IZIEWARIẸ

1 Enana họ eme nọ Mosis ọ ta kẹ ahwo Izrẹl kpobi evaọ ẹkwotọ Jọdan evaọ udhude na, evaọ udhude opraprara nọ o rrọ aro Sọf, evaọ udevie Peran, Tofẹl, Leban, Hazirọt, gbe Daezahab. 2 O rẹ rehọ edẹ ikpegbọvo re a nya no Horẹb te Kedẹsh-bania,+ evaọ edhere orọ Ugbehru Siya. 3 Evaọ ukpe avọ udhuvẹ,+ evaọ amara avọ ikpegbọvo,* evaọ ẹdẹ ọsosuọ amara na, Mosis ọ tẹ vuẹ ahwo Izrẹl* eware kpobi nọ Jihova ọ ta kẹe nọ ọ vuẹ ae. 4 Evaọ oke onana yọ o fi Saehọn+ ovie ahwo Amọ nọ ọ jẹ rria Hẹshbọn gbe Ọg+ ovie Beshan nọ ọ jẹ rria Ashtarọt evaọ Ẹdrae+ kparobọ no. 5 Okenọ a jọ ẹkwotọ Jọdan evaọ otọ Moab, Mosis o te ru Uzi*+ nana vevẹ inọ:

6 “Jihova Ọghẹnẹ mai ọ ta kẹ omai evaọ Horẹb inọ, ‘Onọ wha rria ubrotọ igbehru+ nana u te no. 7 Wha wọ re wha nya kpobọ ubrotọ igbehru ahwo Amọ+ je kpobọ ewho kpobi nọ e kẹle rai evaọ obọ Araba*+ na, ubrotọ igbehru na, obọ Shefila* na, Negẹb na, gbe akotọ abade+ na, ẹkwotọ ahwo Kenan, gbe Lebanọn,*+ rite obọ ethẹ ologbo na, ethẹ Yufretis.+ 8 Rri, mẹ kẹ owhai ẹkwotọ na no. Wha ruọ eva re wha rehọ ẹkwotọ nọ Jihova o duwu iyei kẹ esẹ rai Abraham, Aiziki,+ gbe Jekọp+ inọ ọ te kẹ ae avọ emọ* rai.’*+

9 “Yọ mẹ vuẹ owhai evaọ oke yena nọ, ‘Mẹ ọvo mẹ sae te wọ owha rai hi.+ 10 Jihova Ọghẹnẹ rai o ru owhai bu no, enẹna wha bu gaga no wọhọ isi obọ ehru* na.+ 11 Jọ Jihova Ọghẹnẹ esẹ-esẹ rai o ru owhai bu+ vi epanọ wha bu te na akwa odu, jọ ọ ghale owhai nwane wọhọ epanọ ọ ya eyaa riẹ kẹ owhai na.+ 12 Ẹvẹ mẹ ọvo ọ sae rọ wọ owhai jẹ wọ owha rai gbe owha ẹwhọ+ rai? 13 Wha jọ evaọ erua rai salọ ezae nọ i wo areghẹ, orimuo, gbe onaa,* mẹ vẹ te rehọ ae mu enọ i wuzou rai.’+ 14 Wha tẹ ta kẹ omẹ nọ, ‘Oware nọ whọ ta kẹ omai nọ ma ru na u woma.’ 15 Fikiere mẹ tẹ rehọ enọ i wuzou erua rai, ezae nọ i wo areghẹ gbe onaa, mẹ tẹ rehọ ae mu enọ i wuzou rai, iletu itu ahwo idu, iletu itu ahwo udhusoi, iletu itu ahwo udhuvẹ-gbikpe, gbe iletu itu ahwo ikpe, gbe iletu efa erọ erua rai.+

16 “Evaọ oke yena me jie uzi kẹ ibruoziẹ rai nọ, ‘Nọ wha te bi guẹdhọ inievo rai, wha re bruoziẹ nọ o kiẹrẹe+ evaọ udevie ohwo avọ oniọvo riẹ hayo ọrara nọ ọ be rria udevie rai.+ 17 Wha re bruoziẹ ọriẹwẹ vievie he.+ Oghẹrẹ nọ wha rẹ gaviezọ kẹ ohwo ologbo ere wha rẹ gaviezọ kẹ oruori* re.+ Wha dhozọ ahwo vievie he,+ keme Ọghẹnẹ họ ọnọ o wo ẹdhoguo na;+ yọ otẹrọnọ ẹdhọ jọ ọ ga hrọ kẹ owhai, wha wọe se omẹ re me yoi.’+ 18 Evaọ oke yena me wuhrẹ owhai oware kpobi nọ u fo nọ wha re ru.

19 “Kẹsena ma tẹ wọ no Horẹb, ma tẹ nya udhude ulogbo avọ imuozọ+ yena soso vrẹ, onọ wha ruẹ evaọ edhere nọ a re ro kpobọ ubrotọ igbehru ahwo Amọ+ na, nwane wọhọ epanọ Jihova Ọghẹnẹ mai ọ ta kẹ omai, uwhremu na ma te ti te Kedẹsh-bania.+ 20 Kẹsena mẹ tẹ ta kẹ owhai nọ, ‘Wha ziọ ubrotọ igbehru ahwo Amọ no, onọ Jihova Ọghẹnẹ mai ọ be rọ kẹ omai na. 21 Rri, Jihova Ọghẹnẹ rai ọ rehọ ẹkwotọ na kẹ owhai no. Wha nya, wha nyae rehọ iẹe, nwane wọhọ epanọ Jihova Ọghẹnẹ esẹ-esẹ rai ọ vuẹ owhai.+ Jọ ozọ u mu owhai hi, wha guegue he.’

22 “Rekọ whai kpobi wha tẹ nyabru omẹ ze wha tẹ ta kẹ omẹ nọ, ‘Joma kaki vi ezae jọ vrẹ* re a nyae kiẹ otọ na kẹ omai, re a zihe ze te vuẹ omai edhere nọ u fo nọ ma rẹ nya gbe oghẹrẹ nọ ikpewho nọ ma te ruẹ e te jọ.’+ 23 Iroro nọ wha jẹ ze na i kiehọ evaọ aro mẹ, fikiere mẹ tẹ salọ ezae ikpegbivẹ evaọ usu rai, orua kpobi+ ọzae ọvo. 24 A tẹ nya a te kpobọ ubrotọ igbehru+ na, je te Ukiekpotọ* Ẹshkọl a tẹ kiẹ otọ na. 25 A kọrọ ibi-ire ẹkwotọ na jọ kpozi se omai, yọ a zihe ze te niyẹrẹ kẹ omai nọ, ‘Ẹkwotọ nọ Jihova Ọghẹnẹ mai ọ be rọ kẹ omai na yọ emamọ ẹkwotọ.’+ 26 Rekọ wha rọwo nya ha, wha tẹ wọso oware nọ Jihova Ọghẹnẹ rai ọ ta.+ 27 Wha tẹ jẹ go evaọ iwou-udhu rai be ta nọ, ‘Fikinọ Jihova o mukpahe omai jabọ nọ ọ rọ rehọ omai no ẹkwotọ Ijipti ze re ọ rehọ omai kẹ ahwo Amọ re a kpe omai no. 28 Kinọ oghẹrẹ oria vẹ na ma be nya na? Inievo mai a ru udu no omai awọ*+ nọ a ta nọ, “Ahwo na a rro je theri vi omai, yọ ikpewho rai e rrọ ruaro a te je di ogba wariẹ ae họ kpehru te obọ odhiwu,*+ ma tẹ jẹ ruẹ ahwo Anak+ na evaọ obei.”’

29 “Mẹ tẹ ta kẹ owhai nọ, ‘Wha jọ iguegue e ruọ owhai oma ha, yọ wha dhozọ rai hi.+ 30 Jihova Ọghẹnẹ rai ọ te karo kẹ owhai yọ ọ te họre kẹ owhai,+ nwane wọhọ epanọ ọ jọ obọ Ijipti ru nọ wha rọ ibiaro rai ruẹ na.+ 31 Yọ wha jọ obọ udhude na ruẹ epanọ Jihova Ọghẹnẹ rai ọ wọ owhai nwane wọhọ epanọ ọsẹ ọ rẹ wọ ọmọ riẹ evaọ oria kpobi nọ wha jẹ nya bẹsenọ wha ro te etenẹ na.’ 32 Rekọ, ghelọ edele eware nana kpobi, wha fi ẹrọwọ họ Jihova Ọghẹnẹ rai hi,+ 33 ọnọ ọ jẹ karo kẹ owhai evaọ edhere re ọ gwọlọ oria nọ wha re wohọ kẹ owhai. Ọ romavia kẹ owhai ẹkwoma erae evaọ aso gbe ẹgho evaọ uvo re o dhesẹ edhere nọ wha rẹ nya kẹ owhai.+

34 “Oke nana kpobi yọ Jihova o bi yo eware nọ wha jẹ ta, eva e tẹ dhae o te duwu iyei+ inọ, 35 ‘Makọ ọvo evaọ usu ezae oge omuomu nana ọ te ruẹ otọ uwoma na ha, onọ me duwu iyei nọ mẹ te rọ kẹ esẹ rai na,+ 36 ajokpaọ Kelẹb ọmọzae Jefunẹ. Ọ te ruẹ e riẹ, yọ mẹ te rehọ otọ nọ ọ nya na kẹe avọ emọ riẹ, keme ọ rọ udu riẹ kpobi* lele Jihova.+ 37 (Jihova ọ tubẹ dha eva kẹ omẹ dede fiki rai, ọ tẹ ta kẹ omẹ nọ, “Whẹ omara whọ te ruọ ẹe he.+ 38 Joshua ọmọzae Nọn, nọ ọ be gbodibo kẹ owhẹ*+ na họ ọnọ ọ te ruọ eva ẹkwotọ na.+ Tuduhọ iẹe awọ,*+ keme ọye o ti su ahwo Izrẹl ruọ ẹe re a rehọ iẹe reuku.”) 39 U te no ere no, emọ rai nọ wha ta nọ amọfa a te rehọ no na,+ gbe emezae rai nọ e riẹ oware uwoma gbe uyoma nẹnẹ hẹ na, eye e te ruọ ẹe, mẹ vẹ te rehọ iẹe kẹ ae re a rọ reuku.+ 40 Rọkẹ owhai, wha kuomarẹriẹ re wha nya edhere Abade Ọwawae na kpobọ udhude na.’+

41 “Kẹsena wha tẹ ta kẹ omẹ nọ, ‘Ma raha uzi Jihova no. Obọnana ma te wọ ohọre nya, nwane wọhọ epanọ Jihova Ọghẹnẹ mai ọ ta nọ ma ru na!’ Ere whai kohwo kohwo ọ rọ wọ ekwakwa ẹmo riẹ, wha te roro nọ oware olọlọhọ o rrọ re a gadiẹ ugbehru na nyae họre.+ 42 Rekọ Jihova ọ ta kẹ omẹ nọ, ‘Ta kẹ ae nọ: “Wha nyae họre he, keme mẹ te jọ kugbe owhai hi.+ Rekọ wha tẹ nya, ewegrẹ rai i ti fi owhai kparobọ.”’ 43 Fikiere mẹ tẹ ta kẹ owhai, rekọ wha yo ho. Ukpoye, wha tẹ wọso ẹme nọ Jihova ọ ta, jẹ gbaudu bi kpohọ ehru ugbehru na. 44 Kẹsena ahwo Amọ nọ a jẹ rria ugbehru yena a te nwrotọ bru owhai ze, je le owhai wọhọ epanọ ibi-enyọ i re ru na, a te kpe owhai evaọ Siya te ugbo obọ Họma. 45 Wha te zihe ze wha te muhọ ẹviẹ evaọ aro Jihova, rekọ Jihova ọ gaviezọ kẹ owhai hi, yọ ọ daezọ rai hi. 46 Oyejabọ nọ wha rọ rria Kedẹsh kri te epanọ wha rria riẹ kri te na.

2 “Kẹsena ma te kuomarẹriẹ ma tẹ wọ be rọ edhere Abade Ọwawae na kpobọ udhude na, nwane wọhọ epanọ Jihova ọ ta kẹ omẹ,+ yọ ma nya Ugbehru Siya na wariẹ edẹ buobu. 2 Uwhremu na, Jihova ọ tẹ ta kẹ omẹ nọ, 3 ‘Onọ wha nya ugbehru nana wariẹ u te no. Obọnana wha kuomarẹriẹ rri obọ ẹkpẹlobọ ovatha-ọre. 4 Yọ whọ rẹ ta ẹme nana kẹ ahwo na inọ: “Akotọ uwhru inievo rai wha te nyavrẹ, ahwo uyẹ Esọ+ nọ a be rria Siya,+ yọ a te dhozọ rai+ rekọ wha rẹ yọroma gaga. 5 Wha re lele ae họre he,* keme mẹ te rehọ ẹkwotọ rai ọvuọvo kẹ owhai hi, makọ oria nọ evawọ ọvo ọ rẹ gba dede, keme mẹ rehọ Ugbehru Siya kẹ Esọ no re o jọ ukuoriọ riẹ.+ 6 Wha rẹ hwosa kẹ ae fihọ emu nọ wha te re, jẹ hwosa fihọ ame nọ wha te da.+ 7 Keme Jihova Ọghẹnẹ rai ọ jọ oware kpobi nọ wha ru ghale owhai no. Ọ riẹ vevẹ kpahe onya rai kpobi evaọ udhude ulogbo nana. Evaọ ikpe udhuvẹ nana kpobi Jihova Ọghẹnẹ rai ọ rrọ kugbe owhai, yọ oware ovo o kare owhai hi.”’+ 8 Fikiere ma tẹ nya akotọ inievo mai vrẹ, ahwo uyẹ Esọ+ nọ a be rria Siya, be kẹnoma kẹ edhere Araba* na, Ilat gbe Iziọn-giba.+

“Nọ oyena o vrẹ no, ma te kuomarẹriẹ ma tẹ nya edhere udhude Moab+ na. 9 Kẹsena Jihova ọ tẹ ta kẹ omẹ nọ, ‘Wha kpokpo Moab ho, yọ wha lele Moab họre gbe he, keme mẹ te rehọ ẹkwotọ riẹ ọvuọvo kẹ owhai re wha rọ reuku hu, keme mẹ rehọ Ar kẹ ahwo uyẹ Lọt+ no re o jọ ukuoriọ rai. 10 (Etẹe ahwo Imim+ a jẹ rria vẹre, ahwo nọ a rrọ ruaro jẹ rrọ buobu nọ a rrọ thethei wọhọ ahwo Anak. 11 A je rri ahwo Rẹfeyẹm+ na wọhọ ahwo Anak+ re, yọ ahwo Moab a jẹ hai se ai Imim. 12 Evaọ oke ọsosuọ, ahwo Họr+ họ enọ e jẹ rria Siya, rekọ ahwo uyẹ Esọ a te mi ai ẹkwotọ rai je kpe ai no, a te mu ẹkwotọ rai na họ ẹria,+ nwane wọhọ epanọ Izrẹl o ti ru ẹkwotọ nọ ọ te rọ reuku, onọ Jihova ọ te siọ ae ba ẹrọkẹ hẹ na.) 13 Whaọ obọnana, wha nya re wha fa Ukiekpotọ* Zirẹd vrẹ.’ Fikiere ma tẹ fa Ukiekpotọ* Zirẹd+ vrẹ. 14 Etoke nọ o rehọ omai nọ ma rọ nya no Kedẹsh-bania bẹsenọ ma rọ fa Ukiekpotọ* Zirẹd vrẹ, o rehọ omai ikpe ọgbagberee, bẹsenọ oge ezae nọ e rẹ sai kpohọ ẹmo na kpobi a ro whu no evuẹ na, nwane wọhọ epanọ Jihova o duwu iyei nọ o te via kẹ ae.+ 15 Obọ Jihova o jẹ rọsuọ ae re o kpe ai no evuẹ na, bẹsenọ o ro kpe ai no.+

16 “Nọ ezae nọ e rẹ sai kpohọ ẹmo na kpobi e nwani whu no udevie ahwo na no,+ 17 Jihova ọ tẹ wariẹ ta ẹme kẹ omẹ inọ, 18 ‘Nẹnẹ wha rẹ nya akotọ ẹkwotọ Moab vrẹ, koyehọ Ar. 19 Nọ wha tẹ nya kẹle ahwo Ammọn, wha kpokpo ai hayo ru eva dha ae he, keme mẹ te rehọ ẹkwotọ ahwo Ammọn ọvuọvo kẹ owhai hi, keme mẹ rehọ e riẹ kẹ ahwo uyẹ Lọt no re o jọ ukuoriọ rai.+ 20 A jẹ rehọ ẹkwotọ nana fihọ ọrọ ahwo Rẹfeyẹm+ re. (Ahwo Rẹfeyẹm na họ enọ e jẹ kake rria etẹe, yọ ahwo Ammọn a jẹ hai se ai Zamzọmim. 21 A jọ ruaro jẹ jọ buobu jẹ jọ thethei wọhọ ahwo Anak;+ rekọ Jihova o kpe rai no kẹ ahwo Ammọn, enọ i le rai no je mu ẹkwotọ rai họ ẹria. 22 Ere o ru kẹ ahwo uyẹ Esọ, enọ e be rria Siya+ enẹna, nọ o ro kpe ahwo Họr+ no kẹ ae, onọ u ru nọ a ro mi ai ẹkwotọ rai je mu oria rai họ ẹria rite inẹnẹ na. 23 Yọ ahwo Avim a jẹ rria iwhre sa-sa rite obọ Gaza+ bẹsenọ ahwo Kaftọrim,+ nọ i no obọ Kaftọ* ze a ro kpe ai no je mu ẹkwotọ rai họ ẹria.)

24 “‘Wha kpama re wha fa Ukiekpotọ* Anọn+ vrẹ. Rri, mẹ rehọ Saehọn+ ohwo Amọ, ovie Hẹshbọn họ obọ rai no. Fikiere wha lele iei fi ẹmo re wha mu ẹkwotọ riẹ họ ẹrehọ. 25 Nẹnẹ na me ti mu idudu gbe ozọ rai họ efihọ oma ahwo kpobi nọ a rrọ otọ idhiwu na nọ i yo usi rai. Ozọ u ti mu ai yọ a ti guegue* fiki rai.’+

26 “Kẹsena me te vi ahwo* no udhude Kẹdemọt+ bru Saehọn ovie Hẹshbọn, yọ eme udhedhẹ+ nana họ uwou nọ me vi sei, 27 ‘Jomẹ nya ẹkwotọ ra vrẹ. Edhere na ọvo mẹ te nya, mẹ te wẹriẹ kpohọ obọze hayo ẹkpẹlobọ họ.+ 28 Emu nọ whọ zẹ kẹ omẹ ọvo mẹ te re, yọ ame nọ whọ zẹ kẹ omẹ ọvo mẹ te da. Thakpe jomẹ rọ owọ mẹ nyavrẹ ọvo, 29 ere ahwo uyẹ Esọ nọ a be rria Siya gbe ahwo Moab nọ a be rria Ar a ru kẹ omẹ, re mẹ ruabọhọ onya mẹ bẹsenọ mẹ rẹ nya Jọdan vrẹ kpohọ ẹkwotọ nọ Jihova Ọghẹnẹ mai ọ be rọ kẹ omai.’ 30 Rekọ Saehọn ovie Hẹshbọn ọ rọwo nọ ma nya ẹkwotọ riẹ vrẹ hẹ, keme Jihova Ọghẹnẹ mai* ọ kẹ riẹ* uvẹ re ọ seba ẹrọwo+ jẹ kuvẹ re o ru udu riẹ gaga re ọ ruẹse rehọ iẹe họ obọ mai* wọhọ epanọ o via no na.+

31 “Jihova ọ tẹ ta kẹ omẹ nọ, ‘Rri, me mu Saehọn avọ ẹkwotọ riẹ họ ẹrọkẹ owhai no. Wha mu ẹkwotọ na họ ẹrehọ re o jọ orai.’+ 32 Nọ Saehọn avọ ahwo riẹ kpobi a wọ ẹmo bru omai ze evaọ Jehaz,+ 33 Jihova Ọghẹnẹ mai ọ tẹ rehọ iẹe kẹ omai, ma te fi ei kparobọ, te emezae riẹ, gbe ahwo riẹ kpobi. 34 Ma mi rie ikpewho riẹ kpobi evaọ oke yena jẹ raha okpẹwho kpobi, te ezae, te eyae, gbe emọ. Ma nyasiọ ọvuọvo ba uzuazọ họ.+ 35 Erao na ọvo ma mu rehọ kẹ omamai kugbe eware efa nọ ma kwa rehọ evaọ ikpewho nọ ma fi kparobọ. 36 No Aroa+ nọ ọ rrọ akọ Ukiekpotọ* Anọn (kugbe okpẹwho nọ o rrọ eva ukiekpotọ na), rite obọ Giliad, ẹwho ọvuọvo nọ ma sae ruọ eva ha ọ jariẹ hẹ. Jihova Ọghẹnẹ mai ọ rehọ e rai kpobi kẹ omai.+ 37 Rekọ wha ruọ eva ẹkwotọ ahwo Ammọn+ ho, unueri nọ o rrọ Ukiekpotọ Jabọk+ soso gbe ikpewho nọ e rrọ ubrotọ igbehru na, hayo oria ofa jọ nọ Jihova Ọghẹnẹ mai ọ vẹvẹ omai unu kpahe.

3 “Kẹsena ma te kuomarẹriẹ ma tẹ ruọ Edhere Beshan. Ọg ovie Beshan avọ ahwo riẹ kpobi a tẹ wọ ẹmo bru omai ze evaọ Ẹdrae.+ 2 Fikiere Jihova ọ tẹ ta kẹ omẹ nọ, ‘Ozọ riẹ u mu owhẹ hẹ, keme mẹ te rehọ iẹe avọ ahwo riẹ kpobi gbe ẹkwotọ riẹ họ owhẹ obọ, yọ who ti ru ei nwane wọhọ epanọ who ru Saehọn ovie ahwo Amọ nọ ọ jẹ rria Hẹshbọn.’ 3 Jihova Ọghẹnẹ mai ọ tẹ jẹ rehọ Ọg ovie Beshan avọ ahwo riẹ kpobi họ omai obọ re, ma te mu ai họ ekpe fihọ otọ bẹsenọ ohwo riẹ ọvuọvo o gbe ro kiọkọ họ. 4 Ma te mi ei ikpewho riẹ kpobi. Ẹwho ọvuọvo ọ jariẹ hẹ nọ ma mi rai hi—ikpewho udhosa, ẹkwotọ Agọb na kpobi, uvie Ọg evaọ Beshan.+ 5 A di ogba wariẹ ikpewho nana kpobi họ, a ma igbẹhẹ ikpekpehru fihọ ae, avọ ethẹ, gbe ekpọ nọ a rẹ rọ kare ẹthẹ, te ewho esese buobu. 6 Ghele na, ma raha e rai kpobi,+ nwane wọhọ epanọ ma ru Saehọn ovie Hẹshbọn nọ ma rọ raha okpẹwho kpobi, te ezae, te eyae, te emọ.+ 7 Ma te mu erao na kpobi rehọ jẹ kwa eware nọ e rrọ ikpewho na rehọ kẹ omamai.

