Jerimaya
4 “Otẹrọnọ who re zihe ze, O Izrẹl,” ere Jihova ọ ta,
“Otẹrọnọ who re zihe bru omẹ ze,
Yọ otẹrọnọ who re si emedhọ etọtọ ra no aro mẹ,
Whọ gbẹ te jọ ọnọ ọ be dhẹ dhere he.+
2 Otẹrọnọ who te duwu iyei nọ,
‘Nọ Jihova ọ rrọ uzuazọ na!’ evaọ uzẹme, uvioziẹ, gbe ẹrẹreokie,
Erẹwho na e vẹ te rọ ẹkwoma riẹ wo oghale kẹ omarai,
Yọ ọye a ti ro seha.”+
3 Keme enẹ Jihova ọ ta kẹ ezae Juda gbe Jerusalẹm:
“Wha kporo otọ nọ u re wou ekakọ kẹ omarai,
Wha gbẹ kọ eware fihọ udevie idhigbo ho.+
4 Wha yawo omarai kẹ Jihova,
Re wha je ku iwoliwo nọ e rrọ udu rai no,+
Whai ezae Juda gbe ahwo nọ a be rria Jerusalẹm,
Re ofu mẹ ọ gbẹ ware wọhọ erae he,
Ọ vẹ be to ababọ ohwo ọvo nọ o re furie iei,
Fiki iruẹru imuomu rai.”+
5 Wha whowho iei evaọ Juda, re wha woro iei evaọ Jerusalẹm.
Wha bo je kporo onware nya wariẹ ẹkwotọ na soso họ.+
Wha bo via ruarua re wha ta nọ: “Wha kokohọ oria ovo,
6 Kpare oware oka* rri Zayọn.
Gwọlọ uwou nọ wha rẹ jọ, wha dikihẹ oria ovo ho,”
Keme mẹ be rọ okpẹtu no obọ ẹkpẹlobọ ovatha-ọre tha,+ okpẹtu ologbo.
Ọ wọ no oria riẹ lahwe no re o ru ẹkwotọ ra fihọ oware idudu.
A te raha ikpewho ra kuotọ, ohwo ọvo ọ gbẹ te rria ae eva ha.+
8 Fikiere wha ku ehọ-ekpa* họ,+
Wha weri* je kuenu oviẹ,
Keme ofu ọgaga Jihova ọ re rẹriẹ siọ omai ba ha.
9 Jihova ọ ta nọ, “Evaọ ẹdẹ yena, udu ovie na u gbe ti kie he,*+
Ere ọvona o te via kẹ udu ikpahwo-esuo na;*
Idudu e te jọ izerẹ na oma, yọ akpọ o ti gbe eruẹaro na unu.”+
10 Kẹsena mẹ tẹ ta nọ: “O Jihova Olori nọ Ọ Mai Kpehru na! Evaọ uzẹme, whọ viẹ ahwo nana+ gbe Jerusalẹm họ totọ, inọ, ‘Wha ti wo udhedhẹ,’+ kpakiyọ ọgbọdọ na ọ rrọ uvou mai no.”*
11 Evaọ oke yena, a te ta kẹ ahwo nana gbe Jerusalẹm nọ:
“Ofou ọrrorro ọgaga nọ o no obọ ikpehru ivevẹ nọ e rrọ udhude na ze
O ti fou mu ọmọtẹ* ahwo mẹ;
Orọnikọ o bi fou ze re o fou erara kufiẹ hẹ hayo ru ibi ekakọ fo ho.
12 Mẹ họ ọnọ o vi ofou ọgaga na no eria nana ze.
Enẹna me ti bruoziẹ kpe ai.
13 Rri! Ọ te tha wọhọ ẹgho oso,
Yọ ekẹkẹ riẹ e wọhọ ofou ọwhibo.+
Enyenya riẹ i siawọ vi igo.+
Uye u te omai, keme ma whu no!
14 O Jerusalẹm, wozẹ umuomu no udu ra riẹriẹriẹ, re a ruẹsi siwi owhẹ.+
Ẹvẹ who re wo iroro imuomu fihọ eva kri te?
