No Kasano a Nagbalin a Paset Daytoy a Lubong ti Kakristianuan
DIMTENG ti panawen a narpuog ti Imperio ti Roma, a nangrugian ti immuna a Kinakristiano. Sigun iti adu a historiador, dayta a pannakarpuog panawen met ti naan-anay a panagballigi ti Kinakristiano maibusor iti paganismo. Iti panangiyebkasna iti naiduma a panangmatmat, insurat ti obispo nga Anglicano a ni E. W. Barnes: “Idi narpuog ti sibilisasion a Romano, ti Kinakristiano saanen nga isu ti natan-ok a pammati ni Jesus a Kristo: nagbalin a maysa a relihion a makatulong iti panamagkaykaysa iti nawarawara a lubong.”—The Rise of Christianity.
Sakbay dayta a pannakarpuog, idi maikadua, maikatlo, ken maikapat a siglo K.P., ipakita ti historia nga iti adu a pamay-an sinalimetmetan dagidiay agak-aklon a pasurot ni Jesus ti pannakaisinada iti lubong a Romano. Ngem ipalgakna met ti itatanor ti apostasia iti doktrina, kababalin, ken organisasion, kas impadto ni Jesus ken dagiti apostolna. (Mateo 13:36-43; Aramid 20:29, 30; 2 Tesalonica 2:3-12; 2 Timoteo 2:16-18; 2 Pedro 2:1-3, 10-22) Idi agangay, adda dagiti nakikompromiso iti lubong a Griego ken Romano, ket inawat dagiti dadduma nga agak-aklon a Kristiano ti paganismo ti lubong (kas kadagiti piesta ken panagdaydayaw iti ina a diosa ken iti tinallo a dios), ti pilosopiana (kas iti pammati iti imortal a kararua), ken ti administratibo nga organisasionna (a makita iti panagparang ti klase klero). Daytoy rinuker a kita ti Kinakristiano inallukoyna dagiti pagano ken nagbalin a maysa a puersa nga idi damo pinadas dagiti emperador ti Roma a parmeken ngem idi kamaudiananna inawatda met laeng ken inusarda a maipaay iti bukodda a pagimbagan.
Pinarmek ti Lubong
Impakita ti historiador iti iglesia a ni Augustus Neander ti pagdaksan daytoy baro a relasion iti nagbaetan ti “Kinakristiano” ken ti lubong. No isakripisio dagiti Kristiano ti pannakaisinada iti lubong, “saanen a mailasin ti pakaidumaan ti iglesia iti lubong . . . ta nasken nga isuko ti iglesia ti kinatarnawna, ken, nupay kasla isu koma ti mangparmek, isu ketdi ti maparmek,” insuratna.—General History of the Christian Religion and Church, Tomo 2, panid 161.
Kasta nga agpayso ti napasamak. Idi rugrugi ti maikapat a siglo, pinadas ti emperador ti Roma a ni Constantino nga usaren ti “Kristiano” a relihion idi kaaldawanna tapno patibkeren ti agrakrakaya nga imperiona. Maipaay iti daytoy a panggep, inikkanna dagiti agkunkuna a Kristiano iti relihiuso a wayawaya ken impabaklayna ti sumagmamano a pribilehio dagiti pagano a papadi kadagiti kleroda. Kuna ti The New Encyclopædia Britannica: “Inserrek ni Constantino ti iglesia iti lubong tapno maikkan iti sosial a rebbengen ken inallukoyna ti pagano a kagimongan tapno aklonenna ti iglesia.”
Relihion ti Estado
Kalpasan ni Constantino, pinadas ni Emperador Julian (361-363 K.P.) a busoren ti Kinakristiano ken isubli ti paganismo. Ngem napaay, ket agarup 20 a tawen kalpasanna, imparit ni Emperador Theodosius I ti paganismo ken imbilinna a ti Trinitariano a “Kinakristiano” ti agbalin a relihion ti Estado ti Imperio ti Roma. Siuumiso nga insurat ti historiador a Pranses a ni Henri Marrou: “Iti ngudo ti panagturay ni Theodosius, ti Kinakristiano, wenno tapno ad-adda nga espesipiko, ti naipasdek a Katolicismo, nagbalin nga opisial a relihion ti intero a lubong a Romano.” Sinuktan ti naipasdek a Katolicismo ti pudno a Kinakristiano ken nagbalin a “paset ti lubong.” Naiduma unay daytoy a relihion ti Estado iti relihion dagiti immuna a pasurot ni Jesus, a kadakuada kinunana: “Saankay a paset ti lubong.”—Juan 15:19.