8 “Evaọ oke yena ma mi ivie ivẹ ahwo Amọ+ nọ e jọ ẹkwotọ Jọdan na otọ rai, no Ukiekpotọ* Anọn rite Ugbehru Hẹmọn,+ 9 (ugbehru nọ ahwo Saedọn a jẹ hai se Siriọn, nọ ahwo Amọ a jẹ hai se Sina), 10 ikpewho ẹkwotọ ukpehru opraprara na kpobi, Giliad kpobi, gbe Beshan kpobi rite Saleka gbe Ẹdrae,+ ikpewho nọ e jọ uvie Ọg evaọ Beshan. 11 Keme Ọg ovie Beshan họ ọrọ urere ahwo Rẹfeyẹm. Ayọno* a ro ru ehwa* nọ a fi ori riẹ họ, yọ o gbẹ rrọ obọ Raba ọrọ ahwo Ammọn. U theri te ikiubiti* izii, jẹ kẹre te ikiubiti ene, nọ a tẹ rọ uthethei ikiubiti nọ a jẹ hai lele rọ mae. 12 Evaọ oke yena ma rehọ ẹkwotọ nana: no obọ Aroa+ nọ ọ rrọ Ukiekpotọ* Anọn ze, gbe abọvo ubrotọ igbehru Giliad, yọ mẹ rehọ ikpewho riẹ kẹ ahwo orua Rubẹn gbe ahwo orua Gad+ no. 13 Mẹ tẹ jẹ rehọ ẹkwotọ Giliad nọ o kiọkọ gbe Beshan kpobi orọ uvie Ọg kẹ abọvo orua Manasẹ+ no. Ẹkwotọ Agọb soso, onọ Beshan o wo, a riẹ riẹ vẹre wọhọ ẹkwotọ ahwo Rẹfeyẹm.

14 “Jeya+ ọmọzae Manasẹ ọ tẹ rehọ ẹkwotọ Agọb+ soso rite uwhru ahwo Gẹshọ avọ ahwo Meakat,+ ọ tẹ rọ odẹ riẹ se iwhre Beshan yena inọ Havọt-jeya,*+ yọ ere a gbe bi se ai rite inẹnẹ. 15 Mẹ rehọ Giliad kẹ Meka+ no. 16 Mẹ tẹ kẹ ahwo orua Rubẹn gbe ahwo orua Gad+ no Giliad rite Ukiekpotọ* Anọn, re udevie ukiekpotọ na o jọ uwhru riẹ, je rite Jabọk, ukiekpotọ nọ o rrọ uwhru ahwo Ammọn, 17 gbe Araba* na avọ Jọdan gbe uwhru na, no Kinẹrẹt rite Abade Araba* na, Abade Uwhei* na, evaọ obotọ ukuwhrẹrẹ Pisga nọ o rrọ ofẹ ovatha-ọre.+

18 “Kẹsena me te jie uzi kẹ owhai nọ: ‘Jihova Ọghẹnẹ rai ọ rehọ ẹkwotọ nana kẹ owhai no re o jọ orai. Ezae egaga rai kpobi a rẹ rehọ ekwakwa ẹmo rai a vẹ fa vrẹ evaọ aro inievo rai, ahwo Izrẹl na.+ 19 Eyae rai, emọ rai gbe erao rai ọvo wha rẹ nyaseba (keme mẹ riẹ vevẹ nọ wha wo erao buobu), re a rria eva ikpewho nọ mẹ rọ kẹ owhai na, 20 bẹsenọ Jihova ọ rẹ kẹ inievo rai eriosehọ no, wọhọ epanọ o ru kẹ owhai na, bẹsenọ a rẹ rehọ ẹkwotọ nọ Jihova Ọghẹnẹ rai ọ te kẹ ae evaọ abọdekọ Jọdan na no. Kẹsena wha ve zihe ze, whai omomọvo o ve kpohọ ọvuọ ukuoriọ riẹ nọ mẹ kẹ riẹ.’+

21 “Evaọ oke yena me jie uzi kẹ Joshua+ nọ: ‘Whẹ ọvo whọ rọ ẹro ra ruẹ oware nọ Jihova Ọghẹnẹ rai o ru ivie ivẹ nana. Jihova o ti ru ekwotọ-ivie nọ wha be te fa vrẹ kpohọ na kpobi oware ovona.+ 22 Wha dhozọ rai vievie he, keme Jihova Ọghẹnẹ rai họ ọnọ ọ be họre kẹ owhai.’+

23 “Evaọ oke yena mẹ tẹ lẹ Jihova nọ, 24 ‘O Jihova Olori nọ Ọ Mai Kpehru na, who mu orro ra gbe ogaga ra+ họ edhesẹ kẹ odibo ra no, kọ ọghẹnẹ vẹ evaọ obọ idhiwu hayo otọakpọ na ọ be sai ru ọkpọ eware ilogbo nọ who bi ru na?+ 25 Ivie jomẹ fa vrẹ re mẹ ruẹ otọ uwoma na, onọ o rrọ abọdekọ Jọdan na, emamọ ubrotọ igbehru nana gbe Lebanọn.’+ 26 Rekiyọ eva mẹ e gbẹ be dha Jihova fiki rai,+ fikiere ọ gaviezọ kẹ omẹ hẹ. Ukpoye, Jihova ọ tẹ ta kẹ omẹ nọ, ‘Ora u te no! Whọ gbẹ ta ẹme kpahe oware nana kẹ omẹ ofa ha. 27 Gadiẹ kpobọ ehru Pisga,+ re who rri kpobọ ukiediwo-ọre gbe ẹkpẹlobọ ovatha-ọre gbe obọze ovatha-ọre gbe ovatha-ọre na re whọ rọ ibiaro ra ruẹ otọ na, keme whọ te fa Jọdan nana vrẹ hẹ.+ 28 Rehọ Joshua mu+ re whọ tuduhọ iẹe awọ re whọ bọe ga, keme ọye họ ọnọ ọ te rọ ahwo nana fa vrẹ,+ yọ ọye họ ọnọ o ti su ai ruọ otọ nọ whọ te ruẹ na re a rọ reuku.’ 29 Eware nana kpobi e via okenọ ma jẹ rria ukiekpotọ nọ o rrọ aro Bẹt-piọ.+

4 “Whaọ enẹna, O Izrẹl, wha gaviezọ kẹ ijaje gbe izi oziẹobro nọ me bi wuhrẹ owhai re wha koko na, re wha sae jọ uzuazọ+ jẹ ruọ eva nyae rehọ otọ nọ Jihova, Ọghẹnẹ esẹ-esẹ rai ọ be rọ kẹ owhai na. 2 Wha re fiba eme nọ me bi ro jie uzi kẹ owhai na vievie he, yọ wha re si no ai vievie he,+ re wha ruẹsi koko ijaje Jihova Ọghẹnẹ rai nọ me bi jie kẹ owhai na.

3 “Wha rọ ibiaro rai ruẹ oware nọ Jihova o ru fiki Bale ọrọ Piọ; Jihova Ọghẹnẹ rai o kpe ohwo kpobi evaọ udevie rai nọ ọ gọ Bale ọrọ Piọ.+ 4 Rekọ whai kpobi nọ e talamu Jihova Ọghẹnẹ rai wha gbẹ rrọ uzuazọ nẹnẹ na. 5 Rri, me wuhrẹ owhai ijaje gbe izi oziẹobro+ no, nwane wọhọ epanọ Jihova Ọghẹnẹ mẹ o jie uzi kẹ omẹ, re wha ruẹsi koko ai evaọ ẹkwotọ nọ wha be te rọ reuku na. 6 Wha rẹ romatotọ koko ae+ hrọ, keme onana u ti dhesẹ nọ wha wo areghẹ+ gbe otoriẹ+ evaọ aro ahwo nọ a ti yo kpahe ijaje nana kpobi, a vẹ te ta nọ, ‘Ababọ avro, ahwo orẹwho ulogbo nana yọ ahwo nọ a wo areghẹ gbe otoriẹ.’+ 7 Kọ orẹwho ulogbo vẹ eghẹnẹ rai e kẹle rai wọhọ epanọ Jihova Ọghẹnẹ mai ọ kẹle omai evaọ oke kpobi nọ ma te bo sei na?+ 8 Hayo kọ orẹwho ulogbo vẹ u wo ijaje ikiẹrẹe gbe izi oziẹobro nọ e wọhọ Uzi nana kpobi nọ mẹ be kẹ owhai nẹnẹ na?+

9 “Wha yọroma je rri omarai mu ziezi,* re eware nọ wha rọ ibiaro rai ruẹ na e gbẹ thọrọ owhai ẹro ho, re i gbe no udu rai hi evaọ edẹ uzuazọ rai kpobi. Wha rẹ jẹ ta ae kẹ emọ* rai gbe emọ-iruọmọ* rai hrọ.+ 10 Evaọ ẹdẹ nọ wha ro dikihẹ aro Jihova Ọghẹnẹ rai evaọ Horẹb, Jihova ọ ta kẹ omẹ nọ, ‘Koko ahwo na họ bru omẹ ze re mẹ vuẹ ae eme mẹ,*+ re a ruẹsi wuhrẹ epanọ a sae rọ dhozọ mẹ+ evaọ edẹ uzuazọ rai kpobi evaọ otọakpọ na, re a je wuhrẹ emọ rai.’+

11 “Fikiere wha te bi kẹle, wha te dikihẹ obotọ ugbehru na, ugbehru na o tẹ jẹ ware erae te obọ idhiwu;* yọ ebi, ẹgho, gbe ebi ọlala+ ọ jariẹ. 12 Jihova ọ tẹ jẹ ta ẹme no udevie erae na ze kẹ owhai.+ Wha yo eme na, rekọ wha ruẹ oware ovo ho,+ urru ọvo wha yo.+ 13 Ọ tẹ vuẹ owhai izi ọvọ riẹ,+ enọ o jie kẹ owhai re wha koko, Izi Ikpe na.*+ Kẹsena o te kere ai fihọ ewẹ-itho ekpakpala ivẹ.+ 14 Evaọ oke yena Jihova ọ ta kẹ omẹ nọ me wuhrẹ owhai ijaje gbe izi oziẹobro, enọ wha re koko evaọ ẹkwotọ nọ wha te ruọ eva jẹ rọ reuku na.

15 “Fikiere, wha rri omarai mu ziezi*—nọ orọnọ wha ruẹ oware ovo ho evaọ ẹdẹ nọ Jihova ọ rọ ta ẹme kẹ owhai evaọ Horẹb no udevie erae ze na— 16 re wha gbe ru oware uyoma ha ẹkwoma ẹmema nọ wha rẹ kare nọ u re tho oware jọ, nọ o rẹ wọhọ ọzae hayo aye,+ 17 nọ o rẹ wọhọ arao jọ evaọ otọakpọ na hayo nọ o rẹ wọhọ ọvra jọ nọ ọ be rra evaọ obọ ehru,+ 18 nọ u re tho oware jọ nọ u bi si* evaọ otọ na, hayo nọ u re tho eri jọ nọ ọ rrọ ame evaọ obotọ otọakpọ na.+ 19 Yọ okenọ wha tẹ kpare aro rai rri obọ idhiwu nọ wha jẹ ruẹ ọre na avọ ọvẹre na gbe isi na, ogbaẹmo obọ idhiwu na kpobi, jọ oma o wọ owhai hi re wha guzou kpotọ kẹ ae jẹ gọ ae.+ Jihova Ọghẹnẹ rai ọ rehọ e rai kẹ ahwo kpobi nọ a rrọ otọakpọ na.* 20 Rekọ whai họ enọ Jihova ọ rehọ ze, enọ o si no umuwou-erae nọ a rẹ jọ ghra ayọno ze, no eva Ijipti ze, re wha jọ okwakwa obọriẹ,*+ wọhọ epanọ wha rrọ nẹnẹ na.

21 “Jihova ọ dha eva kẹ omẹ fiki rai,+ o te duwu iyei inọ mẹ rẹ fa Jọdan vrẹ hẹ, yọ mẹ rẹ ruọ otọ uwoma na ha onọ Jihova Ọghẹnẹ rai ọ be rọ kẹ owhai re wha rọ reuku na.+ 22 Keme ẹkwotọ nana mẹ te jọ whu; mẹ te fa Jọdan vrẹ hẹ,+ rekọ wha te fa vrẹ nyae rehọ otọ uwoma na reuku. 23 Wha yọroma re ọvọ nọ Jihova Ọghẹnẹ rai ọ re kugbe owhai na ọ gbẹ thọrọ owhai ẹro ho,+ yọ wha rẹ kare ẹmema kẹ omarai hi, nọ u re tho oware jọ kpobi wọhọ epanọ Jihova Ọghẹnẹ rai ọ vẹvẹ owhai unu nọ wha ru hu na.+ 24 Keme Jihova Ọghẹnẹ rai yọ ebruerae,+ Ọghẹnẹ nọ ọ gwọlọ omarọkẹ riẹriẹriẹ.+

25 “Nọ wha te yẹ emọ* je wo emọ-iruọmọ* no, nọ wha jẹ rria oke krẹkri no evaọ otọ na, wha je ru oware uyoma jẹ kare oghẹrẹ ẹmema+ jọ kpobi, wha je ru oware nọ ọ rrọ muomu evaọ aro Jihova Ọghẹnẹ rai re wha ru ei eva dha,+ 26 mẹ rehọ idhiwu na avọ otọakpọ na re e jọ isẹri kẹ owhai nẹnẹ na inọ wha ti whu no ẹkwotọ nọ wha be fa Jọdan vrẹ nyae rehọ na hrọ ababọ oke oraha. Wha te tọ evaọ eva riẹ hẹ, rekọ a te raha owhai no riẹriẹriẹ.+ 27 Jihova ọ te vaha owhai fihọ udevie ahwo na,+ yọ umutho rai jọ ọvo a te zọ+ evaọ udevie erẹwho nọ Jihova o ti le owhai kpohọ na. 28 Wha vẹ te jọ obei gọ eghẹnẹ ire gbe itho nọ ahwo a rọ abọ ru,+ eghẹnẹ nọ e rẹ sae ruẹ ude he, yo ẹme he, re emu hu, hayo yo ore he.

29 “Otẹrọnọ wha jọ obei gwọlọ Jihova Ọghẹnẹ rai, wha te se iẹe ba ẹruẹ hẹ,+ nọ wha tẹ rọ udu rai kpobi gbe uzuazọ* rai kpobi+ gwọlọ iẹe. 30 Nọ wha tẹ rrọ uye ulogbo nọ eware nana kpobi e tẹ via kẹ owhai no evaọ obaro, wha ve ti zihe bru Jihova Ọghẹnẹ rai ze jẹ gaviezọ kẹ urru riẹ.+ 31 Keme Jihova Ọghẹnẹ rai yọ Ọghẹnẹ nọ o wo ohrọ-oriọ.+ O ti kiukeku owhai hi, yọ ọ te raha owhai no hayo kpairoro vrẹ ọvọ nọ ọ rehọ ẹkwoma iyei iduwu re kugbe esẹ-esẹ rai+ hi.

32 “Wha nọ kpahe oke nọ u kpemu taure a te ti yẹ owhai, no okenọ Ọghẹnẹ ọ rọ ma ohwo fihọ otọakpọ na ze; wha kiẹ no oka idhiwu na rite oka idhiwu na. Kọ oghẹrẹ oware ulogbo utiona jọ o via no ẹdẹ jọ hayo kọ a yo oghẹrẹ oware utiona no ẹdẹ jọ?+ 33 Kọ amọfa jọ a yo urru Ọghẹnẹ nọ o be ta ẹme no udevie erae ze epanọ wha yo rie, wha tẹ gbẹ rrọ uzuazọ na?+ 34 Kọ Ọghẹnẹ ọ dawo e riẹ no ẹdẹ jọ re ọ rehọ orẹwho jọ no udevie orẹwho ọfa ze kẹ omariẹ avọ ẹdhoguo ologbo,* eware eka, iruo igbunu,+ ẹmo,+ obọ ogaga,+ ugbobọ nọ ọ rriẹ, gbe eware imuozọ,+ wọhọ epanọ Jihova Ọghẹnẹ rai o ru kẹ owhai evaọ obọ Ijipti nọ wha rọ ibiaro rai ruẹ na? 35 A dhesẹ eware nana kẹ owhai re wha ruẹse riẹ nọ Jihova họ Ọghẹnẹ uzẹme na;+ u te noi no ọfa ọ rrọ họ.+ 36 O ru nọ wha ro yo urru riẹ no obọ idhiwu na ze re ọ kpọ owhai vi, o te je ru nọ wha rọ ruẹ erae ilogbo riẹ evaọ otọakpọ na je yo eme riẹ no udevie erae na ze.+

37 “Fikinọ o you esẹ-esẹ rai jẹ salọ emọ* rai nọ i ti lele ae,+ ọ rehọ ogaga ulogbo riẹ rehọ owhai no obọ Ijipti ze, yọ wha rrọ aro riẹ. 38 O le erẹwho nọ e rro jẹ ga vi owhai no aro rai, re ọ ruẹse rehọ owhai ruọ eva jẹ kẹ owhai otọ rai re wha rọ reuku, wọhọ epanọ o rrọ nẹnẹ na.+ 39 Fikiere, jọ wha riẹ nẹnẹ na, re u je te owhai udu inọ Jihova họ Ọghẹnẹ uzẹme na evaọ obọ idhiwu gbe evaọ otọakpọ na.+ Ọfa ọ rrọ họ.+ 40 Wha re koko ijaje riẹ gbe izi riẹ nọ me bi jie kẹ owhai nẹnẹ na, re o ruẹsi woma kẹ owhai gbe emọ rai nọ i ti lele owhai, re wha ruẹse rria tọ evaọ otọ nọ Jihova Ọghẹnẹ rai ọ be rọ kẹ owhai na.”+

41 Evaọ oke yena Mosis ọ tẹ salọ ikpewho esa evaọ ofẹ ovatha-ọre Jọdan.+ 42 Otẹrọnọ ohwo jọ ọ rehọ ethobọ kpe ohwo, orọnikọ fikinọ o mukpahe ohwo na vẹre he,+ ọ rẹ dhẹ kpohọ okpẹwho jọ hrọ evaọ usu ikpewho yena re ọ sae jọ uzuazọ.+ 43 Ikpewho na họ Biza+ nọ ọ rrọ udhude evaọ ẹkwotọ ukpehru opraprara nọ o rrọ kẹ ahwo orua Rubẹn, Remọt+ evaọ Giliad nọ o rrọ kẹ ahwo orua Gad, gbe Golan+ evaọ Beshan nọ o rrọ kẹ ahwo orua Manasẹ.+

44 Whaọ Uzi+ nọ Mosis ọ rọ kẹ ahwo Izrẹl ona. 45 Enana họ eme ekareghẹhọ na, ijaje na, gbe izi oziẹobro nọ Mosis ọ rọ kẹ ahwo Izrẹl nọ a no Ijipti ze,+ 46 evaọ ẹkwotọ Jọdan, evaọ ukiekpotọ nọ o rẹriẹ ovao ku Bẹt-piọ,+ evaọ ẹkwotọ Saehọn ovie ahwo Amọ nọ ọ jẹ rria Hẹshbọn,+ nọ Mosis avọ ahwo Izrẹl a fi kparobọ nọ a no Ijipti ze.+ 47 A tẹ rehọ ekwotọ riẹ gbe ẹkwotọ Ọg+ ovie Beshan, ivie ivẹ ahwo Amọ nọ e jọ ẹkwotọ nọ o rrọ ofẹ ovatha-ọre Jọdan na, 48 no Aroa+ nọ o rrọ akọ Ukiekpotọ* Anọn rite Ugbehru Saeyọn, koyehọ Hẹmọn,+ 49 gbe Araba* na soso nọ o rrọ ẹkwotọ ofẹ ovatha-ọre Jọdan na, je rite Abade Araba* na evaọ obotọ ukuwhrẹrẹ Pisga.+

5 Mosis o te se ahwo Izrẹl kpobi koko, ọ tẹ ta kẹ ae nọ: “O Izrẹl, wha gaviezọ kẹ ijaje gbe izi oziẹobro nọ mẹ be te vuẹ owhai nẹnẹ na, yọ wha re wuhrẹ ai hrọ jẹ romatotọ koko ai. 2 Jihova Ọghẹnẹ mai ọ re ọvọ kugbe omai evaọ obọ Horẹb.+ 3 Orọnikọ esẹ-esẹ mai Jihova o lele re ọvọ nana ha, rekọ mai, mai kpobi nọ e rrọ uzuazọ evaọ etenẹ nẹnẹ na. 4 Jihova o lele owhai ta ẹme ovao dhe ovao no udevie erae+ ze evaọ obọ ugbehru na. 5 Evaọ oke yena me te dikihẹ udevie rai avọ Jihova,+ re mẹ vuẹ owhai ẹme Jihova, keme ozọ u je mu owhai fiki erae na, wha gbe kpobọ ugbehru+ na ha. Ọ ta nọ:

6 “‘Mẹ họ Jihova Ọghẹnẹ ra, ọnọ ọ rehọ owhẹ no ẹkwotọ Ijipti ze, oria nọ whọ jẹ jọ igbo.+ 7 Who re wo eghẹnẹ efa vievie he u te no omẹ no.*+

8 “‘Who re wo ẹmema nọ a kare+ kẹ omara vievie he hayo uwoho* jọ nọ o wọhọ oware jọ evaọ obọ idhiwu na, hayo evaọ otọakpọ na hayo evaọ ame nọ ọ rrọ obotọ otọakpọ na. 9 Who re guzou kpotọ kẹ ae vievie he hayo rọwo nọ whọ rẹ gọ ae he,+ keme mẹ, Jihova Ọghẹnẹ rai, mẹ yọ Ọghẹnẹ nọ ọ gwọlọ omarọkẹ riẹriẹriẹ,+ ọnọ ọ rẹ rehọ uye oruthọ esẹ te emọ, rọkẹ oge avọ esa gbe oge avọ ene ọrọ ahwo nọ a mukpahe omẹ,+ 10 rekọ me re dhesẹ uyoyou nọ o rẹ hiẹ hẹ* rite oge avọ odu (1,000) rọkẹ enọ i you omẹ je bi koko izi mẹ.

11 “‘Whọ rẹ rehọ odẹ Jihova Ọghẹnẹ ra ru ugberuo+ vievie he, keme Jihova ọ rẹ siọ ohwo ọvo nọ ọ rehọ odẹ riẹ ru ugberuo+ uye ba ẹkẹ hẹ.

12 “‘Koko ẹdẹ Ẹdijala na re who ru ei ọrẹri, nwane wọhọ epanọ Jihova Ọghẹnẹ ra o jie uzi kẹ owhẹ na.+ 13 Who re ru iruo je ru eware ra kpobi edẹ ezeza,+ 14 rekọ ẹdẹ avọ ihrẹ na yọ ẹdijala kẹ Jihova Ọghẹnẹ ra.+ Who re ru iruo evuevo vievie he,+ te owhẹ hayo ọmọzae ra hayo ọmọtẹ ra hayo ọrigbo ọzae ra hayo ọrigbo ọmọtẹ ra hayo eruẹ ọzae ra hayo eketekete ra hayo arao ẹwho ra jọ hayo ọrara nọ ọ be rria udevie rai evaọ ikpewho rai,*+ re ọrigbo ọzae ra avọ ọrigbo ọmọtẹ ra a ruẹsi serihọ wọhọ epanọ who bi serihọ na.+ 15 Kareghẹhọ nọ whọ jọ ọrigbo evaọ ẹkwotọ Ijipti, Jihova Ọghẹnẹ ra ọ tẹ rehọ obọ ogaga gbe ugbobọ nọ ọ rriẹ+ rọ rehọ owhẹ no obei ze. Oyejabọ nọ Jihova Ọghẹnẹ ra o ro jie uzi kẹ owhẹ inọ who koko ẹdẹ Ẹdijala na.