15 Urru jọ o be vuẹ usi nọ u no obọ Dan ze,+
Yọ u bi whowho okpẹtu nọ o no obọ igbehru Ifremu ze.
16 Niyẹrẹ riẹ, ẹhẹ, niyẹrẹ riẹ kẹ erẹwho na;
Whowho iei kpahe Jerusalẹm.”
“Elakpa* i bi no obọ ẹkwotọ ugbothabọ ze,
Yọ a te kpare irru rai rọsuọ ikpewho Juda.
17 A be vẹruọ Jerusalẹm evaọ tofẹ tofẹ wọhọ iroiro nọ i bi rou udhu,+
Fikinọ ọ wọso omẹ no,”+ ere Jihova ọ ta.
18 “A ti ru re iruemu obọra gbe iruẹru ra i hwẹ ku owhẹ uzou.+
Okpẹtu nọ o ti te owhẹ o ti yoma kẹhẹ,
Keme o ti te obọ otọ udu ra!”
19 Mẹ be rova,* mẹ be rova!
Udu mẹ o be da omẹ gaga.*
Udu mẹ u bi kie kpikpikpi.
20 A niyẹrẹ okpẹtu nọ o be via unọjọ utọjọ no,
Keme a raha ẹkwotọ na soso no.
A raha iwou-udhu mẹ no idudhe,
O raha oke re a tẹ raha ehọ uwou-udhu mẹ no ho.+
22 “Keme ahwo mẹ a rrọ gheghẹ;+
A be daezọ mẹ hẹ.
Emezae igheghẹ nọ i wo otoriẹ hẹ a rrọ.
A wo areghẹ epanọ a re ro ru eyoma,
Rekọ a riẹ epanọ a re ru ewoma ha.”
23 Mẹ ruẹ ẹkwotọ na, o jọ ofofe yọ a gbabọkẹ kẹe no.+
Me rri idhiwu na, elo rai ọ gbẹ jariẹ hẹ.+
24 Mẹ ruẹ igbehru na, yọ i je nuhu,
Yọ ikpehru na i je gbe kpakpakpa.+
26 Mẹ ruẹ nọ ọgbọ na o zihe ruọ igbrẹwọ no,
Yọ a kporo ikpewho riẹ kpobi fihọ otọ no.+
Onana o via fiki Jihova,
Fiki ofu ọgaga riẹ.
27 Keme enẹ Jihova ọ ta: “Ẹkwotọ na soso ọ te jọ ofofe,+
Rekọ mẹ te raha iẹe muotọ riẹriẹriẹ hẹ.
29 Okpẹwho na soso o be dhẹ+
Fiki edo edhẹ-enyenya gbe enọ e rẹ sa ose.
A be ruọ eva ituetue na,
A be gadiẹ itho na.+
A dhẹ no okpẹwho kpobi no,
Yọ ohwo ọvo ọ be rria ae eva ha.”
30 Enẹna nọ a raha owhẹ no na, eme who ti ru na?
Whọ jẹ hai ku iwu ohọ owawae họ,
Jẹ whẹ eware osẹ igoru họ,
Jẹ rehọ usiaro ubiebi si ikpe-aro ra fihọ kẹkẹe.
Rekọ uye nọ whọ jẹ rọ whẹ erru họ oma ra na uvrẹvru,+
Keme ahwo nọ a jẹ dhẹ lele owhẹ a siọ owhẹ no;
31 Keme me yo edo nọ ọ wọhọ ọrọ aye nọ ọ be mọ,
Idhọvẹ nọ e wọhọ erọ aye nọ o bi yẹ ọmọ ọsosuọ riẹ,
Uvou ọmọtẹ Zayọn nọ ẹwẹ riẹ o bi te otọ te ehru hu.
Ọ rriẹ abọ riẹ fihọ, yọ ọ be ta nọ:+
“Uye u te omẹ, keme oma o lọhọ omẹ* no fiki ikpikpakpe na!”