HEIMUR Í UPPNÁMI

3 | Verndaðu samböndin við þá sem standa þér nærri

HVERS VEGNA ER ÞAÐ MIKILVÆGT?

Vaxandi kvíði yfir glundroða heimsins getur valdið því að fólk vanræki óafvitandi samskiptanet sitt.

Fólki hættir til að einangra sig frá vinum sínum.
Hjón verða þrætugjarnari.
Foreldrar gefa lítinn eða engan gaum að kvíða barna sinna.

Það sem þú ættir að vita

Vinátta er nauðsynleg fyrir heilsu þína og jafnvægi, sér í lagi á erfiðum tímum.
Álagið vegna glundroða heimsins getur reynt á fjölskyldulíf þitt með óvæntum hætti.
Óhugnanlegar fréttir gætu haft meiri áhrif á börnin þín en þú gerir þér grein fyrir.

Það sem þú getur gert núna

Biblían segir: „Sannur vinur elskar alltaf og er sem bróðir á raunastund.“ – Orðskviðirnir 17:17.

Hugsaðu til einhvers sem er hjálpsamur og getur gefið hagnýt ráð. Bara það að vita að einhverjum er annt um þig getur gefið þér styrk til að horfast í augu við áskoranir dagsins.

TEKIST Á VIÐ VANDANN – Gagnleg ráð

Á tímum glundroða skaltu varðveita sambönd þín með því að fylgja þessum hagnýtu ráðum.

STYRKTU HJÓNABAND ÞITT

Styrktu hjónaband þitt

Biblían segir: „Betri eru tveir en einn … Ef annar þeirra dettur getur hinn reist félaga sinn á fætur.“ (Prédikarinn 4:9, 10) Hjón ættu að vinna saman eins og flugstjóri og aðstoðarflugstjóri sem vinna saman en forðast það að vera eins og tvær stríðsþotur sem stefna hvor gegn annarri.

Verið staðráðin í að fá ekki útrás fyrir streitu ykkar hvort á öðru. Þolinmæði og umburðarlyndi fleyta ykkur langleiðina.
Ræðið í það minnsta einu sinni í viku um mál sem gæti þurft að leysa. Munið eftir að beina sjónum að vandanum en ekki hvort gegn öðru.
Takið ykkur tíma til að gera hluti saman sem þið njótið bæði.
Rifjið upp góðar stundir sem þið hafið átt saman til dæmis með því að skoða myndir af brúðkaupi ykkar eða rifja upp aðrar góðar minningar.

„Hjón eru kannski ekki sammála um allt en það þýðir ekki að þau geti ekki verið teymi. Hjón geta tekið sameiginlega ákvörðum og síðan unnið saman að því að hún verði að veruleika.“ – David.

VARÐVEITTU VINÁTTUBÖND ÞÍN

Varðveittu vináttubönd þín

Auk þess að þiggja stuðning frá vinum skaltu hugsa um leiðir til að veita stuðning. Þegar þú styrkir aðra styrkist þú líka sjálfur.
Hafðu daglega samband við einhverja af vinum þínum til að spyrja hvernig þeim gengur.
Spyrðu vini þína hvernig þeir hafi tekist á við vanda sem svipar til þess sem þú ert að fást við.

„Þegar þú sérð ekki út úr vandamálunum geta vinirnir hjálpað þér að ná áttum. Þeir ýta við þér í rétta átt, þó ekki sé með öðru en að minna þig á það sem þú veist nú þegar. Vinum er annt um þig og þeir vita að þér er annt um þá.“ – Nicole.

VEITTU BÖRNUM ÞÍNUM STUÐNING

Veittu börnum þínum stuðning

Biblían segir: Vertu „fljótur til að heyra, seinn til að tala“. (Jakobsbréfið 1:19) Það má vel vera að börnin þín séu í fyrstu hikandi við að tjá ótta sinn og áhyggjur, en ef þú hlustar á þau af þolinmæði hjálparðu þeim að opna sig.

Skapaðu umhverfi sem gerir börnunum auðvelt að tjá sig frjálslega. Sum börn eiga auðveldara með að tjá sig þegar þau eru afslöppuð, eins og í bíltúr eða í gönguferð, frekar en þegar þau sitja andspænis foreldri sínu.
Passaðu upp á að börnin þín sjái ekki of mikið af fréttum af hræðandi atburðum.
Segðu barninu hvað þú hefur gert til að stuðla að öryggi fjölskyldunnar.
Gerðu viðbragðsáætlun ef neyðartilfelli skyldi skapast og æfðu hana með börnum þínum.

„Talaðu við börnin þín og leyfðu þeim að segja frá líðan sinni. Þau gætu verið að fela ótta sinn, kvíða eða reiði. Segðu þeim að þú upplifir sömu tilfinningar og líka hvernig þú hefur tekist á við þær.“ – Bethany.