Hvenær fæddist Jesús?

Svar Biblíunnar

Í Biblíunni er hvergi að finna nákvæma dagsetningu á fæðingu Jesú Krists eins og fram kemur í eftirfarandi heimildarritum:

„Í heilagri ritningu er þess hvergi getið hvaða mánaðardag Jesús Kristur sé fæddur.“ – Saga daganna.
„Nákvæm dagsetning á fæðingu Krists er ókunn.“ – Encyclopedia of Early Christianity.

Þótt Biblían svari ekki spurningunni um hvenær Jesús hafi fæðst lýsir hún tveimur atburðum sem áttu sér stað við fæðingu hans og sem leiða líkum að því að hann hafi ekki fæðst 25. desember.

Ekki um vetur

Skrásetningin. Stuttu áður en Jesús fæddist gaf Ágústus keisari út þá tilskipun „að skrásetja skyldi alla heimsbyggðina“. Hver og einn varð að fara „til sinnar borgar“ og láta skrásetja sig. Fyrir marga gat slík ferð tekið viku eða meira. (Lúkas 2:1-3) Þessi fyrirskipun, sem sennilega var gefin til að auðvelda skattlagningu og herkvaðningu, hefði verið óvinsæl á hvaða tíma árs sem væri. Það er þó ólíklegt að Ágústus keisari hefði ögrað þegnum sínum enn frekar með því að neyða marga þeirra í langt ferðalag í vetrarkuldanum.
Sauðkindurnar. Fjárhirðar voru „úti í haga og gættu um nóttina hjarðar sinnar“. (Lúkas 2:8) Í bókinni Daily Life in the Time of Jesus kemur fram að hjarðirnar hafi verið úti undir berum himni allt frá „vikunni fyrir páskahátíðina [síðla mars] þar til um miðjan nóvember“. Í bókinni er síðan bætt við: „Yfir vetrartímann voru þær hafðar í húsi; af þessu einu má sjá að hin hefðbundna dagsetning jólanna, um vetur, getur varla verið rétt því að guðspjöllin segja að fjárhirðar hafi verið úti í haga.“

Að hausti

Jesús dó á páskahátíðinni þann 14. nísan árið 33. Hægt er að áætla hvenær hann fæddist með því að telja til baka frá dauðadegi hans. (Jóhannes 19:14-16) Jesús var um þrítugt þegar hann hóf starf sitt sem stóð yfir í þrjú og hálft ár. Hann fæddist því að hausti árið 2 f.Kr. – Lúkas 3:23.

Af hverju eru haldin jól 25. desember?

Af hverju eru haldin jól 25. desember fyrst ekkert bendir til þess að Jesús Kristur hafi fæðst á þessum degi? Í alfræðiorðabókinni Encyclopædia Britannica segir að trúarleiðtogar kirkjunnar hafi líklega valið þennan dag vegna þess að á þessum tíma, við vetrarsólstöður, var haldin „heiðin rómversk hátíð er nefndist ‚fæðingardagur hinnar ósigrandi sólar‘“. Samkvæmt alfræðibókinni The Encyclopedia Americana halda margir fræðimenn því fram að þetta hafi verið gert til að „gera kristnina þýðingarmeiri í augum heiðinna trúskiptinga“.