AMMOYO KADI?

Naibangon kadi manen ti templo ti Jerusalem kalpasan ti 70 C.E.?

IMPADTO ni Jesus nga awanto a pulos ti matda a bato iti rabaw ti sabali a bato iti templo ni Jehova. Natungpal dayta idi 70 C.E. idi dinadael dagiti Romano a soldado ti siudad ti Jerusalem iti panangidaulo ni Tito. (Mat. 24:2) Idi agangay, implano ni Emperador Julian a bangonen manen ti templo.

Naawagan ni Julian kas maudi a pagano nga emperador ti Roma. Daytoy a kaanakan ni Constantino a Dakkel ket naipaayan iti makunkuna a Nakristianuan nga edukasion. Ngem idi naiwaragawag kas emperador idi 361 C.E., sipapanayag a linaksidna dayta nga edukasion ken ti rinuker a Kristianidad idi kaaldawanna ket pinaboranna ti paganismo. Dagiti libro ti historia tukoyenda ni Julian kas “ti Apostata.”

Ginura ni Julian dagiti agkunkuna a Kristiano. Nalabit ti maysa a makagapu ket ti naimatanganna a panangpapatay dagiti agkunkuna a Kristiano iti ama ken kakabagianna idi innem pay laeng ti tawenna. Sigun kadagiti historiador ti simbaan, indagadag ni Julian kadagiti Judio a bangonenda manen ti temploda, ta patienna a daytoy ti pamay-an a mangpaneknek nga ulbod a propeta ni Jesus.a

Di mapagduaduaan nga adda plano ni Julian a mangibangon manen iti templo. Pagdedebatean dagiti historiador no talaga met laeng a nairugina dayta, ken no apay a di naituloy no bilang man narugianna. Ngem daytoy ti sigurado: Napapatay ni Julian awan pay dua a tawen kalpasan a nagbalin nga emperador, ket saanen a naituloy ti proyektona.