Tulonganyo Dagiti Agtutubo nga Agbalin a Pamiliar iti Organisasion ni Jehova
KAYAT dagiti ubbing ti makasursuro. Panunotenyo dagiti mabalin nga insaludsod dagiti ubbing nga Israelita idi rabii ti umuna a Paskua idiay Egipto: ‘Apay a masapul a matay ti kordero?’ ‘Apay a mangiwarwarsi ni Tatang iti dara iti ruangan?’ ‘Papanantayo?’ Inkabilangan ni Jehova dagiti kasta a saludsod kas ipakita dagiti bilinna kadagiti Israelita nga amma. Kinunana kadakuada mainaig kadagiti masanguanan a panangrambakda iti Paskua: “Inton kunaen kadakayo ti annakyo, ‘Ania ti kaipapanan kadakayo daytoy a panagserbi?’ iti kasta masapul a kunaenyo, ‘Dayta ti sakripisio ti paskua ken Jehova, a nanglabas kadagiti balay ti annak ti Israel idiay Egipto idi sinaplitna dagiti Egipcio, ngem inispalna dagiti balaymi.’” (Ex. 12:24-27) Idi agangay, pinalagipan ni Jehova dagiti nagannak nga Israelita maipapan iti kinapateg ti panangsungbat kadagiti saludsod dagiti annakda mainaig kadagiti ‘alagaden ken hudisial a pangngeddeng’ nga imbilin ni Jehova.—Deut. 6:20-25.
Nalawag a kayat ni Jehova a maipaayan dagiti ubbing kadagiti makapnek a sungbat iti salsaludsodda maipapan iti pudno a panagdayaw—sungbat a mangtignay kadakuada a mangayat ken Jehova kas ti Dios ken Manangisalakanda. Kasta met la ti kayat ni Jehova a mapasamak kadagiti agtutubo ita. Ti maysa a pamay-an a maitukit dagiti nagannak iti puso dagiti annakda ti pudno a panagayat iti Dios ken iti ilina ket babaen ti panangtulongda kadakuada nga agbalin a pamiliar iti organisasion ni Jehova ken mangbigbig no kasanoda a magunggonaan kadagiti urnos dayta. Usigentayo ngarud ti dadduma a pamay-an no kasano a maisuro kadagiti agtutubo ti ad-adu pay a detalye mainaig iti organisasion ti Dios.
Ti Lokal a Kongregasion
Dagiti annakyo masapul a maam-ammoda ti kongregasion a nakaitimpuyogan ti pamiliayo. Tapno maaramid dayta, masapul nga ikuyogyo ida kadagiti amin a Nakristianuan a gimong. Iti kasta, masurotyo ti padron nga impasdek ni Jehova para kadagiti Israelita. Imbilinna kadakuada: “Ummongem dagiti umili, ti lallaki ken ti babbai ken dagidiay ubbing . . . , tapno makapagimdengda ken tapno makasursuroda, yantangay masapul nga agbutengda ken Jehova a Diosyo ken annadanda nga itungpal ti amin a sasao daytoy a linteg. Ket ti annakda a saan a nakaammo rebbeng nga umimdengda, ket masapul a masursuroda ti agbuteng ken Jehova a Diosyo.”—Deut. 31:12, 13.
Mabalin a masursuro dagiti annak ti maipapan iti Sao ni Jehova sipud pay kinamaladagada. Kinuna ni apostol Pablo maipapan ken Timoteo: “Manipud kinamaladaga naammuam ti nasantuan a sursurat.” (2 Tim. 3:15) Kadagiti gimong iti Kingdom Hall, makasursuro uray dagiti ubbing kadagiti impormasion a maidatag ken agbalinda a pamiliar kadagiti kanta mainaig iti Pagarian. Masursuroda sadiay nga usaren ken ipateg ti Biblia ken dagiti naibatay-Biblia a literatura. Kanayonanna, bayat dagiti gimong mariknada nga agraraira ti galad a pakabigbigan dagiti pudno a pasurot ni Kristo—ti pudno nga ayat. Kinuna ni Jesus: “Mangtedak kadakayo iti baro a bilin, nga ayatenyo ti maysa ken maysa; kas iti panagayatko kadakayo, kasta met nga ayatenyo ti maysa ken maysa. Babaen iti daytoy maammuanto ti isuamin a dakayo dagiti adalak, no addaankayo iti ayat iti maysa ken maysa.” (Juan 13:34, 35) Ti nasged nga ayat ken pudno a kinatalged a nabatad idiay Kingdom Hall ket makaay-ayo kadagiti ubbing ken tumulong kadakuada a mamagbalin a paset ti biagda ti pannakigimong.
