Lifum í samræmi við vígsluheit okkar
1 Hvort sem þú skírðist nýlega eða fyrir mörgum áratugum manstu sennilega enn þá eftir þessum mikilvæga tímapunkti í lífinu. Skírnin er ekki lokatakmark heldur upphaf nýrrar lífsstefnu sem einkennist af heilshugar þjónustu sem getur varað ævilangt. (1. Jóh. 2:17) Hvað felst í því að lifa í samræmi við vígsluheit sitt?
2 Fylgjum fordæmi Krists: Þegar Jesús skírðist ‚hóf hann starf sitt‘ og fór að flytja „fagnaðarerindið um Guðs ríki.“ (Lúk. 3:23; 4:43) Þegar við gefum tákn um vígslu okkar við Jehóva með því að skírast verðum við líka fullgildir þjónar fagnaðarerindisins. Þó að mikill tími og kraftar fari kannski í það að sjá fyrir lífsnauðsynjum er kristna þjónustan aðalstarf okkar. (Matt. 6:33) Þeir sem eru vígðir Guði reyna ekki að afla sér auðæfa eða upphefðar heldur leitast þeir við að ‚vegsama þjónustu sína‘ eins og Páll postuli gerði. (Rómv. 11:13) Meturðu mikils þann heiður að þjóna Jehóva og gerirðu allt sem þú getur til að sýna það í verki?
3 Við verðum að ‚standa gegn djöflinum‘ eins og Jesús gerði. (Jak. 4:7) Eftir að Jesús lét skírast freistaði Satan hans. Vígðir þjónar Jehóva nú á dögum eru einnig skotspónn Satans. (Lúk. 4:1-13) Við lifum í heimi Satans og verðum því að hafa sjálfsaga og forðast allt sem gæti spillt huga okkar eða hjarta. (Orðskv. 4:23; Matt. 5:29, 30) Kristnir menn eru minntir á að þeir geti ekki „tekið þátt í borðhaldi Drottins og borðhaldi illra anda.“ (1. Kor. 10:21) Þess vegna verðum við að vera á varðbergi gagnvart óheilnæmri skemmtun, slæmum félagsskap og hættum á Netinu. Við verðum líka að forðast allt efni frá fráhvarfsmönnum. Ef við erum vakandi fyrir þessum og öðrum kænskubrögðum Satans auðveldar það okkur að lifa í samræmi við vígsluheit okkar.
4 Nýtum okkur það sem Guð lætur í té: Jehóva hefur gefið okkur orð sitt og kristna söfnuðinn til að hjálpa okkur að lifa í samræmi við vígsluheit okkar. Gerðu biblíulestur og bænir til Jehóva að venju í þínu daglega lífi. (Jós. 1:8; 1. Þess. 5:17) Hafðu yndi af safnaðarsamkomum. (Sálm. 122:1) Hafðu félagsskap við þá sem óttast Jehóva og varðveita fyrirmæli hans. — Sálm. 119:63.
5 Með hjálp Guðs getur þú lifað í samræmi við vígsluheit þitt og haft ánægju af því að þjóna honum að eilífu. — Sálm. 22:27, 28; Fil. 4:13.