HVERNIG ER HÆGT AÐ RJÚFA VÍTAHRING HATURS?

1 | Verum óhlutdræg

Biblían segir:

„Guð mismunar ekki fólki heldur tekur hann á móti hverjum þeim sem óttast hann og gerir rétt, sama hverrar þjóðar hann er.“ – POSTULASAGAN 10:34, 35.

Hvað merkir það?

Jehóvaa Guð dæmir okkur ekki eftir þjóðerni, kynþætti, húðlit eða menningu. Hann horfir á það sem skiptir máli – okkar innri mann. Biblían segir: „Mennirnir sjá hið ytra en Jehóva sér hvað býr í hjartanu.“ – 1. Samúelsbók 16:7.

Hvað getur þú gert?

Þótt við sjáum ekki hvað býr í hjarta fólks getum við reynt að líkja eftir Guði og vera óhlutdræg í garð annarra. Reyndu að horfa á fólk sem einstaklinga frekar en hóp. Ef þú ert neikvæður út í aðra, kannski þá sem eru af öðrum kynþætti eða þjóðerni, skaltu biðja Guð um að hjálpa þér að losa þig við slíkar tilfinningar. (Sálmur 139:23, 24) Ef þú biður Jehóva að hjálpa þér að mismuna ekki fólki geturðu verið viss um að hann hlusti á bæn þína og styrki þennan góða ásetning þinn. – 1. Pétursbréf 3:12.

a Jehóva er nafn Guðs. – Sálmur 83:18.

„Ég hafði aldrei setið í sátt og samlyndi með hvítri manneskju … Nú var ég hluti af sönnu alþjóðlegu bræðralagi.“ – TITUS

Reynslusaga – TITUS

Sigraðist á vítahring haturs

Titus var meðlimur í ofbeldisfullu gengi sem var mjög ósátt við þjakandi aðskilnaðarlög. Hann segir: „Við fórum á staði í bænum þar sem svartir máttu ekki koma, eins og hótel og bari, gagngert til að stofna til átaka.“ Titus viðurkennir að hann hafi verið drifinn áfram af hatri. Hann bætir við: „Ef ég lenti í deilum við einhvern, hvort sem það var karl eða kona, var ég alltaf fyrstur til að nota hnefana.“

Titus breyttist þegar hann fór að kynna sér Biblíuna með vottum Jehóva. Það sem Biblían sagði hafði sterk áhrif á hann. Loforð hennar um framtíðina þar sem ‚dauðinn verður ekki til framar, engin sorg, angistaróp né kvöl‘ hafði sérstaklega mikil áhrif á hann. – Opinberunarbókin 21:3, 4.

Í fyrstu átti Titus erfitt með að láta af hatrinu sem hafði fest rætur í hjartanu. „Það var mjög erfitt að breyta hugsunarhætti mínum og breytni,“ segir hann. En Postulasagan 10:34, 35 hjálpaði honum þar sem segir að Guð mismuni ekki fólki.

Hverju breytti það fyrir hann? Titus segir: „Ég sannfærðist um að vottar Jehóva iðka sanna trú þegar ég sá kærleikann meðal þeirra óháð kynþætti eða húðlit. Jafnvel áður en ég lét skírast sem vottur bauð hvítur safnaðarmaður mér heim til sín í mat. Þetta var eins og í draumi. Ég hafði aldrei setið í sátt og samlyndi með hvítri manneskju, hvað þá borðað heima hjá henni. Nú var ég hluti af sönnu alþjóðlegu bræðralagi.“