SALUDSOD DAGITI AGTUTUBO
Kasanoak a Maaddaan iti Interes nga Agehersisio?
Apay nga agehersisioak?
Iti dadduma a pagilian, saan unay nga agwatwatwat dagiti agtutubo, ket mabalin nga agpeggad ti salun-atda. Adda nasayaat a rason a kuna ti Biblia a ‘makagunggona ti pisikal a panagsanay.’ (1 Timoteo 4:8) Panunotem dagiti sumaganad:
No agehersisioka, sumayaat ti riknam. Ti pisikal nga aktibidad ket mangparuar iti endorphin—dagiti kemikal iti utek a mangparelaks ken mangparagsak kenka. Adda dagiti mangibagbaga a ti ehersisio ket natural a pangontra iti liday (antidepressant).
“No agtarayak iti bigbigat, ad-adu ti maaramidak ken naragragsak ti aldawko. Sumayaat ti riknak no agtarayak.”—Regina.
No agehersisioka, sumayaat ti langam. Makatulong ti balanse nga ehersisio tapno pumigsaka, sumayaat ti pammagim, ken dumakkel ti kompiansam.
“Makaparagsak no makaaramidka iti sangapulo a pull-up. Idi napan a tawen, marigatanak a mangaramid iti uray maysa la a pull-up! Kangrunaan iti amin, ammok nga ay-aywanak ti salun-atko.”—Olivia.
No agehersisioka, mabalin nga umatiddog ti biagmo. Sumalun-at ti puso ken baram no aktiboka nga agehersisio. Makatulong met dayta tapno maliklikan ti sakit iti urat ti puso—a kangrunaan a makagapu iti ipapatay dagiti lallaki ken babbai.
“No addaantayo iti nasayaat a rutina nga agehersisio, ipakpakitatayo iti Namarsua kadatayo nga ipatpategtayo ti bagi nga intedna kadatayo.”—Jessica.
Laglagipem: Dakkel ti maitulong ti ehersisio iti salun-atmo iti masanguanan, ken mabalin a dakkel ti maitulongna itan. Kuna ti agtutubo a ni Tonya: “Dimo pulos ibaga, ‘Diak la koman napan nag-hiking wenno nagtaray.’ Awan ti pagbabawyak no lipatek dagiti pambarko ket agehersisioak.”
Ti lugan a mabaybay-an ket saanton nga agandar; kasta met laeng ti mapasamak iti bagim no saanka nga agehersisio
Ania ti manglaplapped kaniak?
Dagitoy ti sumagmamano a mabalin a makalapped:
Awan ti maganabko. “No ubingka pay, dimo mapanunot a matayka. Nagrigat a panunoten ti tiempo nga addanton sakitmo. Para kenka, dagiti laeng natataengan ti adda sakitna.”—Sophia.
Awan ti panawenko. “No adu ti ob-obraek, masapul nga iwayaak ti mangan ken maturog, ngem nagrigat nga iwayaan ti agehersisio.”—Clarissa.
Awan ti membership-ko iti gym. “Nagngina ti magasto tapno sumayaat ti pammagim—masapul nga agbayadka tapno makapanka iti gym!”—Gina.
Panunotem:
Ania ti kangrunaan a manglaplapped kenka nga agehersisio? Narigat a pagballigian dayta ngem sulit ti resultana.
Kasanoak a maaddaan iti umdas nga ehersisio?
Dagitoy ti sumagmamano a singasing:
Responsabilidadmo ti salun-atmo.—Galacia 6:5.
Dika agpampambar. (Eclesiastes 11:4) Kas pagarigan, saan a kasapulan a mangalaka iti membership iti gym tapno makaehersisioka. Kitaem no ania nga aktibidad ti magustuam ket aramidem dayta a regular.
Tapno makaalaka iti ideya, saludsodem no ania ti ar-aramiden ti dadduma tapno makaehersisioda.—Proverbio 20:18.
Mangaramidka iti espesipiko nga eskediul. Mangikeddengka iti kalat sa irekordmo ti rimmang-ayam tapno ad-adda a magustuam ti agehersisio.—Proverbio 21:5.
Makitulagka iti kaduam nga agehersisio. Ti kaduam nga agehersisio ti mangsuporta ken mangparegta kenka a mangitultuloy iti rutinam.—Eclesiastes 4:9, 10.
Namnamaem nga adda makalapped no dadduma iti panagehersisiom, ngem ituloymo latta ti agehersisio.—Proverbio 24:10.
Agbalin a balanse
Ibagbaga ti Biblia kadagiti lallaki ken babbai nga agbalinda a ‘natimbeng iti ugali.’ (1 Timoteo 3:2, 11) Isu nga agbalinka a balanse iti panagehersisio. Masansan nga awan magangganab dagiti tattao a sobra ti panagehersisioda. “Diak magustuan ti lalaki a dakkel ti maselna ngem bassit ti utekna,” kuna ti agtutubo nga agnagan Julia.
Agannadka kadagiti islogan a mangparegta kenka nga agehersisio iti nalablabes ngem iti kabaelam. Mabalin a makadangran iti bagim ti kasta a balakad ket mabaybay-am dagiti “napatpateg a bambanag” iti biag.—Filipos 1:10.
Maysa pay, dagiti banag a mangparegta koma kenka nga agehersisio ket mangupay no dadduma. Kuna ti agtutubo a ni Vera: “Adu a babbai ti mangiduldulin iti piktiur dagiti tattao a kayatda a tuladen. Kitaenda dagita no masadutda nga agehersisio. Ngem imbes a maparegtada nga agehersisio, ikomparada ti bagida kadagita a tattao ket maupaydan. Nasaysayaat a pagbalinem a kalat a pasayaaten ti salun-atmo, saan laeng a ti langam.”