Undir stjórn Guðsríkis verður „friður og farsæld“

Brátt mun langþráð ríki Guðs, heimsstjórn stofnsett af Guði, koma á friði og einingu um allan heim. „Friður og farsæld“ mun blómstra eins og lofað er í Sálmi 72:7. En hvenær tekur Guðsríki völdin? Hvernig tekur það völdin? Og hvernig getur þú notið góðs af því?

HVENÆR KEMUR RÍKI GUÐS?

Biblían sagði fyrir um áhrifamikla atburði sem myndu benda til þess að ríki Guðs kæmi bráðlega. Þessir atburðir mynda samsett „tákn“ – meðal annars stríðsátök á heimsvísu, hungur, sjúkdómar, jarðskjálftar og aukið lögleysi. – Matteus 24:3, 7, 12; Lúkas 21:11; Opinberunarbókin 6:2-8.

Í öðrum spádómi segir: „Á síðustu dögum munu koma örðugar tíðir. Menn verða sérgóðir, fégjarnir ... óhlýðnir foreldrum, vanþakklátir, guðlausir, kærleikslausir, ósáttfúsir, rógberandi, taumlausir, grimmir og andsnúnir öllu góðu ... drambsamir og elska munaðarlífið meira en Guð.“ (2. Tímóteusarbréf 3:1-4) Auðvitað hafa alltaf einhverjir hegðað sér svona en nú er slík hegðun orðin almenn.

Þessir spádómar tóku að uppfyllast árið 1914. Sagnfræðingar, stjórnmálamenn og rithöfundar hafa tjáð sig um það hvernig heimurinn breyttist það ár. Danski sagnfræðingurinn Peter Munch skrifaði: „Það var vendipunktur í mannkynssögunni þegar styrjöldin braust út árið 1914. Eftir jákvætt framfaratímabil ... tók við tímabil hörmunga, hryllings og haturs þar sem óöryggi var allsráðandi.“

Þetta ástand er þó eins og stormurinn á undan logninu. Það sýnir að Guðsríki tekur bráðum stjórnina yfir jörðinni. Þegar Jesús talaði um tákn endalokatímans benti hann einnig á jákvæða hlið þess: „Fagnaðarerindið um ríkið verður prédikað um alla heimsbyggðina til þess að allar þjóðir fái að heyra það. Og þá mun endirinn koma.“ – Matteus 24:14.

Þetta fagnaðarerindi er aðalboðskapur Votta Jehóva. Helsta rit þeirra ber heitið Varðturninn kunngerir ríki Jehóva. Það fjallar reglulega um hverju Guðsríki mun koma til leiðar fyrir mannkynið og jörðina.

HVERNIG TEKUR GUÐSRÍKI VÖLDIN?

Svarið felur í sér eftirfarandi fjögur atriði:

1. Guðsríki mun ekki nota stjórnmálaleiðtoga þessa heims.

2. Stjórnmálaleiðtogar heimsins munu snúast gegn Guðsríki í tilraun sinni til að halda völdum. – Sálmur 2:2-9.

3. Guðsríki mun þurfa að eyða þeim ríkisstjórnum sem vilja halda áfram að ríkja yfir mannkyninu. (Daníel 2:44; Opinberunarbókin 19:17-21) Þetta lokastríð, sem hefur áhrif á allan heiminn, er kallað Harmagedón. – Opinberunarbókin 16:14, 16.

4. Allir þeir sem lúta fúslega stjórn Guðsríkis fá vernd í gegnum Harmagedón inn í friðsaman nýjan heim. Biblían kallar þá ,mikinn múg‘ og þeir verða líklega í milljónatali. – Opinberunarbókin 7:9, 10, 13, 14.

HVERNIG GETUM VIÐ NOTIÐ GÓÐS AF STJÓRN GUÐSRÍKIS?

Menntun er fyrsta skrefið til að verða þegn Guðsríkis. Jesús sagði í bæn til Guðs: „Það er hið eilífa líf að þekkja þig, hinn eina sanna Guð, og þann sem þú sendir, Jesú Krist.“ – Jóhannes 17:3.

Við njótum góðs af því á marga vegu að kynnast Jehóva Guði persónulega. Lítum á tvennt. Í fyrsta lagi byggjum við upp sterka trú á hann. Sú trú byggist á sönnunum og sannfærir okkur um að Guðsríki sé raunverulegt og að það taki brátt völdin. (Hebreabréfið 11:1) Í öðru lagi eykst kærleikur okkar til Guðs og náungans. Kærleikur til Guðs knýr okkur til að hlýða honum fúslega. Kærleikur til náungans fær okkur til að fara eftir gullnu reglunni sem Jesús kenndi. Hún hljómar svona: „Eins og þér viljið að aðrir menn geri við yður, svo skuluð þér og þeim gera.“ – Lúkas 6:31.

Skapari okkar vill okkur allt það besta, rétt eins og kærleiksríkur faðir. Hann vill að við njótum þess sem Biblían kallar „hið sanna líf“. (1. Tímóteusarbréf 6:19) Lífið nú á dögum er ekki „hið sanna líf“. Milljónir manna sjá lítinn tilgang með lífinu og margir þurfa að hafa mikið fyrir því að komast af. Til að fá innsýn í „hið sanna líf“ skulum við skoða sumt af því sem Guðsríki mun gera fyrir þegna sína.