Bréf frá stjórnandi ráði

Kæru trúsystkini:

Við sem tilbiðjum Jehóva elskum orð hans, Biblíuna. Við erum sannfærð um að frásögur hennar séu nákvæmar, gefi áreiðanlega leiðsögn fyrir lífið og uppörvandi sönnun um kærleika Jehóva til okkar mannanna. (Sálmur 119:105; Lúkas 1:3; 1. Jóhannesarbréf 4:19) Okkur langar innilega að hjálpa öðrum að kynnast dýrmæta sannleikanum sem er að finna í orði Guðs. Þess vegna er það okkur sönn ánægja að gefa út bókina Lærum af sögum Biblíunnar. Megum við kynna hana aðeins fyrir ykkur?

Þessi bók er fyrst og fremst skrifuð með börn í huga en hún getur líka verið gagnleg fyrir fullorðna sem vilja læra meira um Biblíuna. Biblían er bók fyrir alla svo við getum öll haft gagn af því að rifja upp sögur hennar. Þær geta veitt okkur sanna hamingju.

Þessi bók notar Biblíuna til að segja sögu mannsins allt frá sköpuninni. Við höfum lagt okkur fram við að segja sögur Biblíunnar á skýran og einfaldan hátt og í eins nákvæmri tímaröð og hægt er.

Þessi bók gerir meira en bara að segja sögurnar. Bæði textinn og myndirnar hafa verið gerð þannig að þau glæða frásögurnar lífi og endurspegla tilfinningar þeirra sem sagt er frá.

Þessi bók hjálpar okkur að skilja að Biblían fjallar um fólk, bæði fólk sem gerði vilja Jehóva og sem gerði það ekki. Hún hvetur okkur til að læra af fordæmum þeirra. (Rómverjabréfið 15:4; 1. Korintubréf 10:6) Bókinni er skipt upp í 14 hluta. Í byrjun hvers hluta er samantekt á því sem við getum lært.

Ef þú ert foreldri getur þú lesið sögu með barninu þínu og síðan rætt um myndirnar. Síðan getið þið lesið frásöguna sjálfa úr Biblíunni. Hjálpaðu barninu að tengja það sem það les í Biblíunni við sögurnar úr bókinni. Það gæti verið gagnlegt að nota svipaða aðferð þegar þú hjálpar fullorðnum að fá yfirsýn yfir boðskap Biblíunnar.

Það er von okkar að þessi bók eigi eftir að hjálpa einlægum börnum og fullorðnum að kynnast orði Guðs og tileinka sér það sem þau læra. Þannig geta þau líka orðið hluti af fjölskyldu tilbiðjenda hans, sem hann elskar.