DANÍEL spámaður var uppi meira en 500 árum fyrir fæðingu Jesú en Jehóva gaf honum vissar upplýsingar þannig að hægt væri að tímasetja nákvæmlega hvenær Jesús yrði smurður, það er að segja útnefndur Messías eða Kristur. Daníel var sagt: „Vit því og hygg að: Frá því, er orðið um endurreisn Jerúsalem út gekk, til hins smurða höfðingja, eru sjö sjöundir, og í sextíu og tvær sjöundir skulu torg hennar og stræti endurreist verða.“ — Daníel 9:25.

Til að ákvarða hvenær Messías átti að koma þurfum við að finna út viðmiðunarárið sem komutími hans er talinn frá. Samkvæmt spádóminum á að telja „frá því, er orðið um endurreisn Jerúsalem út gekk“. Hvenær var það? Að sögn biblíuritarans Nehemía var það „á tuttugasta ríkisári Artahsasta konungs“ sem gefin var tilskipun um að múrar Jerúsalem skyldu endurreistir. (Nehemíabók 2:1, 5-8) Sagnfræðingar staðfesta að fyrsta heila ríkisár Artahsasta konungs (oftast nefndur Artaxerxes 1.) hafi verið 474 f.Kr. Tuttugasta ríkisárið var því 455 f.Kr. Þetta er upphafsárið sem miðað er við í Messíasarspádómi Daníels.

Daníel tiltekur hve langur tími ætti að líða þangað til ‚hinn smurði höfðingi‘ Messías kæmi. Spádómurinn nefnir fyrst „sjö sjöundir“ og síðan „sextíu og tvær sjöundir“ eða samanlagt 69 sjöundir.a Hve langur tími er það? Í sumum biblíuþýðingum er tekið fram að þetta séu sjöundir ára. Hver sjöund er sem sagt sjö ár. Það var vel þekkt meðal Gyðinga fornaldar að telja í sjö ára einingum. Til dæmis var hvíldarár hjá þeim sjöunda hvert ár. (2. Mósebók 23:10, 11) Hinar 69 sjöundir í spádóminum samsvara því 69 sinnum 7 eða 483 árum.

Nú er ekki annað eftir en að telja. Ef við teljum 483 ár frá 455 f.Kr. ber okkur niður á árið 29 e.Kr. Það var einmitt árið sem Jesús lét skírast og varð Messías!b (Lúkas 3:1, 2, 21, 22) Þetta hlýtur að teljast eftirtektarverð uppfylling á biblíuspádómi.

TIL að auðvelda okkur að bera kennsl á frelsarann Messías innblés Jehóva Guð mörgum spámönnum Biblíunnar að gefa ítarlegar upplýsingar um fæðingu hans, þjónustu og dauða. Allir spádómarnir rættust á Jesú Kristi. Þeir eru ótrúlega nákvæmir og ítarlegir. Við skulum sjá dæmi um þetta með því að líta á fáeina spádóma um fæðingu Messíasar og bernsku hans.

Jesaja spámaður upplýsti að Messías myndi koma af Davíð konungi. (Jesaja 9:7) Sú varð líka raunin. — Matteus 1:1, 6-17.

Míka, annar spámaður Guðs, sagði fyrir að barnið myndi fæðast í „Betlehem Efrata“ og verða drottnari þegar fram liðu stundir. (Míka 5:1) Þegar Jesús fæddist voru til tveir bæir í Ísrael sem hétu Betlehem. Annar var nálægt Nasaret, norðarlega í landinu, en hinn nálægt Jerúsalem í Júda. Síðarnefndi bærinn var fyrr á tímum kallaður Efrata. Þar fæddist Jesús, rétt eins og sagði í spádóminum. — Matteus 2:1.

Í öðrum biblíuspádómi segir að sonur Guðs yrði kallaður „frá Egyptalandi“. Farið var með Jesú ungan til Egyptalands en fjölskyldan sneri aftur til Ísraels eftir að Heródes var dáinn. Þannig rættist spádómurinn. — Hósea 11:1; Matteus 2:15.

Í töflunni „Spádómar um Messías“ eru tilteknir ritningarstaðir í dálknum „Spádómur“ þar sem fram koma ýmsar upplýsingar um Messías. Berðu þá saman við ritningarstaðina í dálknum „Uppfylling“. Það styrkir trú þína á að orð Guðs sé satt og rétt.

Þegar þú skoðar ritningarstaðina skaltu hafa í huga að spádómarnir voru skrifaðir öldum áður en Jesús fæddist. Sjálfur sagði hann: „Rætast [átti] allt það, sem um mig er ritað í lögmáli Móse, spámönnunum og sálmunum.“ (Lúkas 24:44) Og þú getur notað biblíuna þína til að sannreyna að þeir rættust í smáatriðum!

ÞEIR sem trúa þrenningarkenningunni segja að Guð sé samsettur úr þrem persónum, föðurnum, syninum og heilögum anda. Allar persónurnar eru sagðar vera jafnar, almáttugar og án upphafs. Þrenningarkenningin er sem sagt á þá lund að faðirinn sé Guð, sonurinn sé Guð og heilagur andi sé Guð en þó sé Guð aðeins einn.

Margir sem trúa þessari kenningu viðurkenna að þeir geti ekki útskýrt hana. Þeir halda engu að síður að hún sé kennd í Biblíunni. Athygli vekur að orðið „þrenning“ stendur hvergi í Biblíunni. Skyldi þá hugmyndin koma þar fram? Til að svara því skulum við líta á ritningarstað sem talsmenn þrenningarkenningarinnar vitna oft í henni til stuðnings.