Insurat ti historiador ken pilosopo a Pranses a ni Louis Rougier: “Iti panagsaknapna, limmasat ti Kinakristiano kadagiti nakadidillaw a panagbalbaliw agingga iti saanen a mailasin. . . . Ti immuna nga iglesia dagiti napanglaw, nga agbibiag iti kaasi, nagbalin a maysa a manangsakop nga iglesia a nakipagayam kadagiti agtuturay idi saanna ida a maparmek.”
Idi rugrugi ti maikalima a siglo K.P., pinutar ni Romano Katoliko a “San” Agustino ti kalatakan a sinuratna a The City of God. Dineskribirna ditoy ti dua a siudad, “ti siudad ti Dios ken ti siudad ti lubong.” Impaganetgetna kadi ti pannakaisina dagiti Katoliko iti lubong? Saan. Kuna ni Propesor Latourette: “Sipaprangka a binigbig ni Agustino [a] dagiti dua a siudad, ti naindagaan ken ti nailangitan, ket agkanaig.” Insuro ni Agustino a “nangrugin ti Pagarian ti Dios iti daytoy a lubong iti pannakaipasdek ti iglesia [Katolika].” (The New Encyclopædia Britannica, Macropædia, Tomo 4, panid 506) Ngarud, aniaman ti orihinal a panggep ni Agustino, dagiti kapanunotanna ad-adda a pinaregtana ti Iglesia Katolika a makibiang kadagiti politikal nga aramid daytoy a lubong.
Nabingay nga Imperio
Idi 395 K.P., idi natay ni Theodosius I, opisial a naguddua ti Imperio ti Roma. Ti kabisera ti Dumaya, wenno Byzantine, nga Imperio ket idiay Constantinople (sigud a Byzantium, Istanbul itan), idinto ta ti kabisera ti Lumaud nga Imperio (kalpasan ti 402 K.P.) ket idiay Ravenna, Italia. Kas resulta, nabingay ti Kakristianuan iti politika ken kasta met iti relihion. Maipanggep iti relasion ti Iglesia ken ti Estado, sinurot ti iglesia iti Dumaya nga Imperio ti kapanunotan ni Eusebio a taga Cesarea (kasadaran ni Constantino a Dakkel). Iti dina panangikabilangan iti Nakristianuan a prinsipio mainaig iti pannakaisina iti lubong, inkalintegan ni Eusebio a no agbalin a Kristiano ti emperador ken ti imperio, agbalin a maymaysa a Kristiano a kagimongan ti Iglesia ken ti Estado, ket ti emperador ti agsaad a pannakabagi ti Dios ditoy daga. Sinalimetmetan dagiti iglesia ti Dumaya nga Ortodoxo daytoy a relasion iti nagbaetan ti Iglesia ken ti Estado iti panaglabas dagiti siglo. Iti librona a The Orthodox Church, impakita ni Timothy Ware, maysa nga obispo iti Orthodox, ti resulta: “Nagbalin a parikut iti Ortodoxia ti nasionalismo iti napalabas a sangapulo a siglo.”
Iti Laud, idi a rimmaut dagiti tribo nga Aleman, pinadisida ti maudi nga emperador ti Roma idi 476 K.P. Daytoy ti nanggibus iti Lumaud nga Imperio ti Roma. Maipapan iti politikal a kasasaad a simmaruno iti dayta, kuna ti The New Encyclopædia Britannica: “Nabukel ti maysa a baro a pannakabalin: ti Iglesia Romana, ti iglesia ti obispo ti Roma. Patien daytoy nga iglesia nga isu ti kasukat ti naungaw nga Imperio ti Roma.” Ituloy a kunaen daytoy nga enciclopedia: “Pinalawa dagiti papa a Romano ti pannakibiang ti iglesia iti gobierno nga uray la a nalab-awan dagiti beddeng iti nagbaetan ti iglesia ken ti estado ken binukelda ti makunkuna a teoria ti dua a kampilan. Sigun iti dayta a teoria, inikkan ni Kristo ti papa saan laeng nga iti naespirituan a bileg iti iglesia no di pay ket iti sekular a bileg kadagiti nailubongan a pagarian.”
