Agkursonadaak iti Kapadak iti Sekso—Kayatna Kadi a Sawen a Maysaak a Homoseksual?
Saan!
Ti Pudno: Ti panagkursonada iti kapadam iti sekso ket aglabasto met laeng.
Kasta ti napadasan ni Lisette, nga agtawen iti 16, a naatrakar idi iti maysa a babai. Kinunana: “Naammuak iti klasemi iti biology a bayat ti kinaagtutubo, agbaliwbaliw ti kaadu ti hormone iti bagi ti maysa a tao. Panagkunak, no ad-adu ti ammo dagiti agtutubo maipapan iti bagida, maawatanda a ti panagkursonada iti kapadada iti sekso ket temporario laeng ken saanda a tumulok nga agbalin a homoseksual.”
Adda pagpilian ti amin nga agtutubo—no tuladenda ti nababa a panangmatmat ti lubong maipapan iti seksualidad wenno no surotenda ti nangato a moral a pagalagadan a nailanad iti Sao ti Dios
Ngem kasano no saan a maikkat ti panagkursonadam iti kapadam iti sekso? Naulpit kadi ti Dios no ibagana iti maysa nga agkursonada iti kaseksona a liklikanna ti homoseksualidad?
No wen ti sungbatmo iti maikadua a saludsod, laglagipem a ti kasta a panagrasrason ket naibatay iti di umiso a kapanunotan a masapul a suroten dagiti tattao ti seksual a tarigagayda. Ti Biblia ipapaayanna dagiti tattao iti dignidad babaen ti panangipanamnamana kadakuada a kabaelanda a labanan dagiti di umiso a seksual a tarigagayda no talaga a kayatda.—Colosas 3:5.
Nainkalintegan ti Biblia. Agpada ti pagalagadan nga ipapaannurotna kadagiti agduyos iti kapadada iti sekso ken dagidiay agduyos iti saanda a kasekso—“adaywanyo ti pannakiabig.” (1 Corinto 6:18) Kinapudnona, minilion a heterosexual (dagidiay agduyos iti saanda a kasekso) a mayat a mangyaplikar iti pagalagadan ti Biblia ti agtepteppel iti laksid ti aniaman a sulisog a mabalin a pakaipasanguanda. Kabaelan met nga aramiden dayta dagidiay agduyos iti kapadada iti sekso no talaga a kayatda a paragsaken ti Dios.—Deuteronomio 30:19.