Lugar nga Awan Serbi Dagiti Beddeng
Ikagkagumaan dagiti Saksi ni Jehova nga ikkaten ti beddeng iti nagbaetan dagiti tattao. An-annurotenda ti prinsipio iti kinuna ni Jesus kadagiti adalanna: “Agkakabsatkayo amin.” (Mateo 23:8) Makita daytoy iti dua kadagiti lugar a pagdaydayawan dagiti Saksi maysa idiay Portugal ken maysa idiay Espania.
TI NAPADERAN a siudad ti Valença do Minho, iti makin-amianan a Portugal, ket naibangon idi tiempo ti gubat. Matannawagan ditoy ti Karayan Minho, ti beddeng ti Espania ken Portugal. Iti ballasiw ti karayan, makita ti Tui a siudad ti Espania nga addaan iti katedral a kasla maysa a sarikedked. Naibangon dagiti kangrunaan a pader ti Tui ken Valença idi maika-17 a siglo, idi aggubgubat ti Espania ken Portugal.
Idi 1995, naikkat dagiti estasion ti guardia iti beddeng dagitoy a pagilian ti European Union. Ngem saan laeng a ti panangikkat kadagita nga estasion ti ramanen ti panamagkaykaysa dagiti tattao no di ket ramanenna met ti isip ken puso. Adda idiay Valença ti bassit ngem napintas a pasdek a mangipakita a mabalin nga agkaykaysa dagiti tattao. Dayta ti Kingdom Hall dagiti Saksi ni Jehova, nga agpada nga us-usaren ti Espaniol ken Portugues a kongregasion dagiti Saksi.
Idi 2001, agkasapulan dagiti Saksi idiay Tui iti baro a Kingdom Hall. Masapul a panawanda ti ab-abanganda a pasilidad, ngem kurang ti pondoda a mangipatakder iti baro a paggigimongan. Saanda pay ketdi a kabaelan ti agabang ta bassit laeng ti bilangda. Isu a kiniddaw dagiti Espaniol a Saksi nga usarenda koma ti Kingdom Hall dagiti kakabsatda a Portugues, a sumagmamano laeng a kilometro manipud iti sentro ti Tui.
“Pinatganda dayta a kiddaw bayat ti panagsasaritami idi Disiembre 2001,” kuna ni Eduardo Vila a kameng ti kongregasion ti Tui iti Espania. “Idi nalpas ti mitingmi, nabigbigko a tinignay ni Jehova ti puso dagiti kakabsat a Portugues. Adu ti sakripisioda a nangibangon iti nagpintas a Kingdom Hall-da, ket napabileg ti pammatimi idi immanamongda nga usarenmi dayta.”
“Pinasangbaymi dagiti kakabsat nga Espaniol iti Kingdom Hall-mi,” kuna ni Américo Almeida, maysa a Saksi a Portugues a timmabuno iti dayta a miting. “Agtalekkami a bendisionan ni Jehova daytoy nga urnos, ket immanamongkami amin iti desision.” Nagsayaat ti nabukel a panaglalangen dagiti Portugues ken Espaniol a kakabsat. “Nupay karkarna dayta iti sabsabali, saanmi man la nadlaw a naggapukami gayam iti dua a nagduma a pagilian. Agkakabsatkami iti naespirituan,” kuna ni Paolo a taga Valença.
Maysa kadagiti umuna a madlaw dagiti bisita iti uneg ti Kingdom Hall ket ti dua nga agkalanglanga a relo iti likudan, maysa a para iti Espania ken maysa para iti Portugal. Umun-una iti maysa nga oras ti relo ti Espania, ket dayta laeng ti nagduma iti uneg ti Kingdom Hall. Idi kasapulan a maritubar ti pasdek, ti Regional Building Committee iti Espania ti nangidaulo kadagiti nagaget a kakabsat a kameng ti dua a kongregasion. “Timmulong kadakami ti adu a nalalaing a kakabsat manipud Espania. Sumagmamano kadakuada ti nagbiahe iti 160 kilometro,” kuna ni Paolo. “Ad-adda pay a simminged ti relasion dagiti dua a kongregasion gapu iti proyekto.”
Kitaentayo ti maikadua a pagarigan a nangikkat kadagiti beddeng.
Agkaykaysa ti Nabingay a Tanap
Ti siudad ti Puigcerdá ket maysa a siudad ti Espania nga adda iti beddeng ti France. Adda daytoy iti tengnga ti nadam-eg a tanap a nalikmut iti natatayag a bambantay ti Pyrenees. Ti tanap a maawagan iti Cerdaña ket paset idi ti Espania. Ngem iti katulagan a pagaammo kas “Treaty of the Pyrenees” idi 1659, ti Espania intedna ti kagudua ti tanap iti France.
Ita, dagiti Pranses mapanda ag-shopping idiay Puigcerdá, ti kangrunaan a siudad iti tanap. Sipud idi 1997, dagiti Saksi ni Jehova idiay Puigcerdá impalubosda met nga usaren dagiti Pranses a kakabsatda ti Kingdom Hall-da. Masapul ngamin a panawan idi dagiti Pranses a Saksi ti ab-abanganda a pasdek. Ti kaasitgan a Kingdom Hall idiay France ket maysa nga oras a biahe, ket no panawen ti lam-ek masansan a mabangenan iti yelo ti dalan iti bantay.