Dagiti Nasional a Protestante nga Iglesia
Iti las-ud ti Edad Media, napalalo ti pannakaigamer agpadpada dagiti relihion nga Ortodoxo ken Romano Katoliko iti politika, kadagiti nailubongan nga isyu, ken kadagiti gubat. Insubli kadi ti Protestante a Repormasion idi maika-16 a siglo ti pudno a Kinakristiano, a naisina iti lubong?
Saan. Mabasatayo iti The New Encyclopædia Britannica: “Dagiti Repormista a Protestante iti Lutherano, Calvinista, ken Anglicano a tradision . . . sititibker a kimpetda kadagiti kapanunotan ni Agustino, a ti teolohiana impagarupda nga adda naisangsangayan a pakainaiganna kadakuada. . . . Tunggal maysa kadagiti tallo a kangrunaan a tradision a Protestante idiay Europa idi maika-16 siglo . . . ket sinuportaran dagiti sekular nga agtuturay idiay Saxony [makintengnga nga Alemania], Switzerland, ken idiay Inglaterra ken nagtalinaedda iti takder a kas iti relasion ti estado ken ti iglesia idi edad media.”
Imbes nga agsubli iti pudno a Kinakristiano, nangipasngay ti Repormasion iti nakaad-adu a nasional ken teritorial nga iglesia a nanglanlana kadagiti politikal nga estado ken siaaktibo a nangsuportar kadakuada kadagiti gubat. Kinapudnona, imparparegta agpadpada dagiti iglesia a Katoliko ken Protestante dagiti relihiuso a gubgubat. Iti librona nga An Historian’s Approach to Religion, kinuna ni Arnold Toynbee maipapan kadagita a gubat: “Nangiparangda kadagiti Katoliko ken Protestante idiay Francia, iti Netherlands, Alemania, ken Irlandia, ken kadagiti agkakaribal a sekta ti Protestante idiay Inglaterra ken Scotland, iti naulpit nga aramid a panagpipinnarmek babaen ti bileg dagiti armas.” Ipakita dagiti agdama a panagririri a mamagbingaybingay iti Irlandia ken iti dati a Yugoslavia a napalalo pay laeng ti pannakibiang dagiti iglesia a Romano Katoliko, Ortodoxo, ken Protestante kadagiti aramid daytoy a lubong.
Kayat kadi a sawen amin dagitoy nga awanen ditoy daga ti pudno a Kinakristiano a naisina iti lubong? Sungbatan ti sumaganad nga artikulo dayta a saludsod.
[Kahon/Ladawan iti panid 10, 11]
NO KASANO A NAGBALIN A RELIHION TI ESTADO TI “KINAKRISTIANO”
TI KINAKRISTIANO saan a pulos a nairanta nga agbalin a paset daytoy a lubong. (Mateo 24:3, 9; Juan 17:16) Kaskasdi, ibaga kadatayo dagiti libro iti historia nga idi maikapat a siglo K.P., ti “Kinakristiano” nagbalin nga opisial a relihion ti Estado ti Imperio ti Roma. Kasano a napasamak daytoy?
Manipud ken Nero (54-68 K.P.) agingga iti maikatlo a siglo K.P., indadanes dagiti amin nga emperador ti Roma dagiti Kristiano, wenno saan impalubosda a maidadanesda. Ni Gallienus (253-268 K.P.) ti immuna nga emperador ti Roma a nangipaulog iti deklarasion a mapalugodanda. Ngem naiparit latta ti Kinakristiano kas maysa a relihion iti intero nga imperio. Kalpasan ni Gallienus, nagtultuloy ti pannakaidadanes, ket dimmegdeg pay ketdi iti sidong ni Diocletian (284-305 K.P.) ken dagiti sunona.
Naaramid ti dakkel a panagbalbaliw idi rugrugi ti maikapat a siglo iti kunada a pannakakumberti ni Emperador Constantino I iti Kinakristiano. Maipapan itoy a “pannakakumberti,” kuna ti enciclopedia a Pranses a Théo—Nouvelle encyclopédie catholique (Théo—New Catholic Encyclopedia): “Inaklon ni Constantino nga isu ket maysa a Kristiano nga emperador. Kinapudnona, sa la nabuniagan idi agngangabiten ti biagna.” Nupay kasta, idi 313 K.P., nangipaulog ni Constantino ken ti kaduana nga emperador, ni Licinius, iti bilin a nangted iti relihiuso a wayawaya agpadpada kadagiti Kristiano ken kadagiti pagano. Kuna ti New Catholic Encyclopedia: “Maysa a dakkel a panagbalbaliw ti panangted ni Constantino kadagiti Kristiano iti wayawaya ti panagdayaw, a kaipapananna nga opisial a mabigbigen ti Kinakristiano a religio licita [legal a relihion] a kas iti paganismo.”
