13. kafli
Mikill múgur frammi fyrir hásæti Jehóva
1. (a) Hvað þarf að gerast áður en þjónar Guðs fyrir daga Krists og hinar 144.000 hljóta laun sín? (b) Hvaða möguleika á „mikill múgur“ fólks sem er uppi núna?
DYGGIR þjónar Guðs allt frá Abel til Jóhannesar skírara lögðu sig alla fram um að gera vilja Guðs. En allir dóu þeir og bíða þess að rísa upp hér á jörð í nýjum heimi Guðs. Hinar 144.000, sem munu stjórna með Kristi í ríkinu á himnum, verða líka að deyja til að hljóta þá umbun sem bíður þeirra. En í Opinberunarbókinni 7:9 kemur fram að á síðustu dögum yrði til „mikill múgur“ af öllum þjóðum sem myndi aldrei deyja heldur ætti í vændum eilíft líf á jörð. Tilheyrir þú þessum hópi?
Hver er múgurinn mikli?
2. Lýstu hvernig þjónar Guðs skildu hver væri múgurinn mikli í Opinberunarbókinni 7:9.
2 Árið 1923 gerðu þjónar Jehóva sér grein fyrir því að ‚sauðirnir‘ í dæmisögu Jesú í Matteusi 25:31-46 og ‚aðrir sauðir‘, sem nefndir eru í Jóhannesi 10:16, táknuðu fólk sem fengi tækifæri til að lifa að eilífu á jörðinni. Árið 1931 varð þjónum Guðs ljóst að þeir sem fá merki á enni sér og talað er um í Esekíel 9:1-11 tákni hópinn sem á von um að lifa á jörð. Og árið 1935 skildu þeir að múgurinn mikli væri hluti hópsins sem Jesús kallaði aðra sauði. Núna telst þessi múgur í milljónum.
3. Af hverju merkja orðin „frammi fyrir hásætinu“ ekki að múgurinn mikli sé á himnum?
3 Múgurinn mikli í sýn Jóhannesar í Opinberunarbókinni 7:9 er ekki á himnum. Múgurinn þarf ekki að vera þar til að standa „frammi fyrir hásætinu“, það er að segja hásæti Guðs. Hann er einfaldlega í augsýn Guðs. (Sálmur 11:4) Sjá má að múgurinn mikli fer ekki til himna með því að bera þennan ótilgreinda fjölda, „sem enginn gat tölu á komið“, saman við töluna í Opinberunarbókinni 7:4-8 og 14:1-4. Þar segir að 144.000 séu leystir út frá jörðinni og fari til himna.
4. (a) Hvað er þrengingin sem múgurinn mikli lifir af? (b) Hverjir tilbiðja Guð ásamt múginum mikla samanber Opinberunarbókina 7:11, 12?
4 Í Opinberunarbókinni 7:14 segir um múginn mikla: „Þetta eru þeir, sem komnir eru úr þrengingunni miklu.“ Þeir komast lifandi úr mestu hörmungum mannkynssögunnar. (Matteus 24:21) Þegar þeir þakka Guði og Kristi hjálpræði sitt taka allir trúir þjónar Guðs á himnum undir með þeim og segja: „Amen, lofgjörðin og dýrðin, viskan og þakkargjörðin, heiðurinn og mátturinn og krafturinn sé Guði vorum um aldir alda. Amen.“ — Opinberunarbókin 7:11, 12.
Þeir sýna sig verðuga þess að bjargast
5. Hvernig getum við kynnt okkur hvað við þurfum að gera til að tilheyra múginum mikla?
5 Jehóva verndar hinn mikla múg í þrengingunni miklu í samræmi við réttlátar meginreglur sínar. Eiginleikum þeirra sem bjargast er lýst greinilega í Biblíunni. Þess vegna geta þeir sem elska réttlætið gert viðeigandi ráðstafanir núna til að reynast verðugir þess að komast af. Hvað þurfa þeir að gera?
6. Af hverju er réttilega hægt að líkja múginum mikla við sauði?
6 Sauðir eru gæfir og auðsveipir. Þegar Jesús sagðist eiga aðra sauði sem tilheyrðu ekki himneska hópnum átti hann við fólk sem langaði ekki aðeins til að lifa að eilífu á jörðinni heldur hlýddi líka kenningum hans. „Mínir sauðir heyra raust mína, og ég þekki þá, og þeir fylgja mér,“ sagði hann. (Jóhannes 10:16, 27) Þetta er fólk sem hlustar af einlægni á Jesú og gerir fúslega það sem hann segir. Það gerist lærisveinar hans.
