Davíð og Golíat

Jehóva sagði við Samúel: ‚Farðu heim til Ísaí. Einn af sonum hans verður næsti konungur í Ísrael.‘ Samúel fór þá heim til Ísaí. Þegar hann sá elsta soninn hugsaði hann: ‚Þetta hlýtur að vera sá sem Jehóva valdi.‘ En Jehóva sagði Samúel að þetta væri ekki sá sem hann hafði valið. Jehóva sagði: ‚Ég sé hvað býr í hjarta fólks, ekki bara hvernig það lítur út.‘

Ísaí kom með sex syni í viðbót til Samúels. En Samúel sagði: ‚Jehóva hefur ekki valið neinn þeirra. Áttu fleiri syni?‘ Ísaí sagði: ‚Ég á einn son í viðbót, Davíð. Hann er yngstur og er úti að passa kindurnar.‘ Þegar Davíð kom sagði Jehóva við Samúel: „Þetta er hann!“ Samúel hellti olíu á höfuðið á Davíð og smurði hann þannig sem næsta konung yfir Ísrael.

Einhverju seinna voru Ísraelsmenn í stríði við Filisteana. Risastór hermaður sem hét Golíat barðist fyrir þá. Dag eftir dag gerði Golíat grín að Ísraelsmönnum. Hann öskraði: ‚Komið með mann sem vill berjast við mig! Ef hann vinnur verðum við þrælar ykkar, en ef ég vinn verðið þið þrælar okkar.‘

Davíð kom í herbúðir Ísraelsmanna með mat handa bræðrum sínum sem voru hermenn. Hann heyrði í Golíat og sagði: ‚Ég skal berjast við hann!‘ Sál konungur sagði: ‚En þú ert bara strákur.‘ Davíð svaraði: ‚Jehóva mun hjálpa mér.‘

Sál lét Davíð fara í herklæðin sín, en Davíð sagði: ‚Ég get ekki barist í þessu.‘ Davíð tók slöngvuna sína og fór niður að á. Hann valdi fimm slétta steina og setti þá í töskuna sína. Síðan hljóp Davíð í átt að Golíat. Risinn öskraði: ‚Komdu bara, litli strákur! Ég skal láta fuglana og villidýrin éta þig!‘ Davíð var ekki hræddur. Hann kallaði til baka: ‚Þú kemur með sverð og spjót. En ég kem í nafni Jehóva! Þú ert ekki að berjast við okkur, þú ert að berjast við Guð. Allir sem eru hérna munu sjá að Jehóva er sterkari en sverð og spjót. Hann mun hjálpa okkur að sigra ykkur.‘

Davíð setti stein í slöngvuna sína og sveiflaði henni eins hratt og hann gat. Með hjálp Jehóva skaust steinninn og festist í enninu á Golíat. Risinn Golíat datt niður dauður. Þá hlupu Filistearnir dauðhræddir í burtu. Treystir þú Jehóva eins og Davíð gerði?