Nakitada ti Ayat nga Adda Aramidna

NI Yomara ken dagiti adingna a da Marcelo ken Hiver ket agnanaed iti bassit a barrio idiay Guatemala. Ni Yomara ti immuna a nagpayadal iti Biblia kadagiti Saksi. Idi agangay, nakipagadal metten dagiti adingna. Ngem adda problema. Aminda a tallo nga agkakabsat ket bulsek ken saanda nga ammo ti agbasa iti braille. Gapu iti dayta, ti mangyad-adal iti Biblia kadakuada ti mangbasa kadagiti parapo ken kadagiti bersikulo ti Biblia a mayadal kadakuada.

Ti pannakigimong ti sabali pay a problema. No is-isuda, saanda a kabaelan ti agbiahe iti 40 a minuto a mapan iti kaasitgan a Kingdom Hall. Ngem adda inyurnos dagiti kakabsat tapno makaatenderda iti amin a gimong. Idi mangrugin nga agpaset ti agkakabsat iti gimong iti tengnga ti lawas, tinulongan ida dagiti kakabsat a mangikabesa kadagiti pasetda.

Idi Mayo 2019, nangrugi a maangay dagiti gimong ti kongregasion iti barrioda. Adda met agassawa a regular pioneer nga immakar iti dayta a barrio. Kayatda nga isuro ti tallo nga agkakabsat nga agbasa ken agsurat iti braille, uray no dida ammo no kasano nga aramiden dayta. Isu a napanda iti maysa a libraria tapno ammuenda ti maipapan iti sistema ti braille ken adalenda dagiti pamay-an a maus-usar a pangisuro iti dayta.

Iti sumagmamano a bulan, nalaingen nga agbasa iti braille ti tallo nga agkakabsat. Gapu iti dayta, napartak ti naespirituan nga irarang-ayda.a Regular pioneer itan da Yomara, Marcelo, ken Hiver. Ministerial nga adipen ni Marcelo. Aktiboda kadagiti naespirituan nga aktibidad iti makalawas. Makaakar ti kinaregtada.

Agyamyaman ti tallo nga agkakabsat iti naayat a suporta ti kongregasion. “Manipud pay idi damo, impakitan dagiti Saksi kadakami ti pudpudno a Nakristianuan nga ayat,” kuna ni Yomara. “Adda dagiti nagsasayaat a gagayyemmi iti kongregasion ken pasetkami ti internasional a panagkakabsat a nareppet iti ayat,” innayon ni Marcelo. Segseggaan ni Yomara ken dagiti adingna ti aldaw inton makitada nga agbalinen a paraiso ti daga.​—Sal. 37:10, 11; Isa. 35:5.