“Daytoy Kaipapananna ti Agnanayon a Biag”
“Daytoy kaipapananna ti agnanayon a biag, ti pananggun-odda iti pannakaammo maipapan kenka, ti maymaysa a pudno a Dios, ken iti daydiay imbaonmo, ni Jesu-Kristo.”—JUAN 17:3.
TI PANNAKAAMMO ket makaispal iti biag. Idi nagsakit ti awan pay makatawenna a ni Nouhou, ammo ni nanangna no ania ti aramidenna gapu ta nainaig ti trabahona iti panangaywan iti salun-at idiay Niger. Tinemplaanna iti asin ken asukar ti sangabaso a danum (oral rehydration solution) sana impainum iti anakna. Kuna ti UNICEF a gapu ta “nagtignay a dagus ken ammona ti praktikal a panangaywan iti salun-at, nabiit a naimbagan ti anakna.”
Makaispal met iti biag ti pannakaammo manipud iti Biblia. Kuna ni Moises a nagsurat iti umuna a libro ti Biblia: “Saan a sao nga awanan pateg maipaay kadakayo, no di ket kaipapananna ti biagyo, ken babaen itoy a sao mapaatiddogyo ti al-aldawyo.” (Deuteronomio 32:47) Talaga kadi a mapaatiddog ti Biblia ti biagtayo? Iti ania a pamay-an a kaipapanan dayta ti biagtayo?
Ti lima nga immun-una nga artikulo impakitana a ti Biblia ket naisangsangayan a libro gapu ta mapagtalkan dagiti padtona, maitunos iti historia ken siensia, agtutunos dagiti linaonna, ken praktikal a mangiwanwan iti biag. Daytoy ti mangipakita a naidumduma ti Biblia. Gapuna, no isurona ti pamay-an tapno magun-odan ti napapaut a biag—ti biag nga agnanayon—saan kadi a rumbeng laeng nga adalen a naimbag dayta?
Paregtaendaka a mangadal no kasano a ti umiso a pannakaammo iti Biblia ket mangyeg ita iti talna ti panunot ken kinaragsak iti masanguanan. Maragsakan dagiti Saksi ni Jehova a tumulong kenka no kasano a magun-odam dayta a pannakaammo.
[Kahon/Ladawan iti panid 9]
Naisangsangayan met ti Biblia gapu ta isu laeng ti makaipaay iti makapnek a sungbat kadagiti napapateg a saludsodtayo:
• Apay nga addatayo ditoy?
• Apay a nakaro ti panagsagaba?
• Adda kadi namnama dagiti natayen nga ipatpategko iti biag?
Masarakam ti sungbat ti Biblia kadagitoy a saludsod iti daytoy a libro, Ania a Talaga ti Isursuro ti Biblia? nga impablaak dagiti Saksi ni Jehova.