“Maysaka a Maipatpateg Unay”!

1-2. Kasanotayo a masigurado nga ipatpategnatayo ni Jehova?

IPATPATEG ni Jehova ti amin nga agserserbi kenkuana. Ngem adda dagiti nakababbaba ti panagkitkitada iti bagida. Apay? Posible a gapu ta dayta ti iparparikna ti dadduma. Kastaka kadi met? Kasanom a masigurado nga ipatpategnaka ni Jehova?

² Makatulong no usigem dagiti salaysay iti Biblia a mangipakita a talaga nga ipatpateg ni Jehova dagiti tattao. Kas pagarigan, rinaem ti Anakna a ni Jesus dagiti tattao ken impakitaanna ida iti dignidad. Gapu iti dayta, impakitana a talaga nga ipatpategna ken ti Amana dagiti napakumbaba a tattao a nababa ti panagkitkitada iti bagida. (Juan 5:19; Heb. 1:3) Iti daytoy nga artikulo, pagsasaritaantayo (1) no kasano a tinulongan ni Jesus dagiti tattao tapno mariknada a napategda, ken (2) no kasanotayo a makombinsir ti bagitayo a talaga a napategtayo iti Dios.—Hag. 2:7.

NO KASANO A TINULONGAN NI JESUS DAGITI TATTAO TAPNO MARIKNADA A NAPATEGDA

3. Kasano ti panangtrato ni Jesus kadagiti taga-Galilea a nagpatulong kenkuana?

³ Bayat ti maikatlo a panangasaba ni Jesus iti Galilea, nagadu ti napan iti dayta a lugar tapno dumngeg kenkuana ken tapno mapaimbagda. Imbaga ni Jesus a kasda la ‘nalalatan ken naiwarawara a karnero nga awanan pastor.’ (Mat. 9:36; kitaen dagiti study note.) Apay? Ibilbilang ngamin ida dagiti lider ti relihion nga awan patpategda. Inawaganda pay ketdi ida kas “nailunod a tattao.” (Juan 7:​47-49; study note) Ngem imparikna ni Jesus a nakapatpategda. Nangiwaya iti tiempo a mangisuro ken mangpaimbag kadagiti sakitda. (Mat. 9:35) Kasta met, tapno ad-adu pay ti matulonganna, sinanayna dagiti apostolna a mangasaba ken mangpaimbag iti amin a kita ti sakit.—Mat. 10:​5-8.

4. Ania ti masursurotayo iti panangtrato ni Jesus kadagiti nababa ti panagkitkitada iti bagida?

⁴ Babaen ti panangtrato ni Jesus kadagiti agdengdengngeg kenkuana nga addaan iti dignidad ken panagraem, impakitana nga ipatpategna ken ti Amana dagiti tagtagibassiten ken irurrurumen dagiti tattao. No ngay agserserbika ken Jehova ngem panagriknam ket awan serserbim? Panunotem ti panangtrato ni Jesus kadagiti nababa ti panagkitkitada iti bagida a mayat nga agsursuro kenkuana. Makatulong dayta tapno makitam a talaga a napategka ken Jehova.

5. Ilawlawag ti kasasaad ti babai a taga-Galilea a naam-ammo ni Jesus.

⁵ Saan laeng a nangisuro ni Jesus iti dadakkel a grupo dagiti tattao. Inikkanna met iti atension dagiti indibidual. Kas pagarigan, bayat ti panangasabana idiay Galilea, naam-ammona ti maysa a babai a 12 a tawenen nga agpadpadara. (Mar. 5:25) Sigun iti Linteg, maibilang dayta a babai a narugit, ket maibilang met a narugit ti asinoman a makasagid kenkuana. Gapu iti dayta, masansan nga agmaymaysa isuna. Uray no kayatna koma met ti makikadua iti dadduma iti panagdaydayaw ken Jehova kadagiti sinagoga wenno kadagiti piesta, saanna a mabalin nga aramiden dayta. (Lev. 15:​19, 25) Marigrigatan la ngaruden iti sakitna, posible a nariknana pay nga awan ti mangipatpateg kenkuana.—Mar. 5:26.