16 “‘Rọ ọghọ kẹ ọsẹ ra avọ oni ra,+ nwane wọhọ epanọ Jihova Ọghẹnẹ ra o jie uzi kẹ owhẹ na, re whọ ruẹse rria oke krẹkri re eware i je woma* kẹ owhẹ evaọ ẹkwotọ nọ Jihova Ọghẹnẹ ra ọ be kẹ owhẹ na.+

17 “‘Who re kpe ohwo vievie he.+

18 “‘Who re bruẹnwae vievie he.+

19 “‘Who re tho uji vievie he.+

20 “‘Who re se isẹri ọrue kpahe ọrivẹ ra vievie he.+

21 “‘Who re siuru aye ọrivẹ ra vievie he.+ Yọ who re siuru uwou ọrivẹ ra vievie he, hayo otọ riẹ, hayo ọrigbo ọzae riẹ hayo ọrigbo ọmọtẹ riẹ hayo eruẹ riẹ hayo eketekete riẹ hayo oware kpobi nọ o rrọ orọ ọrivẹ ra.’+

22 “Izi* nana Jihova o jie kẹ ogbotu rai soso evaọ obọ ugbehru na, no eva erae na ze, ẹgho na, gbe ebi ọlala+ na, avọ urru ulogbo, yọ o fi oware ofa bae he; kẹsena o te kere ai fihọ ewẹ-itho ekpakpala ivẹ, ọ tẹ rehọ ae kẹ omẹ.+

23 “Rekọ nọ wha nwani yo urru na no ebi na ze, nọ ugbehru na o jẹ ware erae,+ enọ i wuzou evaọ erua rai kpobi gbe ekpako na a tẹ nyabru omẹ ze. 24 Kẹsena wha tẹ ta nọ, ‘Whaọ Jihova Ọghẹnẹ mai o dhesẹ oruaro gbe orro riẹ kẹ omai no, yọ ma yo urru riẹ no erae na ze.+ Nẹnẹ na ma ruẹ no nọ Ọghẹnẹ ọ sae ta ẹme kẹ ohwo, ohwo na ọ vẹ gbẹ jọ uzuazọ.+ 25 Kọ, fikieme ma je whu? Keme erae egaga nana e sae mahe omai kpe. Ma te gbe bi yo urru Jihova Ọghẹnẹ mai, ma te seba ewhu hu. 26 Kọ ono evaọ usu ahwo-akpọ* kpobi o yo urru Ọghẹnẹ nọ ọ rrọ uzuazọ na nọ ọ be ta ẹme no erae ze wọhọ epanọ ma yo na nọ ọ rẹ gbẹ jọ uzuazọ? 27 Whẹ ọvo go kẹle re who yo eware kpobi nọ Jihova Ọghẹnẹ mai ọ te ta, whọ vẹ vuẹ omai eware kpobi nọ Jihova Ọghẹnẹ mai ọ ta kẹ owhẹ, ma te gaviezọ je ru ae.’+

28 “Jihova o yo ẹme nọ wha ta kẹ omẹ na, Jihova ọ tẹ ta kẹ omẹ nọ, ‘Me yo ẹme nọ ahwo nana a ta kẹ owhẹ na. Eware kpobi nọ a ta na i kiehọ.+ 29 Dodokọ a re wo udu nọ a rẹ rọ dhozọ mẹ+ ẹsikpobi je koko izi mẹ kpobi;+ u ve ti woma kẹ ae avọ emọ rai bẹdẹ bẹdẹ!+ 30 Nyae ta kẹ ae nọ: “Wha zihe kpohọ iwou-udhu rai.” 31 Rekọ jọ etenẹ kugbe omẹ re mẹ vuẹ owhẹ izi na kpobi, ijaje na, gbe izi oziẹobro nọ who re wuhrẹ ae re a koko evaọ ẹkwotọ nọ mẹ be rọ kẹ ae re o jọ ọrai na.’ 32 Whaọ enẹna, wha romatotọ ru epanọ Jihova Ọghẹnẹ rai o jie uzi kẹ owhai na dẹẹ.+ Wha rẹ wẹriẹ obọze hayo ẹkpẹlobọ họ.+ 33 Wha re ru lele izi kpobi nọ Jihova Ọghẹnẹ rai o jie kẹ owhai na,+ re wha ruẹse jọ uzuazọ, re eware i woma kẹ owhai, re wha jẹ rria tọ evaọ ẹkwotọ nọ wha te rehọ na.+

6 “Whaọ enana họ izi, ijaje, gbe izi oziẹobro nọ Jihova Ọghẹnẹ rai o jie re a ro wuhrẹ owhai, re wha ruẹsi koko ai nọ wha tẹ fa vrẹ kpohọ ẹkwotọ nọ wha te nyae rehọ na no, 2 re wha ruẹse dhozọ Jihova Ọghẹnẹ rai je koko izi riẹ gbe ijaje riẹ kpobi nọ mẹ be vuẹ owhai na, te owhai te emọ* rai gbe emọ-iruọmọ* rai,+ evaọ edẹ uzuazọ rai kpobi re wha ruẹse rria oke krẹkri.+ 3 Wha gaviezọ ziezi, O Izrẹl, re wha romatotọ koko ae, re eware i woma kẹ owhai re wha je bu gaga evaọ ẹkwotọ nọ ame-ivie gbe ọnyọ i bi jo su na, nwane wọhọ epanọ Jihova, Ọghẹnẹ esẹ-esẹ rai ọ ya eyaa riẹ kẹ owhai na.

4 “Gaviezọ, O Izrẹl: Jihova Ọghẹnẹ mai yọ Jihova ọvo.+ 5 Whọ rẹ rehọ udu ra kpobi gbe uzuazọ* ra kpobi+ gbe ẹgba ra* kpobi+ you Jihova Ọghẹnẹ ra hrọ. 6 Eme nana nọ me bi ro jie uzi kẹ owhai nẹnẹ na e rẹ jọ udu rai hrọ, 7 who re fi ae họ udu* emọ+ ra hrọ, jẹ ta kpahe ae okenọ wha tẹ keria evaọ uwou rai, okenọ wha tẹ be nya evaọ edhere, okenọ wha kiẹzẹ gbe okenọ wha kpama.+ 8 Gba ae fihọ obọ ra re whọ hae kareghẹhọ ae, yọ e rẹ jọ wọhọ oware nọ a rọ gba uzou evaọ aruezo+ ra.* 9 Kere ai fihọ tofẹ tofẹ unuẹthẹ ra gbe unuighẹ ra.

10 “Nọ Jihova Ọghẹnẹ rai ọ tẹ rehọ owhai ziọ otọ nọ o duwu iyei kẹ esẹ-esẹ rai Abraham, Aiziki, gbe Jekọp inọ ọ te kẹ owhai+ na no, ikpewho nọ e rrọ ruaro jẹ rrọ wowoma nọ wha bọ họ,+ 11 iwou nọ e vọ avọ oghoghẹrẹ eware iwoma kpobi nọ wha ruẹ uye fihọ họ, egọdọ-ame* nọ a bru fihọ itho nọ wha tọ họ, te egbọ evaene gbe ire olivi nọ wha kọ họ, wha jẹ re eva vọ no,+ 12 wha yọroma re Jihova ọ gbẹ thọrọ owhai ẹro ho,+ ọnọ ọ rehọ owhai no obọ ẹkwotọ Ijipti ze, oria nọ wha jẹ jọ igbo. 13 Jihova Ọghẹnẹ rai họ ọnọ wha rẹ dhozọ+ riẹ, ọye wha rẹ gọ,+ yọ odẹ riẹ wha re ro duwu iyei.+ 14 Wha rẹ gọ eghẹnẹ efa vievie he, oghẹrẹ eghẹnẹ kpobi erọ ahwo nọ e wariẹ owhai họ na,+ 15 keme Jihova Ọghẹnẹ rai nọ ọ rrọ udevie rai yọ Ọghẹnẹ nọ ọ gwọlọ omarọkẹ riẹriẹriẹ.+ Wha gbe ru ere he, Jihova Ọghẹnẹ rai o ti mu ofu kẹ owhai+ ọ vẹ te raha owhai no otọakpọ na no.+

16 “Wha rẹ dawo Jihova Ọghẹnẹ rai vievie he+ oghẹrẹ nọ wha dawo e riẹ evaọ obọ Masah+ na. 17 Wha rẹ romatotọ koko izi Jihova Ọghẹnẹ rai gbe eme ekareghẹhọ riẹ gbe ijaje riẹ nọ o jie uzi rai kẹ owhai inọ wha koko na. 18 Wha re ru oware nọ u kiehọ je woma evaọ aro Jihova, re eware e ruẹsi woma kẹ owhai re wha jẹ ruọ eva nyae rehọ otọ uwoma nọ Jihova o duwu iyei nọ ọ rẹ kẹ esẹ-esẹ rai na,+ 19 wha ve ti le ewegrẹ rai kpobi no, nwane wọhọ epanọ Jihova ọ ya eyaa+ na.

20 “Evaọ obaro nọ ọmọzae ra ọ tẹ nọ owhẹ nọ, ‘Fikieme Jihova Ọghẹnẹ mai ọ rọ kẹ owhai ekareghẹhọ, ijaje, gbe izi oziẹobro nana?’ 21 kẹsena whọ vẹ ta kẹ ọmọzae ra nọ, ‘Ma jọ erigbo kẹ Fẹro evaọ obọ Ijipti, rekọ Jihova ọ tẹ rehọ obọ ogaga rehọ omai no Ijipti ze. 22 Evaọ iraro mai na, Jihova ọ tẹ jẹ rehọ eka gbe iruo igbunu ze, iye ilogbo nọ e rọ ọraha te Ijipti+ avọ Fẹro gbe ahwo uwou riẹ kpobi.+ 23 Ọ tẹ rehọ omai no obei ziọ etenẹ re ọ ruẹse kẹ omai ẹkwotọ na, onọ o duwu iyei nọ ọ rẹ kẹ esẹ-esẹ mai.+ 24 Jihova o te jie uzi kẹ omai inọ ma re koko ijaje nana kpobi re ma jẹ dhozọ Jihova Ọghẹnẹ mai re u woma kẹ omai bẹdẹ,+ re ma ruẹse gbẹ jọ uzuazọ+ wọhọ epanọ ma rrọ nẹnẹ na. 25 U ti dhesẹ nọ ma kiẹrẹe otẹrọnọ ma romatotọ koko izi nana kpobi re ma yoẹme kẹ* Jihova Ọghẹnẹ mai, nwane wọhọ epanọ o jie uzi kẹ omai na.’+

7 “Nọ Jihova Ọghẹnẹ rai ọ tẹ rehọ owhai ziọ ẹkwotọ nọ wha be te ruọ eva jẹ rehọ+ na no, o ve ti le ahwo erẹwho nana nọ e rrọ buobu na no kẹ owhai:+ ahwo Hit, ahwo Gẹgash, ahwo Amọ,+ ahwo Kenan, ahwo Pẹriz, ahwo Hiv, gbe ahwo Jebus,+ erẹwho ihrẹ nọ i bu jẹ ga vi owhai.+ 2 Jihova Ọghẹnẹ rai ọ te rehọ ae kẹ owhai, wha ve ti fi ai kparobọ.+ Wha rẹ ruẹ nọ wha raha e rai muotọ.+ Wha rẹ re ọvọ ọvuọvo kugbe ai vievie he yọ wha rẹ re ohrọ rai kakaka ha.+ 3 Wha rẹ ruọ orọo kugbe ai vievie he.* Wha siobọno emetẹ rai kẹ emezae rai hi, hayo rehọ emetẹ rai kẹ emezae rai gbe he.+ 4 Keme a ti ru emezae rai siọ omẹ ba elele re a nyae gọ eghẹnẹ efa;+ Jihova o ve ti mu ofu kẹ owhai, ọ vẹ te rọ ovovẹrẹ raha owhai no.+

5 “Ukpoye, oware nọ wha re ru ai ona: Wha rẹ raha egbada-idhe rai fihọ otọ, kporo ipila ọrẹri+ rai fihọ otọ, ko ekpọ ọrẹri*+ rai fihọ otọ, jẹ mahe emema rai nọ a kare+ no. 6 Keme whai yọ ahwo ọrẹri kẹ Jihova Ọghẹnẹ rai, yọ Jihova Ọghẹnẹ rai ọ salọ owhai no re wha jọ ahwo riẹ, okwakwa obọdẹ* riẹ evaọ usu ahwo kpobi nọ a rrọ otọakpọ na.+

7 “Orọnọ fikinọ whai họ enọ e mai bu evaọ usu ahwo na kpobi oye o soriẹ nọ Jihova o ro you owhai jẹ salọ owhai+ hi, keme whai họ enọ e mae kawo evaọ usu ahwo na kpobi.+ 8 Rekọ fikinọ Jihova o you owhai je bi ru lele eyaa nọ o duwu iyei rọ ya kẹ esẹ-esẹ rai,+ oyejabọ nọ Jihova ọ rọ rehọ obọ ogaga rehọ owhai ze, re ọ ta owhai no oria nọ wha jẹ jọ igbo,+ no obọ* Fẹro ovie Ijipti. 9 Wha riẹ vevẹ nọ Jihova Ọghẹnẹ rai họ Ọghẹnẹ uzẹme na, Ọghẹnẹ nọ o re ru ẹme riẹ gba,* nọ o re koko ọvọ riẹ je dhesẹ uyoyou nọ o rẹ hiẹ hẹ rite ige odu rọkẹ enọ i you rie je bi koko izi riẹ.+ 10 Rekọ ọ te rọ ọraha+ hwosa kẹ enọ i mukpahe iẹe, nọ a te rọ ẹro ruẹ. Ọ te raha oke he re o te dhesẹ akpọ kẹ enọ i mukpahe iẹe; ọ te hwosa kẹ ae nọ a te rọ ẹro ruẹ. 11 Fikiere, wha romatotọ koko izi gbe ijaje gbe izi oziẹobro nọ mẹ be vuẹ owhai nẹnẹ na, re wha ru lele ai.

12 “Wha tẹ ruabọhọ be gaviezọ kẹ izi oziẹobro nana je bi koko ae je ru lele ae, Jihova Ọghẹnẹ rai o ti koko ọvọ na, je dhesẹ uyoyou nọ o rẹ hiẹ hẹ nọ o duwu iyei kpahe rọkẹ esẹ-esẹ rai na. 13 O ti you owhai jẹ ghale owhai je ru owhai bu. Ẹhẹ, ọ te rọ emọ buobu ghale owhai*+ jẹ ghale eware nọ wha kọ fihọ otọ rai, ibi ekakọ rai, enwaene ọkpokpọ rai, ewhri rai,+ emọ-iruẹ owa erao rai gbe imigodẹ ithuru rai, evaọ otọ nọ o duwu iyei kẹ esẹ-esẹ rai nọ ọ te rọ kẹ owhai na.+ 14 Wha rẹ te jọ ahwo nọ a mae ghale evaọ usu ahwo na kpobi;+ a te jọ udevie rai ruẹ ọzae hayo aye ọvo ho nọ o yẹ ọmọ họ, yọ erao rai e te jọ ababọ emọ họ.+ 15 Jihova o ti si eyao kpobi no owhai oma, yọ ọ te rehọ okpẹyao ọvuọvo nọ wha jọ obọ Ijipti+ ruẹ na ro te owhai hi. Ukpoye kọ ahwo nọ a mukpahe owhai ọ te rehọ ai te. 16 Wha rẹ raha* ahwo kpobi nọ Jihova Ọghẹnẹ rai ọ rehọ họ owhai obọ.+ Wha rẹ re ohrọ* rai vievie he,+ yọ wha rẹ gọ eghẹnẹ rai vievie he,+ keme oyena o te jọ agbefẹ kẹ owhai.+

17 “Wha tẹ jọ udu rai ta nọ, ‘Erẹwho nana i bu vi omai. Kọ ẹvẹ ma sai ro le ai no?’+ 18 wha dhozọ rai vievie he.+ Wha rẹ kareghẹhọ omarai oware nọ Jihova Ọghẹnẹ rai o ru Fẹro gbe Ijipti soso,+ 19 ẹdhoguo ologbo* nọ wha rọ ibiaro rai ruẹ na, gbe eware eka avọ iruo igbunu+ gbe obọ ogaga avọ ugbobọ nọ Jihova Ọghẹnẹ rai ọ rriẹ rọ rehọ owhai ze.+ Ere Jihova Ọghẹnẹ rai o ti ru ahwo kpobi nọ ozọ rai u bi mu owhai na.+ 20 Jihova Ọghẹnẹ rai o ti fi elọhoma* họ ae oma bẹsenọ enọ i kiọkọ+ gbe enọ i bi dhere kẹ owhai a ti ro whu no. 21 Wha dhozọ rai hi, keme Jihova Ọghẹnẹ rai ọ rrọ kugbe owhai,+ Ọghẹnẹ nọ ọ rrọ ruaro, nọ o re mu ọwhewhe.+

22 “Jihova Ọghẹnẹ rai ọ te ruẹ nọ o le erẹwho nana no kẹ owhai ẹmẹrera.+ Ọ te kẹ owhai uvẹ re wha kpe ai no ovovẹrẹ hẹ, re erao ijihẹ nọ e rrọ obọ ẹwọ na i gbe vihọ kẹ owhai hi. 23 Jihova Ọghẹnẹ rai ọ te rehọ ae kẹ owhai, je fi ae kpobi kparobọ bẹsenọ a re ro whu kpobi no.+ 24 Ọ te rehọ ivie rai họ owhai obọ,+ wha ve ti voro edẹ rai no otọ idhiwu na.+ Ohwo ọvo ọ te sai dikihẹ lele owhai họre he,+ bẹsenọ wha re kpe ai kpobi no.+ 25 Wha rẹ rọ erae mahe eghẹnẹ emema rai nọ a kare.+ Wha siuru isiliva gbe igoru nọ a ro ru ai hi, yọ wha rehọ ae kẹ omarai hi,+ re e gbẹ jọ agbefẹ kẹ owhai hi, keme yọ oware nọ o rẹ tọtọ Jihova Ọghẹnẹ rai oma.+ 26 Wha rẹ rehọ oware otọtọ ziọ uwou rai vievie he, re u ru owhai fihọ oware nọ a rẹ raha kufiẹ wọhọ oware yena. U re tu owhai oma gaga jẹ tọtọ owhai oma gaga, keme yọ oware nọ a rẹ raha kufiẹ.

8 “Wha rẹ romatotọ koko izi kpobi nọ mẹ be kẹ owhai nẹnẹ na, re wha ruẹse gbẹ jọ uzuazọ+ je vihọ, jẹ ruọ eva nyae rehọ ẹkwotọ nọ Jihova o duwu iyei nọ ọ te rọ kẹ esẹ-esẹ rai na.+ 2 Wha kareghẹhọ edhere othethabọ nọ Jihova Ọghẹnẹ rai o ru owhai nya evaọ ikpe udhuvẹ nana evaọ udhude+ na, re o hrẹ owhai kpotọ jẹ dawo+ owhai re ọ riẹ oware nọ o rrọ udu+ rai, sọ wha ti koko izi riẹ hayo wha ti koko ai hi. 3 Fikiere o te hrẹ owhai kpotọ jẹ kuvẹ re ohọo+ u kpe owhai, ọ tẹ rọ emana+ kuọ owhai, onọ wha riẹ hẹ nọ esẹ rai e riẹ gbe he, re ọ ruẹsi ru owhai riẹ nọ orọnikọ ẹkwoma ebrẹdi ọvo ohwo ọ rẹ rọ jọ uzuazọ họ, rekọ ohwo ọ rẹ jọ uzuazọ ẹkwoma ẹme kpobi nọ o no unu Jihova ze.+ 4 Iwu nọ wha fihọ e bẹre he, yọ awọ rai o fu hu evaọ ikpe udhuvẹ+ nana. 5 Wha riẹ vevẹ evaọ udu rai inọ nwane wọhọ epanọ ohwo ọ rẹ kpọ ọmọ riẹ họ na, ere Jihova Ọghẹnẹ rai ọ jẹ kpọ owhai họ.+

6 “Wha re koko izi Jihova Ọghẹnẹ rai hrọ, re wha nya evaọ idhere riẹ jẹ dhozọ riẹ. 7 Keme Jihova Ọghẹnẹ rai ọ be rehọ owhai ziọ otọ uwoma,+ otọ nọ iko-ame* e rrọ, yọ iyeri-ame gbe eria nọ ame o bi kporo no ze* e rrọ ikiekpotọ epraprara na gbe ubrotọ igbehru na, 8 ẹkwotọ nọ iwhiti avọ ebali e rrọ, egbọ evaene, ire ifigi, gbe pọmegranet,+ ẹkwotọ nọ ewhri olivi gbe ọnyọ+ e rrọ, 9 ẹkwotọ nọ emu ọ te kare he, nọ oware ovo o te jọ kare owhai hi, ẹkwotọ nọ itho riẹ i wo ayọno, nọ wha te jọ igbehru riẹ tọ ekọpa via.

