Skækjan mikla afhjúpuð

NÚVERANDI heimsskipan undir stjórn Satans hefur þrjá meginparta sem „guð þessarar aldar“ ráðskast með. Þeir eru pólitískt stjórnvald, áhrif og völd stórvelda viðskiptalífsins og svo trúarbrögðin. Allar árþúsundir mannkynssögunnar hefur þetta þrennt verið fastir liðir nánast allra stjórnkerfa. Hvert af þessum sterku öflum er táknað með ‚móður hórkvennanna‘? — 2. Korintubréf 4:3, 4; Opinberunarbókin 12:9; 17:5.

Samkvæmt sýn Jóhannesar, sem hér er til umræðu, hafa valdhafarnir, „konungar jarðarinnar,“ fúslega drýgt saurlifnað með henni. (Opinberunarbókin 18:3) (Færð verða fram söguleg rök fyrir því á næstu blaðsíðum.) Babýlon hin mikla getur því ekki táknað hin stjórnmálalegu valdaöfl heims.

Hvað um stórveldi viðskiptalífsins sem gegna svo mikilvægu hlutverki í málefnum manna nú á tímum? Þau hafa vissulega sterk áhrif meðal margra þjóða og ákveða í raun hverjir skuli vera ríkir og hverjir fátækir. Geta þau verið Babýlon hin mikla? Engillinn gaf Jóhannesi mikilvæga vísbendingu sem svarar þeirri spurningu. Hann skýrði frá óvæntum atburði — Babýlon er fallin úr náðinni! Hún glatar viðskiptavinum sínum og friðlum sem skyndilega fá viðbjóð á henni. Hverjir hafa, auk ‚konunga jarðarinnar,‘ verið fastagestir hennar? Engillinn segir: „Því að hún hefur byrlað öllum þjóðum af reiði-víni saurlifnaðar síns, og konungar jarðarinnar drýgðu saurlifnað með henni og kaupmenn jarðarinnar auðguðust af gnóttum munaðar hennar.“ Já, kaupmenn jarðarinnar hafa hagnast á því að vera í slagtogi með henni og eiga viðskipti við hana og auka ‚gnóttir munaðar hennar.‘ Hún getur því ekki táknað stórveldi viðskiptalífsins í heiminum. — Opinberunarbókin 18:3.

Með útilokunaraðferðinni höfum við þannig útilokað stjórnmálaöflin og áhrif og völd stórvelda viðskiptalífsins. Hvað situr þá eftir? Það hlýtur að vera sá valdageiri sem einnig hæfir áfellisdóminum: „Hún leiddi þjóðirnar afvega með kukli sínu og göldrum.“ (Lifandi orð) Hún er sá eðlisþáttur sem hefur haft sterk áhrif á hugsanagang og hátterni þjóðanna allt frá dögum Forn-Babýlonar, þótt þau áhrif fari nú dvínandi. Það er hún sem hefur haldið „ríki yfir konungum jarðarinnar“ — það er að segja fölsk trúarbrögð! — Opinberunarbókin 17:18; 18:23.

Þótt einlægu, trúhneigðu fólki kunni að hnykkja við þessi tíðindi er Babýlon hin mikla, móðir hórkvenna, táknmynd heimsveldis falstrúarbragða Satans. Hún er táknmynd þeirra trúarbragða heims sem hafa á einn eða annan veg slakað til gagnvart stjórnmála- og fjármálaöflunum út í gegnum mannkynssöguna.

Stríðsmangarinn Babýlon

Í samræmi við spádómssýnina er Babýlon hin mikla hóran mikla sem hefur leitt þjóðir, lýði og ættkvíslir út í blóðugar styrjaldir, krossferðir og blóðhefndir, og blessað þær með særingaþulum, vígðu vatni, bænum og eldheitum ættjarðarræðum.a — Opinberunarbókin 18:24.

Klerkastétt hennar, einkanlega herprestarnir, hafa verið viljug verkfæri valdhafanna í því að smala saman fjöldanum til að vera fallbyssufóður í stórslátrun tveggja heimsstyrjalda og annarra stórátaka. Kaþólskir hafa drepið kaþólska og mótmælendur hafa skylduræknir brytjað niður mótmælendur svo að um 50 til 60 milljónir manna týndu lífi aðeins í heimsstyrjöldunum tveim.

Á okkar upplýstu 20. öld heldur arfur trúarbragðanna áfram að ala af sér hatur og dauða — ekki aðeins á valdasvæði kristna heimsins með árekstrum kaþólskra og mótmælenda, heldur líka í þeim heimshluta sem ekki telst kristinn þar sem er múhameðstrú gegn gyðingdómi, hindúatrú gegn múhameðstrú, búddhatrú gegn hindúatrú, sikhatrú gegn hindúatrú og svo mætti lengi telja.

Enn fremur hafa trúarbrögðin alltaf viljað hafa sterk áhrif á ‚konunga jarðarinnar‘ og freistað þess að ákveða örlög þeirra og arftaka. Við skulum stuttlega líta á fáein dæmi.

[Neðanmáls]