SUNGBAT DAGITI SALUDSOD MAIPAPAN ITI BIBLIA
Ania ti mangtigtignay iti adu a tattao a mangusig iti kaadda ti Namarsua?
Saan kadi a nakaskasdaaw ti biag?
Agarup 3,000 a tawenen ti napalabas, insurat ti maysa a dumadaniw: “Iti nakaam-amak a pamay-an nakaskasdaaw ti pannakaaramidko.” (Salmo 139:14) No panunotem no kasano a mabukel ti maladaga manipud iti maysa a selula, saanka kadi nga agamanga? Adu ti mamati a ti Namarsua ti nangaramid kadagiti sibibiag a bambanag.—Basaen ti Salmo 139:13-17; Hebreo 3:4.
Daydiay nangparsua iti uniberso ken nangaramid iti daga a pagtaengan pinarsuana met ti biag. (Salmo 36:9) Nakikomunikar kadagiti tattao ken imbagana kadatayo ti maipapan kenkuana.—Basaen ti Isaias 45:18.
Naggaputayo kadi kadagiti animal?
Adu ti pagpadaan ti bagitayo ken ti bagi dagiti animal. Ti ngamin Namarsua diniseniona dagiti tattao ken animal nga agbiag ditoy daga. Inaramidna ti immuna a tao manipud iti daga, saan ket a manipud iti animal.—Basaen ti Genesis 1:24; 2:7.
Adda dua a napateg a nagdumaan dagiti tattao ken animal. Umuna, kabaelan dagiti tattao ti agsursuro, agayat, ken mangraem iti Namarsua. Maikadua, nadisenio dagiti tattao nga agbiag nga agnanayon, idinto ta saan a kasta dagiti animal. Ngem natawid ti amin a tao ti ipapatay gapu ta inlaksid ti immuna a tao ti panangiwanwan ti Namarsua.—Basaen ti Genesis 1:27; 2:15-17.