10 “Nọ wha tẹ re eva vọ no, wha re jiri Jihova Ọghẹnẹ rai hrọ, rọkẹ otọ uwoma nọ ọ kẹ owhai+ na. 11 Wha yọroma re Jihova Ọghẹnẹ rai ọ gbẹ thọrọ owhai ẹro ho, nọ wha rẹ rọ siọ ijaje riẹ, izi oziẹobro riẹ gbe izi riẹ nọ mẹ be kẹ owhai nẹnẹ na ba ekoko. 12 Nọ wha tẹ re eva vọ no jẹ bọ emamọ iwou nọ wha muhọ ẹria no,+ 13 nọ owa erao rai gbe ithuru erao rai i je vihọ no, nọ isiliva avọ igoru rai i je bu no, nọ wha je wo eware kpobi dafia no, 14 wha kuvẹ re omorro+ o ruọ udu rai hi re u ru nọ Jihova Ọghẹnẹ rai ọ rẹ rọ thọrọ owhai ẹro, ọnọ ọ rehọ owhai no ẹkwotọ Ijipti ze, oria nọ wha jẹ jọ igbo,+ 15 ọnọ o ru owhai nya udhude+ ulogbo avọ imuozọ vrẹ, nọ eraomuomu nọ i wo obi gbe ewhọhro-imuomu e rrọ, otọ nọ o ya fia nọ ame ọ rrọ họ. O ru nọ ame o ro hwẹ no utho ọgaga ze,+ 16 ọ tẹ rọ emana+ kuọ owhai evaọ udhude na, onọ esẹ rai e riẹ hẹ, re o hrẹ owhai kpotọ+ jẹ dawo owhai re o wha erere se owhai evaọ obaro.+ 17 Wha tẹ jọ udu rai ta nọ, ‘Ogaga obọmẹ gbe ẹgba ugbobọ mẹ me ro wo efe nana,’+ 18 wha kareghẹhọ nọ Jihova Ọghẹnẹ rai họ ọnọ ọ kẹ owhai ogaga nọ wha ro fe+ na, re ọ ruẹsi koko ọvọ riẹ nọ o duwu iyei kpahe rọkẹ esẹ-esẹ rai, wọhọ epanọ o bi ru nẹnẹ na.+

19 “Wha tẹ dawo iẹe kuvẹ re Jihova Ọghẹnẹ rai ọ thọrọ owhai ẹro, re wha lele eghẹnẹ efa, re wha nyae gọ ae, je guzou kpotọ kẹ ae, mẹ be vuẹ owhai vevẹ nẹnẹ na nọ wha te seba ewhu hu.+ 20 Wọhọ erẹwho nọ Jihova ọ be raha no kẹ owhai na, ere wha ti whu, keme wha gaviezọ kẹ urru Jihova Ọghẹnẹ rai hi.+

9 “Gaviezọ, O Izrẹl, nẹnẹ na wha be te fa Jọdan+ vrẹ re wha mi erẹwho nọ e rro jẹ ga vi owhai+ ẹkwotọ rai, ikpewho nọ e rrọ ruaro nọ a di ogba wariẹ họ kpehru te obọ odhiwu,*+ 2 ahwo nọ a rrọ ruaro jẹ rrọ thethei, ahwo Anak,+ enọ wha riẹ, je yo nọ ahwo a rẹ ta kpahe nọ, ‘Ono ọ rẹ sai dikihẹ lele ahwo Anak họre?’ 3 Fikiere jọ wha riẹ nẹnẹ na inọ Jihova Ọghẹnẹ rai ọ te fa vrẹ karo kẹ owhai.+ Ọyomariẹ yọ ebruerae,+ yọ ọ te raha ae muotọ. O ti fi ai kparobọ evaọ iraro rai re wha ruẹsi le ai no* ababọ oke oraha je kpe ai no, nwane wọhọ epanọ Jihova ọ ya eyaa riẹ kẹ owhai na.+

4 “Nọ Jihova Ọghẹnẹ rai o te le ai vrẹ kẹ owhai no, whọ jọ udu ra ta ha inọ, ‘Fiki ẹrẹreokie mẹ Jihova ọ rọ rehọ omẹ ze te rehọ ẹkwotọ nana.’+ Ukpoye, fiki imuemu erẹwho+ nana Jihova o bi ro le ai no kẹ owhai na. 5 Orọnikọ fiki ẹrẹreokie rai hayo fiki udu rai nọ u kiete wha be rọ nyae rehọ ẹkwotọ rai hi. Rekọ fiki imuemu erẹwho nana Jihova Ọghẹnẹ rai o bi ro le ai no kẹ owhai na,+ gbe re Jihova ọ ruẹsi ru ẹme riẹ gba, onọ o duwu iyei kpahe rọkẹ esẹ-esẹ rai, Abraham,+ Aiziki,+ gbe Jekọp.+ 6 Fikiere wha riẹ nọ orọnikọ fiki ẹrẹreokie rai Jihova Ọghẹnẹ rai ọ be rọ kẹ owhai otọ uwoma nana rehọ na ha, keme whai yọ ahwo nọ a rrọ udu gaga.*+

7 “Wha kareghẹhọ, jọ o thọrọ owhai ẹro vievie he, oghẹrẹ nọ wha ro ru eva dha Jihova Ọghẹnẹ rai evaọ udhude+ na. No anwọ ẹdẹ nọ wha ro no ẹkwotọ Ijipti ze rite ẹdẹ nọ wha ro te etenẹ na wha be rọ wọso Jihova.+ 8 Makọ evaọ obọ Horẹb, wha ru eva dha Jihova, yọ eva e dha Jihova te epanọ o je ti ro kpe owhai kpobi no.+ 9 Nọ mẹ gadiẹ kpobọ ugbehru na nyae rehọ ewẹ-itho ekpakpala+ na, ewẹ-itho ekpakpala ọvọ nọ Jihova ọ re kugbe owhai+ na, mẹ jọ obọ ugbehru na edẹ udhuvẹ gbe eso udhuvẹ,+ mẹ re emu hu yọ mẹ da ame he. 10 Kẹsena Jihova ọ tẹ kẹ omẹ ewẹ-itho ekpakpala ivẹ na nọ uziobọ Ọghẹnẹ u kere eme fihọ, yọ eme kpobi nọ Jihova ọ ta kẹ owhai evaọ ehru ugbehru na no erae na ze evaọ ẹdẹ nọ ogbotu* rai a ro kokohọ+ na e jarai. 11 Nọ edẹ udhuvẹ gbe eso udhuvẹ na i re no, Jihova ọ tẹ kẹ omẹ ewẹ-itho ekpakpala ivẹ na, ewẹ-itho ekpakpala ọvọ na, 12 Jihova ọ tẹ ta kẹ omẹ nọ, ‘Kpama, nwrotọ no etenẹ vẹrẹ vẹrẹ, keme ahwo ra nọ whọ rehọ no otọ Ijipti ze a gbe omarai ku+ no. A rọ ovovẹrẹ no edhere nọ me jie uzi riẹ kẹ ae inọ a nya na no. A ru ẹmema igoru* kẹ omarai no.’+ 13 Jihova ọ tẹ ta kẹ omẹ nọ, ‘Mẹ ruẹ oghẹrẹ nọ ahwo nana a rrọ no, rri! ahwo nọ a rrọ udu gaga.*+ 14 Kẹ omẹ uvẹ re me kpe ai kpobi no je voro odẹ rai no otọ idhiwu na re me ru owhẹ fihọ orẹwho nọ o ga vi ai je bu vi ai.’+

15 “Kẹsena me te kuomarẹriẹ me te nwrotọ no ugbehru na ze, yọ ugbehru na o be ware erae,+ yọ ewẹ-itho ekpakpala ivẹ erọ ọvọ na e rrọ abọ ivẹ mẹ.+ 16 Nọ me rri, mẹ tẹ ruẹ nọ wha raha uzi Jihova Ọghẹnẹ rai no! Wha ru ẹmema* ọmọ-eruẹ kẹ omarai. Wha rọ ovovẹrẹ no edhere nọ Jihova o jie uzi riẹ kẹ owhai nọ wha nya na no.+ 17 Fikiere mẹ tẹ rehọ ewẹ-itho ekpakpala ivẹ na, mẹ tẹ rọ abọ ivẹ mẹ gbolo ai fihọ otọ, i te whu ehehẹhẹ evaọ iraro rai.+ 18 Me te kiẹzẹ vovao tuotọ kẹ Jihova, wọhọ epaọ oke ọsosuọ, edẹ udhuvẹ gbe eso udhuvẹ. Mẹ re emu hu yọ mẹ da ame he,+ fiki izieraha kpobi nọ wha raha, nọ wha ro ru oware nọ u yoma evaọ aro Jihova je ru ei eva dha. 19 Keme ozọ u mu omẹ fiki ofu ọgaga nọ Jihova o mu kẹ owhai,+ nọ ọ rọ gwọlọ nọ o re kpe owhai kpobi no. Rekọ Jihova ọ gaviezọ kẹ omẹ evaọ oke yena re.+

20 “Eva e dha Jihova gaga kẹ Erọn te epanọ ọ rọ gwọlọ nọ o re kpei no,+ rekọ mẹ lẹ olẹ ayare-ọgaga kẹ Erọn evaọ oke yena re. 21 Kẹsena mẹ tẹ rehọ oware uzioraha nọ wha ru na, ọmọ-eruẹ na,+ mẹ tẹ rọ erae mahe iẹe; mẹ tẹ guọghọ iẹe je wuhu iei wuru wuru bẹsenọ o ro zihe ruọ ovu no, mẹ tẹ vaha ovu na fihọ ame nọ o bi kporo no obọ ugbehru na ze.+

22 “U te no ere no, wha jọ obọ Tabera,+ obọ Masah,+ gbe obọ Kibrọt-hateava+ ru eva dha Jihova re. 23 Okenọ Jihova o vi owhai no Kedẹsh-bania vrẹ+ inọ, ‘Wha nyae rehọ ẹkwotọ nọ mẹ te rọ kẹ owhai na!’ wha tẹ wariẹ wọso eme nọ Jihova Ọghẹnẹ rai ọ ta,+ wha fi ẹrọwọ họ iẹe he+ yọ wha yoẹme kẹe he. 24 Wha be wọso Jihova anwẹnọ mẹ rọ riẹ owhai na.

25 “Fikiere edẹ udhuvẹ gbe eso udhuvẹ me je kiẹzẹ vovao tuotọ kẹ Jihova,+ me kiẹzẹ vovao tuotọ ere keme Jihova ọ ta nọ o re kpe owhai kpobi no. 26 Me te mu olẹ ayare-ọgaga họ, be lẹ Jihova nọ, ‘O Jihova, Olori nọ Ọ Mai Kpehru na, whọ raha ahwo ra no ho. Ahwo nana yọ ahwo obọra,*+ enọ whọ rehọ oruaro ra ta jẹ rehọ obọ ogaga ra rehọ no obọ Ijipti ze.+ 27 Kareghẹhọ idibo ra Abraham, Aiziki, gbe Jekọp.+ Whọ daezọ udu ogaga ahwo nana ha, gbe umuomu rai, avọ uzioraha rai.+ 28 O gbẹ rrọ ere he, ahwo ẹkwotọ nọ whọ rehọ omai no ze na a vẹ te ta nọ: “Jihova ọ sae rehọ ae kpohọ ẹkwotọ nọ ọ ya eyaa riẹ kẹ ae na ha, yọ fikinọ o mukpahe ae ọ rọ rehọ ae vrẹ re o kpe ai no evaọ obọ udhude na.”+ 29 Keme ahwo ra a rrọ, ahwo obọra,*+ enọ whọ rehọ ogaga ulogbo ra gbe ugbobọ ra nọ whọ rriẹ rehọ ze.’+

10 “Evaọ oke yena Jihova ọ tẹ ta kẹ omẹ nọ, ‘Kare ewẹ-itho ekpakpala ivẹ wọhọ erọ ọsosuọ na kẹ omara,+ re whọ gadiẹ bru omẹ ziọ obọ ugbehru na; yọ whọ rẹ jẹ rehọ ure ru etehe.* 2 Me ve ti kere eme nọ e jọ ewẹ-itho ekpakpala ọsosuọ nọ who kpe ehehẹhẹ no na fihọ ewẹ-itho ekpakpala nana, who ve fi ai họ eva etehe na.’ 3 Fikiere mẹ tẹ rehọ ure akasha ru etehe, mẹ tẹ jẹ kare ewẹ-itho ekpakpala ivẹ nọ e wọhọ erọ ọsosuọ na, mẹ tẹ gadiẹ kpobọ ugbehru na avọ ewẹ-itho ekpakpala ivẹ na nọ e rrọ obọ mẹ.+ 4 Kẹsena ọ tẹ wariẹ kere eme nọ o kere no vẹre na fihọ ewẹ-itho ekpakpala na,+ Izi Ikpe na,*+ enọ Jihova ọ ta kẹ owhai evaọ ehru ugbehru na no erae na ze+ evaọ ẹdẹ nọ ogbotu* rai o ro kokohọ na;+ Jihova ọ tẹ rehọ ae kẹ omẹ. 5 Kẹsena me te kuomarẹriẹ me te nwrotọ no ugbehru na ze,+ me te fi ewẹ-itho ekpakpala na họ eva etehe nọ me ru na, yọ etẹe e gbẹ rrọ, nwane wọhọ epanọ Jihova o jie uzi kẹ omẹ.

6 “Ahwo Izrẹl a tẹ wọ no Biẹrọt Bẹnẹ-jekan kpohọ Mosira. Etẹe Erọn o jo whu yọ etẹe a ki rie fihọ,+ Ẹlieza ọmọzae riẹ ọ tẹ jọ ozerẹ nọ ọ rehọ ẹta riẹ.+ 7 A tẹ wọ no etẹe kpohọ Gọdguda, je no Gọdguda kpohọ Jọtbata,+ ẹkwotọ nọ iko-ame* e be jọ su.

8 “Evaọ oke yena Jihova ọ tẹ salọ orua Livae+ re a wọ etehe ọvọ Jihova na,+ re a dikihẹ aro Jihova re a gbodibo kẹe, jẹ rọ odẹ riẹ lẹ ẹro eghale,+ wọhọ epanọ a gbe bi ru rite inẹnẹ na. 9 Oyejabọ nọ a gbẹ rọ kẹ Livae ẹkẹ hayo ukuoriọ evaọ udevie inievo riẹ hẹ na. Jihova họ ukuoriọ riẹ, nwane wọhọ epanọ Jihova Ọghẹnẹ rai ọ ta kẹe.+ 10 Mẹ omamẹ mẹ rria obọ ugbehru na wọhọ epaọ oke ọsosuọ, edẹ udhuvẹ gbe eso udhuvẹ,+ yọ Jihova ọ gaviezọ kẹ omẹ evaọ oke oyena re.+ Jihova ọ gbẹ gwọlọ nọ ọ rẹ raha owhai hi. 11 Jihova ọ tẹ ta kẹ omẹ nọ, ‘Kpohọ aro ahwo na, re wha ruẹrẹ oma kpahe kẹ epanọ wha te rọ wọ ruọ edhere, re a nyae rehọ ẹkwotọ nọ me duwu iyei kẹ esẹ-esẹ rai nọ mẹ te rọ kẹ ae na.’+

12 “Enẹna, O Izrẹl, eme Jihova Ọghẹnẹ rai ọ gwọlọ mi owhai?+ Onana ọvo: re wha dhozọ Jihova Ọghẹnẹ rai,+ re wha nya evaọ idhere riẹ kpobi,+ re wha you rie, re wha rọ udu rai kpobi gbe uzuazọ* rai kpobi gọ Jihova Ọghẹnẹ rai,+ 13 re wha je koko ijaje gbe izi Jihova nọ mẹ be kẹ owhai nẹnẹ na rọkẹ ewoma rai.+ 14 Rri, Jihova Ọghẹnẹ rai ọye o wo odhiwu na, makọ idhiwu erọ idhiwu na,* gbe otọakpọ na avọ eware kpobi nọ e rrọ eva riẹ.+ 15 Ghele na esẹ-esẹ rai ọvo Jihova o si kẹle je dhesẹ uyoyou riẹ kẹ, ọ tẹ jẹ salọ owhai emọ rai+ no udevie ahwo na kpobi ze, wọhọ epanọ wha rrọ nẹnẹ na. 16 Whaọ obọnana, wha ru eva rai fo*+ jẹ siọ uzou ogaga ba edhesẹ.*+ 17 Keme Jihova Ọghẹnẹ rai họ Ọghẹnẹ eghẹnẹ+ gbe Olori ilori, Ọghẹnẹ ologbo, ọnọ o wo ogaga, jẹ vọ avọ ọwhewhe, ọnọ o re dhesẹ ọriẹwẹ kẹ ohwo ọvo ho+ yọ ọ rẹ re udi hi. 18 O re bruoziẹ okiẹrẹe kẹ ọmọ nọ o wo ọsẹ hẹ* avọ aye-uku,+ yọ o you ọrara nọ ọ be rria udevie rai,+ jẹ be kẹe emu avọ iwu. 19 Whai omarai re, wha re you ọrara nọ ọ be rria udevie rai hrọ, keme wha jọ erara evaọ ẹkwotọ Ijipti.+

20 “Jihova Ọghẹnẹ rai họ ọnọ wha rẹ dhozọ riẹ, ọye wha rẹ gọ,+ ọye wha rẹ talamu, yọ odẹ riẹ wha re ro duwu iyei. 21 Ọye họ Ọnọ wha re jiri.+ Ọye họ Ọghẹnẹ rai, ọnọ o ru eware ilogbo nana kpobi nọ i re mu ọwhewhe na kẹ owhai, enọ wha rọ ibiaro rai ruẹ no na.+ 22 Okenọ esẹ-esẹ rai a kpohọ obọ Ijipti,+ ahwo* udhosa-gbikpe a jọ, rekọ enẹna Jihova Ọghẹnẹ rai o ru owhai bu gaga no wọhọ isi obọ ehru.*+

11 “Wha re you Jihova Ọghẹnẹ rai+ hrọ je ru oware nọ ọ gwọlọ mi owhai, je koko izi riẹ, izi oziẹobro riẹ, gbe ijaje riẹ ẹsikpobi. 2 Nẹnẹ na wha riẹ nọ whai mẹ be ta ẹme kẹ, orọnikọ emọ rai hi, enọ e re riẹ hayo rọ ẹro ruẹ ọwhọkuo Jihova Ọghẹnẹ rai+ hi, gbe oruaro riẹ,+ obọ ogaga riẹ+ avọ ugbobọ riẹ nọ ọ rriẹ. 3 A ruẹ eka riẹ gbe eware nọ o ru evaọ obọ Ijipti hi, enọ o ru Fẹro ovie Ijipti gbe ẹkwotọ riẹ soso;+ 4 hayo oware nọ o ru egbaẹmo Ijipti, enyenya Fẹro gbe ekẹkẹ ẹmo riẹ, enọ ame Abade Ọwawae na o hwẹ ruru evaọ okenọ a je le owhai, Jihova ọ tẹ raha ai no riẹriẹriẹ.*+ 5 A ruẹ eware nọ o ru kẹ owhai* evaọ obọ udhude na ha bẹsenọ wha rọ nyate oria nana, 6 hayo oware nọ o ru Detan avọ Abaeram emezae Ẹlayab ohwo orua Rubẹn, nọ otọ na u ro rovie jẹ lọ ai no, te ahwo uwou rai gbe iwou-udhu rai gbe omama kpobi nọ u wo uzuazọ nọ o lele i rai, evaọ iraro ahwo Izrẹl kpobi.+ 7 Ibiaro rai e ruẹ eware ilogbo kpobi nọ Jihova o ru.

8 “Wha re koko izi kpobi nọ mẹ be rọ kẹ owhai nẹnẹ na hrọ, re wha ruẹse jọ gaga jẹ fa vrẹ nyae ruọ eva ẹkwotọ na re wha rehọ iẹe, 9 re wha ruẹse rria tọ+ evaọ ẹkwotọ nọ Jihova o duwu iyei nọ ọ te kẹ esẹ-esẹ rai gbe emọ* rai,+ ẹkwotọ nọ ame-ivie gbe ọnyọ i bi jo su.+

10 “Ẹkwotọ nọ wha be te nyae rehọ na o wọhọ ẹkwotọ Ijipti hi, onọ wha no ze na, oria nọ wha jẹ hae jọ kọ ibi wha vẹ rọ awọ rai nyai ku ame ku ai* wọhọ ọgbọ ibi-ire. 11 Rekọ ẹkwotọ nọ wha be fa vrẹ nyae rehọ na yọ ubrotọ igbehru avọ ikiekpotọ epraprara.+ Ame oso nọ ọ rrọ no obọ ehru* ze ọ rẹ da;+ 12 otọ nọ Jihova Ọghẹnẹ rai ọ be rẹrote. Ibiaro Jihova Ọghẹnẹ rai i bi rri rie kẹse kẹse, no emuhọ ukpe na rite urere ukpe na.

13 “Otẹrọnọ wha rẹ romatotọ yoẹme kẹ izi mẹ nọ mẹ be kẹ owhai nẹnẹ na je you Jihova Ọghẹnẹ rai re wha rọ udu rai kpobi gbe uzuazọ* rai kpobi+ gọe, 14 me ti je ru oso rrọ fihọ otọ rai evaọ ezi riẹ, iso obọ emuhọ okiewhru gbe iso obọ ekuhọ okiewhru, wha ve ti koko ibi ekakọ rai gbe enwaene ọkpokpọ rai avọ ewhri rai họ.+ 15 Yọ me ti ru etọ rai di ẹbe ziezi rọkẹ erao rai, wha vẹ te re eva vọ.+ 16 Wha yọroma re udu rai u gbe su owhai thọ họ re wha nyae gọ eghẹnẹ efa je guzou kpotọ kẹ ae.+ 17 O gbẹ rrọ ere he, Jihova o ve ti mu ofu kẹ owhai, ọ vẹ te kare ihru* na dhe re e gbẹ rrọ oso ze he,+ yọ otọ na u gbe ti wou eware he, wha ve ti whu no otọ uwoma nọ Jihova ọ be rọ kẹ owhai na no vẹrẹ vẹrẹ.+

18 “Wha re fi eme mẹ nana họ* udu rai gbe oma* rai jẹ gba ae fihọ obọ rai re e jọ ekareghẹhọ kẹ owhai, yọ e rẹ jọ wọhọ oware nọ a rọ gba uzou evaọ aruezo rai.*+ 19 Wha rehọ ae wuhrẹ emọ rai, jẹ ta kpahe ae okenọ wha tẹ keria evaọ uwou rai gbe okenọ wha tẹ be nya evaọ edhere gbe okenọ wha kiẹzẹ gbe okenọ wha kpama.+ 20 Wha kere ai fihọ tofẹ tofẹ unuẹthẹ rai gbe unuighẹ rai, 21 re te owhai te emọ rai wha ruẹse rria tọ+ evaọ ẹkwotọ nọ Jihova o duwu iyei nọ ọ rẹ kẹ esẹ-esẹ rai na,+ evaọ edẹ kpobi nọ idhiwu na e rẹ jọ ehru otọakpọ na.

22 “Wha tẹ robọ kotọ koko izi mẹ nana nọ mẹ be rọ kẹ owhai na, nọ wha je ru lele ai, re wha you Jihova Ọghẹnẹ rai,+ jẹ nya evaọ idhere riẹ kpobi jẹ talamu ei,+ 23 Jihova o ti le erẹwho nana kpobi no kẹ owhai,+ wha ve ti mi erẹwho nọ e rro vi owhai je bu vi owhai ẹkwotọ rai.+ 24 Oria kpobi nọ wha rọ evawọ rai thihi u ti zihe ruọ orai.+ No udhude na rite Lebanọn, je no Ethẹ na, ethẹ Yufretis na rite abade obọ ukiediwo-ọre na,* uwhru rai o te jọ.+ 25 Ohwo ọvo ọ te sai dikihẹ lele owhai họre he.+ Jihova Ọghẹnẹ rai o ti fi iguegue rai gbe ozọ rai họ ẹkwotọ kpobi nọ wha nyate,+ nwane wọhọ epanọ ọ ya eyaa riẹ kẹ owhai.

26 “Rri, me bi fi oghale gbe eka* họ aro rai nẹnẹ na:+ 27 oghale u re te owhai otẹrọnọ wha yoẹme kẹ izi Jihova Ọghẹnẹ rai nọ mẹ be kẹ owhai nẹnẹ na,+ 28 rekọ eka i ti te owhai otẹrọnọ wha gbe koko izi Jihova Ọghẹnẹ rai hi,+ nọ wha te no edhere nọ me jie uzi riẹ kẹ owhai nẹnẹ na inọ wha nya na, je bi lele eghẹnẹ nọ wha riẹ hẹ.

29 “Nọ Jihova Ọghẹnẹ rai ọ tẹ rehọ owhai ziọ ẹkwotọ nọ wha te rehọ na no, wha re woro* eghale na evaọ Ugbehru Gẹrizim gbe eka* na evaọ Ugbehru Ibal.+ 30 Kọ e gbẹ rrọ abọdekọ Jọdan na evaọ ofẹ obọ ukiediwo-ọre na, evaọ ẹkwotọ ahwo Kenan nọ e be rria Araba* na, nọ o rẹriẹ ovao ku Gilgal, evaọ akotọ ire ilogbo erọ Morẹ?+ 31 Keme wha be fa Jọdan vrẹ re wha ruọ eva nyae rehọ ẹkwotọ nọ Jihova Ọghẹnẹ rai ọ be rọ kẹ owhai.+ Nọ wha tẹ rehọ ẹkwotọ na no je mu ei họ ẹria no, 32 wha rẹ yọroma gaga re wha ru lele ijaje gbe izi oziẹobro kpobi nọ mẹ be rọ kẹ owhai nẹnẹ na.+

12 “Enana họ ijaje gbe izi oziẹobro nọ wha rẹ romatotọ koko evaọ edẹ uzuazọ rai kpobi nọ wha te rria ẹkwotọ nọ Jihova Ọghẹnẹ esẹ-esẹ rai ọ te rọ kẹ owhai rehọ na. 2 Wha rẹ raha eria kpobi nọ erẹwho nọ wha te rehọ ẹkwotọ rai a jẹ jọ gọ eghẹnẹ rai na muotọ,+ makọ evaọ igbehru hayo eria ikpehru hayo otọ okpure jọ kpobi. 3 Wha re kporo egbada-idhe rai fihọ otọ, kporo ipila ọrẹri rai,+ rọ erae mahe ekpọ ọrẹri* rai, je bru eghẹnẹ emema rai nọ a kare na fihọ otọ,+ wha ve voro edẹ rai no oria yena no riẹriẹriẹ.+

4 “Wha rẹ gọ Jihova Ọghẹnẹ rai evaọ oghẹrẹ utioye vievie he.+ 5 Ukpoye wha gwọlọ Jihova Ọghẹnẹ rai evaọ oria kpobi nọ ọ salọ inọ odẹ riẹ o rẹ jọ, gbe oria nọ ọ be rria evaọ usu erua rai kpobi, wha ve kpohọ etẹe.+ 6 Etẹe wha rẹ rehọ idhe emahọ rai ze,+ gbe idhe rai efa, ekẹ abọvo abakpe rai,+ azọhọ nọ o no obọ rai ze,+ eware nọ wha ya eyaa nọ wha te rọ kẹ okẹ, ekẹ unevaze rai,+ gbe ọmọ ọsosuọ owa erao gbe uthuru erao rai.+ 7 Whai avọ ahwo uwou rai wha rẹ jọ etẹe re emu evaọ aro Jihova Ọghẹnẹ rai+ jẹ ghọghọ evaọ oware kpobi nọ wha bi ru,+ fikinọ Jihova Ọghẹnẹ rai ọ ghale owhai no.