No iyugaliyo ti nasapa a sumangpet iti Kingdom Hall ken agtalinaed pay kalpasan dagiti gimong, adda gundaway dagiti annakyo a makilangen tapno makabirokda iti gagayyem. Imbes a bay-anyo a dagiti laeng padada nga ubbing ti kalangenda, apay a diyo iyam-ammo ida kadagiti kakabsat a nagduduma ti edadda? Adu ti masursuroda manipud kadagiti kapadasan ken sirib dagiti natataengan no makilangenda kadakuada. No kasano a ti nagkauna nga adipen ti Dios a ni Zacarias, a “manangisuro iti panagbuteng iti pudno a Dios,” ket nasayaat ti impluensiana ken Ozias, ti agtutubo nga ari ti Juda, dagidiay met matalek nga agserserbi ita ken Jehova iti adun a tawen makaipaayda iti nasayaat nga impluensia kadagiti agtutubo. (2 Cron. 26:1, 4, 5) Bayat ti kaaddayo iti Kingdom Hall, mabalinyo met nga ilawlawag kadagiti annakyo no ania ti usar ti libraria, information board, ken dadduma pay.
Ti Sangalubongan nga Organisasion
Masapul a maawatan dagiti annak a ti lokal a kongregasion ket paset ti sangalubongan nga organisasion a buklen ti nasurok a 100,000 a kongregasion. Ilawlawagyo ti nagduduma a paset daytoy nga organisasion, no kasano ti panagandarna, ken no ania ti maitulong dagiti ubbing iti trabaho dayta. Ibagayo kadakuada no apay a segseggaanyo dagiti asamblea sirkito, kombension distrito, ken ti panagbisita ti mangaywan iti sirkito.—Kitaenyo ti kahon a “Dagiti Topiko a Mapagsasaritaan Bayat ti Panagdaydayaw ti Pamilia,” iti panid 28.
Agingga a posible, awisenyo iti pagtaenganyo dagiti agdaldaliasat a manangaywan, misionero, Bethelite, ken dadduma pay nga amin-tiempo a ministro para iti maysa a pannangan. Diyo koma panunoten nga awan ti panawenda para kadagiti agtutubo. Ikagkagumaan dagitoy a tuladen ni Jesus, a kanayon a sidadaan a nakilangen ken nakisarita kadagiti ubbing. (Mar. 10:13-16) No mangngegda dagiti kapadasan dagitoy nga adipen ni Jehova ken makitada ti ragsak nga itden ti sagrado a panagserbida, mabalin a matignay dagiti annakyo a mangragpat iti amin-tiempo a panagministro.
Ania pay ti maaramidanyo kas pamilia tapno matulonganyo dagiti annakyo nga agbalin nga ad-adda a pamiliar iti organisasion ni Jehova? Adtoy ti sumagmamano a singasing: Aramidenyo a kalat ti pamiliayo ti panangusig iti libro a Dagiti Saksi ni Jehova—Manangiwaragawag iti Pagarian ti Dios. Itampokyo ti debosion, kinapakumbaba, ken kinasungdo nga imparangarang dagiti adipen ni Jehova. Ipakitayo no kasano nga inusar ida ni Jehova a mangisaknap iti naimbag a damag iti intero a daga. Usarenyo dagiti video nga inaramid ti organisasion ni Jehova a mangisuro kadagiti napateg a leksion manipud iti napalabas ken iti agdama. No kabaelanyo, bisitaenyo ti pagtaengan a Bethel iti pagilianyo wenno nalabit kadagiti sabali a pagilian. Dagita nga ibibisita iyukuokna kadagiti annakyo no kasano a maor-organisar ti naindagaan a paset ti organisasion ni Jehova nga imatmatonan ti klase matalek nga adipen tapno mangipaay iti naespirituan a taraon ken panangiwanwan kadagiti kakabsat iti intero a lubong, kas met la idi umuna a siglo K.P.—Mat. 24:45-47; Ara. 15:22-31.
