Panangpugto iti Masanguanan
Napampanunotmo kadin no ania ti masanguananyo a sangapamiliaan? Bumaknangka ngata wenno rumigat? Mapno iti ayat wenno liday? Napautto ngata ti biagmo, wenno ababa? Rinibu a tawenen a pampanunoten dayta dagiti tattao.
Ita, ad-adalen dagiti eksperto ti mapaspasamak iti lubong tapno makaaramidda iti prediksion maipapan iti masanguanan. Nupay adu ti pimmudno a prediksionda, adu met ti pimmalia. Kas pagarigan idi 1912, impadto ni Guglielmo Marconi, nga imbentor ti wireless telegraph: “Ti pannakaimbento dagiti wireless nga alikamen pukawenna ti gubat.” Ken ti maysa nga ahente iti Decca Record Company, a saan a nangawat iti Beatles idi 1962, impagarupna a di agbayag ti kinalatak dagiti banda nga agtoktokar iti gitara.
Adu ti agpampannuray kadagiti karkarna a banag tapno maammuanda ti mapasamak iti masanguanan. Dadduma ti agpabpabalakad kadagiti astrologo; regular met a maikabkabil dagiti horoscope iti adu a magasin ken diario. Adda met dagiti agkonkonsulta iti mammadles wenno espiritista, a mangibagbaga a “mabasada” ti masanguanan babaen ti tarot card, numero, wenno kadagiti uged iti dakulap.
Gapu ta kayatda a maammuan ti masanguanan, nagkonsulta ti dadduma a tattao idi un-unana kadagiti orakulo—dagiti papadi a lallaki wenno babbai a mangidanon iti impormasion manipud iti dios nga ibagbagada nga irepresentarda. Kas pagarigan, naibaga a nangipatulod ni Ari Croesus ti Lidia kadagiti nangingina a regalo iti orakulo idiay Delphi, Greece, ta kayatna a maammuan ti resultana no makigubat ken Ciro ti Persia. Imbaga ti orakulo a kabaelan ni Croesus a dadaelen ti “maysa a dakkel nga imperio” no makigubat ken Ciro. Gapu ta agtalek a mangabak, nakigubat ni Croesus, ngem ti dakkel nga imperio a nadadael ket ti imperiona!
Awan serserbi ti di nalawag a prediksion ti orakulo; agparang a pudno dayta uray no asino ti nangabak iti gubat. Napukaw ni Croesus ti amin gapu iti dayta a di umiso a prediksion. Adda kadi nakaidumaan dagiti agpampannuray kadagiti moderno a pamay-an iti panagpadles ita?