8 “Wha re ru epanọ ma rrọ etenẹ ru nẹnẹ na ha, nọ ohwo kpobi o bi ro ru oware nọ u kiehọ evaọ aro riẹ,* 9 keme wha ri te oria eriosehọ na ha,+ onọ Jihova Ọghẹnẹ rai ọ te kẹ owhai re wha rọ reuku. 10 Nọ wha tẹ fa Jọdan vrẹ+ je mu ẹkwotọ nọ Jihova Ọghẹnẹ rai ọ be kẹ owhai na họ ẹria no, o ti gine ru owhai wo ufuoma* no obọ ewegrẹ rai kpobi nọ e wariẹ owhai họ, wha vẹ te rria avọ omofọwẹ.+ 11 Wha rẹ rehọ eware kpobi nọ mẹ be vuẹ owhai na ziọ oria nọ Jihova Ọghẹnẹ rai ọ salọ nọ odẹ riẹ o rẹ jọ,+ idhe emahọ rai, gbe idhe rai efa, ekẹ abọvo abakpe rai,+ azọhọ nọ o no obọ rai ze, gbe eware kpobi nọ wha ya eyaa nọ wha te rọ kẹ Jihova. 12 Wha rẹ ghọghọ evaọ aro Jihova Ọghẹnẹ rai,+ te owhai te emezae rai, emetẹ rai, erigbo emezae gbe emetẹ rai, gbe ahwo Livae nọ a rrọ eva ikpewho* rai, keme a kẹ rai ẹkẹ hayo ukuoriọ evaọ udevie rai hi.+ 13 Wha yọroma re wha gbẹ jọ oria ofa kpobi nọ wha ruẹ dhe idhe emahọ rai hi.+ 14 Oria nọ Jihova ọ salọ ọvo evaọ usu ekwotọ erua rai wha rẹ jọ dhe idhe emahọ rai, etẹe wha re jo ru oware kpobi nọ me bi jie uzi riẹ kẹ owhai na.+

15 “Rekọ oke kpobi nọ u te si owhai* urru, wha rẹ sai kpe arao wha vẹ re iẹe,+ wọhọ epanọ Jihova Ọghẹnẹ rai ọ ghale owhai te evaọ ikpewho* rai kpobi. Te ohwo nọ ọ fo te ohwo nọ ọ fo ho ọ rẹ sae re iẹe, wọhọ epanọ wha rẹ re ugbosu hayo orua na. 16 Rekọ wha rẹ re azẹ na vievie he;+ wha re ku ei fihọ otọ wọhọ ame.+ 17 A te kẹ owhai uvẹ hẹ re wha jọ eva ikpewho* rai re abọvo abakpe ekakọ rai, enwaene ọkpokpọ rai, ewhri rai, ọmọ ọsosuọ owa erao gbe ọrọ uthuru erao rai,+ eware kpobi nọ wha ya eyaa nọ wha te rọ kẹ okẹ, ekẹ unevaze rai hayo azọhọ nọ o no obọ rai ze. 18 Wha rẹ re enana evaọ aro Jihova Ọghẹnẹ rai evaọ oria nọ Jihova Ọghẹnẹ rai ọ te salọ,+ te owhẹ te ọmọzae ra, ọmọtẹ ra, odibo ọmọzae gbe odibo ọmọtẹ ra, gbe ohwo Livae nọ ọ rrọ evaọ ikpewho* rai; wha vẹ te ghọghọ evaọ aro Jihova Ọghẹnẹ rai evaọ oware kpobi nọ wha bi ru. 19 Wha yọroma re wha gbe gbolaro kẹ ahwo Livae he+ evaọ edẹ nọ wha te rria otọ na kpobi.

20 “Nọ Jihova Ọghẹnẹ rai o te ru ẹkwotọ rai rro no,+ nwane wọhọ epanọ ọ ya eyaa riẹ kẹ owhai na,+ nọ whọ jẹ ta nọ, ‘Mẹ gwọlọ re arao,’ keme arao o si owhẹ* urru, whọ rẹ sae re arao evaọ oke kpobi nọ whọ* gwọlọ e riẹ.+ 21 Otẹrọnọ oria nọ Jihova Ọghẹnẹ rai ọ salọ nọ o re fi odẹ riẹ họ+ o thabọ no oria nọ whọ be rria, whọ rẹ sai kpe arao jọ evaọ owa erao ra hayo uthuru erao ra nọ Jihova ọ kẹ owhẹ, nwane wọhọ epanọ me jie uzi riẹ kẹ owhai na, yọ wha rẹ sae re iẹe evaọ ikpewho* rai evaọ oke kpobi nọ wha* gwọlọ e riẹ. 22 Wha rẹ sae re iẹe wọhọ epanọ wha rẹ re ugbosu hayo orua+ na; te ohwo nọ ọ fo te ohwo nọ ọ fo ho ọ rẹ sae re iẹe. 23 Thakpinọ wha gbaemu ziezi inọ wha rẹ re azẹ na ha,+ keme azẹ na họ uzuazọ*+ na, wha rẹ re uzuazọ* na kugbe uwo na vievie he. 24 Wha rẹ re iẹe vievie he. Wha re ku ei fihọ otọ wọhọ ame.+ 25 Wha rẹ re iẹe vievie he, re o ruẹsi woma kẹ owhai gbe emọ rai nọ i ti lele owhai, fikinọ wha bi ru oware nọ u kiehọ evaọ aro Jihova. 26 Eware ọrẹri ra gbe eware nọ whọ ya eyaa nọ whọ te rọ kẹ okẹ ọvo whọ rẹ wha lele oma nọ whọ tẹ be nyaziọ oria nọ Jihova ọ te salọ. 27 Etẹe wha re jo dhe idhe emahọ rai, enọ wha rẹ rehọ uwo gbe azẹ na+ dhe evaọ agbada-idhe Jihova Ọghẹnẹ rai, wha re ku azẹ idhe rai fihọ akotọ agbada-idhe+ Jihova Ọghẹnẹ rai, rekọ wha rẹ sae re uwo na.

28 “Wha romatotọ ru lele eme nana kpobi nọ me bi ro jie uzi kẹ owhai na, re u woma kẹ owhai ẹsikpobi te emọ rai nọ i ti lele owhai, fikinọ wha bi ru oware nọ u woma je kiehọ evaọ aro Jihova Ọghẹnẹ rai.

29 “Nọ Jihova Ọghẹnẹ rai ọ tẹ raha erẹwho nọ wha te rehọ ẹkwotọ rai na no,+ nọ wha je mu ẹkwotọ rai họ ẹria no, 30 wha yọroma re wha siọ ẹta ba ekie ruọ nọ a tẹ raha ai no. Wha nọ kpahe eghẹnẹ rai hi, inọ, ‘Oghẹrẹ vẹ erẹwho nana a jẹ hae rọ gọ eghẹnẹ rai? Mẹ omamẹ me re ru epọvo na re.’+ 31 Wha ru ere kẹ Jihova Ọghẹnẹ rai hi, keme a be hai ru oware otọtọ kpobi nọ Jihova o mukpahe kẹ eghẹnẹ rai, a rẹ tubẹ mahe emezae rai gbe emetẹ rai evaọ erae rọkẹ eghẹnẹ rai.+ 32 Wha rẹ romatotọ ru lele ẹme kpobi nọ me bi ro jie uzi kẹ owhai na.+ Wha re fibae hayo si noi vievie he.+

13 “Otẹrọnọ ọruẹaro jọ hayo ohwo jọ nọ ọ rẹ wezẹ ewezẹ rọ ruẹaro o no udevie rai ze o je ru oware oka hayo dhesẹ oware jọ nọ o te via evaọ obaro, 2 nọ oka na hayo oware nọ o dhesẹ na, nọ ọ vuẹ owhai kpahe na o jẹ via, ọ tẹ be ta nọ, ‘Joma nya lele eghẹnẹ efa,’ eghẹnẹ nọ wha riẹ hẹ, inọ ‘ma nyae gọ ae,’ 3 wha rẹ gaviezọ kẹ eme ọruẹaro yena hayo ọwezẹ-ewezẹ+ yena vievie he, keme Jihova Ọghẹnẹ rai ọ be dawo owhai+ re ọ riẹ sọ wha rọ udu rai kpobi gbe uzuazọ* rai kpobi you Jihova Ọghẹnẹ rai.+ 4 Jihova Ọghẹnẹ rai wha re lele, ọye wha rẹ dhozọ riẹ, izi riẹ wha re koko, urru riẹ wha rẹ gaviezọ kẹ; ọye họ ọnọ wha rẹ gọ, yọ ọye wha rẹ talamu.+ 5 Rekọ wha re kpe ọruẹaro yena hayo ọwezẹ-ewezẹ yena no,+ keme o bi ru owhai wọso Jihova Ọghẹnẹ rai, ọnọ ọ rehọ owhai no ẹkwotọ Ijipti ze, ọnọ ọ ta owhai no oria nọ wha jẹ jọ igbo. Ohwo yena ọ gwọlọ si owhai no edhere nọ Jihova Ọghẹnẹ rai o jie uzi kẹ owhai nọ wha rẹ nya. Wha re si oware umuomu no udevie rai hrọ.+

6 “Otẹrọnọ oniọvo-ọmọzae ra, ọmọzae oni ra, hayo ọmọzae ra hayo ọmọtẹ ra hayo aye oyoyou ra hayo ogbẹnyusu ọkpekpe* ra ọ be gwọlọ viẹ owhẹ họ evaọ idhere, inọ, ‘Joma nyae gọ eghẹnẹ efa,’+ eghẹnẹ nọ te owhai te esẹ-esẹ rai wha riẹ hẹ, 7 eghẹnẹ ahwo nọ a wariẹ owhai họ kpobi na, te enọ e kẹle owhai te enọ i thabọ no owhai, no oka otọ na jọ rite oka otọ na ọdekọ, 8 whọ rẹ rọwo kẹe vievie he hayo gaviezọ kẹe he,+ whọ rẹ re ohrọ riẹ hayo wo ọdawẹ kẹe hayo thọe he; 9 ukpoye, who re kpei no hrọ.+ Whẹ họ ọnọ ọ rẹ kake rọ utho fi ei, nọ a te bi ti kpei, kẹsena ahwo na kpobi a vẹ rọ itho fi ei.+ 10 Wha rẹ rọ itho fi ei kpe hrọ,+ keme ọ gwọlọ si owhai no abọ Jihova Ọghẹnẹ rai, ọnọ ọ rehọ owhai no ẹkwotọ Ijipti ze, oria nọ wha jẹ jọ igbo. 11 Kẹsena ahwo Izrẹl kpobi a ve ti yo, ozọ u ve ti mu ai, a gbe ru oware uyoma utioye ofa vievie he evaọ udevie rai.+

12 “Otẹrọnọ who yo nọ ohwo jọ ọ ta evaọ okpẹwho jọ evaọ usu ikpewho rai nọ Jihova Ọghẹnẹ rai ọ kẹ owhai nọ wha rria na, inọ, 13 ‘Ahwo nọ a fioka ha a nyae viẹ ahwo nọ a be rria okpẹwho rai họ inọ: “Joma nyae gọ eghẹnẹ efa,” eghẹnẹ nọ wha riẹ hẹ,’ 14 wha rẹ kiẹ ẹme na, romatotọ kiẹ otọ ẹme na jẹ nọ kpahe iẹe;+ yọ wha tẹ ruẹ nọ ginọ uzẹme nọ a ru oware otọtọ nana evaọ udevie rai, 15 wha rẹ rọ ọgbọdọ kpe ahwo nọ a be rria okpẹwho yena no hrọ.+ Wha rọ ọgbọdọ raha iẹe avọ eware kpobi nọ e rrọ eva riẹ muotọ, te erao nọ e riẹe.+ 16 Wha vẹ kwa eware okpẹwho na kpobi kokohọ udevie oko-ore riẹ wha vẹ rọ erae mahe okpẹwho na, eware riẹ kpobi e vẹ jọ wọhọ idhe nọ a mahe oma riẹ soso kẹ Jihova Ọghẹnẹ rai. O ve zihe ruọ okpẹwho nọ a raha no ribri. A rẹ gbẹ wariẹ bọ okpẹwho na ofa ha. 17 Wha rẹ tọlọ oware ovuovo nọ a nyaseba kẹ ọraha ha,*+ re ofu ọgaga Jihova ọ ruẹsi hrẹ, o ve dhesẹ ohrọ gbe ọdawẹ kẹ owhai je ru owhai bu, nwane wọhọ epanọ o duwu iyei kẹ esẹ-esẹ rai.+ 18 Keme wha re yoẹme kẹ* Jihova Ọghẹnẹ rai ẹkwoma izi riẹ kpobi nọ mẹ be kẹ owhai nẹnẹ na nọ wha re koko, wha vẹ rọ ere ru oware nọ u kiehọ evaọ aro Jihova Ọghẹnẹ rai.+

14 “Whai yọ emọ Jihova Ọghẹnẹ rai. Wha re bru oma rai+ hayo fọrọ eto obaro uzou rai rioriorio* ho fiki ohwo nọ o whu.+ 2 Keme whai yọ ahwo ọrẹri+ kẹ Jihova Ọghẹnẹ rai, yọ Jihova ọ salọ owhai no re wha jọ ahwo riẹ, okwakwa obọdẹ* riẹ evaọ usu ahwo kpobi nọ a rrọ otọakpọ na.+

3 “Wha rẹ re oware ovuovo nọ o rrọ tọtọtọ họ.+ 4 Erao nọ wha rẹ sae re ena:+ eruẹ, ogodẹ, ẹwe, 5 orua, ugbosu, ugbosu ọzae, ẹwe ẹwọ, uyo, ogodẹ ẹwọ, gbe ogodẹ igbehru. 6 Wha rẹ sae re arao kpobi nọ o wo ekothawọ nọ e bẹre abava, nọ ọ rẹ wariẹ re eware nọ ọ re no vẹre. 7 Rekọ erao nana nọ e rẹ wariẹ re eware nọ a re no vẹre na hayo nọ i wo ekothawọ nọ e bẹre na, wha rẹ re ae vievie he: ekamẹle, uriri, gbe ebaja nọ ọ rẹ rria eghogho-utho, keme a rẹ wariẹ re eware nọ a re no vẹre rekọ ekothawọ rai e bẹre he. Enana yọ erao nọ e fo ho kẹ owhai.+ 8 Te esi re keme o wo ekothawọ nọ e bẹre rekọ ọ rẹ wariẹ re eware nọ ọ re no vẹre he. Ọnana yọ arao nọ ọ fo ho kẹ owhai. Wha rẹ re uwo rai hayo rọ obọ te owhuowhu rai vievie he.

9 “Evaọ usu eware kpobi nọ e rrọ obọ ame na, enọ wha rẹ sae re ena: Wha rẹ sae re oware kpobi nọ u wo efọlefọ gbe egbẹ.+ 10 Rekọ oware kpobi nọ u wo efọlefọ gbe egbẹ hẹ wha rẹ re iẹe vievie he. Yọ oware nọ o fo ho kẹ owhai.

11 “Wha rẹ sae re ọvra kpobi nọ ọ fo. 12 Rekọ wha rẹ re enana vievie he: ugo, ọso ọgaga, udele obiebi,+ 13 ẹgodi ọwawae, ẹgodi obiebi, koghẹrẹ koghẹrẹ ẹgodi kpobi, 14 koghẹrẹ koghẹrẹ ọkọlọbe kpobi, 15 ogomugoro, okpukpuru, ayesa, koghẹrẹ koghẹrẹ ọso kpobi, 16 okpukpuru ọsese, okpukpuru nọ o wo ezọ ithethei, ọkọlọbe-abade, 17 okpitolo, udele, ọkẹkẹlẹ, 18 ogbodu, koghẹrẹ koghẹrẹ eruele kpobi, akia-eni, gbe adha. 19 Emama nọ e rẹ jọ usu ovo buobu* nọ i wo ibekpe kpobi yọ eware nọ e fo ho kẹ owhai re. A rẹ re ae he. 20 Wha sae re emama kpobi nọ e rẹ rra nọ e fo.

21 “Wha rẹ re arao nọ a dihọ owhuowhu vievie he.+ Wha sae rehọ iẹe kẹ ọrara nọ ọ be rria udevie rai eva ikpewho rai,* yọ ọ rẹ sae re iẹe, hayo a rẹ sae zẹe kẹ ohwo orẹwho ọfa. Keme whai yọ ahwo ọrẹri kẹ Jihova Ọghẹnẹ rai.

“Wha rẹ rọ ame-ivie oni ẹwe there ọmọ riẹ vievie he.+

22 “O gbahọ nọ wha rẹ rọ abọvo abakpe oware kpobi nọ wha kọrọ no idhu rai ze kukpe kukpe rọ kẹ okẹ.+ 23 Wha rẹ re abọvo abakpe ekakọ rai, enwaene ọkpokpọ rai, ewhri rai, gbe ọmọ ọsosuọ owa erao avọ uthuru erao rai evaọ aro Jihova Ọghẹnẹ rai, evaọ oria nọ ọ salọ inọ odẹ riẹ o rẹ jọ,+ re wha wuhrẹ epanọ wha rẹ rọ dhozọ Jihova Ọghẹnẹ rai ẹsikpobi.+

24 “Rekọ otẹrọnọ erẹ na o thabọ hrọ kẹ owhai yọ wha sae wha ae kpohọ oria nọ Jihova Ọghẹnẹ rai ọ salọ rọkẹ odẹ riẹ+ na ha, fikinọ u thabọ kẹ owhai (keme Jihova Ọghẹnẹ rai ọ te ghale owhai), 25 wha rẹ sae rehọ ugho nwene ai wha vẹ wha ugho na kpohọ oria nọ Jihova Ọghẹnẹ rai ọ te salọ na. 26 Kẹsena whọ vẹ rọ ugho na dẹ oware kpobi nọ whọ* gwọlọ: iruẹ, igodẹ, ewe, enwaene avọ idi egaga efa, gbe oware kpobi nọ o were owhẹ;* whọ rẹ jọ etẹe re emu evaọ aro Jihova Ọghẹnẹ rai jẹ ghọghọ, te owhẹ te ahwo uwou ra.+ 27 Yọ who re gbolaro kẹ ahwo Livae nọ a rrọ evaọ ikpewho rai hi,+ keme a kẹ rai ẹkẹ hayo ukuoriọ evaọ udevie rai hi.+

28 “Evaọ urere ikpe esa kpobi, wha rẹ rọ abọvo abakpe ekakọ rai kpobi evaọ ukpe yena ze wha ve fi ai họ eva ikpewho rai.+ 29 Kẹsena ahwo Livae nọ a kẹ ẹkẹ hayo ukuoriọ evaọ udevie rai hi na, te ọrara nọ ọ be rria udevie rai, ọmọ nọ o wo ọsẹ hẹ,* gbe aye-uku nọ ọ rrọ evaọ ikpewho rai ọ vẹ nyaze te re eva vọ,+ re Jihova Ọghẹnẹ rai ọ ruẹse ghale owhai evaọ oware kpobi nọ wha bi ru.+

15 “Urere ikpe ihrẹ kpobi o rẹ jọ oke obusino kẹ owhai.+ 2 Enẹ obusino na o rẹ jọ: ohwo kpobi nọ a reosa riẹ ọ rẹ rọ osa nọ ọrivẹ riẹ ọ re na rọvrẹ riẹ. O re ye ọrivẹ riẹ hayo oniọvo riẹ osa ha, keme a ti woro iei inọ onana yọ obusino nọ a bi ru kẹ Jihova.+ 3 Whọ rẹ sai ye ohwo orẹwho ọfa osa,+ rekọ whọ rẹ rọ oware kpobi nọ oniọvo ra o kru owhẹ rọvrẹ riẹ. 4 Ohwo ọvo ọ rẹ jọ oyogbe evaọ udevie rai hi, keme Jihova ọ te ghale owhai hrọ+ evaọ ẹkwotọ nọ Jihova Ọghẹnẹ rai ọ be kẹ owhai rehọ re wha rọ reuku na, 5 thakpinọ wha yoẹme kẹ Jihova Ọghẹnẹ rai evaọ oware kpobi, re wha romatotọ koko izi nana kpobi nọ mẹ be kẹ owhai nẹnẹ na.+ 6 Keme Jihova Ọghẹnẹ rai ọ te ghale owhai nwane wọhọ epanọ ọ ya eyaa riẹ kẹ owhai na, wha ve ti momo kẹ erẹwho buobu,* rekọ wha ti momo mi ai hi;+ wha te ta họ erẹwho buobu obọ,* rekọ a te ta họ owhai obọ họ.+

7 “Otẹrọnọ oniọvo ra jọ o zihe ruọ oyogbe evaọ okpẹwho rai jọ evaọ ẹkwotọ nọ Jihova Ọghẹnẹ rai ọ be kẹ owhai na, who ru eva gaga hayo keke obọ kẹ oniọvo ra nọ ọ rrọ oyogbe he.*+ 8 Keme u fo nọ who re rovie obọ ra ru ọghọ kẹe+ jẹ daoma momo oware kpobi* nọ ọ gwọlọ hayo nọ o kare riẹ rọ kẹe. 9 Yọroma re who gbe roro iroro imuomu nana evaọ udu ra ha inọ, ‘Ukpe avọ ihrẹ na, ukpe obusino na o kẹle no,’+ re whọ siọ ọghọ ba eru kẹ oniọvo ra nọ ọ rrọ oyogbe, re whọ se iẹe oware ovo ba ẹkẹ. O te bo se Jihova fiki ra, o te jọ uzioraha kẹ owhẹ.+ 10 Who re ru ọghọ kẹe,+ whọ rẹ kẹe* avọ ẹgo ho, keme oye o te whae ze nọ Jihova Ọghẹnẹ ra ọ te rọ ghale oware kpobi nọ who bi ru gbe oware kpobi nọ whọ rọ obọ te.+ 11 Keme iyogbe e te jọ ẹkwotọ na ẹsikpobi.+ Oyejabọ nọ me bi ro jie uzi kẹ owhai nọ, ‘Wha re rovie obọ rai ru ọghọ kẹ oniọvo rai nọ ọ be reoja, nọ ọ rrọ oyogbe evaọ ẹkwotọ rai.’+

12 “Otẹrọnọ a zẹ oniọvo ra jọ, ọzae hayo aye nọ ọ rrọ ohwo Hibru kẹ owhẹ, yọ ọ gbodibo kẹ owhẹ ikpe ezeza no, evaọ ukpe avọ ihrẹ who re siobọnoi kpo.+ 13 Yọ who te bi siobọnoi kpo, who re siobọnoi kpo ababọ họ. 14 Whọ rẹ jọ uthuru erao ra, oria nọ whọ rẹ jọ si ibi no igbe ekakọ, gbe oria nọ whọ rẹ jọ ru ewhri gbe enwaene rehọ eware jọ ru ei ọghọ ziezi. Nwane epanọ Jihova Ọghẹnẹ ra ọ ghale owhẹ te, ere whọ rẹ kẹe bu te. 15 Kareghẹhọ nọ whọ jọ ọrigbo evaọ ẹkwotọ Ijipti, Jihova Ọghẹnẹ ra ọ tẹ ta owhẹ no obei ze. Oyejabọ nọ me bi ro jie uzi nana kẹ owhẹ nẹnẹ na.