7. Hvaða eiginleika þurfa fylgjendur Jesú að temja sér?
7 Hvað annað þurfa fylgjendur Jesú að tileinka sér? Biblían svarar: „Þér eigið að hætta hinni fyrri breytni og afklæðast hinum gamla manni . . . og íklæðast hinum nýja manni, sem skapaður er eftir Guði í réttlæti og heilagleika sannleikans.“ (Efesusbréfið 4:22-24) Þeir leggja rækt við eiginleika sem stuðla að einingu þjóna Guðs en það eru eiginleikar eins og „kærleiki, gleði, friður, langlyndi, gæska, góðvild, trúmennska, hógværð og sjálfsagi“. — Galatabréfið 5:22, 23, Biblían 2007.
8. Hvað hefur það í för með sér fyrir múginn mikla að styðja þá sem eru eftir af hinum andasmurðu?
8 Múgurinn mikli styður þá sem hafa fengið himneska köllun. Af þeim eru fremur fáir eftir en þeir fara með forystu í að boða fagnaðarerindið. (Matteus 24:14; 25:40) Aðrir sauðir styðja þá enda þótt þeir viti að þeir kalla yfir sig andstöðu af ýmsu tagi. Hún stafar af því að Jesús Kristur og englar hans úthýstu Satan og illu öndunum af himnum í byrjun síðustu daga. Það hefur valdið miklum hörmungum á jörð og því segir í Opinberunarbókinni: „Vei sé jörðunni . . . því að djöfullinn er stiginn niður til yðar í miklum móð, því að hann veit, að hann hefur nauman tíma.“ (Opinberunarbókin 12:7-12) Satan þjarmar því meir að þjónum Guðs sem nálgast endalok þessa heims.
9. Hvernig hefur þjónum Guðs gengið að boða fagnaðarerindið og hvers vegna?
9 Boðun fagnaðarerindisins heldur áfram þrátt fyrir grimmilegar ofsóknir. Frá lokum fyrri heimsstyrjaldar hefur boðberum fjölgað úr fáeinum þúsundum í milljónir. Það er í samræmi við loforð Jehóva: „Engin vopn, sem smíðuð verða móti þér, skulu verða sigurvænleg.“ (Jesaja 54:17) Öldungur í hæstarétti Gyðinga gerði sér jafnvel grein fyrir því að það væri ekki hægt að stöðva starf Guðs. Hann sagði faríseum fyrstu aldar: „Látið þessa menn [lærisveina Krists] eiga sig og sleppið þeim. Sé þetta ráð eða verk frá mönnum, verður það að engu, en sé það frá Guði, þá megnið þér ekki að yfirbuga þá. Eigi má það verða, að þér berjist við sjálfan Guð.“ — Postulasagan 5:38, 39.
10. (a) Hvað er „merkið“ sem múgurinn mikli fær? (b) Hvernig bregðast þjónar Guðs við „rödd af himni“?
10 Þeim sem mynda múginn mikla er lýst þannig að þeir fái merki sem verði þeim til björgunar. (Esekíel 9:4-6) „Merkið“ er sönnunin fyrir því að þeir séu vígðir Jehóva, skírðir sem lærisveinar Jesú og þroski með sér kristinn persónuleika. Þeir hlýða „rödd af himni“ sem segir eftirfarandi um falstrúarveldi Satans: „Gangið út, mitt fólk, út úr henni, svo að þér eigið engan hlut í syndum hennar og hreppið ekki plágur hennar.“ — Opinberunarbókin 18:1-5.
11. Á hvaða mikilvæga hátt sýna þeir sem tilheyra múginum mikla að þeir séu þjónar Jehóva?
11 Jesús sagði við fylgjendur sína: „Á því munu allir þekkja, að þér eruð mínir lærisveinar, ef þér berið elsku hver til annars.“ (Jóhannes 13:35) Þeir sem tilheyra trúfélögum heims eiga það hins vegar til að drepa hver annan í styrjöldum og oft er ástæðan ekki önnur en sú að þeir eru af ólíku þjóðerni. Í orði Guðs segir: „Af þessu eru augljós börn Guðs og börn djöfulsins. Sá sem iðkar ekki réttlætið og elskar ekki bróður sinn heyrir ekki Guði til. . . . Vér eigum að elska hver annan. Ekki vera eins og Kain, sem heyrði hinum vonda til og myrti bróður sinn.“ — 1. Jóhannesarbréf 3:10-12.
12. Hvað ætlar Jehóva að gera við trúarbrögð sem eru eins og slæm „tré“ og bera vondan ávöxt?
12 Jesús sagði: „Sérhvert gott tré [ber] góða ávöxtu, en slæmt tré vonda. Gott tré getur ekki borið vonda ávöxtu, ekki heldur slæmt tré góða ávöxtu. Hvert það tré, sem ber ekki góðan ávöxt, verður upp höggvið og í eld kastað. Af ávöxtum þeirra skuluð þér því þekkja þá.“ (Matteus 7:17-20) Trúarbrögð heims hafa borið slíkan ávöxt að þau eru augljóslega eins og slæm „tré“. Jehóva eyðir þeim innan skamms í þrengingunni miklu. — Opinberunarbókin 17:16.