6. Ania ti inaramid ti babai tapno umimbag?

⁶ Kayat unay ti babai a paimbagen isuna ni Jesus. Ngem saan a direkta nga immasideg kenkuana. Apay? Posible ngamin a mabain gapu iti situasionna. Baka mabuteng pay ketdi amangan no ungtan ni Jesus gapu ta immasideg isuna kadagiti tattao uray no narugit. Ania ti inaramidna? Sinagidna laeng ti makinruar a bado ni Jesus. Mamati ngamin nga umanayen dayta tapno umimbag. (Mar. 5:​27, 28) Nagunggonaan ti pammatina—immimbag isuna! Ket idi dinamag ni Jesus no asino ti nangsagid kenkuana, dagus nga immamin. Ania ti reaksion ni Jesus?

7. Kasano ti panangtrato ni Jesus iti daytoy kakaasi a babai? (Mar. 5:34)

⁷ Nasingpet ti panangtrato ni Jesus iti dayta a babai ken rinaemna. Nadlawna ngamin “a madandanagan ken agpigpigerger.” (Mar. 5:33) Gapu iti dayta, nasingpet ti pannakisaritana kenkuana. Inawaganna pay ketdi iti “anakko.” Inusar ni Jesus dayta a termino, saan laeng a tapno ipakitana a raraemenna, no di ket kayatna met nga ipakita nga ay-ayatenna ken maseknan kenkuana. (Basaen ti Marcos 5:34.) Isuna laeng ti nangusaran ni Jesus iti dayta a termino, posible a gapu iti narigat a situasionna ken gapu ta ‘agpigpigerger.’ Panunotem laengen no kasano a nabang-aran ti babai! Agpayso met ketdi nga immimbag iti pisikal. Ngem no saan koma a nasingpet ti pannakisarita ni Jesus kenkuana, posible koma a makonkonsiensia a pimmanaw. Wen, saan laeng a pinaimbag ni Jesus. Impariknana met kenkuana a maysa isuna a maipatpateg nga anak ti nadungngo a nailangitan nga Amatayo.

8. Ania dagiti narigat a situasion a nakaipasanguan ti maysa a sister a taga-Brazil?

⁸ Adda met dagiti kakabsat ita nga addaan kadagiti sakit wenno pisikal a depekto. Mabalin a dagita ti rason a mariknada nga awan serserbida. Maysa kadakuada ket ni Mariaa a regular pioneer iti Brazil. Nayanak nga awan sakana ken kannigid nga imana. Imbagana: “Kanayondak nga uy-uyawen ken sursuronen idiay eskuelaan. Nakaad-adu pay ketdi ti nasakit nga ibirbirngasda kaniak. Uray ngarud ti mismo a pamiliak ket iparpariknada no dadduma nga awan serserbik.”

9. Ania ti nakatulong ken Maria tapno mariknana nga ipatpateg isuna ni Jehova?

⁹ Ania ti nakatulong ken Maria? Idi nagbalinen a Saksi ni Jehova, pinaregta dagiti kakongregasionna ken tinulonganda tapno mariknana nga ipatpateg isuna ni Jehova. Imbagana: “No saggaysaek nga isurat ti nagan ti amin a kakabsat a timmulong kaniak, saan nga umanay dagita iti notebook-ko. Talaga nga agyamyamanak ken Jehova ta impaayannak iti nakaay-ayat a naespirituan a pamilia.” Nagdakkel ti naitulong dagiti kakabsat tapno marikna ni Maria a talaga nga ipatpateg isuna ti Dios.

10. Ania dagiti nakaro a problema a napadasan ni Maria Magdalena? (Kitaen met dagiti ladawan.)

¹⁰ Kitaentayo no kasano a tinulongan ni Jesus ti sabali pay nga indibidual—ni Maria Magdalena. Linuganan ti pito a demonio! (Luc. 8:2) Gapu iti dayta, posible a nakabutbuteng ti panagtigtignay ken panagsasaona, isu a likliklikan idi dagiti tattao. Bayat dayta a nakarigrigat a paset ti biagna, sigurado a mabutbuteng. Nariknana met nga awan ti mangipatpateg kenkuana ken awan gawgawayna. Ania ti inaramid ni Jesus? Pinaruarna dagiti demonio a limmugan ken Maria, ket nagbalin a matalek nga adalanna. Ania pay ti inaramid ni Jesus tapno marikna ni Maria Magdalena nga ipatpateg isuna ti Dios?