„ORÐIÐ VAR GUГ

Í Jóhannesarguðspjalli 1:1 stendur: „Í upphafi var Orðið, og Orðið var hjá Guði, og Orðið var Guð.“ Síðar í sama kafla kemur greinilega fram að „Orðið“ sé Jesús Kristur. (Jóhannes 1:14) En þar sem Orðið er kallað Guð álykta sumir að sonurinn og faðirinn hljóti að vera hluti af einum og sama Guði.

Nú er rétt að hafa í huga að þessi biblíubók var upphaflega skrifuð á grísku og gríski textinn var síðan þýddur á önnur tungumál. Allmargir biblíuþýðendur sögðu hins vegar ekki: „Orðið var Guð“ í þessu versi af því að þekking þeirra á grísku máli Biblíunnar sagði þeim að annað orðalag væri heppilegra. Lítum á nokkur dæmi: „Logos [Orðið] var guðlegt.“ (A New Translation of the Bible) „Orðið var guð.“ (The New Testament in an Improved Version) „Orðið var hjá Guði og var sama eðlis og hann.“ (The Translator’s New Testament) Samkvæmt orðalagi þessara þýðinga er Orðið ekki Guð sjálfur heldur „guð“ í þeim skilningi að það fer með háa stöðu meðal sköpunarvera Jehóva Guðs.a Hér merkir orðið „guð“ sem sagt „voldug vera“.

AFLAÐU ÞÉR NÁNARI UPPLÝSINGA

Fæstir kunna skil á biblíugrísku. Hvernig er þá hægt að vita hvað Jóhannes postuli átti við í raun og veru? Lítum á eftirfarandi dæmi: Kennari skýrir ákveðið efni fyrir nemendum sínum. Nemendurnir eru ekki sammála um það eftir á hvernig eigi að skilja skýringar kennarans. Hvernig eiga þeir að komast til botns í málinu? Þeir gætu beðið kennarann um nánari skýringar. Ítarlegri upplýsingar myndu eflaust veita þeim betri skilning á efninu. Þú gætir sömuleiðis glöggvað þig betur á Jóhannesi 1:1 með því að leita meiri upplýsinga í þessu sama guðspjalli um stöðu Jesú. Ef þú færð í hendur fleiri staðreyndir um málið ættirðu að geta komist að réttri niðurstöðu.

Tökum sem dæmi orð Jóhannesar í 18. versi 1. kaflans: „Enginn hefur nokkurn tíma séð [alvaldan] Guð.“ Menn hafa hins vegar séð Jesú, soninn, því að Jóhannes segir: „Orðið [Jesús] varð hold, hann bjó með oss, fullur náðar og sannleika, og vér sáum dýrð hans.“ (Jóhannes 1:14) Hvernig getur sonurinn þá verið hluti af alvöldum Guði? Jóhannes segir enn fremur að Orðið hafi verið „hjá Guði“. Varla er hægt að vera hjá sjálfum sér. Auk þess gerir Jesús skýran greinarmun á sjálfum sér og föðurnum á himnum eins og fram kemur í Jóhannesi 17:3. Þar kallar hann föðurinn „hinn eina sanna Guð“. Og undir lok guðspjallsins gerir Jóhannes eftirfarandi samantekt: „Þetta er ritað til þess að þér trúið, að Jesús sé Kristur, sonur Guðs.“ (Jóhannes 20:31) Við tökum eftir að Jesús er ekki kallaður Guð heldur sonur Guðs. Þessar viðbótarupplýsingar, sem er að finna í Jóhannesarguðspjalli, sýna hvernig okkur ber að skilja Jóhannes 1:1. Jesús, Orðið, er „guð“ í þeim skilningi að hann er hátt settur en hann er ekki alvaldur Guð.

SANNREYNDU STAÐREYNDIR

Snúum okkur aftur að dæminu um kennarann og nemendurna. Segjum að sumir af nemendunum séu enn í vafa eftir að hafa hlustað á nánari skýringar hjá kennaranum. Hvað er þá til ráða? Þeir gætu leitað til annars kennara og spurt hann út í efnið. Ef sá staðfestir skýringar hins fyrri ættu efasemdir flestra nemendanna að vera úr sögunni. Ef þú ert ekki viss um hvað biblíuritarinn Jóhannes var að segja um samband Jesú og Guðs hins alvalda gætirðu leitað nánari upplýsinga hjá öðrum biblíuritara. Tökum guðspjall Matteusar sem dæmi. Hann vitnar í orð Jesú um endalok núverandi heimskerfis: „Þann dag og stund veit enginn, hvorki englar á himnum né sonurinn, enginn nema faðirinn einn.“ (Matteus 24:36) Hvernig staðfesta þessi orð að Jesús sé ekki alvaldur Guð?

Jesús segir að faðirinn viti meira en sonurinn. Ef Jesús væri hluti af alvöldum Guði myndi hann hins vegar vita það sama og faðirinn. Faðirinn og sonurinn geta þar af leiðandi ekki verið jafnir. Sumir segja kannski að Jesús hafi haft tvenns konar eðli og þarna hafi hann talað sem maður. Segjum að það væri rétt. Hvað þá um heilagan anda sem á að vera þriðji hluti hins þríeina Guðs? Af hverju segir Jesús ekki að heilagur andi viti það sem faðirinn veit?

Með áframhaldandi biblíunámi kynnist þú fleiri ritningarstöðum sem tengjast þessu efni, og þeir staðfesta sannleikann um föðurinn, soninn og heilagan anda. — Sálmur 90:2; Postulasagan 7:55; Kólossubréfið 1:15.