13. Hvernig sýnir múgurinn mikli að hann stendur sameinaður frammi fyrir hásæti Jehóva?
13 Í Opinberunarbókinni 7:9-15 er bent á af hverju Jehóva verndar múginn mikla. Þeir sem mynda hann standa sameinaðir „frammi fyrir hásætinu“ og styðja drottinvald Jehóva. Þeir hafa „þvegið skikkjur sínar og hvítfágað þær í blóði lambsins“ en það sýnir að þeir viðurkenna friðþægingarfórn Jesú. (Jóhannes 1:29) Þeir hafa vígst Guði og skírst niðurdýfingarskírn til tákns um það. Þess vegna standa þeir hreinir frammi fyrir Guði en það er táknað með hvítu skikkjunum. Og þeir „þjóna honum dag og nótt“. Geturðu lagað líft þitt enn betur að lýsingunni sem er gefin hérna?
Gæði sem þeir njóta núna
14. Nefndu dæmi um þau gæði sem fylgja því að þjóna Jehóva.
14 Líklega hefurðu veitt því eftirtekt að þeir sem þjóna Jehóva njóta núna margs konar gæða. Þegar þú kynntist réttlátum fyrirætlunum Guðs varð þér til dæmis ljóst að þú gætir átt þér bjarta framtíðarvon. Núna hefurðu markmið í lífinu — að þjóna hinum sanna Guði með þá gleðilegu von að hljóta eilíft líf í paradís á jörð. Já, konungurinn Jesús Kristur mun „leiða [múginn mikla] til vatnslinda lífsins.“ — Opinberunarbókin 7:17.
15. Af hverju er það til góðs fyrir votta Jehóva að fylgja meginreglum Biblíunnar um stjórnmál og siðferðismál?
15 Þeir sem tilheyra múginum mikla elska hver annan og þeir búa saman í sátt og samlyndi um heim allan. Það er mikil blessun. Við nærumst öll á sömu andlegu fæðunni og hlýðum sömu lögum og meginreglum sem er að finna í orði Guðs. Við fylgjum ekki ólíkum stjórnmálastefnum eða þjóðernislegum sjónarmiðum sem myndu valda sundrungu meðal okkar. Við förum eftir þeim góðu siðferðisreglum sem Guð hefur sett þjónum sínum. (1. Korintubréf 6:9-11) Þess vegna búa þjónar hans við ástand sem kalla mætti andlega paradís, lausir við þau átök, óeiningu og siðleysi sem er svo áberandi í heiminum. Taktu eftir hvernig þessu er lýst í Jesaja 65:13, 14.
16. Hvaða von hefur múgurinn mikli þrátt fyrir erfiðleika lífsins?
16 Þjónar Jehóva hér á jörð eru auðvitað ekki fullkomnir. Þeir fara ekki varhluta af þeim erfiðleikum sem fylgja lífinu í þessum heimi. Þeir eru ekki ónæmir fyrir þrengingum. Oft líða þeir saklausir þegar þjóðir heyja stríð. Og þeir mega þola sjúkdóma, þjáningar og dauða. Þeir trúa hins vegar að í nýja heiminum muni Guð „þerra hvert tár af augum þeirra“. Þeir vita að „dauðinn mun ekki framar til vera, hvorki harmur né vein né kvöl er framar til“. — Opinberunarbókin 21:4.
17. Hvaða unaðslega framtíð bíður allra sem tilbiðja hinn sanna Guð?
17 Jafnvel þó að elli, sjúkdómar, slys eða ofsóknir verði þér að aldurtila mun Jehóva reisa þig upp í paradís. (Postulasagan 24:15) Í þúsundáraríki Krists geturðu svo haldið áfram að gæða þér á andlegum veislumat. Þú færð að sjá hvernig vilji Jehóva nær fram að ganga og elskar hann æ heitar. Og þau efnislegu gæði, sem Jehóva lætur þá í té, munu styrkja kærleiksböndin enn frekar. (Jesaja 25:6-9) Það er unaðsleg framtíð sem þjónar Guðs eiga í vændum.
Til upprifjunar
• Hvaða einstæða lýsing er gefin á múginum mikla í Biblíunni?
• Hvað þurfum við að gera núna til að njóta velvildar Guðs og fá að tilheyra múginum mikla?
• Hve mikilvæg finnst þér þau gæði sem múgurinn mikli fær að njóta núna og á eftir að njóta í nýja heiminum?
[Mynd á blaðsíðu 123]
Milljónir manna, sem mynda múginn mikla, eru sameinaðar í tilbeiðslu á hinum sanna Guði.