„Spekin sannast af verkum sínum“
1. Hvaða augum líta sumir starf okkar?
1 Stundum bregðast húsráðendur neikvætt við boðskapnum vegna þess að þeir misskilja okkur eða hafa fengið rangar upplýsingar um Votta Jehóva. Kannski eru sjónarmið þeirra lituð af fordómafullri umræðu í fjölmiðlum. Sums staðar hafa Vottar Jehóva jafnvel verið stimplaðir sem „hættuleg sértrúarregla“. Hvernig ættum við að bregðast við þegar við fáum slíka gagnrýni?
2. Hvað getur hjálpað okkur að herða upp hugann þegar við fáum gagnrýni?
2 Verum jákvæð: Á fyrstu öldinni voru Jesús og aðrir þjónar Jehóva oft misskildir og rægðir. (Post. 28:22) En þrátt fyrir gagnrýni skömmuðust þeir sín aldrei fyrir þjónustuna. Jesús sagði: „Spekin sannast af verkum sínum.“ (Matt. 11:18, 19) Hann hélt kappsamur áfram að gera vilja föður síns, sannfærður um að sannleiksleitandi fólk gerði sér grein fyrir gildi fagnaðarerindisins. Við getum komist hjá því að láta gagnrýni draga úr okkur með því að hugsa til þess að sonur Guðs fékk sömu móttökur.
3. Hvers vegna ættum við ekki að undrast neikvæða umfjöllun og andstöðu?
3 Jesús benti á að heimurinn myndi hata fylgjendur sína rétt eins og heimurinn hataði hann. (Jóh. 15:18-20) Þess vegna ætti neikvæð umfjöllun og andstaða ekki að koma okkur á óvart. Við búumst við því að slíkir erfiðleikar færist í aukana því nær sem dregur endinum og reiði Satans magnast. (Opinb. 12:12) Við getum fagnað vegna þess að það bendir til þess að heimur Satans sé að renna sitt skeið á enda.
4. Hvernig ættum við að koma fram þegar fólk bregst neikvætt við fagnaðarerindinu?
4 Sýnum góðvild: Þegar viðbrögð eru neikvæð ættum við ávallt að sýna góðvild og mildi. (Orðskv. 15:1; Kól. 4:5, 6) Ef aðstæður leyfa gætum við fengið tækifæri til að útskýra fyrir einlægum húsráðanda að það ríki mikill misskilningur um starf Votta Jehóva eða við gætum spurt hann hver ástæðan sé fyrir viðbrögðum hans. Ef við bregðumst mildilega við gæti hann farið að efast um það sem hann hefur heyrt um Votta Jehóva og hlustað næst þegar vottur bankar upp á. Ef húsráðandinn er á hinn bóginn mjög æstur er sennilega best að kveðja vingjarnlega og fara. Við getum verið örugg um að Jehóva metur þjónustu okkar mikils óháð því hvernig aðrir líta á okkur. — Jes. 52:7.