LUẸ ỌNAN
Luẹ Emhin Bhi Ifoto Ne Ribhi Ebe Nesẹmhan
Ifoto ne bunbun wo ribhi ebe nesẹmhan ne man mhan emhin kpataki. Be uwẹ ha rẹ manman ha miẹn emhin luẹ bhi ene ifoto nan yẹ?
Ọkuẹsẹ uwẹ munhẹn ha tie ebe, ka fẹ ene ifoto ne ribhọ nẹga. Ene ifoto dẹ rẹkpa uwẹ rẹ ha mhọn ọne ọhubhudu rẹ tie ọne ebe. Ọria ha daghe ebale nọn mhẹn bhi unun bhi uke tebu, ọ ki ha ghọnlẹn rẹ le ọle. Iriọ sẹyẹ nọn, ahamiẹn uwẹ ka daghe ene ifoto ne ribhi ebe nin uwẹ ha tie, ọ ki ha ghọn uwẹ rẹ tie ọle. Bhiriọ, ọkuẹsẹ uwẹ munhẹn ha tie ebe, ka nọọn egbe ẹ ọne inọnta nan, ‘Ifoto nela ribhi ọne ebe nan?’—Amos 7:7, 8.
Ahamiẹn uwẹ tie ọne ebe, ria eria nyan ebezẹle nan da ne ene ifoto ọbhọ. Ahamiẹn a gbẹn ebe sikẹ ene ifoto rẹ gbotọle fanọn an, dọnmhegbe tie ọle. Ria eria nyan ebi ene ifoto rẹ diẹn mun ọne ebe yẹ, bi ebi uwẹ ha rẹ sabọ re obọ rẹkhan ebi ọ man uwẹ le bhi iẹnlẹn.
Uwẹ ha tie ọne ebe fo, kie fẹ ene ifoto ghe, uwẹ ha yẹ re ele ye egbe ẹ re ene emhin kpataki nin uwẹ luẹle bhi ọne ebe. Dọnmhegbe rẹ re ọkhọle munọ ebe ribhi ene ifoto, bi emhin kpataki nin ele man uwẹ le.
Dọnmhegbe kie fẹ ene ifoto ne ribhi ọne ebe nan ghe, nin uwẹ rẹ lẹn si uwẹ dẹ yẹ sabọ ye ebi ele man uwẹ le re.