heb. 11:8-10; 12:2) No itultuloytayo nga ipangpangruna ti Pagarian ken silalagiptayo kadagiti manayon a bendision, mapagballigiantayo ti sulisog a mangawat kadagiti tukon a temporario a mangpabang-ar kadatayo manipud kadagiti pakasuotan.​—2 Cor. 4:16-18.

Dinatay Baybay-an ni Jehova

Iti laksid ti panangikagumaan ni Rabsaque a mangbutbuteng kadagiti Judio, naan-anay a nagtalek ken Jehova da Ezekias ken dagiti iturayanna. (2 Ar. 19:15, 19; Isa. 37:5-7) Sinungbatan ni Jehova dagiti kararagda babaen ti panangibaonna iti anghel a nangpapatay iti 185,000 a mannakigubat iti kampo dagiti Asirio iti maysa laeng a rabii. Kabigatanna, naibabain a nagsubli ni Senaquerib iti kabeserada, ti Nineve, gapu ta bassit laengen ti nabati a soldadona.​—2 Ar. 19:35, 36.

Nalawag a saan a binaybay-an ni Jehova dagidiay nagtalek kenkuana. Ti kapadasan dagiti kakabsattayo ita a nagtalinaed a matalek iti sidong dagiti pakasuotan ket pammaneknek a saan a nagbaliw ni Jehova. Gapuna, adda naimbag a rason nga impasigurado kadatayo ti nailangitan nga Amatayo: “Siak, ni Jehova a Diosmo, ig-iggamak ti makannawan nga imam, Daydiay agkunkuna kenka, ‘Dika agbuteng. Siak tulongankanto.’”​—Isa. 41:13.

[Footnote]

[Blurb iti panid 13]

Nasurok a 30 a daras nga agparang iti Biblia daytoy a pammatalged ni Jehova kadagiti adipenna: “Dika agbuteng”

[Ladawan iti panid 12]

Kasano a dagiti taktika ni Rabsaque ket umasping kadagiti us-usaren dagiti bumusbusor iti ili ti Dios ita?

[Dagiti Ladawan iti panid 15]

Ti nasinged a relasiontayo ken Jehova tulongannatayo nga agtalinaed a natarnaw iti sidong ti pakasuotan