Menntun til lífs
1 Það er sannarlega góð tilfinning að sjá gleðina sem skín úr augum fólks þegar það skilur sannleikann í orði Guðs. Það veitir okkur sanna ánægju að færa öðrum þekkingu á Guði og fyrirætlun hans með manninn. Menntun af þessu tagi getur fært mönnum eilíft líf. — Jóh. 17:3.
2 Betri menntun: Nú til dags er hægt að mennta sig í öllu mögulegu og eftir öllum hugsanlegum leiðum. (Préd. 12:12) En slík menntun kemst ekki í hálfkvisti við „stórmerki Guðs“. (Post. 2:11) Menntunin, sem heimurinn býður upp á, hefur ekki fært mannkynið nær skaparanum eða upplýst það um fyrirætlanir hans. Hún hefur ekki hjálpað fólki að skilja hvað gerist við dauðann eða hvers vegna það eru svona miklar þjáningar í heiminum. Hún hefur ekki gefið mönnum von. Hún hefur ekki hjálpað þeim að bæta fjölskyldulífið. Það er aðeins með menntun frá Guði sem við fáum raunsönn svör við mikilvægustu spurningum lífsins.
3 Menntunin frá Guði bætir siðgæði fólks en slíka menntun vantar sárlega í heiminum. Kennslan frá orði Guðs upprætir kynþáttafordóma, ættflokkahygli og þjóðernishyggju úr hjörtum þeirra sem taka við henni. (Hebr. 4:12) Hún hefur fengið fólk til að láta af hvers konar ofsa og ‚íklæðast hinum nýja manni‘. (Kól. 3:9-11; Míka 4:1-3) Enn fremur hefur menntunin frá Guði gefið milljónum manna styrk til að láta af rótgrónum siðum og eiginleikum sem Guð hefur vanþóknun á. — 1. Kor. 6:9-11.
4 Áríðandi menntun: Kennari okkar, Jehóva Guð, lætur okkur vita á hvaða tímum við lifum. Í spádómum hans eru upplýsingar um nútímann sem þarf að boða um allan heim. (Opinb. 14:6, 7) Kristur ríkir á himnum, heimsveldi falstrúarbragðanna verður bráðlega afmáð og Guðsríki er í viðbragðsstöðu til að ryðja öllum jarðneskum stjórnum úr vegi. (Dan. 2:44; Opinb. 11:15; 17:16) Það er því áríðandi að fólk viðurkenni ríkjandi konung Guðsríkis, fari út úr Babýlon hinni miklu og ákalli nafn Jehóva í trú. (Sálm. 2:11, 12; Rómv. 10:13; Opinb. 18:4) Gerum okkar ýtrasta til að færa öðrum menntunina sem er til lífs.