Einstakur viðburður — ætlarðu að mæta?

EINN ógleymanlegan dag fyrir meira en 3500 árum lét Jehóva Guð sérhverja fjölskyldu Ísraelsmanna, sem voru þrælar í Egyptalandi, slátra lambi eða kiðlingi og rjóða blóðinu á dyrastafi og dyratré húsa sinna. Þessa sömu nótt fór engill Guðs fram hjá þeim húsum sem þannig voru merkt en deyddi frumburðina á heimilum Egypta. Ísraelsmenn voru síðan leystir úr ánauðinni. Gyðingar hafa æ síðan minnst þessa með því að halda páska.

Um leið og Jesús Kristur hafði haldið síðustu páskana með postulunum stofnaði hann til minningarmáltíðar um fórnardauða sinn. Hann rétti postulunum ósýrt brauð og sagði: „Takið og etið, þetta er líkami minn.“ Síðan rétti hann þeim vínbikar og sagði: „Drekkið allir hér af. Þetta er blóð mitt, blóð sáttmálans, úthellt fyrir marga til fyrirgefningar synda.“ Hann bætti við: „Gjörið þetta í mína minningu.“ (Matteus 26:26-28; Lúkas 22:19, 20) Þannig bauð Jesús fylgjendum sínum að halda þessa hátíð til minningar um dauða sinn.

Í ár ber minningarhátíðina upp á miðvikudaginn 19. apríl eftir sólsetur. Vottar Jehóva um heim allan koma saman þetta sérstaka kvöld til að halda þessa minningarhátíð á sama hátt og Jesús bauð. Við hvetjum þig til að koma líka og fylgjast með. Hafðu samband við votta Jehóva þar sem þú býrð til að fá upplýsingar um samkomustað og -tíma.