Þegar hatur heyrir sögunni til
Við getum að vísu upprætt hatur úr eigin hjarta en við getum ekki stjórnað viðhorfum eða gerðum annarra. Saklaust fólk heldur áfram að vera fórnarlömb haturs. Hvað getur bundið enda á hatur til frambúðar?
Aðeins Jehóva Guð getur endanlega rofið þann vítahring haturs sem blasir alls staðar við okkur. Það er einmitt það sem Biblían lofar að hann ætli að gera. – Orðskviðirnir 20:22.
GUÐ ÆTLAR AÐ EYÐA ÞVÍ SEM VELDUR HATRI
1. SATAN DJÖFLINUM. Hatrið sem blasir við okkur má rekja til Satans, hins uppreisnargjarna engils. Guð ætlar að eyða Satan og öllum sem láta hatursanda hans móta sig. – Sálmur 37:38; Rómverjabréfið 16:20.
2. HATURSFULLUM HEIMI. Guð ætlar að útrýma allri illsku í heiminum, þar á meðal spilltum stjórnmálaleiðtogum og trúarleiðtogum sem æsa til haturs. Hann ætlar líka að útrýma hinu gráðuga og spillta viðskiptakerfi sem misnotar sér fólk. – 2. Pétursbréf 3:13.
3. ÓFULLKOMLEIKA MANNA. Biblían segir okkur að allir menn hafi erft ófullkomleika – tilhneiginguna til að hugsa, hafa löngun í og gera það sem er rangt. (Rómverjabréfið 5:12) Að ala með sér hatur og láta það í ljós er hluti af þessari syndugu tilhneigingu. Guð mun hjálpa okkur að sigrast á öllum brestum okkar og þá verður ekki snefill eftir af hatri. – Jesaja 54:13.
BIBLÍAN LOFAR HEIMI ÁN HATURS
1. ENGINN ÞARF AÐ ÞOLA ÓRÉTTLÆTI. Guðsríki fer með stjórnina yfir heiminum. Þessi stjórn mun ríkja frá himnum og tryggja varanlegt réttlæti. (Daníel 2:44) Fordómar og umburðarleysi heyrir þá sögunni til. Guð mun leiðrétta allt það óréttlæti sem fólk þarf nú að þola. – Lúkas 18:7.
2. ALLIR NJÓTA FRIÐAR. Enginn þarf að þjást vegna ofbeldis eða styrjalda. (Sálmur 46:9) Jörðin verður öruggur staður og allir íbúar hennar verða friðsamir. – Sálmur 72:7.
3. ALLIR LIFA AÐ EILÍFU VIÐ FULLKOMNAR AÐSTÆÐUR. Ímyndaðu þér þegar allir jarðarbúar sýna sannan náungakærleika. (Matteus 22:39) Enginn þjáist og óþægilegar hugsanir eða minningar ónáða okkur ekki einu sinni. (Jesaja 65:17) Þegar allt hatur er horfið mun mannkynið „gleðjast yfir miklum friði“. – Sálmur 37:11.
Langar þig að búa í þannig heimi? Margir eru nú þegar að læra að fylgja meginreglum Biblíunnar og segja skilið við hatur. (Sálmur 37:8) Það á við um milljónir votta Jehóva um allan heim. Þótt þeir tilheyri mismunandi menningu og uppruna eru þeir eins og stór og sameinuð fjölskylda. – Jesaja 2:2–4.
Vottar Jehóva vilja gjarnan segja öðrum frá því sem þeir hafa lært um að takast á við óréttlæti og mismunun. Þú getur unnið að því að láta kærleikann koma í stað sérhverrar hatursfullrar tilfinningar. Þú munt komast að því hvernig hægt er að sýna öllum góðvild – jafnvel þeim sem virðast vanþakklátir eða óvinsamlegir. Þetta mun veita þér mikla gleði núna og samskipti þín við aðra munu fara batnandi. Og umfram allt muntu læra hvað þú þarft að gera til að lifa undir stjórn Guðs þegar hatur verður úr sögunni fyrir fullt og allt. – Sálmur 37:29.