Er „ný heimsskipan“ manna í nánd?
1. Hvernig hefur löngun manna í aukið pólitískt frelsi birst á síðustu árum?
MILLJÓNIR nútímamanna eru í fjötrum falskra trúarbragða og margir kjósa að vera það áfram. Á sama tíma krefjast sífellt fleiri pólitísks frelsis. Hinir óvenjulegu atburðir síðustu ára í Austur-Evrópu og víðar hafa sýnt að fólk vill frjálsara stjórnarfar. Þetta hefur haft í för með sér að margir segja nú að nýir frelsistímar séu framundan. Forseti Bandaríkjanna kallaði þá „nýja heimsskipan.“ Alls staðar tala þjóðaleiðtogar um að kalda stríðið og vígbúnaðarkapphlaupið sé liðin tíð og nýir friðartímar séu runnir upp. — Samanber 1. Þessaloníkubréf 5:3.
2, 3. Hvaða aðstæður vinna gegn sönnu frelsi?
2 En jafnvel þótt mannleg viðleitni hefði í för með sér færri vopn og frjálsara stjórnarfar, væri þá í raun komið ósvikið frelsi? Nei, vegna þess að hrikaleg vandamál blasa við öllum þjóðum, líka lýðræðisríkjunum þar sem fátækum fjölgar og milljónir manna streitast við að hafa í sig og á. Í einni skýrslu Sameinuðu þjóðanna segir að þrátt fyrir framfarir í vísindum og læknisfræði deyi daglega að meðaltali yfir 40.000 börn um heim allan vegna vannæringar eða sjúkdóma sem hægt væri að fyrirbyggja. Sérfræðingur á þessu sviði segir: „Fátækt er að taka á sig varanleg einkenni sem framtíð mannkyns stafar raunveruleg ógn af.“
3 Auk þess verður fleira fólk en nokkru sinni fyrr fórnarlömb glæpa sem verða sífellt grimmilegri. Hatur af völdum kynþáttar, stórnmála eða trúar er að lima ýmsar þjóðir í sundur. Sums staðar er ástandið ekki fjarri þeirri framtíðarspá Sakaría 14:13 að menn myndu verða ‚svo ráðvilltir og skelfdir að hver maður muni hrifsa í næsta mann og ráðast á hann.‘ (Today’s English Version) Fíkniefnanotkun og samræðissjúkdómar breiðast út sem faraldur. Milljónir manna eru sýktar af alnæmi; í Bandaríkjunum einum hafa yfir 120.000 manns nú þegar dáið af völdum sjúkdómsins.
Fjötrar syndar og dauða
4, 5. Í hvers konar fjötrum eru allir, óháð því frelsi sem ríkir nú á dögum?
4 En jafnvel þótt engar þessara slæmu aðstæðna væru fyrir hendi byggju menn samt ekki við ósvikið frelsi. Allir yrðu eftir sem áður í fjötrum. Hvernig víkur því við? Lýsum því með dæmi: Setjum sem svo að einhver einræðisherra hneppti hvern einasta jarðarbúa í þrælkun og myrti þá svo alla? Það er í raun það sem kom fyrir mannkynið þegar fyrstu foreldrar okkar gerðu uppreisn gegn Guði og urðu þrælar kúgunarstjórnar djöfulsins. — 2. Korintubréf 4:4.
5 Þegar Guð skapaði mennina ætlaði hann þeim að lifa að eilífu í fullkomleika á jörðinni, í paradís, eins og 1. Mósebók, 1. og 2. kafli sýna. En vegna uppreisnar forföður okkar Adams gegn Guði erum við öll undir dauðadómi allt frá getnaði: „Syndin kom inn í heiminn fyrir einn mann [Adam, ættföður mannkyns] og dauðinn fyrir syndina, og þannig er dauðinn runninn til allra manna.“ Eins og Biblían segir „hefur dauðinn ríkt frá Adam.“ (Rómaverjabréfið 5:12, 14) Óháð því hve mikils frelsis við persónulega njótum erum við öll í fjötrum syndar og dauða.
6. Hvers vegna hafa lífslíkur manna lítið lengst síðan Sálmur 90:10 var skrifaður?
6 Enn fremur er núverandi æviskeið okkar ósköp stutt. Jafnvel hjá þeim heppnu er það aðeins fáeinir áratugir. Fyrir þá óheppnu er það aðeins fáein ár eða minna. Og í niðurstöðum nýrrar rannsóknar segir: „Vísindi og læknisfræði hafa fært lífslíkur manna upp að náttúrlegum mörkum sínum.“ Það kemur til af því að ófullkomleiki og dauði er innbyggður í erfðabúnað okkar vegna syndar Adams. Það er hryggilegt að ef við náum sjötugs- eða áttræðisaldri, og ættum þá að vera orðin vitrari og færari um að njóta lífsins en á yngri árum, þá gefst líkami okkar upp og við verðum að dufti! — Sálmur 90:10.
7. Hvers vegna geta menn aldrei veitt hið sanna frelsi sem við þráum og þörfnumst?
7 Hvers konar stjórn manna getur komið í veg fyrir þessa þrælkun syndar og dauða? Engin einasta. Enginn stjórnmálamaður, vísindamaður eða læknir nokkurs staðar getur létt af okkur þeirri bölvun sem sjúkdómar, elli og dauði eru, og enginn getur létt af okkur öryggisleysi, óréttlæti, glæpum, hungri og fátækt. (Sálmur 89:49) Hversu velviljaðir sem menn eru geta þeir með engu móti skapað hið sanna frelsi sem við þráum og þörfnumst. — Sálmur 146:3.
Frjáls vilji misnotaður
8, 9. Hvað kom mannkyninu í það sorglega ástand sem það er í núna?