16 “Rekọ ọ tẹ ta kẹ owhẹ nọ, ‘Mẹ gwọlọ nyasiọ owhẹ ba ha!’ fikinọ o you owhẹ gbe ahwo uwou ra, keme ọ be wereva anwẹnọ ọ rọ rrọ kugbe owhẹ na,+ 17 whọ vẹ rehọ ododo ze, whọ vẹ rehọ iẹe duwu ozọ riẹ lafi ẹthẹ, ọ vẹ jọ ọrigbo ra evaọ edẹ uzuazọ riẹ kpobi. Epọvo na who re ru ọrigbo ọmọtẹ ra. 18 Who du roro ho inọ akpọ ọ te bẹ owhẹ nọ who te siobọnoi kpo, keme iruo nọ o ru kẹ owhẹ evaọ ikpe ezeza na i te akuava iruo ohwo nọ a rehọ iruo, yọ Jihova Ọghẹnẹ ra ọ ghale owhẹ evaọ oware kpobi nọ who ru.

19 “Who re fi ọmọ ọsosuọ ọzae ọrọ owa erao ra gbe uthuru erao ra họ akotọ* kẹ Jihova Ọghẹnẹ ra.+ Whọ rẹ rehọ ọmọ ọsosuọ owa erao* ra ru oghẹrẹ iruo ọvo ho, yọ who re bru eto ọmọ ọsosuọ uthuru erao ra ha. 20 Whẹ avọ ahwo uwou ra wha rẹ re iẹe evaọ aro Jihova Ọghẹnẹ ra kukpe kukpe evaọ oria nọ Jihova ọ te salọ.+ 21 Rekọ otẹrọnọ oware jọ o thọ evaọ oma riẹ, ọ tẹ ko, hayo o tuaro, hayo oware ulogbo ofa jọ o jọ oma riẹ thọ, wha rẹ rehọ iẹe dhe idhe kẹ Jihova Ọghẹnẹ rai vievie he.+ 22 Wha rẹ jọ eva ikpewho* rai re iẹe, te ohwo nọ ọ fo te ohwo nọ ọ fo ho, wọhọ ẹsenọ ọ rrọ ugbosu hayo orua.+ 23 Rekọ wha rẹ re azẹ riẹ vievie he;+ wha re ku ei fihọ otọ wọhọ ame.+

16 “Wha ru ekareghẹhọ amara Ebib* na, re wha ru ehaa Ọnyavrẹ na kẹ Jihova Ọghẹnẹ rai,+ keme amara Ebib Jihova Ọghẹnẹ rai ọ rọ rehọ owhai no Ijipti ze evaọ aso.+ 2 Wha re dhe idhe Ọnyavrẹ na kẹ Jihova Ọghẹnẹ rai,+ rono uthuru erao gbe owa erao rai ze,+ evaọ oria nọ Jihova ọ salọ nọ odẹ riẹ o rẹ jọ.+ 3 Wha rẹ rehọ oware ovo nọ u wo ẹvi* rọ re iẹe he;+ edẹ ihrẹ wha rẹ re ebrẹdi nọ ọ kare ẹvi, ebrẹdi oja-oriọ na, keme ugidi wha ro no ẹkwotọ Ijipti ze.+ Wha ru onana re wha rọ kareghẹhọ ẹdẹ nọ wha ro no ẹkwotọ Ijipti ze evaọ edẹ uzuazọ rai kpobi.+ 4 Ukulu nọ u wo ẹvi o rẹ jọ kugbe owhai hi evaọ ẹkwotọ rai kpobi evaọ edẹ ihrẹ,+ yọ arao kpobi nọ wha ro dhe idhe evaọ owọwọ ẹdẹ ọsosuọ na ọ rẹ rria asohẹrioke te ohiohiẹ hẹ.+ 5 A te kẹ owhai uvẹ re wha dhe idhe Ọnyavrẹ na evaọ okpẹwho kpobi nọ u je owhai hi evaọ usu erẹwho nọ Jihova Ọghẹnẹ rai ọ be rọ kẹ owhai na. 6 Rekọ oria nọ Jihova Ọghẹnẹ rai ọ salọ nọ odẹ riẹ o rẹ jọ a re jo ru ei. Wha rẹ rehọ arao idhe Ọnyavrẹ na dhe idhe evaọ owọwọ nọ ọre ọ tẹ nwani kiediwi no,+ evaọ oke* nọ wha ro no Ijipti ze na. 7 Wha rẹ rọ erae ru ei ye jẹ re iẹe+ evaọ oria nọ Jihova Ọghẹnẹ rai ọ te salọ,+ evaọ ohiohiẹ wha ve zihe kpohọ iwou-udhu rai. 8 Edẹ ezeza wha rẹ re ebrẹdi nọ ọ kare ẹvi, ẹdẹ avọ ihrẹ wha ve ru okokohọ urirẹ kẹ Jihova Ọghẹnẹ rai. Wha re ru iruo evuevo vievie he.+

9 “Wha re kele ekpoka ihrẹ. Wha re mu ekpoka ihrẹ na họ ekele no okenọ wha ro mu ojale họ ero bru ekakọ rai nọ e rrọ obọ ẹwọ.+ 10 Kẹsena wha ve ru Ehaa Ekpoka na kẹ Jihova Ọghẹnẹ rai,+ avọ okẹ unevaze rai nọ wha rọ ze, nọ wha rẹ rọ kẹ okẹ wọhọ epanọ Jihova Ọghẹnẹ rai ọ ghale owhai te.+ 11 Yọ wha rẹ ghọghọ evaọ aro Jihova Ọghẹnẹ rai, te owhẹ te ọmọzae ra, ọmọtẹ ra, ọrigbo ọzae ra, ọrigbo aye ra, ahwo Livae nọ a rrọ eva ikpewho* rai, ọrara, ọmọ nọ o wo ọsẹ hẹ,* gbe aye-uku, enọ e be rria udevie rai, evaọ oria nọ Jihova Ọghẹnẹ rai ọ salọ nọ odẹ riẹ o rẹ jọ.+ 12 Wha kareghẹhọ nọ wha jọ erigbo evaọ obọ Ijipti,+ re wha koko je ru lele ijaje nana.

13 “Wha re ru Ehaa Iwou-Owhre*+ na edẹ ihrẹ nọ wha te bi koko eware rai họ no oria nọ wha rẹ jọ si ibi no igbe ekakọ ze, je no oria nọ wha rẹ jọ ru ewhri gbe enwaene ze. 14 Wha ghọghọ evaọ etoke ehaa rai,+ te owhẹ te ọmọzae ra, ọmọtẹ ra, ọrigbo ọzae ra, ọrigbo aye ra, ohwo Livae, ọrara, ọmọ nọ o wo ọsẹ hẹ, gbe aye-uku, enọ e be rria eva ikpewho rai. 15 Edẹ ihrẹ wha re ru ehaa+ na kẹ Jihova Ọghẹnẹ rai evaọ oria nọ Jihova ọ salọ, keme Jihova Ọghẹnẹ rai ọ te ghale ekakọ rai kpobi gbe oware kpobi nọ wha bi ru,+ kọ evawere ọvo wha ti wo.+

16 “Isiasa ẹgbukpe ezae rai kpobi a rẹ nyaziọ aro Jihova Ọghẹnẹ rai evaọ oria nọ ọ salọ: evaọ etoke Ehaa Ebrẹdi nọ Ọ Kare Ẹvi+ na, Ehaa Ekpoka+ na, gbe Ehaa Iwou-Owhre*+ na, yọ ohwo ọvo ọ rẹ nya ababọ ziọ aro Jihova ha. 17 Okẹ nọ omomọvo ọ rẹ kẹ o rẹ jọ wọhọ epanọ Jihova Ọghẹnẹ rai ọ ghale riẹ te.+

18 “Wha rẹ rọ ibruoziẹ+ gbe iletu mu kẹ orua kpobi evaọ ikpewho* kpobi nọ Jihova Ọghẹnẹ rai ọ be rọ kẹ owhai na, yọ a re guẹdhọ je bruoziẹ nọ o kiẹrẹe kẹ ahwo na hrọ. 19 Wha rẹ vẹ ẹdhọ tu vievie he,+ hayo dhesẹ ọriẹwẹ hẹ,+ hayo re udi hi, keme udioriọ u re tu ohwo nọ o wo areghẹ aro+ je ru ohwo okiẹrẹe jẹlẹ ẹme. 20 Uvioziẹ! Uvioziẹ ọvo wha re bru,*+ re wha ruẹse gbẹ jọ uzuazọ jẹ rehọ ẹkwotọ nọ Jihova Ọghẹnẹ rai ọ be rọ kẹ owhai na.

21 “Wha rẹ kọ oghẹrẹ ure ovuovo nọ o rẹ jọ ọkpọ ọrẹri*+ kẹle agbada-idhe Jihova Ọghẹnẹ rai hi.

22 “Yọ wha rẹ rọ ipila ọrẹri vi hi,+ oware nọ Jihova Ọghẹnẹ rai o mukpahe.

17 “Wha rẹ rọ eruẹ hayo ogodẹ nọ o wo oka, hayo nọ oware jọ o thọ evaọ oma riẹ ro dhe idhe kẹ Jihova Ọghẹnẹ rai vievie he, keme o te tọtọ Jihova Ọghẹnẹ rai oma.+

2 “Otẹrọnọ a jọ evaọ usu ikpewho nọ Jihova Ọghẹnẹ rai ọ be rọ kẹ owhai na ruẹ ọzae hayo aye jọ evaọ udevie rai nọ o bi ru oware nọ u yoma evaọ aro Jihova Ọghẹnẹ rai jẹ be raha ọvọ riẹ,+ 3 ọ tẹ nyathọ be gọ eghẹnẹ efa je bi guzou kpotọ kẹ ae, hayo rọkẹ ọre na, hayo ọvẹre na, hayo ogbaẹmo obọ idhiwu na kpobi,+ oware nana yọ onọ me jie uzi riẹ hẹ.+ 4 Nọ a tẹ vuẹ owhai kpahe iẹe hayo nọ wha te yo kpahe iẹe, wha rẹ romatotọ kiẹ otọ ẹme na. A tẹ ruẹ nọ ginọ uzẹme+ nọ a ru oware otọtọ nana evaọ Izrẹl, 5 wha rẹ rehọ ọzae hayo aye nọ o ru umuomu yena kpobọ unuẹthẹ okpẹwho na hrọ, yọ a rẹ rọ itho fi ọzae hayo aye na kpe hrọ.+ 6 Isẹri* imava hayo orọ imasa+ a re ro kpe ohwo nọ o gwọlọ nọ a re kpe. A re kpei fiki isẹri omọvo vievie he.+ 7 Enọ i se isẹri na họ enọ e rẹ kake rọ itho fi ei, nọ a te bi ti kpei, kẹsena ahwo na kpobi a vẹ rọ itho fi ei. Wha re si oware uyoma no udevie rai hrọ.+

8 “Otẹrọnọ ẹdhọ jọ ọ riẹ nọ ọ ga hrọ kẹ owhai evaọ okpẹwho rai jọ, te ọ rrọ ẹdhọ ohwo nọ a kpe+ hayo ẹdhọ nọ a tu ohwo jọ, hayo ozighi jọ nọ a ru hayo eme edhọ efa jọ, wha rẹ kpama wha ve kpohọ oria nọ Jihova Ọghẹnẹ rai ọ salọ.+ 9 Wha nyabru izerẹ nọ e rrọ ahwo Livae na gbe ohwo nọ ọ rrọ obruoziẹ+ evaọ oke yena, wha vẹ nọ kpahe ẹme na, a vẹ ta oghẹrẹ nọ a re ru ei* kẹ owhai.+ 10 Kẹsena kọ oware nọ a ta kẹ owhai evaọ oria nọ Jihova ọ salọ na wha re ru. Wha rẹ ruẹ nọ wha romatotọ ru lele oware kpobi nọ a ta kẹ owhai. 11 Wha re ru lele uzi nọ a dhesẹ kẹ owhai gbe oghẹrẹ nọ a vuẹ owhai nọ a re bruoziẹ na hrọ.+ Wha nyasiọ oware nọ a te ta kẹ owhai na ba ha, re wha kpohọ obọze hayo ẹkpẹlobọ.+ 12 Ohwo nọ o dhesẹ omorro nọ ọ ghẹmeeyo kẹ oware nọ ozerẹ nọ ọ be gbodibo kẹ Jihova Ọghẹnẹ rai hayo obruoziẹ na ọ ta o re whu hrọ.+ Wha re si oware uyoma no Izrẹl hrọ.+ 13 Ahwo na kpobi a ve ti yo, ozọ u ve ti mu ai, a gbe dhesẹ omorro ofa ha.+

14 “Wha tẹ ruọ eva ẹkwotọ nọ Jihova Ọghẹnẹ rai ọ be rọ kẹ owhai na no, nọ wha jẹ rehọ iẹe no, je mu ei họ ẹria no, wha jẹ ta nọ, ‘Joma rọ ovie mu nọ o re su omai wọhọ erẹwho kpobi nọ e wariẹ omai họ na,’+ 15 o tẹ via ere, ovie nọ Jihova Ọghẹnẹ rai ọ salọ ọvo wha re ro mu.+ Omọvo inievo rai wha re ro mu ovie. Oware aghọ o rrọ re wha rehọ ohwo orẹwho ọfa nọ ọ rrọ oniọvo rai hi mu ovie. 16 Rekọ, o re wo enyenya buobu kẹ omariẹ hẹ,+ hayo ru ahwo na zihe kpobọ Ijipti hi re a rehọ enyenya efa ze,+ keme Jihova ọ ta kẹ owhai nọ, ‘Wha re zihe vievie he.’* 17 Yọ o re wo eyae buobu hu, re udu riẹ u gbe su ei thọ họ;+ yọ o re koko isiliva gbe igoru buobu họ kẹ omariẹ gbe he.+ 18 Nọ ọ tẹ keria agbara-esuo uvie riẹ no, o re kere Uzi na fihọ obe* kẹ omariẹ hrọ, o re kere iei no onọ o rrọ obọ izerẹ nọ e rrọ ahwo Livae na ze.+

19 “O rẹ jariẹ obọ, yọ o re sei evaọ edẹ uzuazọ riẹ kpobi hrọ,+ re o wuhrẹ epanọ ọ rẹ rọ dhozọ Jihova Ọghẹnẹ riẹ je ru lele eme kpobi nọ e rrọ Uzi nana gbe ijaje nana.+ 20 Udu riẹ u gbe ru ei wọ oma kpehru vi inievo riẹ hẹ, ọ gbẹ nyasiọ uzi na ba kpohọ obọze hayo ẹkpẹlobọ họ, re ọ ruẹsi su uvie riẹ tọ, tei te emezae riẹ evaọ Izrẹl.

18 “Izerẹ nọ e rrọ ahwo Livae na avọ ahwo orua Livae soso, a te kẹ ae ẹkẹ hayo ukuoriọ họ evaọ Izrẹl. Ekẹ nọ a re ro dhe idhe nọ a rẹ rọ erae mahe kẹ Jihova na a te jọ re, enana họ ukuoriọ rai.*+ 2 Fiki onana a re wo ukuoriọ ovuọvo ho evaọ udevie inievo rai. Jihova họ ukuoriọ rai, nwane wọhọ epanọ ọ ta kẹ ae no vẹre na.

3 “Whaọ enana họ eware nọ ahwo na a rẹ kẹ izerẹ na: Ohwo kpobi nọ o bi dhe idhe, te orọ eruẹ ọzae hayo ogodẹ, ọ rẹ rehọ akpalobọ na, agba na, gbe omokpa na kẹ ozerẹ na. 4 Wha rẹ rehọ ibi ọsosuọ ibi ekakọ rai, enwaene ọkpokpọ rai, ewhri rai, gbe iwhulu ọsosuọ rai nọ wha ru no eto uthuru erao rai ze rọ kẹe.+ 5 Jihova Ọghẹnẹ rai ọ salọ e riẹ avọ emezae riẹ no erua rai kpobi ze re a gbodibo evaọ odẹ Jihova ẹsikpobi.+

6 “Rekọ otẹrọnọ ohwo Livae jọ o no okpẹwho rai jọ nọ ọ jẹ rria evaọ Izrẹl,+ ọ* jẹ gwọlọ nọ o re kpohọ oria nọ Jihova ọ salọ,*+ 7 ọ sae jọ etẹe gbodibo evaọ odẹ Jihova Ọghẹnẹ riẹ wọhọ inievo riẹ nọ i kiọkọ kpobi nọ e rrọ ahwo Livae na, enọ e rrọ etẹe evaọ aro Jihova.+ 8 O re lele ai ghale emu ẹrẹrẹe,+ fiba ugho nọ o wo nọ ọ zẹ eware esẹ-esẹ riẹ.

9 “Nọ wha tẹ ruọ eva ẹkwotọ nọ Jihova Ọghẹnẹ rai ọ be rọ kẹ owhai na no, wha rẹ rọ aro kele iruẹru etọtọ erẹwho yena vievie he.+ 10 A rẹ jọ udevie rai ruẹ ohwo ọvo vievie he nọ ọ rẹ mahe ọmọzae riẹ hayo ọmọtẹ riẹ evaọ erae ro dhe idhe,*+ ohwo kpobi nọ ọ rẹ gbẹva,+ ohwo kpobi nọ o re ru emajiki,+ ohwo kpobi nọ ọ rẹ gwọlọ oka oware nọ o te via,+ ọbo-ẹva,*+ 11 ohwo kpobi nọ ọ rẹ nua amọfa, ohwo kpobi nọ ọ rẹ nekpẹ mi ohwo nọ o re lele izi ta ẹme+ hayo ọgbẹva,*+ hayo ohwo kpobi nọ ọ rẹ nekpẹ mi enọ i whu no.+ 12 Keme ohwo kpobi nọ o bi ru eware enana ọ rẹ tọtọ Jihova oma, yọ fiki iruẹru etọtọ nana Jihova Ọghẹnẹ rai o bi ro le ai no kẹ owhai na. 13 Wha rẹ jọ ahwo nọ e kare afuẹwẹ evaọ aro Jihova Ọghẹnẹ rai.+

14 “Keme erẹwho nana nọ wha be rehọ ẹkwotọ rai na a jẹ hae gaviezọ kẹ ahwo nọ a re ru emajiki+ jẹ gbẹva,+ rekọ Jihova Ọghẹnẹ rai ọ kẹ owhai uvẹ nọ wha ru oware utioye na ovuovo ho. 15 Jihova Ọghẹnẹ rai ọ te jọ udevie inievo rai rọ ọruẹaro nọ ọ wọhọ omẹ ro mu kẹ owhai. Wha rẹ gaviezọ kẹe hrọ.+ 16 Onana o rrọ ere fiki oware nọ whọ yare Jihova Ọghẹnẹ ra evaọ obọ Horẹb evaọ ẹdẹ nọ ogbotu* na o ro kokohọ,+ nọ whọ rọ ta nọ, ‘Whọ jọ omẹ yo urru Jihova Ọghẹnẹ mẹ hẹ hayo ruẹ erae egaga nana ofa ha, re mẹ seba ewhu.’+ 17 Jihova ọ tẹ ta kẹ omẹ nọ, ‘Oware nọ a ta na u kiehọ. 18 Mẹ te jọ udevie inievo rai rọ ọruẹaro nọ ọ wọhọ owhẹ ro mu kẹ ae,+ yọ me ti fi eme mẹ họ iẹe unu,+ ọ vẹ te vuẹ ae eware kpobi nọ mẹ ta kẹe.*+ 19 Evaọ uzẹme, ohwo nọ ọ gaviezọ kẹ eme mẹ nọ ọ te rehọ odẹ mẹ ta ha, mẹ te rehọ iẹe guẹdhọ.+

20 “‘Otẹrọnọ ọruẹaro jọ ọ rọ omovia rehọ odẹ mẹ ta ẹme jọ nọ me vi rie nọ ọ ta ha hayo ọ rehọ odẹ eghẹnẹ efa ta ẹme, ọruẹaro yena o re whu hrọ.+ 21 Rekọ, ẹsejọhọ wha rẹ te jọ udu rai ta nọ: “Kọ ẹvẹ ma te rọ riẹ nọ Jihova họ ọnọ ọ ta ẹme na ha?” 22 Nọ ọruẹaro na ọ tẹ rọ odẹ Jihova ta ẹme nọ ẹme na o gbe rugba ha, hayo oware na o gbẹ via ha, u dhesẹ nọ Jihova họ ọnọ ọ ta ẹme ọyena ha. Omovia oye ọruẹaro na ọ rọ ta ẹme na. Wha rẹ dhozọ riẹ hẹ.’

19 “Nọ Jihova Ọghẹnẹ rai ọ tẹ raha erẹwho nọ Jihova Ọghẹnẹ rai ọ be rọ ẹkwotọ rai kẹ owhai na no, nọ wha je mi ai ẹkwotọ rai je mu ikpewho rai gbe iwou rai họ ẹria no,+ 2 wha rẹ salọ ikpewho esa evaọ ẹkwotọ rai nọ Jihova Ọghẹnẹ rai ọ be rọ kẹ owhai rehọ na.+ 3 Wha rẹ ghale ẹkwotọ nọ Jihova Ọghẹnẹ rai ọ be rọ kẹ owhai rehọ na kpohọ abasa, yọ wha rẹ ruẹrẹ idhere na họ re ohwo kpobi nọ o kpe ohwo ọ vẹ dhẹ kpohọ okpẹwho jọ evaọ usu rai.

4 “Whaọ enẹ o rẹ jọ: Ohwo nọ o kpe ohwo ọ rẹ sae dhẹ kpohọ etẹe re ọ ruẹse jọ uzuazọ. Otẹrọnọ ọ rọ ethobọ kpe ọrivẹ riẹ, yọ orọnikọ o mukpahe iẹe vẹre he;+ 5 wọhọ oriruo nọ tei te ọrivẹ riẹ a te kpobọ ẹwọ nyai hwe ire ọ jẹ kpare obọ riẹ re ọ rehọ ewhe ko ure, rekọ uzou ewhe na o jẹ la no udhe ewhe na nyai kie fihọ ọrivẹ riẹ o te whu, ohwo nọ o kpe ohwo na ọ rẹ dhẹ kpohọ okpẹwho jọ evaọ usu ikpewho nana nyae rria.+ 6 O gbẹ rrọ ere he, ọnọ ọ be gwọlọ kioja azẹ+ na ọ rẹ sae rọ ofu* mu ohwo nọ o kpe ohwo na họ ele, o ve lei mu je kpei no, fikinọ obonọ okpẹwho na o rrọ u thabọ hrọ. Rekọ u fo nọ o re whu hu, nọ orọnọ o mukpahe ọrivẹ riẹ vẹre he na.+ 7 Oyejabọ nọ me bi ro jie uzi kẹ owhai nọ: ‘Wha salọ ikpewho esa.’

