Ha Noo Eji A Ka Sẹ bhi JW.ORG bhi Itẹmhọn Osẹnobulua

Ividio bi uhọnmhọn-ọta kẹkẹ ne ha yẹ sabọ ha yẹẹ ẹbho ne iyi Esali Jehova, ele a ne ọbhi eji a ka sẹ bhi jw.org. (Ac 13:48) Ẹmhọn ebe sunu nọn gba ije rebhe nin ẹbho yẹ ria ẹmhọn ọlẹn, ele a kẹ ne ọbhọ.

Be uwẹ ha rẹ sabọ noo ebe ribhi eji a ka sẹ bhi jw.org yẹ bhi iwẹnna itẹmhọn Osẹnobulua?

• Ha fẹ ọne wẹbsait ghe ẹghe-ẹghe. Ha gbẹlokotọ bhi emhin ọgbọn nan ne ọbhọ, uwẹ ha ria ẹmhọn ebi uwẹ ha rẹ noo ọle rẹ rẹkpa ẹbho ne ka uwẹ ehọ yẹ. (Nin uwẹ rẹ sabọ miẹn emhin ọgbọn ọbhebhe nan la ne dagbare bhi eji a ka sẹ bhi jw.org, piẹn “Fẹ Enekẹle Ghe.”) Uwẹ a ha gbẹlokotọ bhi emhin ọgbọn nan ne ọbhọ, ọ ki rẹkpa uwẹ lẹn emhin ne sunu nin uwẹ ha sabọ zilo nyan bhi itẹmhọn Osẹnobulua.

• Noo uhọnmhọn-ọta bi vidio kẹkẹ ne ribhi eji a ka sẹ bhi jw.org rẹ munhẹn ha ne ẹbho zilo. Ene emhin nan dẹ sabọ rẹkpa mhan lẹn ebi ẹbho ne ribhi eji mhan da tẹmhọn Osẹnobulua ria ẹmhọn ọlẹn.

• Re eji a ka sẹ bhi jw.org man ẹbho. Re unun so bhi uhọnmhọn-ọta eso, uwẹ ha yẹ rẹman ọne ọria ebi ọle ha rẹ ha guanọ emhin bhi ẹkẹ ọle yẹ.

• Je linki ji ẹbho. Ọ iyẹẹ ẹbho eso rẹ ne mhan talọ, sokpan ọ yẹẹ ele rẹ ha fẹ wẹbsait nọnsẹmhan ghe. Bhiriọ, dọnmhegbe ha je linki ji ele nọn ha re ele diọbhi eji a ka sẹ bhi jw.org la vidio bi uhọnmhọn-ọta ne ribhọ.