Notaðu Biblíuna sem oftast
1. Hvernig gætirðu undirbúið þig fyrir boðunarstarfið?
1 Án tillits til hvaða rit við ætlum að bjóða í boðunarstarfinu er gott að velja ritningarstað sem vekur viðmælendur til umhugsunar. (Hebr. 4:12) Ef þú notar ritningarstað, sem vísað er til í ritinu sem þú ert að bjóða, verður auðvelt að tengja það efni ritsins. Á sumum svæðum hefur boðberum fundist gagnlegt að halda á Biblíunni þegar þeir koma að máli við fólk eða starfa hús úr húsi.
2. (a) Hvernig er hægt að byrja kynningu á því að lesa ritningarstað? (b) Á hvaða biblíuefni hefur fólk á svæðinu áhuga?
2 Byrjaðu á því að lesa ritningarstað: Boðberar byrja sumir hverjir kynningar sínar á því að spyrja húsráðanda um álit hans á biblíutexta og lesa hann síðan. Þetta beinir fljótt athyglinni að orði Guðs. Gætu einhverjar af eftirfarandi kynningum hentað vel á svæðinu þar sem þú starfar?
◼ „Myndirðu koma þessum breytingum á ef þú gætir?“ Lestu Opinberunarbókina 21:4.
◼ „Hvers vegna lifum við á svona erfiðum tímum?“ Lestu 2. Tímóteusarbréf 3:1-5.
◼ „Heldurðu að samfélagið yrði betra ef allir færu eftir þessu ráði?“ Lestu Matteus 7:12.
◼ „Heldurðu að börnin þín eigi eftir að njóta þess sem lýst er hérna?“ Lestu Sálm 37:10, 11.
◼ „Heldurðu að sá dagur komi einhvern tíma þegar þessi orð rætast?“ Lestu Jesaja 33:24.
◼ „Hefurðu heyrt um stjórnarskiptin sem minnst er á hér?“ Lestu Daníel 2:44.
◼ „Hefur þig einhvern tíma langað til að spyrja Guð að þessu?“ Lestu Jobsbók 21:7.
◼ „Verður hægt að sjá látna ástvini aftur?“ Lestu Jóhannes 5:28, 29.
◼ „Vita hinir látnu hvað hinir lifandi hafa fyrir stafni?“ Lestu Prédikarann 9:5.
3. Hvernig getum við hjálpað fólki að skilja biblíutextana sem við lesum?
3 Útskýrðu, lýstu með dæmi og heimfærðu: Þegar einhvern langar til að ræða málin skaltu ekki ljúka samtalinu í flýti. Gefðu þér tíma til að útskýra, koma með dæmi og heimfæra ritningarstaðinn, sem þú last, svo að viðmælandinn skilji hann. (Nehem. 8:8) Þegar fólk skilur það sem orð Guðs kennir og tekur á móti því getur líf þess tekið miklum breytingum. — 1. Þess. 2:13.
4. Hvernig getum við notað Biblíuna þegar við förum í endurheimsóknir?
4 Haltu áfram að nota Biblíuna þegar þú fylgir áhuganum eftir. Þú getur notað sömu aðferð þegar þú ferð í endurheimsóknir: (1) Veldu viðeigandi ritningarstað. (2) Varpaðu fram spurningu sem snertir málefnið. Lestu síðan ritningarstaðinn. (3) Útskýrðu, lýstu með dæmi og heimfærðu hann. Leggðu þig fram um að auka þekkingu viðmælandans á orði Guðs í hverri heimsókn. Fyrr en varir ertu kannski farinn að stjórna biblíunámskeiði!