Önnur Mósebók
13 Jehóva hélt áfram að tala til Móse og sagði: 2 „Helgaðu* mér alla karlkyns frumburði* meðal Ísraelsmanna. Það fyrsta sem fæðist, bæði af mönnum og skepnum, tilheyrir mér.“+
3 Móse sagði þá við fólkið: „Munið eftir þessum degi þegar þið fóruð frá Egyptalandi,+ úr þrælahúsinu, því að Jehóva leiddi ykkur út héðan með máttugri hendi.+ Þess vegna megið þið ekki borða neitt sem er sýrt. 4 Á þessum degi í abíbmánuði*+ farið þið út úr Egyptalandi. 5 Guð sór forfeðrum þínum að gefa þér+ land Kanverja, Hetíta, Amoríta, Hevíta og Jebúsíta,+ land sem flýtur í mjólk og hunangi.+ Þegar Jehóva hefur leitt ykkur inn í þetta land skuluð þið halda þessa hátíð í þessum mánuði. 6 Þú átt að borða ósýrt brauð+ í sjö daga og á sjöunda deginum skaltu halda hátíð, Jehóva til heiðurs. 7 Það á að borða ósýrt brauð þessa sjö daga.+ Ekkert sýrt má fyrirfinnast hjá þér+ og ekkert súrdeig vera til innan landamæra þinna. 8 Á þeim degi skaltu segja börnum þínum: ‚Ég geri þetta vegna þess sem Jehóva gerði fyrir mig þegar ég fór frá Egyptalandi.‘+ 9 Og þetta verður þér tákn á hendi þinni og merki til minningar á enni þínu*+ svo að lög Jehóva verði á vörum* þínum því að Jehóva leiddi þig út úr Egyptalandi með máttugri hendi. 10 Þú skalt halda þetta ákvæði á tilsettum tíma ár eftir ár.+
11 Þegar Jehóva leiðir þig inn í land Kanverja sem hann sór þér og forfeðrum þínum að gefa þér+ 12 skaltu gefa Jehóva alla frumgetna drengi* og alla karlkyns frumburði af búfé þínu sem þú eignast. Þeir tilheyra Jehóva.+ 13 Alla frumburði asna áttu að kaupa lausa með sauðkind en ef þú leysir þá ekki skaltu hálsbrjóta þá. Og alla frumgetna syni skaltu kaupa lausa.+
14 Ef börnin þín spyrja þig síðar: ‚Hvað merkir þetta?‘ skaltu svara þeim: ‚Jehóva leiddi okkur með máttugri hendi út úr Egyptalandi, út úr þrælahúsinu.+ 15 Þegar faraó neitaði okkur með þrjósku um að fara+ banaði Jehóva öllum frumburðum í Egyptalandi, bæði frumburðum manna og skepna.+ Þess vegna færum við Jehóva alla karlkyns frumburði* að fórn og leysum alla frumgetna syni okkar.‘ 16 Þetta á að vera tákn á hendi þinni og enni*+ því að Jehóva leiddi okkur með máttugri hendi út úr Egyptalandi.“
17 Þegar faraó leyfði fólkinu að fara lét Guð það ekki fara leiðina um land Filistea þó að hún væri styst því að hann sagði: „Fólkið gæti skipt um skoðun og snúið aftur til Egyptalands þegar hætta er á átökum.“ 18 Guð lét því fólkið leggja lykkju á leið sína og fara um óbyggðirnar við Rauðahaf.+ Ísraelsmenn fóru fylktu liði út úr Egyptalandi. 19 Móse tók bein Jósefs með sér því að Jósef hafði látið afkomendur Ísraels sverja hátíðlegan eið og sagt: „Guð mun gefa ykkur gaum. Lofið mér að þið takið bein mín með ykkur héðan.“+ 20 Þeir fóru frá Súkkót og slógu upp tjöldum í Etam við útjaðar óbyggðanna.
21 Jehóva fór á undan þeim á daginn í skýstólpa til að vísa þeim veginn+ og um nætur í eldstólpa til að lýsa þeim svo að þeir gætu ferðast bæði að degi til og nóttu.+ 22 Skýstólpinn vék ekki frá fólkinu á daginn né eldstólpinn á nóttinni.+