Posible Kadi ti Agbalin a Mapagpiaran iti Lubong a Napnuan Kurapsion?

NUPAY napigsa ti impluensia ti lubong, ti Diablo, ken ti managbasol a lasagtayo, kabaelantayo a sarangten dagita! Kasano? Babaen ti iyaadanitayo iti Dios ken ti panangyaplikar kadagiti prinsipio manipud Sao ti Dios, ti Biblia, a nabayagen a napaneknekan a makagunggona. Usigentayo ti dua a pagarigan.

PRINSIPIO TI BIBLIA: “Saanyo a tultuladen dagiti ugali iti daytoy a lubong.”​—Roma 12:2, Ti Baro a Naimbag a Damag Biblia.

Pudno a kapadasan: Ni Guilherme ket nabaknang a negosiante a taga-Brazil. Aminenna a narigat ti agbalin a mapagpiaran. Kunana: “Magargari nga agkusit ti maysa a negosiante, nalabit gapu ta narigat a ragpaten ti kayat ti kompania wenno narigat ti agtultuloy gapu iti nakaro a kompetision. Ibilang ti adu a tattao a gagangay laeng ti umawat ken mangted iti pasuksok. No mangrugrugika pay laeng nga agnegosio ket adu ti babayadam, narigat ti agbalin a mapagpiaran.”

Nupay kasta, nakapagtalinaed a mapagpiaran ni Guilherme. Kunana: “Uray kadagiti lugar a mapampanuynoyan nga agkusit ti kaaduan a negosiante, posible ti agbalin a mapagpiaran. Masapul a natibker ti pagalagadam iti moral. Naammuak iti Biblia a nasaysayaat ti agbalin a mapagpiaran. Nadalus ti konsiensia ti tao a mapagpiaran, natalna ti panunotna, ken adda panagraemna iti bagina. Nasayaat met ti impluensiana iti sabsabali.”

PRINSIPIO TI BIBLIA: “Ti siasinoman nga agtarigagay a bumaknang, matnag iti sulisog ket maipalab-og iti adu a minamaag ken makadadael a tarigagay a mangirarem kenkuana iti pannakadadael ken pannakapukaw. Ta ti panagayat iti kuarta isu ti pagtaudan ti amin a kita ti kinadakes.”​—1 Timoteo 6:9, 10, Ti Baro a Naimbag a Damag Biblia.

Pudno a kapadasan: Ni André ti makinkukua iti maysa a kompania a mangipapaay iti serbisio mainaig iti security system. Ti maysa kadagiti klientena ket ti dakkel a soccer club. Naminsan, kalpasan ti dakkel a paay-ayam, napan ni André iti administration office ken impakitana ti resibo a bayadanda para iti serbisiona. Okupado idi ti financial department nga agbilbilang iti kuarta a naglakuanda iti tiket. Gapu ta rumabiin, nagap-apura ti superbisor a nangbayad kadagiti suplayer a pakairamanan ni André.

“Idi agawidakon, nadlawko a sobra ti imbayad ti superbisor,” kuna ni André. “Sigurado a dina ammon no asino ti nabayadanna iti sobra. Ngem kaasi met ta ammok nga isunto ti mangsupusop iti dayta! Isu a nagsubliak. Nakilinnetletak kadagiti adu a fans tapno isublik ti sobra a kuarta. Kasta unay ti siddaaw ti superbisor ta awan pay a pulos ti nangisubli kenkuana iti kuarta.”

“Gapu iti dayta nga inaramidko, nagun-odko ti panagtalek ti superbisor,” kuna ni André. “Adun a tawen ti naglabas ngem siak laengen ti nabati kadagiti suplayer nga addaan iti kontrata iti dayta a soccer club. Agyamanak ta naaddaanak iti nasayaat a reputasion gapu iti panangyaplikarko kadagiti nangato a pagalagadan ti Biblia.”

Makaparagsak ta babaen iti tulong ti Dios maliklikantayo dagiti dakes nga impluensia ti kurapsion. Nupay kasta, saan a naan-anay a maikkat ti kurapsion babaen ti panagregget ti maysa laeng a tao. Nairamuten ti kurapsion​—isu a saan a kaskarina a maikkat dayta dagiti imperpekto a tattao. Kayatna kadi a sawen nga agtultuloy lattan ti kurapsion? Ilawlawag ti sumaganad nga artikulo ti makaparegta a sungbat ti Biblia.