Hvar er sanna hamingju að finna?

MARGIR halda að þeir finni hamingjuna með því að safna efnislegum eigum. Hvað um þig? Efnislegar eigur geta vissulega átt sinn þátt í hamingju okkar, en þær hvorki tryggja hana né byggja upp trú okkar eða fullnægja andlegum þörfum okkar.

Jesús Kristur sagði í fjallræðu sinni: „Sælir eru þeir sem eru sér meðvita um andlega þörf sína því að himnaríki tilheyrir þeim.“ (Matteus 5:3 NW) Jesús sagði líka: „Gætið yðar, og varist alla ágirnd. Enginn þiggur líf af eigum sínum, þótt auðugur sé.“ — Lúkas 12:15.

Margir leita hamingjunnar í óleyfilegu kynlífi og öðrum ‚verkum holdsins‘. (Galatabréfið 5:19-21) En sönn og varanleg hamingja fæst ekki með því að láta undan holdlegum löngunum. Reyndar munu þeir sem gera slíkt ekki erfa Guðsríki. — 1. Korintubréf 6:9, 10.

Aðrir leita hamingjunnar innan með sér með því að reyna að byggja upp sjálfsvirðingu sína. Bókasöfn og bókabúðir eru fullar af leiðbeiningabókum um hvernig megi bæta persónuleika sinn, en samt hafa slík rit ekki fært fólki varanlega hamingju. Hvar getum við þá fundið raunverulega hamingju?

Við þurfum að koma auga á meðfædda andlega þörf okkar til að vera raunverulega hamingjusöm. Jesús sagði: „Sælir eru þeir sem eru sér meðvita um andlega þörf sína.“ En það gerir okkur lítið gagn ef við aðeins sjáum þessa þörf en gerum svo ekkert í málinu. Tökum dæmi: Hvað kæmi fyrir maraþonhlaupara ef hann hunsaði þörf líkamans fyrir vatn að lokinni keppni? Myndi hann ekki fljótlega þorna upp og finna fyrir ýmsum alvarlegum afleiðingum vessaþurrðar? Á sama hátt visnum við að lokum andlega ef við sinnum ekki þörf okkar fyrir andlega næringu. Þannig missum við hamingju okkar og gleði.

Jesús gerði sér fulla grein fyrir andlegri þörf sinni og hann nam og hugleiddi orð Guðs reglulega. Hann gat auðveldlega fundið og lesið viðeigandi kafla í Ritningunni og hann kenndi öðrum að gera það sama. (Lúkas 4:16-21; samanber Efesusbréfið 4:20, 21.) Jesús líkti því að gera vilja föður síns við mat. Að gera vilja Guðs veitti honum mikla hamingju. — Jóhannes 4:34.

Já, það er því hvorki hægt að öðlast sanna hamingju með því að afla sér efnislegra eigna né er hamingja afleiðing þess að fullnægja löngunum holdsins. Sönn hamingja er ástand hjartans, byggt á einlægri trú og góðu sambandi við Jehóva Guð. Það er því viðeigandi að sálmaritarinn Davíð skyldi syngja: „Sæl er sú þjóð, sem á [Jehóva] að Guði.“ — Sálmur 144:15b.

[Mynd á blaðsíðu 31]

Trú og gott samband við Guð veita þér sanna hamingju.