Manstu?

Hefurðu lesið nýjustu tölublöð Varðturnsins vandlega? Reyndu þá að svara eftirfarandi spurningum:

Hvaða fordæmi setur Jehóva með því hvernig hann kemur fram við konur?

Hann er óhlutdrægur og tekur ekki karla fram yfir konur. Hann hlustar á konur og hefur áhuga á hvernig þeim líður og hverju þær hafa áhyggjur af. Hann treystir þeim líka til að vinna að verki sínu. – w24.01, bls. 15–16.

Hvernig getum við farið eftir Efesusbréfinu 5:7 þar sem stendur: „Eigið ekkert saman við þá að sælda“?

Páll postuli varar okkur við að umgangast fólk sem gerir okkur erfitt fyrir að hlýða mælikvarða Guðs. Það eru ekki bara þeir sem við hittum augliti til auglitis sem geta verið slæmur félagsskapur heldur líka þeir sem við eigum samskipti við á samfélagsmiðlum. – w24.03, bls. 22–23.

Hvers konar lygasögum þurfum við að vara okkur á?

Vörum okkur á sögum sem ekki eru áreiðanlegar heimildir fyrir þó að þær komi frá vinum sem gengur gott eitt til og sömuleiðis óumbeðnum tölvupóstum frá ókunnugum. Gætum okkar líka á fráhvarfsmönnum sem þykjast hafa áhuga á boðskap okkar. – w24.04, bls. 12.

Hvað vitum við og hvað vitum við ekki um það hvernig Jehóva mun dæma Salómon konung og þá sem dóu í Sódómu og Gómorru og í flóðinu?

Við getum ekki verið viss um að Jehóva hafi dæmt þá til eilífrar tortímingar. Við vitum hins vegar að hann er með allar staðreyndir á hreinu og að hann er mjög miskunnsamur. – w24.05, bls. 3–4.

Hvað fullvissar það okkur um að Guð skuli vera kallaður „kletturinn“? (5. Mós. 32:4)

Við getum leitað athvarfs hjá Jehóva. Hann er áreiðanlegur og stendur alltaf við loforð sín. Hann er líka stöðugur, hann er sjálfum sér samkvæmur og heldur sig við fyrirætlun sína. – w24.06, bls. 26–28.

Hvað getur auðveldað þér að skipta um söfnuð?

Treystu á Jehóva. Hann hjálpar þér eins og hann hjálpaði þjónum sínum til forna. Berðu ekki nýja söfnuðinn saman við þann sem þú varst í. Vertu virkur í nýja söfnuðinum og reyndu að eignast nýja vini. – w24.07, bls. 26–28.

Hvað getum við lært af dæmisögunum þrem í Matteusi 25. kafla?

Í dæmisögunni um sauðina og geiturnar er lögð áhersla á tryggð og trúfesti. Dæmisagan um skynsömu og óskynsömu meyjarnar sýnir að við þurfum að vera tilbúin og vökul. Og dæmisagan um talenturnar bendir á mikilvægi þess að vera vinnusöm og iðin. – w24.09, bls. 20–24.

Hversu hár var forsalurinn í musteri Salómons?

Í 2. Kroníkubók 3:4 stendur í sumum fornum handritum að hann hafi verið „120 álnir“ á hæð sem samsvara 53 metrum. En í öðrum áreiðanlegum textum segir „20 álnir“ sem samsvara 9 metrum. Síðari talan virðist eiga við rök að styðjast miðað við það hversu þykkir musterisveggirnir voru. – w24.10, bls. 31.

Hvað þýðir það að safnaðarþjónn eigi að vera „einnar konu eiginmaður“? (1. Tím. 3:12)

Það þýðir að hann má aðeins vera giftur einni konu og eigi ekki að fremja kynferðislegt siðleysi. Hann á ekki heldur að sýna öðrum konum óviðeigandi athygli. – w24.11, bls. 19.

Hvers vegna getum við sagt að orð Jesú í Jóhannesi 6:53 eigi ekki við um kvöldmáltíð Drottins?

Í Jóhannesi 6:53 er talað um að menn þurfi að borða hold Jesú og drekka blóð hans. Jesús sagði þetta árið 32 í Galíleu við Gyðinga sem höfðu enn ekki sterka trú á hann. Stofnað var til kvöldmáltíðar Drottins í Jerúsalem ári síðar. Þar talaði Jesús til þeirra sem áttu eftir að ríkja með honum á himnum. – w24.12, bls. 10–11.