Öll sköpunin naut friðar og einingar undir stjórn Guðs.

Hvers vegna þurfum við á ríki Guðs að halda?

Í upphafi mannkyns var skapari okkar, sem heitir Jehóva, eini stjórnandinn. Hann beitti valdi sínu á kærleiksríkan hátt. Hann bjó mönnunum fallegt heimili í aldingarðinum Eden. Hann sá þeim fyrir meira en nóg af mat. Og hann fékk þeim auk þess gefandi starf. (1. Mósebók 1:28, 29; 2:8, 15) Mennirnir hefðu notið friðar ef þeir hefðu haldið sig undir kærleiksríkri stjórn Guðs.

Adam heldur á forboðna ávextinum sem Eva hefur boðið honum. — Fyrstu mannhjónin höfnuðu Guði sem stjórnanda.

Í Biblíunni er sagt frá uppreisnargjörnum engli sem var seinna kallaður Satan Djöfullinn. Hann dró í efa rétt Guðs til að stjórna og gaf í skyn að mennirnir myndu vera ánægðari án leiðsagnar og stjórnar Guðs. Því miður fylgdu Adam og Eva, foreldrar mannkyns, stefnu Satans og gerðu uppreisn gegn Guði. – 1. Mósebók 3:1–6; Opinberunarbókin 12:9.

Adam og Eva misstu heimili sitt í paradís og vonina um að lifa við fullkomna heilsu að eilífu vegna þess að þau höfnuðu Guði sem stjórnanda. (1. Mósebók 3:17–19) Ákvörðun þeirra hafði einnig áhrif á börnin sem þau eignuðust. Biblían segir um afleiðingu syndar Adams: „Syndin kom inn í heiminn ... og dauðinn með syndinni.“ (Rómverjabréfið 5:12) Syndin hafði aðra slæma afleiðingu: „Einn maður drottnar yfir öðrum honum til ógæfu.“ (Prédikarinn 8:9) Með öðrum orðum verða alltaf vandamál þegar menn stjórna sér sjálfir.

STJÓRNIR MANNA VERÐA TIL

Nimrod stillir sér hrokafullur upp. Í bakgrunni sést fólk reisa byggingu. — Nimrod gerði uppreisn gegn Jehóva.

Fyrsti mennski stjórnandinn sem nefndur er í Biblíunni var Nimrod. Hann gerði uppreisn gegn stjórn Jehóva. Allt frá dögum Nimrods hafa valdamiklir menn misnotað vald sitt. Fyrir um 3.000 árum skrifaði Salómon konungur: ,Tár hinna undirokuðu streyma en enginn huggar þá. Af hendi kúgara sinna sæta þeir ofbeldi.‘ – Prédikarinn 4:1.

Við glímum enn við sömu vandamál. Árið 2009 sagði í riti frá Sameinuðu þjóðunum að litið væri í auknum mæli á slæma stjórnarhætti sem „eina meginástæðu allrar illsku í þjóðfélögum okkar“.

TÍMI TIL AÐGERÐA

Við þurfum á betri stjórnendum og betra stjórnarformi að halda. Og skapari okkar hefur lofað því.

Klippimynd: Afleiðingar mannlegra stjórna. 1. Asísk kona situr á skítugri götu og heldur á grátandi barni sínu. 2. Veikur eldri maður í sjúkrarúmi. 3. Hermenn skjóta af byssum á vígvelli. 4. Reiðir mótmælendur öskra og halda á skiltum. 5. Móðir og dóttir standa fyrir utan heimili sitt og sjá að glerið í útidyrahurðinni er brotið. 6. Reykháfar og rafmagnssnúrur í mengaðri borg. — Jafnvel bestu mannlegu stjórnunum hefur ekki tekist að leysa alvarleg vandamál mannkyns.

Guð hefur stofnsett ríki, eða stjórn, sem kemur í stað allra mannlegra stjórna og það mun „standa sjálft að eilífu“. (Daníel 2:44) Milljónir manna biðja um þetta ríki. (Matteus 6:9, 10) En Guð er ekki stjórnandi þessa ríkis sjálfur. Hann hefur öllu heldur falið einhverjum sem lifði sem maður að vera stjórnandi þess. Hvern hefur hann valið?