Tilkynningar

◼ Ritatilboðið í janúar: Bókin Þú getur lifað að eilífu í paradís á jörð. Febrúar: Bókin Lífið — varð það til við þróun eða sköpun? Mars: Bókin Þekking sem leiðir til eilífs lífs. Leggið áherslu á að koma af stað heimabiblíunámskeiðum. Apríl: Einstök tölublöð af Varðturninum og Vaknið!

◼ Allir skírðir boðberar, sem viðstaddir verða á þjónustusamkomunni í vikunni er hefst 5. janúar, fá blóðkort (Upplýsingar um læknismeðferð/Blóðgjöf óheimil) og Nafnskírteini fyrir börn sín.

◼ Opinber fyrirlestur farandhirðis þegar hann heimsækir söfnuðina frá og með 1. febrúar ber heitið „Hefurðu viðhorf Guðs til lífsins?“

◼ Söfnuðir ættu að gera hentugar ráðstafanir til að halda minningarhátíðina hátíðlega laugardaginn 11. apríl á þessu ári, eftir sólarlag. Enda þótt ræðan geti hafist fyrir sólarlag ætti ekki að bera fram brauðið og vínið fyrr en sólin er sest. Sólsetur á Reyðarfirði er kl. 20:21, á Akureyri kl. 20:39 og á Suðurlandi og suðvesturhorni landsins er sól alls staðar sest kl. 20:51. Þótt æskilegt sé að hver söfnuður haldi sína eigin minningarhátíð er ekki víst að það sé alltaf gerlegt. Á stöðum þar sem nokkrir söfnuðir nota venjulega sama ríkissal gæti ef til vill einn söfnuður eða fleiri orðið sér úti um annað húsnæði þetta kvöld. Minningarhátíðin ætti ekki að hefjast það seint að þeim sem nýlega hafa fengið áhuga reynist óþægilegt að sækja hana. Auk þess ætti ekki að vera svo stutt milli samkomna að lítill sem enginn tími gefist fyrir og eftir hátíðina til að heilsa gestum, gera ráðstafanir til að veita sumum frekari andlega aðstoð eða almennt til að uppörva hver annan. Eftir að öldungarnir hafa hugleitt vandlega allar hliðar málsins ættu þeir að ákveða hvaða fyrirkomulag sé best til þess fallið að hjálpa þeim sem sækja minningarhátíðina að hafa sem mest gagn af þessari kvöldstund.

◼ Sérræðan fyrir minningarhátíðartímabilið 1998 verður flutt sunnudaginn 29. mars. Ræðuuppkast verður sent. Ef farandhirðisheimsókn stendur yfir þá helgi ætti viðkomandi söfnuður að flytja sérræðuna viku síðar. Enginn söfnuður ætti að flytja sérræðuna fyrir 29. mars 1998.

◼ Öldungaráðið ætti að þekkja til eftirfarandi breytinga sem nauðsynlegt er að gera þegar söfnuðurinn sækir eins eða tveggja daga mót: Þegar sérstakur mótsdagur er framundan ætti söfnuðurinn að halda allar venjulegar samkomur í vikunni að því undanskildu að opinberi fyrirlesturinn og Varðturnsnámið fellur niður. Þegar um svæðismót er að ræða fellir söfnuðurinn líka niður Guðveldisskólann og þjónustusamkomuna; aðeins safnaðarbóknámið er haldið þá viku.

◼ Á hverju ári hlakka tilbiðjendur Jehóva um heim allan til að fjölmenna á umdæmismót. Þeim er innanbrjósts eins og trúföstum þjónum Guðs í Forn-Ísrael sem sungu orðin í Sálmi 122 er þeir héldu til Jerúsalem til að tilbiðja hann. Fyrsta vers sálmsins segir: „Ég varð glaður, er menn sögðu við mig: ‚Göngum í hús [Jehóva].‘“ Við slík tækifæri sjáum við líka enn betur hvernig hin innblásnu orð í Jesaja 2:3, 4 eru að uppfyllast. Í ár höfum við sérstaka ástæðu til að fagna af því að mótin verða með alþjóðlegu yfirbragði þar eð þúsundir mótsgesta hvaðanæva úr heimi munu sækja sum stærri umdæmismótin. Trúboðar, sem fara til síns heima að heimsækja ættingja og vini, verða á mörgum þeirra. Á dagskrám slíkra móta verða frásagnir úr boðunarstarfinu og greint verður frá framvindu prédikunarstarfs Guðsríkis í öðrum löndum. Hið alþjóðlega yfirbragð verður þó greinilegt á öllum umdæmismótum í ýmsum dagskrárliðum og frásögnum. Umdæmismótið 1998 verður haldið dagana 7.-9. ágúst í Íþróttahúsinu Digranesi, Kópavogi, og stendur dagskráin frá kl. 9:30 til 17:00 á föstudag og laugardag en kl. 9:30 til 16:00 á sunnudag. Stef mótsins er „Lífsvegur Guðs.“