Panangibagay Kadagiti Impormasion iti Tunggal Anak
Bayat nga isursuroyo dagiti annakyo, laglagipenyo no kasano nga insuro ni Jesus dagiti apostolna. Kinunana kadakuada iti naminsan: “Adu pay a banag ti sawek kadakayo, ngem saanyo a kabaelan nga awiten ida iti agdama.” (Juan 16:12) Ni Jesus dina ginabsuonan dagiti adalanna iti adu nga impormasion. Imbes ketdi, in-inut nga insurona kadakuada dagiti agkakapateg a kinapudno tapno maawatanda a naimbag. Iti umasping a pamay-an, diyo koma gabsuonan iti impormasion dagiti annakyo. No saggabassit ngem regular nga isursuroyo ida maipapan iti organisasion, mataginayonyo ti interesda ken agbalin a makaparagsak ti panagadalda maipapan iti kongregasion Kristiano. Bayat nga agbalbaliw ti kasapulan dagiti annakyo, mabalinyo nga uliten ken palawaen ti datin nga ammoda.
Ti kongregasion Kristiano ket nagpateg a gubuayan ti naespirituan a pammabileg. Dagiti agtutubo a sireregta a makipaspaset kadagiti aktibidad ti kongregasion ket ad-adda a makabalan a mangsaranget iti impluensia ti lubong ni Satanas. (Roma 12:2) Agtalekkami a maaddaankayo iti dakkel a rag-o iti panangtulong kadagiti annakyo nga agbalin a pamiliar iti organisasion ni Jehova. Babaen iti pamendisionna, sapay koma ta agtalinaedda a nasungdo iti dayta ken iti naayat a Dios a pagserserbiantayo.
[Kahon/Ladawan iti panid 28]
Dagiti Topiko a Mapagsasaritaan Bayat ti Panagdaydayaw ti Pamilia
Dagitoy ti sumagmamano a topiko mainaig iti organisasion a mabalinyo a pagsasaritaan bayat ti Panagdaydayaw ti Pamiliayo.
▪ Repasuenyo ti pakasaritaan ti lokal a kongregasion. Kaano ken kasano a nabuangay? Ania dagiti nagduduma a Kingdom Hall nga inusar ti kongregasionyo? Bayat ti panagsasaritayo, apay a diyo awisen iti pagtaenganyo ti maysa a nabayagen a kameng ti kongregasionyo tapno sungbatanna ti salsaludsod dagiti annakyo?
▪ Ilawlawagyo ti panggep ti nagduduma a gimong ti kongregasion ken dagiti daddadakkel a taripnong ken no kasano a makagunggona dagita kadagiti annakyo.
▪ Usigenyo ti panggep ti nagduduma nga eskuelaan nga impasdek ti organisasion ni Jehova. Mangisalaysay kadagiti kapadasan a mangipakita kadagiti nasayaat a naaramidan dagiti nagturpos kadagita nga eskuelaan.
▪ Tulonganyo dagiti agtutubo a mangkita iti kinapateg ti panagbalin a regular nga agibumbunannag iti naimbag a damag. Ipakita kadakuada no kasano a makatulongda iti sangalubongan a report a maipabpablaak iti Tinawen a Libro Dagiti Saksi ni Jehova.
▪ Usigenyo ti nagduduma a kita ti amin-tiempo a panagserbi a silulukat kadagiti agtutubo iti organisasion ni Jehova. Nasayaat a gubuayan iti impormasion ti kapitulo 10 ti libro nga Organisado a Mangaramid iti Pagayatan ni Jehova.
▪ Tulonganyo dagiti agtutubo a mangtarus no apay nga adda dagiti urnos a sursuroten ti kongregasion. Ilawlawagyo no apay a masapul a makitunosda a kanayon iti aniaman nga urnos ti organisasion ni Jehova uray kadagiti babassit a bambanag. Ipakita no kasanoda a makatulong iti panangtaginayon iti urnos ti kongregasion babaen ti panagtulnogda kadagiti panglakayen.
[Ladawan]
Pagimbagan dagiti annakyo no makigayyemda kadagiti nabayagen nga adipen ti Dios
[Dagiti Ladawan iti panid 26]
Kas iti nagkauna nga Israel, ikagumaan dagiti nagannak ita ti mangipaay kadagiti makapnek a sungbat no mapagsaludsodanda maipapan iti organisasion ni Jehova