11. Kasano nga impakita ni Jesus ken Maria Magdalena nga ipatpateg isuna ti Dios? (Kitaen met dagiti ladawan.)

¹¹ Inawis ni Jesus ni Maria Magdalena a makikadua kenkuana a mangasaba iti agduduma a lugar.b Kas resultana, kanayon a nagunggonaan iti panangisuro ni Jesus kadagiti tattao. Nagparang met ni Jesus kenkuana iti mismo nga aldaw a napagungar. Maysa ni Maria kadagiti kaunaan nga adalan a kinasarita ni Jesus iti dayta nga aldaw. Isu pay ketdi ti imbaon ni Jesus a mangipadamag kadagiti apostolna a napagungaren isuna. Ebidensia amin dagita a talaga nga ipatpateg ni Jehova daytoy a babai!—Juan 20:​11-18.

12. Ania ti napadasan ni Lidia isu a nariknana nga awan ti mangay-ayat kenkuana?

¹² Kas iti kasasaad ni Maria Magdalena, adu met ita ti makarikrikna nga awan ti mangay-ayat kadakuada. Kasta ti napadasan ti taga-Spain a sister a ni Lidia. Uray idi maysa pay la a sikog, kayat ni nanangnan nga iparegreg. Ket uray idi ubingen ni Lidia, malaglagipna a baybay-an ni nanangna ken pagsasawanna pay ketdi. Imbaga ni Lidia: “Diak pulos narikna ti ayat ti maysa nga ina. Isu a kayatko koma a marikna a maikariak met a maayat. Ngem gapu ta kanayon nga ibagbaga ken iparparikna ni Nanang a dakesak a tao, panagriknak ket imposible nga adda dagiti mangayat kaniak.”

13. Ania ti nakatulong ken Lidia tapno mariknana nga ipatpateg ni Jehova?

¹³ Simmayaat ti kasasaad ni Lidia idi naammuanna ti kinapudno. Nakatulong met kenkuana ti panagkararag, panagadal, ken ti kinaimbag dagiti kakabsat iti sao ken aramid. Gapu iti dayta, nariknanan nga ipatpateg unay isuna ni Jehova. Imbagana: “Sangkaibaga ni lakayko nga ay-ayatennak unay. Ipalpalagipna met kaniak dagiti nagsasayaat a kualidadko. Kasta met ti ar-aramiden dagiti gagayyemko.” Adda kadi met am-ammom nga agkasapulan iti tulong tapno mariknana nga ipatpateg unay isuna ni Jehova?

KITAEM TI BAGIM A KAS ITI PANANGKITA KENKA NI JEHOVA

14. Kasano a makatulong kenka ti 1 Samuel 16:7 tapno makitam ti bagim a kas iti panangkita kenka ni Jehova? (Kitaen met ti kahon nga “Apay nga Ipatpateg ni Jehova Dagiti Adipenna?”)

¹⁴ Laglagipem a saan a kas iti tao ti panangkita kenka ni Jehova. (Basaen ti 1 Samuel 16:7.) Saanna nga ibatay ti pategmo sigun iti langam, kasasaad ti biagmo, wenno iti naragpatmo nga edukasion. (Isa. 55:​8, 9) Isu a saanmo koma a rukoden ti pategmo sigun iti panangmatmat kenka dagiti tattao no di ket iti panangkita kenka ni Jehova. Adda met dagiti karakter iti Biblia a nakarikna nga awan ti patpategda a kas kada Elias, Noemi, ken Hanna. No basaem ti maipapan kadakuada, makitam a talaga nga impatpateg ida ni Jehova. Mabalinmo met nga isurat dagiti mismo a kapadasam a nariknam a talaga nga ay-ayaten ken ipatpategnaka ni Jehova. Kanayonanna, ag-research-ka kadagiti publikasiontayo kadagiti topiko maipapan iti umiso a panangmatmat iti bagi.c

15. Apay nga imbilang ni Jehova ni Daniel kas “maipatpateg unay”? (Daniel 9:23)

¹⁵ Ipalagipmo iti bagim nga ipatpategnaka ni Jehova gapu iti kinamatalekmo. Posible nga idi dandanin 100 ti tawen ni propeta Daniel, adda tiempo a nariknana met ti ‘kasta unay a bannog’ ken pannakaupay. (Dan. 9:​20, 21) Kasano a pinabileg ni Jehova? Imbaonna ni anghel Gabriel tapno ipalagipna kenkuana nga isu ket “maipatpateg unay” ken nangngeg ti Dios dagiti kararagna. (Basaen ti Daniel 9:23.) Apay nga impatpateg unay ti Dios ni Daniel? Malaksid iti adu a nagsasayaat a kualidad ni Daniel, impatpateg isuna ni Jehova gapu ta nalinteg ken matalek. (Ezek. 14:14) Impaisurat ni Jehova ti maipapan kenkuana iti Saona tapno maliwliwatayo. (Roma 15:4) Dengdenggen met ni Jehova dagiti kararagmo ken ipatpategnaka gapu ta nalinteg ken matalekka kenkuana.—Mik. 6:​8, ftn.; Heb. 6:10.