8 “Otẹrọnọ Jihova Ọghẹnẹ rai o ru ẹkwotọ rai rro wọhọ epanọ o duwu iyei riẹ rọkẹ esẹ-esẹ rai,+ nọ ọ jẹ kẹ owhai ẹkwotọ nọ ọ ya eyaa inọ ọ te kẹ esẹ-esẹ rai na no,+ 9 thakpinọ wha romatotọ koko izi nana kpobi nọ me bi jie kẹ owhai nẹnẹ na, re wha you Jihova Ọghẹnẹ rai jẹ nya evaọ idhere riẹ ẹsikpobi,+ kẹsena wha ve fi ikpewho esa efa ba esa nana.+ 10 Nọ wha te ru enẹ, a gbe kpe azẹ ekueku hu+ evaọ ẹkwotọ rai nọ Jihova Ọghẹnẹ rai ọ be rọ kẹ owhai re wha rọ reuku na, abe-ọriọ azẹ ọvuọvo ọ gbẹ jọ owhai uzou hu.+

11 “Rekọ otẹrọnọ ohwo o mukpahe ọrivẹ riẹ+ nọ ọ jẹ be hẹrẹ iẹe re ọ họre iẹe, nọ ọ jẹ nwae* oma gaga, o je whu, ohwo na ọ tẹ dhẹ kpohọ okpẹwho nana jọ, 12 ekpako okpẹwho riẹ a re sei no obei* ze a vẹ rehọ iẹe họ obọ ọnọ ọ be gwọlọ kioja azẹ na, o re whu hrọ.+ 13 Wha rẹ re ohrọ riẹ hẹ,* wha re si abe-ọriọ azẹ ekueku no Izrẹl,+ re u woma kẹ owhai.

14 “Nọ a tẹ kẹ owhẹ ukuoriọ ra no evaọ ẹkwotọ nọ Jihova Ọghẹnẹ rai ọ be rọ kẹ owhai rehọ na, who re fowo oka uwhru+ ọrivẹ ra no oria nọ esẹ-esẹ rai a fi iwhru na họ vievie he.

15 “A rẹ rehọ fiki isẹri omọvo brukpe* ohwo ho evaọ oruthọ jọ hayo uzi jọ kpobi nọ ohwo ọ raha.+ Isẹri* imava hayo isẹri imasa a re ro vuhu uzẹme oware nọ o via.+ 16 Otẹrọnọ osẹri omuomu o se isẹri kpe ohwo jọ inọ ọ raha uzi jọ,+ 17 imava nọ i wo ẹme na a re dikihẹ aro Jihova, aro izerẹ na gbe ahwo nọ a rrọ ibruoziẹ evaọ oke yena.+ 18 Ibruoziẹ na a rẹ romatotọ kiẹ otọ ẹme na,+ yọ otẹrọnọ ohwo nọ o se isẹri na yọ osẹri ọrue, yọ ọ wọ eku họ oniọvo riẹ uzou, 19 wha re ru ei oware nọ ọ ma omaa riẹ nọ o re ru oniọvo riẹ na dẹẹ,+ wha re si oware uyoma no udevie rai hrọ.+ 20 Ahwo nọ a kiọkọ a ve ti yo, ozọ u ve ti mu ai, a gbe ru oware uyoma utioye ofa vievie he evaọ udevie rai.+ 21 Wha rẹ re ohrọ riẹ hẹ:*+ A rẹ rehọ uzuazọ* hwosa uzuazọ,* ubiẹro rọkẹ ubiẹro, ubiakọ rọkẹ ubiakọ, obọ rọkẹ obọ, owọ rọkẹ owọ.+

20 “Otẹrọnọ wha wọ ẹmo bru ewegrẹ rai wha jẹ ruẹ nọ enyenya gbe ekẹkẹ gbe egbaẹmo ewegrẹ rai i bu vi erai, jọ ozọ rai u mu owhai hi, keme Jihova Ọghẹnẹ rai nọ ọ rehọ owhai no ẹkwotọ Ijipti ze ọ rrọ kugbe owhai.+ 2 Nọ wha te bi ti kpohọ ẹmo, ozerẹ na ọ rẹ nyaze ọ vẹ ta ẹme kẹ ahwo na.+ 3 Ọ rẹ ta kẹ ae nọ, ‘Wha gaviezọ, O Izrẹl, wha be te nyai fi ewegrẹ rai ẹmo. Jọ udu u bru owhai hi. Jọ ozọ u mu owhai hi, wha guegue he, hayo nuhu fiki rai hi, 4 keme Jihova Ọghẹnẹ rai o bi lele owhai re ọ họre ewegrẹ rai kẹ owhai, re o siwi owhai.’+

5 “Iletu na omarai a rẹ ta kẹ ahwo na nọ, ‘Ono ọ bọ uwou okpokpọ nọ o ri rovie iei hi? Jọ o zihe kpobọ uwou riẹ. O gbẹ rrọ ere he, ọ sai whu evaọ ẹmo na omọfa o ve rovie uwou na. 6 Kọ ono ọ kọ ọgbọ evaene nọ o ri mu ibi riẹ họ ẹkọrọ họ? Jọ o zihe kpobọ uwou riẹ. O gbẹ rrọ ere he, ọ sai whu evaọ ẹmo na omọfa o ve mu ibi riẹ họ ẹkọrọ. 7 Kọ ono ọ sa aye họ otọ nọ ọ re rehọ aye na ha? Jọ o zihe kpobọ uwou riẹ.+ O gbẹ rrọ ere he, ọ sai whu evaọ ẹmo na omọfa ọ vẹ rehọ aye na.’ 8 Iletu na a rẹ jẹ nọ ahwo na nọ, ‘Ono ozọ u bi mu nọ o bi bru udu?+ Jọ o zihe kpobọ uwou riẹ, re o gbe ru udu no inievo riẹ awọ họ wọhọ epanọ o rrọ kẹe na.’*+ 9 Nọ iletu na a tẹ ta ẹme kẹ ahwo na no, a rẹ jọ usu egbaẹmo na rehọ iletu mu re i su ahwo na.

10 “Nọ wha te bi kẹle okpẹwho re wha lele iei họre, wha re woro kẹ okpẹwho na oware nọ a re ru re a ru udhedhẹ kugbe owhai.+ 11 Otẹrọnọ uyo nọ a kẹ owhai u dhesẹ nọ a gwọlọ udhedhẹ, nọ a je rovie kẹ owhai, ahwo kpobi nọ a rrọ eva riẹ a re zihe ruọ ahwo rai nọ wha re ro ru iruo ọgbahọ, a vẹ gbodibo kẹ owhai.+ 12 Rekọ a gbẹ rọwo nọ a re lele owhai ru udhedhẹ hẹ, nọ a jẹ wọ ẹmo nọ a re lele owhai họre, wha re ko ai họ, 13 Jihova Ọghẹnẹ rai ọ te rehọ okpẹwho na họ obọ rai hrọ, yọ wha rẹ rọ ọgbọdọ kpe ọzae kpobi nọ ọ rrọ eva riẹ no hrọ. 14 Rekọ, eyae na, emọ na, erao na, gbe oware kpobi nọ o rrọ eva okpẹwho na, eware riẹ kpobi, wha rẹ kwa ae rehọ kẹ omarai,+ wha vẹ re eware ewegrẹ rai nọ Jihova Ọghẹnẹ rai ọ rọ kẹ owhai.+

15 “Ere wha re ru ikpewho kpobi nọ i thabọ gaga no owhai nọ e rrọ ikpewho erẹwho nọ e kẹle owhai na ha. 16 Rekọ evaọ ikpewho ahwo nana nọ Jihova Ọghẹnẹ rai ọ be rọ kẹ owhai re wha rọ reuku na, wha rẹ siọ oware ovuovo nọ o be wẹ ba uzuazọ họ.+ 17 Ukpoye, wha rẹ raha ae muotọ, ahwo Hit, ahwo Amọ, ahwo Kenan, ahwo Pẹriz, ahwo Hiv, gbe ahwo Jebus,+ nwane wọhọ epanọ Jihova Ọghẹnẹ rai o jie uzi kẹ owhai na; 18 re a gbe wuhrẹ owhai re wha ru iruẹru etọtọ rai kpobi nọ a ru kẹ eghẹnẹ rai hi, nọ o rẹ lẹliẹ owhai raha uzi wọso Jihova Ọghẹnẹ rai.+

19 “Wha te ko okpẹwho jọ họ edẹ buobu jẹ be họre iẹe re wha ruẹse rehọ iẹe, wha rẹ raha ire riẹ hẹ re wha rọ ewhe ko ai no. Wha sae re ibi rai, rekọ wha re ko ai fihọ otọ họ.+ Kọ wha rẹ họre ure oghẹrẹ nọ wha re lele ohwo-akpọ họre?* 20 Ure nọ wha riẹ nọ a rẹ re he ọvo wha re ko fihọ otọ. Wha sai koi fihọ otọ jẹ rehọ iẹe bọ eware nọ a re ro ko okpẹwho nọ o bi lele owhai fi ẹmo na họ, bẹsenọ wha re fi ei kparobọ.

21 “Nọ a tẹ ruẹ ohwo nọ a kpe fihọ obọ ẹwọ evaọ ẹkwotọ nọ Jihova Ọghẹnẹ rai ọ be rọ kẹ owhai re wha rehọ na, yọ a riẹ ohwo nọ o kpe rie he, 2 ekpako rai avọ ibruoziẹ rai+ a rẹ nyae ma otọ na no oria nọ ohwo na o whu fihọ na rite ikpewho nọ e wariẹ e riẹ họ. 3 Kẹsena ekpako okpẹwho nọ o mae kẹle ori na a vẹ jọ owa erao rehọ eruẹ aye nọ a ri ro ru iruo ẹdẹvo ho, ọnọ a ri fi owhowha họ ro si oware ovo ho, 4 ekpako okpẹwho yena a ve su eruẹ aye na kpohọ ukiekpotọ* nọ ame o bi jo su nọ a ri kporo hayo kọ ibi fihọ họ, a vẹ jọ ukiekpotọ na fa eruẹ aye na uriohọ wiri.*+

5 “Izerẹ na, ahwo Livae, a vẹ nyaze keme Jihova Ọghẹnẹ rai ọ salọ e rai re a gbodibo kẹe,+ re a rọ odẹ Jihova lẹ ẹro eghale.+ A rẹ ta oghẹrẹ nọ a re ro ku ẹme kpobi nọ o kiekpahe oware ozighi họ.+ 6 Kẹsena ekpako kpobi nọ e rrọ okpẹwho nọ o mae kẹle ori na a vẹ wozẹ abọ rai+ fihọ eruẹ aye nọ a jọ ukiekpotọ wiri uriohọ riẹ na, 7 a ve whowho nọ, ‘Mai ma kpe* azẹ nana ha, yọ ibiaro mai e ruẹ e riẹ nọ a je kpei hi. 8 Who kele onana kẹ ahwo ra Izrẹl he, enọ whọ ta no,+ O Jihova, whọ jọ abe-ọriọ azẹ ekueku ọ jọ uzou ahwo ra Izrẹl he.’+ Onana u ve ti ru nọ a gbe kele abe-ọriọ azẹ na kẹ ae he. 9 Enẹ wha re ro si abe-ọriọ azẹ ekueku no udevie rai nọ wha te bi ru oware nọ u kiehọ evaọ aro Jihova.

10 “Nọ wha tẹ wọ ẹmo bru ewegrẹ rai nọ Jihova Ọghẹnẹ rai o je fi ai kparobọ kẹ owhai nọ wha je mu ai kpohọ igbo,+ 11 whọ jẹ jọ udevie enọ wha mu rehọ na ruẹ aye nọ o wo erru nọ o si owhẹ urru, whọ jẹ gwọlọ nọ whọ rẹ rehọ iẹe re ọ jọ aye ra, 12 whọ sae rehọ iẹe ziọ uwou ra. Ọ vẹ nware eto uzou riẹ no jẹ rẹrote ikpituabọ gbe ikpituawọ riẹ, 13 o ve si iwu nọ a ro mu ei ziọ igbo na no, ọ vẹ rria uwou ra. O ve weri ọsẹ riẹ gbe oni riẹ amara soso,+ kẹsena who ve lele iei wezẹ; who ve zihe ruọ ọzae riẹ o ve zihe ruọ aye ra. 14 Rekọ otẹrọnọ ọ were owhẹ hẹ, who re siobọnoi+ re o kpohọ obonọ o were riẹ* kpobi. Rekọ whọ rẹ zẹe ro wo ugho hayo lahiẹe he, keme who si ọghọ noi oma no.

15 “Otẹrọnọ ọzae o wo eyae ivẹ nọ o je you ọjọ vi ọdekọ,* yọ aimava a yẹ emezae kẹe, yọ ọnọ o you hu na ọye o yẹ ọmọzae ọsosuọ na,+ 16 evaọ ẹdẹ nọ ọ be ghale uku riẹ kẹ emezae riẹ, o wo udu nọ ọ rẹ rọ rehọ ọmọzae aye nọ o you na inọ ọye họ ọmọ ọsosuọ riẹ hẹ re ọ rehọ iẹe nwene ẹta ọmọzae aye nọ o you hu na nọ ọ rrọ ọmọ ọsosuọ na. 17 O re dhesẹ nọ o vuhumu nọ ọmọzae aye nọ o you hu na họ ọmọzae ọsosuọ riẹ, ọ vẹ rehọ abava eware kpobi nọ o wo kẹe, keme ọye họ ọmọ nọ o ro mu eyẹ họ.* Ọye o wo ọkwa ọmọ ọsosuọ na.+

18 “Otẹrọnọ ọzae o wo ọmọ* nọ o wo udu ogaga jẹ be kpareso, yọ o bi yoẹme kẹ ọsẹ riẹ gbe oni riẹ hẹ,+ yọ a daoma kpọe họ bẹ no rekọ ọ be rọwo gaviezọ kẹ ae he,+ 19 ọsẹ riẹ gbe oni riẹ a re kru rie lahwe a vẹ rehọ iẹe se ekpako na evaọ obọ unuẹthẹ okpẹwho riẹ, 20 a vẹ ta kẹ ekpako okpẹwho riẹ nọ, ‘Ọmọ mai nana o wo udu ogaga yọ ọ be kpareso, ọ be rọwo yoẹme kẹ omai hi. Ọgba-ore+ gbe ọgba-udi ọ rrọ.’+ 21 Kẹsena ahwo okpẹwho riẹ kpobi a vẹ rehọ itho fi ei kpe. Wha vẹ rọ ere si oware uyoma no udevie rai, ahwo Izrẹl kpobi a ve ti yo, ozọ u ve ti mu ai.+

22 “Otẹrọnọ ohwo ọ raha uzi nọ a re ro bruoziẹ uwhu kpei,+ nọ wha je kpei jẹ kare iẹe fihọ ehru ure,+ 23 ori riẹ ọ rẹ jọ ehru ure na asohẹrioke he.+ Ukpoye, wha rẹ ruẹ nọ wha ki rie evaọ ẹdẹ yena, keme ohwo nọ a kare fihọ ure yọ ọnọ Ọghẹnẹ ọ bọwo ehao,*+ wha re zue otọ nọ Jihova Ọghẹnẹ rai ọ be rọ kẹ owhai re wha rọ reuku na ha.+

22 “Otẹrọnọ whọ ruẹ eruẹ* hayo ogodẹ oniọvo ra nọ o bi ghoro vrẹ, who re keke aro fihọ nyase iẹe ba ha.+ Whọ rẹ ruẹ nọ who su rie zihe bru oniọvo ra. 2 Rekọ otẹrọnọ oniọvo ra ọ be rria kẹle owhẹ hẹ hayo whọ riẹ riẹ hẹ, who re su arao na kpohọ obọ uwou ra, ọ vẹ jọ kugbe owhẹ bẹsenọ oniọvo ra ọ rẹ gwọlọ iẹe.+ Kẹsena who ve zihe iei kẹe. 3 Ere ọvona who re ru eketekete riẹ, ewu riẹ, hayo oware oniọvo ra kpobi nọ u vru nọ whọ ruẹ. Whọ rẹ nyase iẹe ba vievie he.

4 “Nọ whọ tẹ ruẹ eketekete oniọvo ra hayo eruẹ riẹ nọ o kie fihọ otọ evaọ edhere, who re keke aro fihọ nyase iẹe ba vievie he. Whọ rẹ ruẹ nọ who fiobọhọ kẹe kpare arao na.+

5 “Aye o re ku ewu ọzae họ vievie he, yọ ọzae o re ku ewu aye họ vievie he. Keme ohwo kpobi nọ o bi ru ere, ọ rẹ tọtọ Jihova Ọghẹnẹ rai oma.

6 “Whọ tẹ nyaku uwou ọvra evaọ edhere nọ emọ hayo ike e rrọ eva, te ọ rrọ ehru ure hayo otọ, yọ oni na ọ rrọ ehru emọ na hayo ike na, who re mu oni na kugbe emọ riẹ vievie he.+ 7 Whọ rẹ ruẹ nọ who siobọno oni na vrẹ, rekọ whọ sae rehọ emọ na kẹ omara. Enẹ who re ru re o ruẹsi woma kẹ owhẹ re whọ jẹ rria tọ.

8 “Nọ whọ tẹ bọ uwou okpokpọ, whọ rẹ ma ogbẹ wariẹ ehru uwou na họ hrọ,+ re who gbe ru nọ abe-ọriọ azẹ ọ rẹ rọ jọ uwou ra ha keme ohwo ọ rẹ sai kie no obei ze.*

9 “Whọ rẹ rọ oghẹrẹ ibi ekakọ ivẹ kọ ọgbọ evaene ra vievie he.+ O gbẹ rrọ ere he, oware kpobi nọ who vu no ibi nọ whọ kọ na ze, te onọ who wo no ibi evaene na ze e vẹ te jọ rọkẹ oria aruẹri na.

10 “Who re thuru eruẹ ọzae avọ eketekete kugbe ro kporo udhu vievie he.+

11 “Who re ku ewu nọ a rehọ ilulu iwhulu avọ erọ ehọ-elọlọhọ ru họ vievie he.+

12 “Who re ru ikru efọlefọ họ ibiezọ ene ewu nọ who re ku họ.+

13 “Nọ ọzae o te wo aye nọ o je lele aye na wezẹ kẹsena o je mukpahe iẹe,* 14 ọ jẹ ta nọ aye na o ru oware otọtọ, o je mu ekpehre odẹ kẹe nọ: ‘Mẹ rehọ aye nana, rekọ nọ me lele iei wezẹ, mẹ ruẹ oware ovo* nọ u dhesẹ nọ ọ jọ ọmọtẹ-kọkọ họ,’ 15 ọsẹ ọmọtẹ na avọ oni riẹ a rẹ rehọ oware* nọ u re dhesẹ nọ ọmọtẹ na ọmọtẹ-kọkọ ze, a vẹ rehọ iẹe se ekpako na evaọ obọ unuẹthẹ okpẹwho na. 16 Ọsẹ ọmọtẹ na ọ rẹ ta kẹ ekpako na nọ, ‘Mẹ rehọ ọmọtẹ mẹ kẹ ọzae nana re ọ jọ aye riẹ, rekọ o mukpahe iẹe* 17 ọ tẹ be wọ eku họ iẹe uzou inọ o ru oware otọtọ, be ta nọ: “Mẹ ruẹ oware ovo nọ u dhesẹ nọ ọmọtẹ ra ọmọtẹ-kọkọ họ.” Whaọ oware nọ u dhesẹ nọ ọmọtẹ mẹ ọmọtẹ-kọkọ ona.’ A vẹ rriẹ ohọ na fihọ aro ekpako okpẹwho na. 18 Ekpako okpẹwho na+ a vẹ rehọ ọzae na ze a vẹ kẹe uye.+ 19 A re hoi shẹkẹl* isiliva udhusoi (100) a vẹ rehọ ae kẹ ọsẹ ọmọtẹ na, keme ọzae na ọ raha odẹ ọmọtẹ-kọkọ Izrẹl,+ ọ vẹ gbẹ jọ aye riẹ. O wo udu nọ ọ rẹ rọ se iẹe he evaọ edẹ uzuazọ riẹ kpobi.

20 “Rekọ otẹrọnọ oware nọ ọzae na ọ ta na uzẹme, yọ a ruẹ oware ovo nọ u dhesẹ nọ ọmọtẹ na ọmọtẹ-kọkọ họ, 21 a rẹ rehọ ọmọtẹ na ziọ aro ighẹ ọsẹ riẹ, ezae okpẹwho riẹ a vẹ rọ itho fi ei kpe, keme ọmọtẹ na o ru oware omovuọ+ evaọ Izrẹl nọ o ro gbe-ọfariẹ* evaọ uwou ọsẹ riẹ.+ Ere wha re ru hrọ re wha si oware uyoma no udevie rai.+

22 “A te mu ọzae nọ o bi lele aye omọfa wezẹ, aimava na a re whu hrọ, ọzae nọ o lele aye na wezẹ na avọ aye na.+ Wha re si oware uyoma no Izrẹl hrọ.

23 “Nọ ọzae ọ tẹ sa ọmọtẹ-kọkọ họ otọ, nọ ọzae ọfa ọ jẹ nyaku ei evaọ okpẹwho na je lele iei wezẹ, 24 wha rẹ rehọ aimava na ziọ otafe unuẹthẹ okpẹwho na, wha vẹ rọ itho fi ai kpe, ọmọtẹ na o re whu keme o bo ho evaọ okpẹwho na, yọ ọzae na o re whu keme o si ọghọ no* aye ọrivẹ riẹ oma.+ Ere wha re ru hrọ re wha si oware umuomu no udevie rai.

25 “Rekọ otẹrọnọ obọ ẹwọ ọzae na ọ jọ nyaku ọmọtẹ nọ a sahotọ na nọ ọ jẹ ga obọ vi ei je lele iei wezẹ, ọzae nọ o lele i rie wezẹ na ọvo o re whu, 26 wha re ru ọmọtẹ na oware ovo vievie he. Ọmọtẹ na ọ raha uzi ovo nọ a re ro kpei hi. Oware nana o wọhọ epanọ ohwo ọ rẹ họrọ mu ọrivẹ riẹ ọ vẹ fae kpe.+ 27 Keme obọ ẹwọ ọ jọ nyaku ei, yọ ọmọtẹ nọ a sahotọ na o bo, rekọ ohwo ọvo ọ jariẹ nọ ọ rẹ thọe he.

28 “Nọ ọzae ọ tẹ nyaku ọmọtẹ-kọkọ nọ a re sahotọ họ, ọ jẹ gbae je lele iei wezẹ, nọ o jẹ bẹre via,+ 29 ọzae nọ o lele i rie wezẹ na ọ rẹ rehọ shẹkẹl isiliva udhuvẹ-gbikpe se ọsẹ ọmọtẹ na hrọ, ọmọtẹ na o ve zihe ruọ aye riẹ.+ Fikinọ o si ọghọ no* ọmọtẹ na oma, o wo udu nọ ọ rẹ rọ se iẹe he evaọ edẹ uzuazọ riẹ kpobi.

30 “Ọzae ọvuọvo ọ rẹ rehọ aye ọsẹ riẹ hẹ, re o gbe si ọghọ no ọsẹ riẹ oma ha.*+

23 “Ohwo ọvo nọ a whare ẹkwoma ibite riẹ nọ a whọlọ no, hayo nọ a bru oyọ riẹ no ọ rẹ nyaziọ ukoko Jihova ha.+

2 “Ọmọ* nọ a rọ ọfariẹ-ogbe yẹ* ọ rẹ nyaziọ ukoko Jihova ha.+ Makọ rite oge avọ ikpe, ohwo uyẹ riẹ ọvuọvo ọ rẹ nyaziọ ukoko Jihova ha.

