Orọ Ọsosuọ Ro Se Ahwo Kọrint

10 Inievo, mẹ gwọlọ nọ wha riẹ nọ esẹ-esẹ mai kpobi a jọ otọ ẹgho na+ yọ aikpobi a nya abade na vrẹ,+ 2 aikpobi a họ-ame fihọ Mosis ẹkwoma ẹgho na gbe abade na, 3 aikpobi a re emu ọvona nọ Ọghẹnẹ ọ kẹ rai,+ 4 aikpobi a da ame ọvona nọ Ọghẹnẹ ọ kẹ rai.+ Keme a jẹ hae jọ utho nọ u no obọ Ọghẹnẹ ze nọ u je lele ai na da ame, yọ utho yena u dikihẹ kẹ Kristi.*+ 5 Ghele na, Ọghẹnẹ ọ wereva kugbe ibuobu rai hi, keme a kpe rai evaọ udhude na.+

6 Whaọ eware nana e rrọ iriruo kẹ omai, re ma gbe siuru eware iyoma ha, wọhọ epanọ a siuru eware iyoma.+ 7 Wha joma gọ edhọ họ, wọhọ epanọ ejọ rai a ru; wọhọ epanọ a kere nọ: “Ahwo na a tẹ keria jẹ re jẹ da. Kẹsena a tẹ kpama re a re omaweromẹ.”+ 8 Wha joma duomahọ ọfariẹ-ogbe* he, wọhọ epanọ ejọ rai a gbe-ọfariẹ,* nọ ahwo idu udhegbesa (23,000) rai a ro whu evaọ ẹdẹ ọvo.+ 9 Wha joma dawo Jihova* ha,+ wọhọ epanọ ejọ rai a dawo e riẹ, nọ eraomuomu e rọ rowo ai kpe.+ 10 Wha joma jọ enọ e rẹ go ho, wọhọ epanọ otu rai jọ a go,+ nọ okpikpakpe na o ro kpe ai.+ 11 Whaọ eware nana e via kẹ ae wọhọ iriruo, yọ a kere i rai re e jọ unuovẹvẹ kẹ omai+ nọ e be rria obọ ekuhọ uyero-akpọ sa-sa na.

12 Fikiere, jọ ohwo nọ o bi roro nọ o dikihẹ ọ yọroma re ọ seba ekie.+ 13 Odawọ ọvuọvo u ri te owhai hi ajokpaọ onọ u bi te ahwo.+ Rekọ Ọghẹnẹ o re ru ẹme riẹ gba, yọ ọ rẹ kuvẹ hẹ re odawọ nọ wha rẹ sai thihakọ riẹ hẹ u te owhai,+ rekọ nọ odawọ u te te owhai ọ te gbẹ edhere kẹ owhai re wha sai thihakọ riẹ.+

14 Fikiere, iyoyou mẹ, wha dhẹ kẹnoma kẹ ẹdhọgọ.+ 15 Mẹ be ta ẹme kẹ owhai ahwo nọ a wo orimuo; wha bruoziẹ eme nọ mẹ be ta na kẹ omarai. 16 Egho udi orọ oghale nọ ma be lẹ fihọ na, kọ u gbe dhesẹ nọ azẹ Kristi o te omai?+ Ebrẹdi nọ ma bi bru na, u gbe dhesẹ nọ ugboma Kristi u te omai?+ 17 Fikinọ ebrẹdi ọvo ọ riẹ, dede nọ ma rrọ buobu, ugboma ọvo ma rrọ,+ keme ebrẹdi ọvo yena mai kpobi ma be re na.

18 Wha roro kpahe orẹwho Izrẹl: Enọ e rẹ re eware nọ a ro dhe idhe na, kọ ogbẹrọnọ agbada-idhe na a bi lele re emu na?+ 19 Kọ eme mẹ be ta na? Inọ oware nọ a ro dhe idhe kẹ ẹmẹdhọ yọ oware jọ nọ a rẹ daezọ riẹ, hayo inọ ẹmẹdhọ yọ oware jọ? 20 Ijo; rekọ mẹ be ta nọ eware nọ erẹwho na a bi ro dhe idhe na a be rehọ ae dhe idhe kẹ idhivẹri, orọnikọ Ọghẹnẹ hẹ;+ yọ mẹ gwọlọ nọ wha lele idhivẹri re eware rai hi.+ 21 Wha rẹ sae da egho Jihova* gbe egho idhivẹri hi; wha rẹ sae re emu evaọ “emẹjẹ Jihova”*+ gbe emẹjẹ idhivẹri hi. 22 Hayo ‘kọ ma bi ru Jihova* re ihri’?+ Ma ga vi ei hi, manikọ ere he?

23 Uzi o kuvẹ* eware kpobi; rekọ orọnọ eware kpobi e rẹ kẹ erere he. Uzi o kuvẹ eware kpobi, rekọ orọnọ eware kpobi e rẹ bọ ohwo ga ha.+ 24 Jọ omomọvo ọ hae daoma ru oware nọ o rẹ kẹ omọfa erere orọnikọ omobọ riẹ hẹ.+

25 Wha re oware kpobi nọ a be zẹ evaọ eki nọ a rẹ jọ zẹ erao, wha du nọ enọ họ fiki obruoziẹ-iroro rai, 26 keme “Jihova* họ ọnọ o wo otọakpọ na gbe eware kpobi nọ e rrọ eva riẹ.”+ 27 Otẹrọnọ ohwo nọ ọ rrọ Oleleikristi hi* o zizie owhai yọ o were owhai nọ wha rẹ nya, wha re oware kpobi nọ ọ kẹ owhai, wha du nọ enọ họ fiki obruoziẹ-iroro rai. 28 Rekọ otẹrọnọ ohwo jọ ọ tẹ ta kẹ owhai nọ, “Onana yọ oware nọ a ro dhe idhe,” wha re he fiki ohwo nọ ọ ta ere kẹ owhai na gbe fiki obruoziẹ-iroro.+ 29 Orọnikọ obruoziẹ-iroro ra mẹ be ta ha, rekọ ọrọ ohwo ọdekọ na. Kọ fikieme ohwo jọ ọ rẹ rọ rehọ obruoziẹ-iroro riẹ gu omẹ ẹdhọ fiki ufuoma mẹ?+ 30 Otẹrọnọ mẹ be re je yere Ọghẹnẹ, kọ fikieme a rẹ rọ ta eme iyoma kpahe omẹ evaọ oware nọ mẹ kẹ uyere fihọ?+

31 Fikiere, te wha be re hayo wha be da hayo wha bi ru oware ofa jọ kpobi, wha ru eware kpobi rọ kẹ Ọghẹnẹ oruaro.+ 32 Wha whaha oware nọ o rẹ wha ezoruẹ se ahwo Ju gbe ahwo Griki gbe ukoko Ọghẹnẹ,+ 33 wọhọ epanọ mẹ be daoma ru ahwo kpobi eva were evaọ eware kpobi na, mẹ be gwọlọ erere obọmẹ hẹ+ rekọ orọ ibuobu, re a sai siwi ae.+