Idi inlawlawag dagiti Pranses a Saksi ti naganat a panagkasapulanda iti paggigimongan, dagus nga intukon dagiti Espaniol a Saksi ti Kingdom Hall-da. “Magagaran amin dagiti Espaniol a kakabsat a mangiranud iti Kingdom Hall-da,” malagip ni Prem a maysa a Saksi iti dayta a lugar. “Siempre, gapu daytoy iti panangyaplikarmi iti Nainkasuratan a prinsipio a naadalmi iti adu a tawen. Kalpasan ti dua a lawas, inaramatdan ti Kingdom Hall-mi, ket kaduami idan iti 13 a tawen.”
“Ti Kingdom Hall idiay Puigcerdá ti kasayaatan para kadakami,” kuna ni Eric, maysa a manangaywan iti Pranses a kongregasion. “Malagipko pay laeng ti nabara a panangabrasa kadakami dagiti kameng ti Espaniol a kongregasion. Inarkosanda pay ti Kingdom Hall-da iti dakkel a bugkong ti sabsabong ken nangikabilda iti karatula nga agkuna, ‘Maabrasakayo, dungdungnguenmi a kakabsat.’”
“Impagarup dagiti tattao nga awanen ti kongregasionmi idi nagserra ti Kingdom Hall-mi idiay France,” kuna ni Eric. “Ngem impakitami a saan ta kanayon a mangasabakami iti dayta a lugar ken agibunongkami kadagiti imbitasion iti gimongmi idiay Espania. Siraragsak nga umay makigimong iti Kingdom Hall dagiti interesado a tattao. Nagbalinkami met a nasingsinged kadagiti kakabsatmi nga Espaniol. Ammomi idi nga adda Espaniol a kongregasion iti ballasiw ti beddeng, ngem saanmi unay a makalanglangen ida. Ngem ita ta kanayonen nga agkikitakami, mariknami a saan laeng a dakami ti Saksi iti daytoy a nasulinek a tanap.”
Komportableda kadi iti maysa ken maysa nupay nagduduma ti kulturada? “Medio madanaganak idi naammuak a mapankami makigimong iti labes ti beddeng ti pagilianmi,” impudno ti nasuroken a 80 ti tawenna a Pranses a Saksi. “Ngem saankami a narigatan iti dayta a panagbalbaliw gapu iti panangabrasa ken panangpadagus kadakami dagiti kakabsat idiay Puigcerdá. Imbes ketdi, dayta ti gundawaymi a mangpabileg iti internasional a panagkaykaysa ti ili ni Jehova.”
Pundasion ti Nasingsinged a Panagkaykaysa
Kinuna dagiti nangbuangay iti panagkaykaysa dagiti pagilian ti Europa a “determinado [dagiti kamengna] a mangipasdek iti pundasion ti nasingsinged a panagkaykaysa.” Dayta ti makagapu no apay a naikkat dagiti estasion iti beddeng dagiti agkakaarruba a pagilian idi dekada 1980 ken 1990. Saan laeng a dayta ti kasapulan no di ket masapul met a maiwaksi ti panangidumduma.
Pagregreggetan dagiti Saksi ni Jehova nga iwaksi ti panangidumduma. Mabigbigda ti pagsayaatan ti panagduduma ti puli ken ammoda a “ti Dios saan a mangidumduma.” (Aramid 10:34) Kadagiti internasional a kombension ken iti Kingdom Hall, napaneknekanda a ‘nagimbag ken makaay-ayo ti agtutunos a panagnaed dagiti agkakabsat.’ (Salmo 133:1) Napaneknekan dayta iti kinasinged dagiti Saksi a taga Valença ken Puigcerdá kadagiti kakabsatda iti kabangibang a pagilian.
[Blurb iti panid 13]
“Nupay karkarna dayta iti sabsabali, saanmi man la nadlaw a naggapukami gayam iti dua a nagduma a pagilian. Agkakabsatkami iti naespirituan”
[Blurb iti panid 14]
“Ad-adda pay a simminged ti relasion dagiti dua a kongregasion gapu iti proyekto”
[Blurb iti panid 15]
“Anian a nagimbag ken anian a makaay-ayo a dagiti agkakabsat agnaedda a sangsangkamaysa buyogen ti panagtutunos!” SALMO 133:1.
[Ladawan iti panid 12, 13]
Buya ti siudad ti Tui ken ti Karayan Minho a matannawagan iti napaderan a siudad ti Valença do Minho
[Ladawan iti panid 14]
Panangritubar iti Kingdom Hall
[Ladawan iti panid 15]
Ti Pyrenees ken ti tanap ti Cerdaña
[Ladawan iti panid 15]
Dua a panglakayen manipud iti Espaniol ken Pranses a kongregasion a mangus-usar iti Kingdom Hall ti Puigcerdá