Hversu ábyrgðarfullur er ég?

Hvernig stendurðu þig?

• Ég er ... alltaf, oftast, stundum eða aldrei

  • heiðarlegur

  • áreiðanlegur

  • stundvís

  • iðjusamur

  • skipulagður

  • hjálpsamur

  • sanngjarn

  • kurteis

  • umhyggjusamur

• Hverjir þessara eiginleika eru sterkastir í fari þínu?

  Haltu áfram að styrkja þessa góðu eiginleika. – Filippíbréfið 3:16.

• Hvaða eiginleika þarftu helst að vinna í?

Það sem fjallað er um í þessari grein getur hjálpað þér að bæta þig.

Hvað felur það í sér að vera ábyrgðarfullur?

Ábyrgðarfullir einstaklingar sinna skyldum sínum heima fyrir, í skólanum og í samfélaginu. Þeir gera sér grein fyrir að þeir eru ábyrgir gerða sinna. Þegar þeir gera mistök eru þeir því fúsir til að viðurkenna þau, biðjast afsökunar og reyna að bæta fyrir þau.

Biblían segir: „Sérhver mun verða að bera sína byrði.“ – Galatabréfið 6:5.

Hvers vegna ætti ég að vilja vera ábyrgðarfullur?

Sá sem er ábyrgðarfullur notar hæfileika sína skynsamlega. Hann er oft í góðu áliti hjá öðrum og yfirleitt koma aðrir fram við hann eins og fullorðna manneskju. Honum er gefið meira frjálsræði og hann nýtur góðs af því að vera treyst.

Biblían segir: „Sjáir þú mann vel færan í verki sínu mun hann veita konungum þjónustu sína.“ – Orðskviðirnir 22:29.

Ábyrgðarfull manneskja er yfirleitt örlát og á því oft góða vini.

Biblían segir: „Gefið og yður mun gefið verða.“ – Lúkas 6:38.

Ábyrgðarfullri manneskju finnst hún hafa áorkað einhverju og er ánægð með það. Það styrkir sjálfstraustið.

Biblían segir: „Sérhver rannsaki breytni sjálfs sín og þá mun hann hafa hrósunarefni í samanburði við sjálfan sig.“ – Galatabréfið 6:4.

Hvernig get ég verið ábyrgðarfyllri?

Til að þú getir svarað þessari spurningu skaltu líta á eftirfarandi staðhæfingar. Hver þeirra á best við þig?

„Það er leiðinlegt þegar komið er fram við mann eins og smábarn sem þarf að láta foreldra sína vita af sér á klukkutímafresti.“ – Kerri.

„Foreldrar mínir leyfa mér oftast að fara út með vinum mínum og það er aldrei neitt vesen.“ – Richard.

„Þegar ég horfi á krakka á mínum aldri og sé hvað þeir mega gera hugsa ég: ,Af hverju leyfa foreldrar mínir mér ekki að gera þetta?‘“ – Anne.

„Foreldrar mínir leyfa mér að öllu jöfnu að gera það sem mig langar til. Ég er þeim þakklát fyrir að veita mér svona mikið frelsi.“ – Marina.

Niðurstaða: Sumir unglingar fá meira frelsi en aðrir. Hver ætli ástæðan sé?

Reynslan sýnir: Hve mikið frelsi þér er gefið ræðst oft af því hversu mikið traust þú hefur áunnið þér.

Skoðaðu hvað tvö ungmenni, sem vitnað var í fyrr í greininni, hafa um þetta að segja.

Richard: „Einu sinni efuðust foreldrar mínir um að það væri skynsamlegt að gefa mér meira frjálsræði. En núna treysta þau mér af því að ég hef sýnt að ég er ábyrgðarfullur. Ég lýg ekki að þeim þegar þau spyrja mig hvert ég sé að fara eða með hverjum. Og þó að þau spyrji mig ekki læt ég þau yfirleitt vita hvað ég er að fara að gera.“

Marina: „Ég hef logið að foreldrum mínum tvisvar sinnum og það komst upp í bæði skiptin. Síðan þá hef ég alltaf sagt þeim sannleikann. Ég segi þeim nákvæmlega frá því sem ég er að gera og ég hringi í þau þegar ég er ekki heima. Núna treysta þau mér miklu betur.“

Viltu að komið sé fram við þig eins og Richard og Marinu? Þá ættirðu að kanna hvernig þú stendur þig á eftirfarandi sviðum:

Á HEIMILINU

• Sinnirðu skyldum þínum heima fyrir?

• Kemurðu alltaf heim á þeim tíma sem foreldrar þínir ætlast til?

• Kemurðu vel fram við foreldra þína og systkini?

Á hvaða sviðum gætirðu þurft að bæta þig?

Biblían segir: „Hlýðið foreldrum ykkar.“ – Efesusbréfið 6:1.

MENNTUN

• Klárar þú heimavinnuna á réttum tíma?

• Leggurðu þig fram um að bæta einkunnirnar þínar?

• Hefurðu tamið þér góðar námsvenjur?

Á hvaða sviðum gætirðu þurft að bæta þig?

Biblían segir: „Spekin veitir forsælu.“ (Prédikarinn 7:12) Góð menntun getur hjálpað þér að verða vitur.

MANNORÐ ÞITT

• Ertu heiðarlegur við foreldra þína og aðra?

• Ferðu vel með peninga?

• Ertu þekktur fyrir að vera áreiðanlegur?

Á hvaða sviðum gætirðu þurft að bæta þig?

Biblían hvetur okkur til að „íklæðast hinum nýja manni“. (Efesusbréfið 4:24) Það er hægt að bæta persónuleika sinn og mannorð.