Hverjir eru hinir sönnu kristniboðar?

ÓHÁÐ því hvar þú býrð hefur kristniboðshreyfingin, sem Jesús Kristur kom af stað, snert líf þitt með einum eða öðrum hætti. Ekki hafa þó allir yfirlýstir fulltrúar Krists útbreitt hinn sanna boðskap orðs Guðs. Ekki hafa allir kristniboðar — hvorki fyrr né nú — verið haldnir sama trúboðsandanum og einkenndi lærisveina Krists á fyrstu öld.

Vissulega hafa kirkjur kristna heimsins að störfum nálægt 220.000 trúboða víðs vegar í heiminum, en standast þessir trúboðar þær kröfur sem Ritningin gerir til sannra kristniboða? Markmið kristniboðs var ekki eins konar andleg heimsvaldastefna þar sem prédikararnir áttu að starfa sem útsendarar nýlenduvelda. (Samanber Jakobsbréfið 4:4.) Boðberar sannrar kristni myndu ekki heldur útbreiða hina svonefndu frelsisguðfræði eða beita sér fyrir róttækum breytingum í stjórnmálum og félagsmálum. Og ekki hafði Jesús í huga að lærisveinar hans ættu að þruma sína einkatúlkun á Ritningunni yfir lönd og lýði í gegnum sjónvarp og útvarp. (Jóhannes 17:16; Matteus 6:24) Hvað er þá fólgið í því að vera kristniboði?

Í hverju er kristniboð fólgið?

Á frummálum Biblíunnar, hebresku og grísku, er kristniboði hið sama og boðberi góðra tíðinda eða fagnaðarerindis.a Þar er um að ræða gleðitíðindi um hjálpræði, réttláta stjórn og frið. Til dæmis segir Jesaja 52:7: „Hversu yndislegir eru á fjöllunum fætur fagnaðarboðans, sem friðinn kunngjörir, gleðitíðindin flytur, hjálpræðið boðar og segir við Síon: ‚Guð þinn er sestur að völdum!‘“

Þegar sonur Guðs fæddist sem maður færði engill fjárhirðum þessi tíðindi: „Verið óhræddir, því sjá, ég boða yður mikinn fögnuð, sem veitast mun öllum lýðnum: Yður er í dag frelsari fæddur, sem er Kristur Drottinn.“ (Lúkas 2:10, 11) Fagnaðarerindið snýst því um Jesú Krist.

Um 30 árum síðar gekk Jesús inn í samkunduhúsið í bænum Nasaret á hvíldardegi og stóð upp til að lesa: „Var honum fengin bók Jesaja spámanns. Hann lauk upp bókinni og fann staðinn, þar sem ritað er: Andi [Jehóva] er yfir mér, af því að hann hefur smurt mig. Hann hefur sent mig til að flytja fátækum gleðilegan boðskap.‘“ Eftir að hafa lokið lestrinum „lukti hann aftur bókinni, fékk hana aftur þjónunum og settist niður, en augu allra í samkundunni hvíldu á honum. Hann tók þá að tala til þeirra: ‚Í dag hefur ræst þessi ritning í áheyrn yðar.‘“ Jesús var prédikari gleðilegs boðskapar sem fjallaði um „Guðsríki.“ — Lúkas 4:17-21; 8:1.

Jesús líkti prédikun sinni við uppskerustarf og sagði: „Uppskeran er mikil, en verkamenn fáir.“ (Matteus 9:36-38) Því þjálfaði hann fylgjendur sína einnig í að prédika og sendi þá út til þess. (Matteus 10. kafli; Lúkas 10. kafli) Eins og hjá kennaranum var kjarni prédikunar þeirra „himnaríki.“ (Matteus 10:7) En það voru fleiri en postular Jesú sem áttu að prédika Guðsríki.

Þegar ofsóknir hófust gegn hinum unga kristna söfnuði í Jerúsalemborg segir Postulasagan 8:1 að ‚allir hafi dreifst út um byggðir Júdeu og Samaríu nema postularnir.‘ En voru þessir tvístruðu lærisveinar óttaslegnir og fóru huldu höfði? Nei, því að 4. vers heldur áfram: „Þeir sem dreifst höfðu, fóru víðs vegar og fluttu fagnaðarerindið.“ Með þeim hætti náðu þessir kristniboðar fyrstu aldarinnar mikilli uppskeru.

Uppsláttarritið A Theological Word Book of the Bible segir: „Í Nýjatestamentinu á prédikun ekkert skylt við prédikunarræðu yfir þeim sem tekið hafa trú, en sá er almennt skilningur manna á hugtakinu nú á dögum, heldur er alltaf átt við boðun ‚fagnaðarerindis Guðs‘ yfir hinum ókristna heimi.“ Því eru allir kristnir menn kristniboðar, og boðun þeirra takmarkast ekki við það að tala við trúbræður sína.

En hvert er inntak fagnaðarerindisins nú á dögum? Jesús sagði fyrir að á okkar dögum yrði ‚þetta fagnaðarerindi um ríkið prédikað um alla heimsbyggðina öllum þjóðum til vitnisburðar. Og þá myndi endirinn koma.‘ (Matteus 24:14) Og Jesús bauð að ekki aðeins þeir sem sáu hann stíga upp til himna heldur líka fylgjendur hans í framtíðinni skyldu verða ‚vottar hans í Jerúsalem og allri Júdeu, í Samaríu og allt til endimarka jarðarinnar.‘ — Postulasagan 1:8; sjá einnig Matteus 28:19, 20.

Kjarni þess boðskapar, sem sérhver kristniboði á að færa mönnum, er því fagnaðarerindið um ríki Guðs í höndum hins skipaða valdhafa, Jesú Krists, Friðarhöfðingjans. (Jesaja 9:6) Það felur í sér öll þau sannindi sem Jesús talaði og lærisveinar hans skráðu. Sannir kristniboðar okkar daga halda sér trúfastir við þetta eina stef.

Hverjir standa að baki sönnu kristniboði?

Sannir kristniboðar dýrka Jehóva sem Guð. Hann er kristniboðinn mikli; hann er sá sem stendur að baki boðun fagnaðarerindisins um ríkið. (Galatabréfið 3:8; Opinberunarbókin 10:7) Hann vill að allir menn alls staðar heyri og hlýði boðskap hans. „Sannlega skil ég nú, að Guð fer ekki í manngreinarálit,“ sagði Pétur postuli smáum hópi manna í hafnarborginni Sesareu við Miðjarðarhaf. „Hann tekur opnum örmum hverjum þeim, sem óttast hann og ástundar réttlæti, hverrar þjóðar sem er. Orðið, sem hann sendi börnum Ísraels, þá er hann flutti fagnaðarboðin um frið fyrir Jesú Krist, sem er Drottinn allra, þekkið þér.“ — Postulasagan 10:34-36.

Biblían sagði fyrir að á okkar dögum myndu kristniboðar á nýjan leik draga saman mikla uppskeru. (Opinberunarbókin 14:15, 16) Lestu í greininni á eftir frásögur af ýmsu því sem drifið hefur á daga votta Jehóva í því starfi. Veittu athygli ýmsum upplýsingum um árangurinn af prédikun þeirra í greinunum á bls. 8-22 í þessu blaði. Talaðu síðan við votta Jehóva þegar þeir knýja dyra hjá þér til að kanna hvort þeir séu ekki einmitt hinir sönnu kristniboðar okkar tíma.

[Neðanmáls]