8 Mannkynið er svona illa komið vegna þess að Adam og Eva misnotuðu frjálsan vilja sinn. Fyrra Pétursbréf 2:16 segir samkvæmt orðalagi The Jerusalem Bible: „Hegðið ykkur eins og frjálsir menn og notið aldrei frelsi ykkar sem afsökun fyrir vonskunni.“ Það er því greinilegt að Guð ætlaðist ekki til að frelsi mannsins væri takmarkalaust. Því átti að beita innan þess ramma sem lög Guðs settu, en þau voru réttlát og öllum til góðs. Og þessi rammi er nógu rúmur til að bjóða upp á víðtækt, persónulegt valfrelsi þannig að stjórn Guðs gæti aldrei orðið nein kúgun. — 5. Mósebók 32:4.
9 En fyrstu foreldrar okkar kusu að ákveða sjálfir hvað væri rétt og hvað væri rangt. Með því að þau gengu af ásettu ráði undan stjórn Guðs dró hann til baka stuðning sinn við þau. (1. Mósebók 3:17-19) Þau urðu því ófullkomin og sjúkdómar og dauði fylgdu í kjölfarið. Í stað frelsis var mannkynið hneppt í fjötra syndar og dauða. Mannkynið varð einnig undirorpið duttlungum ófullkominna og oft grimmra valdhafa. — 5. Mósebeók 32:5.
10. Hvernig hefur Jehóva tekið á málum í kærleika sínum?
10 Guð hefur leyft mönnum að gera þessa tilraun til að njóta algers frelsis aðeins um takmarkaðan tíma. Hann vissi að niðurstaðan myndi taka af allan vafa um að stjórn manna óháð Guði gæti ekki heppnast. Úr því að frjáls vilji, sem er rétt beitt, er slíkur fjársjóður, hefur Guð í kærleika sínum leyft um stundarsakir það sem gerst hefur í stað þess að taka frá manninum þá gjöf sem frjáls vilji er.
‚Maðurinn getur ekki stýrt skrefum sínum‘
11. Hvernig hefur mannkynssagan stutt nákvæmni Biblíunnar?
11 Saga mannkynsins hefur sýnt fram á nákvæmni þess sem stendur í Jeremía 10. kafla, 23. og 24. versi: „Það tilheyrir ekki gangandi manni einu sinni að stýra skrefum sínum. Leiðréttu mig, ó Jehóva.“ (NW) Sagan hefur líka sýnt nákvæmni Prédikarans 8:9 sem lýsir yfir: „Einn maðurinn drottnar yfir öðrum honum til ógæfu.“ Þetta er hverju orði sannara! Mannkynið hefur farið frá einni ógæfunni til annarrar og allir hafa endað í gröfinni. Páll postuli lýsti ástandinu gerla er hann sagði eins og stendur í Rómverjabréfinu 8:22: „Vér vitum, að öll sköpunin stynur líka og hefur fæðingarhríðir allt til þessa.“ Já, sjálfstæði frá lögum Guðs hefur haft hrikalegar afleiðingar.
12. Hvað segja sumar veraldlegar heimildir um algert frelsi?
12 Bókin Inquisiton and Liberty kemst svo að orði um frelsi: „Sjálfstæði þarf ekki í sjálfu sér að vera dyggð: það er ekkert til að vera stoltur af án frekari forsendna. Í raun getur það hreinlega verið ein af hinum auvirðilegustu myndum eigingirni . . . Maðurinn er ekki og getur ekki fjarstæðulaust einu sinni þráð það að vera algerlega sjálfstæð vera.“ Og Filippus prins af Englandi sagði einu sinni: „Frelsi til að láta undan öllum duttlungum og náttúruhvötum getur virst eftirsóknarvert, en reynslan kennir okkur aftur og aftur að hömlulaust frelsi, . . . og hegðun án tillits til annarra er öruggasta leiðin til að spilla lífsgæðum samfélagsins, og gildir þá einu hversu auðugt það er.“
Hver veit best?
13, 14. Hver einn getur veitt mannkyninu ósvikið frelsi?
13 Hver kann betur að skipuleggja heimili — ástríkir og dugandi foreldrar eða ung börn? Svarið er augljóst. Á líkan hátt veit skapari mannsins, okkar himneski faðir, hvað er okkur fyrir bestu. Hann veit hvernig best er að skipuleggja og stjórna mannlegu samfélagi. Hann veit hvernig ætti að tempra frjálsan vilja til að veita öllum þá blessun sem fylgir sönnu frelsi. Aðeins alvaldur Guð, Jehóva, veit hvernig á að leysa fjötra mannkynsins og veita öllum ósvikið frelsi. — Jesaja 48:17-19.
14 Í orði sínu, í Rómverjabréfinu 8:21, gefur Jehóva það örvandi loforð „að jafnvel sjálf sköpunin muni verða leyst úr ánauð forgengileikans til dýrðarfrelsis Guðs barna.“ Já, Guð lofar að frelsa mannkynið algerlega úr því ömurlega ástandi sem það er í núna. Í greininni á eftir verður fjallað um hvernig það mun gerast.
Hverju svarar þú
(Upprifjun blaðsíðu 3 til 8)
□ Hvers vegna er mönnum frelsi afar mikilvægt?
□ Á hvaða vegu hafa menn verið þrælkaðir út í gegnum alla mannkynssöguna?
□ Hvers vegna hefur Jehóva leyft manninum að misnota frjálsan vilja sinn svona lengi?
□ Hver einn getur veitt öllu mannkyni ósvikið frelsi og hvers vegna?
[Mynd á blaðsíðu 7]
Æviskeið mannsins er mjög áþekkt og sagt var fyrir 3500 árum í Sálmi 90:10.
[Rétthafi]
Birt með leyfi The British Museum