Leyndardómur — hver er skækjan Babýlon hin mikla?

KONA, illræmd vændiskona sem hefur haft áhrif á líf milljarða manna, er drepin, líflátin. En þetta er engin venjuleg aftaka. Hvað er einstakt við hana? Böðullinn er skepna, villidýr sem sviptir hana klæðum, étur hold hennar og lætur síðan það sem eftir er eyðast í eldi. Hver er þessi áhrifamikla kona? Hvers vegna ræðst villidýr á hana? Hvað hefur hún gert til að verðskulda þennan voveiflega dauðdaga?a — Opinberunarbókin 17:16, 17.

Þetta gæti verið efni í spennandi sögufléttu — að því undanskildu að þetta er ekki söguþráður í skáldsögu. Þetta er sannsögulegur veruleiki sem er núna að uppfyllast. Og hann skiptir þig máli af því að þessi illræmda skækja kann að hafa áhrif á líf þitt nú á þessari stundu. Það getur meira að segja skipt sköpum um líf eða dauða fyrir þig hvort þú heldur tryggð við hana eða segir skilið við hana. Hver er hún þá?

Viðskiptavinir konunnar leyndardómsfullu

Hin spádómlega Opinberunarbók Biblíunnar lýsir þessari hættulegu konu sem táldregur menn blygðunarlaust. Þar lesum við: „Og [engillinn] leiddi mig burt í anda á eyðimörk. Og ég sá konu sitja á skarlatsrauðu dýri, alsettu guðlöstunar nöfnum, og hafði það sjö höfuð og tíu horn. Og konan var skrýdd purpura og skarlati, og var búin gulli og gimsteinum og perlum. Hún hafði í hendi sér gullbikar, fullan viðurstyggðar, og var það óhreinleikur saurlifnaðar hennar. Og á enni hennar var ritað nafn, sem er leyndardómur: Babýlon hin mikla, móðir hórkvenna og viðurstyggða jarðarinnar.“ — Opinberunarbókin 17:3-5.

Þessi „Babýlon hin mikla“ hlýtur að fara með mikið ægivald því að 1. versið segir að hún sé „við vötnin mörgu.“ Hvað merkir það? Engill Guðs skýrði það fyrir Jóhannesi: „Vötnin, sem þú sást, þar sem skækjan situr, eru lýðir og fólk, þjóðir og tungur.“ (Opinberunarbókin 17:15) Greinilega er hér um að ræða vændiskonu sem hefur áhrif um víða veröld. En hún er engin venjuleg hóra. Hún er „móðir hórkvenna,“ sjálf hórumamma stofnunarinnar. Þegar hórdómur er annars vegar gefur hún skipanirnar. En viðskiptavinirnir eru líka af sérstöku tagi.

Engillinn opinberar hverjir séu þessir sérstöku viðskiptavinir skækjunnar miklu. Hvernig lýsir hann þeim? Hann segir að ‚konungar jarðarinnar hafi drýgt saurlifnað með henni, og þeir sem á jörðinni búa hafi orðið drukknir af saurlifnaðarvíni hennar.‘ (Opinberunarbókin 17:2) Þetta hlýtur að vera lokkandi skækja með góð sambönd fyrst hún getur tælt til sín valdhafa heimsins, sjálfa ‚konunga jarðarinnar‘! Hver er hún þá?

Engillinn segir að hún hafi nafn, leyndardómsfullt nafn, „Babýlon hin mikla.“ Við höfum hér tvær vísbendingar um það hver hún sé — önnur er viðskiptavinirnir sem hún selur blíðu sína og hin er nafnið, Babýlon hin mikla. Hvaða ályktun getum við dregið af þessum vísbendingum?

[Neðanmáls]