Nupay kasta, kuna ti The New Encyclopædia Britannica: “Saanna [ni Constantino] a pinagbalin ti Kinakristiano a relihion ti imperio.” Kastoy ti kinuna ti historiador a Pranses a ni Jean-Rémy Palanque, miembro ti Institute of France: “Nupay kasta, ti Estado a Romano . . . nagtalinaed a pagano. Ket idi nga inawat ni Constantino ti relihion ni Kristo, saanna a pinagpatingga dayta a situasion.” Iti libro a The Legacy of Rome, kinuna ni Propesor Ernest Barker: “[Ti panagballigi ni Constantino] saan a nagresulta iti insigida a pannakaipasdek ti Kinakristiano kas relihion ti Estado. Kapkapnekan ni Constantino a bigbigen ti Kinakristiano kas maysa kadagiti relihion ti publiko iti imperio. Iti simmaruno a pito pulo a tawen, opisial a maan-annurot dagiti dati a pinapagano a ritual idiay Roma.”
Isu nga iti daytoy a punto, ti “Kinakristiano” ket maysa a legal a relihion iti Imperio ti Roma. Kaano a nagbalin daytoy nga opisial a relihion ti Estado, no iti naan-anay a kaipapanan ti sasao? Mabasatayo iti New Catholic Encyclopedia: “Intultuloy nga impatungpal dagiti suno [ni Constantino] ti paglinteganna malaksid ken ni Julian [361-363 K.P.], a ti panangidadanesna iti Kinakristiano kellaat a naggibus iti ipapatayna. Kamaudiananna, iti maudi a kakapat ti maika-4 a siglo, pinagbalin ni Theodosius a Dakkel [379-395 K.P.] ti Kinakristiano nga opisial a relihion ti Imperio ken imparitna ti pinapagano a panagdaydayaw dagiti tattao.”
Iti panangpatalgedna iti daytoy ken panangipalgakna no ania daytoy baro a relihion ti Estado, insurat ti eskolar ti Biblia ken historiador a ni F. J. Foakes Jackson: “Iti sidong ni Constantino agkaandingayan ti Kinakristiano ken ti imperio ti Roma. Nagkaykaysada iti sidong ni Theodosius. . . . Sipud idin magaladan a Katoliko dagidiay agdaydayaw iti Ama, Anak ken Espiritu Santo a buyogen ti awan idumdumana a panagraem. Naiturong iti daytoy a panggep ti intero a relihiuso a paglintegan daytoy nga emperador, ken nagresulta iti panagbalin ti Katoliko a Pammati a maymaysa a legal a relihion dagiti Romano.”
Insurat ni Jean-Rémy Palanque: “Bayat a parparmeken ni Theodosius ti paganismo, inanamonganna met ti naipasdek nga Iglesia [Katolika]; idi 380 K.P., binilinna dagiti amin nga iturayanna nga aklonenda ti pammati ni Papa Damasus ken ti [Trinitariano] nga obispo ti Alexandria ken paidaman iti wayawaya ti panagdayaw dagiti sumuppiat. Kinondenar manen ti natan-ok a Konsilio ti Constantinople (381) dagiti amin nga erehe, ken sinigurado ti emperador nga awan ti obispo a kumanunong kadagitoy. Ti [Trinitariano] a Kinakristiano iti Nicaea ti nagbalin a naan-anay ken masnup a relihion ti Estado . . . Nairut ti pannakipagkaykaysa ti Iglesia iti Estado ken nagun-odna ti naan-anay a suporta daytoy.”
Gapuna, saan a ti awan mulitna a Kinakristiano idi kaaldawan dagiti apostol ti nagbalin a relihion ti Estado ti Imperio ti Roma. Ti Trinitariano a Katolicismo idi maikapat a siglo, nga impilit nga impaalagad ni Emperador Theodosius I ken inalagad idi ken al-alagaden ita ti Iglesia Romana Katolika, ket pudno a paset daytoy a lubong.
[Credit Line]
Emperador Theodosius I: Real Academia de la Historia, Madrid (Foto Oronoz)
[Picture Credit Line iti panid 8]
Scala/Art Resource, N.Y.