Hljóðupptökur – hvernig getum við notað þær?

1. Hvaða gagnlega efni höfum við aðgang að, auk ritaðs máls?

¹ Margir hafa ánægju af að nota jw.org til að lesa fögur sannleiksorð. (Préd. 12:10) En hefur þú nýtt þér hljóðupptökurnar? Við getum notað þær til að hlusta á sumt efni á vefsetri okkar. Hvernig geta þessar hljóðupptökur gagnast okkur?

2. Hvernig getum við notað hljóðupptökur í sjálfsnámi okkar eða fjölskyldunáminu?

² Í sjálfsnámi okkar eða fjölskyldunáminu: Við getum nýtt tíma okkar betur með því að hlusta á hljóðupptökur af biblíutengdum ritum þegar við erum á ferðalagi eða sinnum daglegum störfum. (Ef. 5:15, 16) Við getum gert tilbeiðslustund fjölskyldunnar fjölbreyttari með því að hlusta á hljóðupptökur og fylgjast með í eigin útgáfu af viðkomandi riti. Það er sérstaklega gagnlegt að nota hljóðupptökur í sjálfsnámi sínu ef maður vill taka framförum í lestri eða er að læra nýtt tungumál.

3. Hverjir á okkar svæði gætu haft gagn af því að hlusta á hljóðupptökur?

³ Fyrir boðunarstarfið: Fólk á starfssvæði okkar, sem finnst það of upptekið til að lesa, hefur kannski áhuga á að hlusta á hljóðupptökur. Við gætum líka hitt fólk sem talar annað tungumál og myndi frekar hlusta ef það heyrði boðskapinn um ríki Guðs á ,móðurmáli‘ sínu. (Post. 2:6-8) Sums staðar er það mikilvægur þáttur í menningunni að hlusta. Tökum dæmi. Hjá hmong-þjóðflokknum er rík hefð fyrir því að segja yngri kynslóðum sögu þjóðarinnar sem festist býsna vel í minni unga fólksins. Í mörgum menningarsamfélögum í Afríku hefur fólk ánægju af að hlusta á sögur og fræðast.

4. Hvaða spurninga gætum við spurt okkur í tengslum við að ná til fólks á starfssvæði okkar?

⁴ Gæti verið gagnlegt að spila sýnishorn af hljóðupptöku á tungumáli húsráðanda á þínu starfssvæði? Gæti einhver haft gagn af hljóðupptöku af riti sem við myndum senda honum með tölvupósti? Gætum við brennt hljóðupptöku af riti á geisladisk og gefið áhugasömum húsráðanda og kannski látið prentuðu útgáfuna fylgja með? Allar heilar rafrænar bækur, bæklingar, blöð eða smárit, sem við gefum fólki í boðunarstarfinu, má telja sem dreifingu. Hljóðupptökurnar eru gerðar til þess að við getum notað þær í sjálfsnámi okkar og til að sá frækornum sannleikans. – 1. Kor. 3:6.