16. Ania ti makatulong tapno ibilangmo ni Jehova kas nadungngo nga Amam?

¹⁶ Ibilangmo ni Jehova kas nadungngo nga Amam. Saan a dagiti kamalim ti kitkitaen ni Jehova. Imbes ketdi, kayatnaka a tulongan. (Sal. 130:3; Mat. 7:11; Luc. 12:​6, 7) Dayta ti nakatulong iti adu a tattao a nababa ti panagkitkitada iti bagida. Kasta ti narikna ti sister a taga-Spain a ni Eliana. Adun a tawen a pagsasawan ni lakayna isu a nariknana nga awan ti mangay-ayat kenkuana. Imbagana, “No mariknak nga awan serserbik, im-imadyinek nga ub-ubbaennak ni Jehova gapu ta ay-ayatennak ken kayatnak a protektaran.” (Sal. 28:9) Ipalpalagip met ti sister a taga-South Africa a ni Lauren iti bagina: “Ni Jehova a mismo ti nangyasideg kaniak kenkuana babaen ti singdan ni ayat. Adun a tawen a tultulongannak tapno agtalinaedak a nasinged kenkuana. Us-usarennak pay ketdi a tumulong iti dadduma. Gapu ta dagita ti kanayon a pampanunotek, masiguradok a talaga nga ipatpategnak ni Jehova.”—Os. 11:4.

17. Ania ti makatulong tapno makombinsirmo ti bagim nga adda kenka ti parabur ni Jehova? (Salmo 5:12) (Kitaen met ti ladawan.)

¹⁷ Kombinsirem ti bagim nga adda kenka ti parabur ni Jehova. (Basaen ti Salmo 5:12.) Impada ni David ti parabur ni Jehova iti “dakkel a kalasag” a mangprotektar kadagiti nalinteg a tattao. No ammom a parparaburan ken tultulongannaka ni Jehova, maiwaksim iti panunotmo nga awan serserbim. Kasanom nga ammo nga adda kenka ti parabur ni Jehova wenno maparparagsakmo isuna? Kas naammuantayon, us-usaren ni Jehova ti Saona a mangipasigurado kenka nga ay-ayatennaka. Us-usarenna met dagiti panglakayen, nasinged a gagayyemmo, wenno ti dadduma a mangipalagip kenka nga ipatpategnaka. Ania ti aramidem no adda mangparegta kenka?

18. Apay a masapul nga awatem ti pammaregta kenka ti dadduma?

¹⁸ No adda nasayaat nga ibaga dagiti am-ammom ken mangay-ayat kenka, dimo koma ipapan a saan nga agpaypayso ti ibagbagada. Laglagipem a mabalin nga isuda ti us-usaren ni Jehova a mangipasigurado nga adda kenka ti paraburna. Imbaga ti nadakamaten a ni Eliana: “In-inut a nasursurok nga awaten dagiti nagsayaat nga ibagbaga kaniak ti dadduma. Narigat dayta, ngem ammok nga isu ti kayat ni Jehova nga aramidek.” Dakkel met ti naitulong ken Eliana ti naayat a panagregget dagiti panglakayen a tumulong kenkuana. Kas resultana, agserserbi itan kas payunir ken remote volunteer iti Bethel.

19. Apay a masiguradom nga ipatpategnaka ti Dios?

¹⁹ Ipaspasigurado ni Jesus nga ay-ayatennatayo la unay ti nailangitan nga Amatayo. (Luc. 12:24) Masiguradotayo ngarud nga ipatpategnatayo ni Jehova. Ditay koma pulos liplipatan dayta! Aramidentayo met ti amin a kabaelantayo a tumulong iti dadduma tapno mariknada nga ipatpateg ida ti Dios!