“ Taginayonen ti Panagkaykaysa”
PINAREGTA ni apostol Pablo dagiti Kristiano idiay Efeso nga itultuloyda ti ‘agpipinnasensia gapu iti ayat, agkakappiada, ken ikagumaanda a taginayonen ti panagkaykaysa a nagun-odanda babaen ti nasantuan nga espiritu.’—Efe. 4:2, 3.
‘Ti panagkaykaysatayo’ ket gapuanan ti “espiritu.” Kaipapananna nga adda laeng panagkaykaysa gapu iti aktibo a puersa ti Dios—ti nasantuan nga espirituna. Ngem imbaga ni Pablo a masapul a mataginayon dayta a panagkaykaysa. Siasino ti mangaramid iti dayta? Kas Kristiano, masapul nga ikagumaan ti tunggal maysa kadatayo a ‘taginayonen ti panagkaykaysa a nagun-odantayo babaen ti nasantuan nga espiritu.’
Kas panangyilustrar, imadyinem nga adda nangiregalo kenka iti baro a lugan. Asino ti makinresponsabilidad a mangmantener iti dayta a lugan tapno kanayon a nasayaat ti kondisionna? Siempre, sika. Ngem no naperdi gapu ta nabaybay-am, saanmo a mabalin nga ipabasol iti nangiregalo kenka.
Kasta met laeng no maipapan iti panagkaykaysatayo kas Kristiano. Regalo dayta ti Dios ket responsabilidad ti tunggal maysa kadatayo a taginayonen dayta. Isu a no saan a nasayaat ti relasiontayo iti maysa a kabsat, isaludsodtayo iti bagitayo, ‘Ar-aramidek kadi ti amin a kabaelak tapno mataginayon ti panagkaykaysa ti kongregasion?’
“IKAGUMAANYO A TAGINAYONEN” TI PANAGKAYKAYSA
Kas iti imbaga ni Pablo, masapul a pagreggetantayo a taginayonen ti panagkaykaysa. Ket ad-adda a masapul nga aramidentayo dayta no adda kabsat a nakasair iti riknatayo. Ngem kayat kadi a sawen dayta a masapul a kasaritatayo ti tunggal kabsat a nakasair iti riknatayo? Saan met ketdi. Isaludsodtayo iti bagitayo, ‘No kasaritak isuna, agkappiakami ngata wenno kumaro laeng ti situasion?’ No dadduma, baka nasaysayaat no pakawanemon wenno palabsem laengen dayta.—Prov. 19:11; Mar. 11:25.
Isaludsodmo iti bagim, ‘No kasaritak isuna, agkappiakami ngata wenno kumaro laeng ti situasion?’
Kas iti insurat ni apostol Pablo, masapul nga itultuloytayo ti ‘agpipinnasensia gapu iti ayat.’ (Efe. 4:2) Sigun iti maysa a reperensia, dagitoy a sasao ket mabalin met a kaipapananna ti “panangawat iti kinasiasinoda.” Kayatna a sawen a masapul nga akseptarentayo a managbasol dagiti kapammatiantayo a kas kadatayo. Siempre, ikagkagumaantayo amin nga isuot “ti baro a personalidad.” (Efe. 4:23, 24) Ngem awan kadatayo ti naan-anay a makaaramid iti dayta. (Roma 3:23) No bigbigentayo dayta, nalaklakatayo a mapalabas ti kamali ti dadduma, ken agbalintayo a manangpakawan. Makatulong dagita tapno ‘mataginayontayo ti panagkaykaysa a nagun-odantayo babaen ti nasantuan nga espiritu.’
Mataginayontayo ti panagkaykaysa iti uneg ti kongregasion no agpipinnakawantayo ken no palabsentayo dagiti naaramid kadatayo dagiti kakabsat. Ti Griego a sao a naipatarus kas “panagkaykaysa” iti Efeso 4:3 ket naipatarus kas “nagsusuopan” iti Colosas 2:19. Dagiti nagsusuopan ket natibker a tissue a mamagkonektar kadagiti tulang. Kasta met laeng ti panagkaykaysa iti uneg ti kongregasion. Makatulong ti panangtaginayon iti talna ken panangipakita iti ayat kadagiti kakabsat. Iti kasta, agtalinaedtayo a nasinged kadakuada uray no saantayo a kayat ti amin nga ibagbaga wenno ar-aramidenda.
Ania ngarud ti aramidentayo no masaktan, masuron, wenno makaungettayo iti inaramid ti maysa a kabsat? Ikagumaantayo ti agbalin a mannakaawat. Imbes nga agpokustayo iti saan a nasayaat a naaramidna, tarusantayo ketdi no apay a naaramidna dayta. (Col. 3:12) Imperpektotayo amin ken masaktantayo ti sabsabali no dadduma. No sipapanunottayo iti dayta, makatulongtayo tapno ‘mataginayon ti panagkaykaysa a nagun-odantayo babaen ti nasantuan nga espiritu.’