3 “Ohwo Ammọn hayo ohwo Moab ọvuọvo ọ rẹ nyaziọ ukoko Jihova ha.+ Makọ rite oge avọ ikpe, ohwo uyẹ rai ọvuọvo ọ rẹ nyaziọ ukoko Jihova vievie he, 4 keme a nyaze ti fiobọhọ kẹ owhai hi re a kẹ owhai emu avọ ame evaọ okenọ wha jọ edhere je no ẹkwotọ Ijipti ze,+ gbe fikinọ a haya Belam ọmọzae Biọ no obọ Pithọ ọrọ Mẹsopotemia ze re ọ bọwo owhai ehao.*+ 5 Rekọ Jihova Ọghẹnẹ rai ọ rọwo gaviezọ kẹ Belam hu.+ Ukpoye, Jihova Ọghẹnẹ rai o te nwene ehao na kpohọ eghale kẹ owhai,+ keme Jihova Ọghẹnẹ rai o you owhai.+ 6 Wha rẹ gwọlọ epanọ a re ro wo udhedhẹ hayo epanọ eware i re ro woma kẹ ae vievie he evaọ edẹ uzuazọ rai kpobi.+

7 “Who re mukpahe ohwo Edọm vievie he, keme yọ oniọvo ra.+

“Who re mukpahe ohwo Ijipti vievie he, keme whọ jọ ọrara evaọ orẹwho riẹ.+ 8 Emọ oge avọ esa nọ a ti yẹ kẹ ae a rẹ sae ruọ eva ukoko Jihova.

9 “Nọ wha tẹ wọ ẹmo bru ewegrẹ rai, wha rẹ whaha oware uyoma kpobi.*+ 10 Nọ ọzae o te zihe ruọ ohwo nọ ọ fo ho fiki ame-oma nọ o no rie oma ze,+ o re kpohọ obọ otafe evuẹ na, ọ rẹ wariẹ ruọ eva evuẹ na ha. 11 Nọ owọwọ u te te, ọ rẹ họ,* kẹsena o ve te zihe ziọ evuẹ na nọ ọre o te kiediwi no.+ 12 Wha re wo oria nọ u siomano* evaọ otafe evuẹ na, kọ etẹe wha rẹ hai kpohọ. 13 Wha re wo ure nọ a rẹ rọ tọ otọ evaọ usu ekwakwa rai. Nọ wha te ne evaọ obọ otafe, wha rẹ rehọ iẹe tọ ọgọdọ fihọ otọ wha ve nwo isọ na ruru. 14 Keme Jihova Ọghẹnẹ rai ọ be hae nya evuẹ rai na+ re o siwi owhai, re ọ jẹ rehọ ewegrẹ rai họ owhai obọ, fikiere evuẹ rai ọ rẹ jọ ọrẹri,+ re ọ gbẹ ruẹ oware onyenye ovuovo evaọ udevie rai hi nọ o rẹ lẹliẹe kuomarẹriẹ nyasiọ owhai ba.

15 “Whọ rẹ rehọ ọrigbo kẹ olori riẹ hẹ, nọ ọ tẹ dhẹ no uwou olori riẹ bru owhẹ ze. 16 Ọ rẹ rria kugbe owhai evaọ oria kpobi nọ ọ salọ evaọ okpẹwho rai jọ, oria kpobi nọ o were riẹ. Whọ rẹ lahiẹe vievie he.+

17 “Ọmọtẹ Izrẹl ọvuọvo ọ rẹ jọ ogberẹ etẹmpol ho,+ yọ ọmọzae Izrẹl ọvuọvo ọ rẹ jọ ogberẹ etẹmpol gbe he.+ 18 Wha rẹ rehọ ugho* nọ a hwa kẹ ogberẹ aye hayo ugho nọ a hwa kẹ ogberẹ ọzae* ziọ uwou Jihova Ọghẹnẹ rai hi re wha rọ hwa eyaa rai, keme ivẹ na yọ eware nọ e rẹ tọtọ Jihova Ọghẹnẹ rai oma.

19 “Who re mi oniọvo ra isuo vievie he,+ makọ isuo nọ a rẹ hwa fihọ ugho, onọ a rẹ hwa fihọ emu, hayo onọ a rẹ hwa fihọ oware kpobi nọ a re mi isuo fihọ. 20 Whọ rẹ sai mi ohwo orẹwho ọfa isuo,+ rekọ who re mi oniọvo ra isuo vievie he,+ re Jihova Ọghẹnẹ ra ọ ruẹse ghale owhẹ evaọ oware kpobi nọ who bi ru evaọ otọ nọ wha be nyae rehọ na.+

21 “Whọ tẹ ya eyaa jọ kẹ Jihova Ọghẹnẹ ra,+ whọ raha oke he re whọ tẹ te hwae.+ Keme Jihova Ọghẹnẹ ra ọ te gwọlọ iẹe mi owhẹ hrọ; o gbẹ rrọ ere he, o rẹ te jọ uzioraha kẹ owhẹ.+ 22 Rekọ whọ gbẹ ya eyaa evuevo ho, whọ rẹ reabe uzioraha ha.+ 23 Ẹme nọ whọ rọ igbenu ra ta, who re ru ei,+ yọ who re ru oware nọ whọ rehọ unu obọra ya inọ whọ te rọ kẹ Jihova Ọghẹnẹ ra okẹ unevaze.+

24 “Otẹrọnọ whọ ruọ eva ọgbọ evaene ọrivẹ ra, whọ rẹ sae re unu ibi-ire evaene nọ e rẹ vọ owhẹ* eva, rekọ who re fi ọvo họ ẹkpa kpo ho.+

25 “Whọ tẹ ruọ eva udhu ekakọ ọrivẹ ra, whọ rẹ rehọ obọ ra kọrọ enọ e ware no, rekọ whọ rẹ rọ ojale bru ibi ekakọ riẹ hẹ.+

24 “Otẹrọnọ ọzae o wo aye rekọ aye na ọ gbẹ were iẹe he fikinọ ọ jọ obọ riẹ ruẹ ekpehre uruemu jọ, o re kere obe-udu orọo-ofa,+ ọ vẹ rehọ iẹe kẹe, ọ vẹ ta kẹe re o no uwou riẹ no.+ 2 Nọ o te no uwou riẹ no, ọzae ọfa ọ rẹ sae rehọ iẹe.+ 3 Otẹrọnọ ọzae avọ ivẹ na o mukpahe iẹe* o je kere obe-udu orọo-ofa, ọ jẹ rehọ iẹe kẹe, jẹ ta kẹe nọ o no uwou riẹ no, hayo nọ ọzae avọ ivẹ nọ ọ rehọ e riẹ na o te whu, 4 ọzae ọsosuọ riẹ nọ ọ se riẹ na ọ rẹ sae gbẹ wariẹ rehọ aye na ha nọ orọnọ a zue aye na oma no na, keme oyena yọ oware nọ o rẹ tọtọ Jihova oma. Wha rẹ wha uzioraha ziọ ẹkwotọ nọ Jihova Ọghẹnẹ rai ọ be rọ kẹ owhai re wha rọ reuku na ha.

5 “Nọ ọzae o te wo aye obọ, o re kuomagbe ogbaẹmo na ha yọ a rẹ kẹe iruo efa ha. A rẹ kẹe uvẹ ẹgbukpe re ọ jọ uwou re o ru eva were aye riẹ.+

6 “Ohwo ọvo o re kru utho nọ a re ro wuhu eware hayo utho obehru* riẹ wọhọ oware nọ a ro viowa fihọ oware nọ a momo ho,*+ keme a te ru ere yọ a rehọ oware nọ ohwo na o bi ro yeri uzuazọ* no.

7 “Otẹrọnọ a ruẹ ohwo jọ nọ o mu oniọvo riẹ jọ rehọ, ọnọ* ọ rrọ ohwo Izrẹl, yọ o gboja kẹe jẹ zẹe,+ ohwo nọ o mu ohwo rehọ na o re whu hrọ.+ Wha re si oware uyoma no udevie rai.+

8 “Nọ oti* ọ tẹ romavia, wha yọroma gaga re wha ru lele oware kpobi nọ izerẹ nọ e rrọ ahwo Livae na a te ta kẹ owhai.+ Wha romatotọ ru epanọ me jie uzi riẹ kẹ ae na dẹẹ. 9 Wha kareghẹhọ oware nọ Jihova Ọghẹnẹ rai o ru Miriam evaọ edhere nọ wha je no Ijipti ze.+

10 “Who te momo oware jọ kẹ ọrivẹ ra,+ whọ rẹ ruọ eva uwou riẹ re who gboro oware nọ o ro viowa na vievie he. 11 Who re dikihẹ obọ otafe, ohwo nọ o momo oware na ọ vẹ rehọ oware nọ o ro viowa na se owhẹ evaọ obọ otafe. 12 Yọ otẹrọnọ akpọ ọ be bẹ ohwo na, oware nọ o ro viowa nọ ọ kẹ owhẹ na ọ rẹ rria owhẹ obọ asohẹrioke he.+ 13 Whọ rẹ ruẹ nọ who zihe oware nọ o ro viowa kẹ owhẹ na sei nọ ọre o te bi kiediwi, ọ vẹ rehọ ewu riẹ kiẹzẹ,+ ọ vẹ ghale owhẹ; yọ onana u ti ru owhẹ fihọ ohwo okiẹrẹe evaọ aro Jihova Ọghẹnẹ ra.

14 “Who re fi ohwo nọ whọ rehọ iruo iwhayo vievie he ọnọ akpọ ọ be bẹ nọ ọ rrọ oyogbe, te ọ rrọ omọvo inievo ra, hayo ọrara nọ ọ be rria ẹkwotọ rai, eva ikpewho* rai.+ 15 Whọ rẹ hwa osa riẹ kẹe ẹdẹdẹ yena,+ taure ọre o te ti kiediwi, keme akpọ ọ be bẹe, yọ osa riẹ ọ rẹroso evaọ uzuazọ* riẹ kpobi. O gbẹ rrọ ere he, o ti bo se Jihova fiki ra, whọ vẹ te reabe uzioraha.+

16 “A re kpe esẹ hẹ fiki oware nọ emọ rai a ru, yọ a re kpe emọ họ fiki oware nọ esẹ rai a ru.+ Fiki uzioraha obọ ohwo ọvo a re ro kpei.+

17 “Wha rẹ vẹ ẹdhọ ọrara nọ ọ be rria udevie rai tu vievie he, hayo orọ ọmọ nọ o wo ọsẹ hẹ,*+ yọ wha re kru ewu aye-uku hu wọhọ oware nọ o ro viowa fihọ oware nọ o momo.*+ 18 Wha kareghẹhọ nọ wha jọ erigbo evaọ obọ Ijipti, Jihova Ọghẹnẹ rai ọ tẹ ta owhai no obei ze.+ Oyejabọ nọ me bi ro jie uzi kẹ owhai re wha ru oware nana.

19 “Nọ wha te bi vu ekakọ udhu rai, ekru ekakọ* jọ o jẹ thọrọ owhai ẹro fihọ udhu na, wha re zihe nyae rehọ iẹe he. Wha rẹ nyase iẹe ba kẹ ọrara nọ ọ be rria udevie rai, ọmọ nọ o wo ọsẹ hẹ, gbe aye-uku,+ re Jihova Ọghẹnẹ rai ọ ghale owhai evaọ oware kpobi nọ wha bi ru.+

20 “Okenọ wha te fa ure olivi rai,* wha rẹ wariẹ fa egha riẹ hẹ. Ibi nọ i kiọkọ iẹe e rẹ jọ kẹ ọrara nọ ọ be rria udevie rai, ọmọ nọ o wo ọsẹ hẹ, gbe aye-uku.+

21 “Nọ wha te kwa ibi-ire ọgbọ evaene rai kokohọ, wha re zihe nyae kwa enọ i kiọkọ vievie he. A rẹ nyasiọ ae ba kẹ ọrara nọ ọ be rria udevie rai, ọmọ nọ o wo ọsẹ hẹ, gbe aye-uku. 22 Wha kareghẹhọ nọ wha jọ erigbo evaọ ẹkwotọ Ijipti. Oyejabọ nọ me bi ro jie uzi kẹ owhai re wha ru oware nana.

25 “Otẹrọnọ ezae ivẹ a wo ẹme, a rẹ nyabru ibruoziẹ na,+ a ve guẹdhọ rai, a ve bruoziẹ kẹ ọnọ o kiẹrẹe na inọ ọ rease je bruoziẹ kpe ohwo omuomu na inọ ọ reabe.+ 2 O tẹ gwọlọ nọ a rẹ fa ohwo omuomu na,+ obruoziẹ na ọ vẹ ta kẹe nọ o kiẹzẹ vovao tuotọ, a vẹ jọ iraro riẹ fae. Epanọ oware nọ o ru na u yoma te ere unu eviaviẹ nọ a rẹ fae i re bu te. 3 A rẹ sae fae te eviaviẹ udhuvẹ,+ rekọ a rẹ fae vrẹ ere he. Otẹrọnọ a fa riẹ bu vrẹ ere, yọ a kpomovuọ họ oniọvo ra oma no evaọ aro rai.

4 “Wha rẹ gba unu eruẹ vievie he nọ o te bi si ibi no igbe ekakọ.+

5 “Otẹrọnọ inievo e be rria kugbe, ọjọ evaọ usu rai o je whu yọ o yẹ ọmọzae he, aye ọnọ o whu na ọ rẹ jọ uviuwou ọfa wo ọzae he. Oniọvo ọzae riẹ ọ rẹ nyabru ei ọ vẹ rehọ iẹe re ọ jọ aye riẹ, ọ vẹ ruọ orọo aye-uku kugbei.+ 6 A rẹ rehọ ọmọ ọsosuọ nọ o ti yẹ wọhọ ọmọ oniọvo riẹ nọ o whu no na,*+ re odẹ riẹ u gbe voro no Izrẹl he.+

7 “Whaọ otẹrọnọ ọzae na ọ gwọlọ rehọ aye-uku oniọvo riẹ na ha, aye-uku oniọvo riẹ na ọ rẹ nyabru ekpako na evaọ obọ unuẹthẹ okpẹwho na, ọ vẹ ta nọ, ‘Oniọvo ọzae mẹ ọ rọwo nọ o re ru re odẹ oniọvo riẹ o gbẹ jọ Izrẹl he. Ọ rọwo nọ ọ rẹ ruọ orọo aye-uku kugbe omẹ hẹ.’ 8 Ekpako okpẹwho riẹ a re se ọzae na, a vẹ ta ẹme kẹe. Ọ tẹ gbẹ be se inọ, ‘Mẹ gwọlọ rehọ aye na ha,’ 9 kẹsena aye-uku oniọvo riẹ na ọ vẹ nyabru ei evaọ aro ekpako na, ọ vẹ ba owọ-eviẹ noi owọ,+ o ve nwo eya ku ei ovao, ọ vẹ ta nọ, ‘Enẹ a re ru ọzae nọ ọ gwọlọ nọ o re ru uwou oniọvo riẹ dikihẹ hẹ.’ 10 Kẹsena a vẹ jọ Izrẹl riẹ odẹ uviuwou riẹ* wọhọ ‘Uwou ohwo nọ a ba owọ-eviẹ no owọ riẹ.’

11 “Otẹrọnọ ezae ivẹ a be họre, aye ọjọ ọ jẹ nyaze te thọ ọzae riẹ no obọ ohwo ọdekọ nọ ọ be họre iẹe na, aye na ọ jẹ rriẹ obọ riẹ duọ ite riẹ, 12 wha re bru obọ riẹ no hrọ. Wha* rẹ re ohrọ riẹ hẹ.

13 “Wha rẹ jọ ẹkpa rai wo eghẹrẹ itho owawọ ivẹ vievie he,+ ologbo gbe ọsese. 14 Wha rẹ jọ uwou rai wo eghẹrẹ imidhe ivẹ nọ a rẹ rọ wawọ eware* vievie he,+ ologbo gbe ọsese. 15 Wha re wo owawọ-oware ogbagba nọ u wo ewhariọ họ nọ a rẹ rọ wawọ ẹgbẹdẹ, gbe owawọ-oware ogbagba nọ u wo ewhariọ họ nọ a rẹ rọ wawọ eware, re wha ruẹse rria tọ evaọ ẹkwotọ nọ Jihova Ọghẹnẹ rai ọ be rọ kẹ owhai na.+ 16 Keme ohwo ewhariọ kpobi nọ o re ru eware itieye na ọ rẹ tọtọ Jihova Ọghẹnẹ rai oma.+

17 “Wha kareghẹhọ oware nọ Amalẹk o ru owhai evaọ edhere nọ wha je no Ijipti ze,+ 18 epanọ o ro zere owhai evaọ edhere ọ tẹ họre ahwo kpobi nọ a be nya ẹmẹrera evaọ emu rai nọ oma o lọhọ owhai no jẹ rrọ owhai no. Ọ dhozọ Ọghẹnẹ hẹ. 19 Nọ Jihova Ọghẹnẹ rai o te ru owhai wo eriosehọ no obọ ewegrẹ rai kpobi nọ e wariẹ owhai họ no evaọ ẹkwotọ nọ Jihova Ọghẹnẹ rai ọ be rọ kẹ owhai re o jọ orai nọ wha rẹ rọ reuku na,+ wha re voro odẹ Amalẹk no otọ idhiwu na no.+ Jọ o thọrọ owhai ẹro vievie he.

26 “Uwhremu na nọ wha tẹ ruọ eva ẹkwotọ nọ Jihova Ọghẹnẹ rai ọ be rọ kẹ owhai re wha rọ reuku na no, nọ wha jẹ rehọ iẹe je mu ei họ ẹria no, 2 wha rẹ rehọ ibi ọsosuọ erọ ekakọ* kpobi evaọ otọ na, enọ wha ti wo no otọ rai ze, onọ Jihova Ọghẹnẹ rai ọ be rọ kẹ owhai na, wha ve fi ai họ ekete wha vẹ wọ ae kpohọ oria nọ Jihova Ọghẹnẹ rai ọ salọ nọ odẹ riẹ o rẹ jọ.+ 3 Wha rẹ nyabru ozerẹ nọ ọ be gbodibo evaọ oke yena, wha vẹ ta kẹe nọ, ‘Nẹnẹ na mẹ be niyẹrẹ kẹ Jihova Ọghẹnẹ ra inọ mẹ ziọ ẹkwotọ nọ Jihova o duwu iyei kẹ esẹ-esẹ mai inọ ọ te rọ kẹ omai na no.’+

4 “Kẹsena ozerẹ na ọ vẹ rehọ ekete na no obọ ra ọ vẹ wọe fihọ aro agbada-idhe Jihova Ọghẹnẹ ra. 5 Whọ vẹ jọ aro Jihova Ọghẹnẹ ra ta nọ, ‘Ọsẹ mẹ ọ jọ ohwo Eram nọ o je ghoro,*+ o te kpobọ Ijipti,+ ọ tẹ rria obei wọhọ ọrara, yọ ahwo uwou riẹ a bu hu.+ Rekọ ọ tẹ te jọ obei zihe ruọ orẹwho ulogbo, nọ o rrọ gaga jẹ rrọ buobu.+ 6 Ahwo Ijipti a te je gboja kẹ omai, kienyẹ omai, je fi omai họ igbo egaga.+ 7 Ma te muhọ ebo se Jihova, Ọghẹnẹ esẹ-esẹ mai, Jihova o te yo urru mai, ọ tẹ ruẹ oja nọ ma be re, ukpokpoma mai gbe okienyẹ mai.+ 8 Ukuhọ riẹ, Jihova ọ tẹ rehọ omai no Ijipti ze avọ obọ ogaga, ugbobọ nọ ọ rriẹ,+ eware imuozọ, eware eka, gbe iruo igbunu.+ 9 Ọ tẹ rehọ omai ziọ oria nana jẹ kẹ omai ẹkwotọ nana, ẹkwotọ nọ ame-ivie gbe ọnyọ i bi jo su.+ 10 Obọnana mẹ rehọ ibi ọsosuọ erọ ekakọ otọ na nọ Jihova ọ kẹ omẹ ze no.’+

“Whọ rẹ wọ ae fihọ aro Jihova Ọghẹnẹ rai hrọ, who ve guzou kpotọ kẹ Jihova Ọghẹnẹ rai. 11 Kẹsena wha vẹ ghọghọ fiki eware iwoma kpobi nọ Jihova Ọghẹnẹ rai ọ rọ kẹ owhai gbe iviuwou rai, te owhai, gbe ahwo Livae, gbe erara nọ e be rria udevie rai.+

12 “Wha tẹ rọ abọvo abakpe na kpobi ze no,+ erọ ukpe avọ esa na, ukpe abọvo abakpe na, wha rẹ rehọ iẹe kẹ ohwo Livae, ọrara nọ ọ be rria udevie rai, ọmọ nọ o wo ọsẹ hẹ,* gbe aye-uku, a vẹ re eva vọ evaọ ikpewho* rai.+ 13 Kẹsena whọ vẹ jọ aro Jihova Ọghẹnẹ ra ta nọ, ‘Me si ẹkẹ ọrẹri na no uwou mẹ no yọ mẹ rehọ e riẹ kẹ ohwo Livae, ọrara nọ ọ be rria udevie mai, ọmọ nọ o wo ọsẹ hẹ, gbe aye-uku no,+ nwane wọhọ epanọ who jie uzi riẹ kẹ omẹ. Mẹ raha izi ra ha yọ me gbabọkẹ ae he. 14 Mẹ jariẹ re he okenọ mẹ jọ uweri, yọ mẹ jariẹ rehọ oware ovo ho okenọ mẹ fo ho, yọ mẹ jariẹ rehọ ovuovo ru oware nọ u kiekpahe ohwo nọ o whu no ho. Me yoẹme kẹ Jihova Ọghẹnẹ mẹ je ru eware kpobi nọ o jie uzi rai kẹ omẹ. 15 Obọnana, rri no oria ọrẹri nọ whọ be rria ze, obọ idhiwu, re whọ ghale ahwo ra, ahwo Izrẹl gbe ẹkwotọ nọ whọ rọ kẹ omai na,+ nwane wọhọ epanọ who duwu iyei riẹ rọkẹ esẹ-esẹ mai,+ ẹkwotọ nọ ame-ivie gbe ọnyọ i bi jo su.’+

16 “Nẹnẹ na, Jihova Ọghẹnẹ rai o bi jie uzi kẹ owhai re wha koko ijaje gbe izi oziẹobro nana. Wha re koko ai hrọ jẹ rọ udu rai kpobi+ gbe uzuazọ* rai kpobi ru lele ai. 17 Nẹnẹ na, Jihova ọ vuẹ owhai no inọ ọ te jọ Ọghẹnẹ rai nọ wha tẹ ruabọhọ be nya evaọ idhere riẹ je bi koko ijaje riẹ,+ izi riẹ,+ gbe izi oziẹobro riẹ,+ jẹ be gaviezọ kẹ urru riẹ. 18 Yọ nẹnẹ na, wha vuẹ Jihova no inọ wha te jọ ahwo riẹ, okwakwa obọdẹ* riẹ,+ nwane wọhọ epanọ ọ ya eyaa riẹ kẹ owhai, gbe nọ wha ti koko izi riẹ kpobi, 19 yọ ọ te kpare owhai kpehru vi erẹwho efa kpobi nọ ọ ma,+ ọ te kẹ owhai ujiro, ru odẹ rai do, je ru owhai wo oruaro nọ wha bi dhesẹ nọ whai yọ ahwo ọrẹri kẹ Jihova Ọghẹnẹ rai,+ nwane wọhọ epanọ ọ ya eyaa na.”

27 Kẹsena Mosis avọ ekpako Izrẹl a tẹ ta kẹ ahwo na nọ: “Wha koko uzi kpobi nọ mẹ be rọ kẹ owhai nẹnẹ na. 2 Yọ evaọ ẹdẹ nọ wha te fa Jọdan vrẹ ruọ ẹkwotọ nọ Jihova Ọghẹnẹ rai ọ be rọ kẹ owhai na, wha wọ itho ilogbo fihọ oria re wha ralọ ae.*+ 3 Kẹsena wha ve kere eme uzi nana kpobi fihọ ae nọ wha tẹ fa vrẹ no, re wha ruẹse ruọ eva ẹkwotọ nọ Jihova Ọghẹnẹ rai ọ be rọ kẹ owhai na, ẹkwotọ nọ ame-ivie gbe ọnyọ i bi jo su, nwane wọhọ epanọ Jihova, Ọghẹnẹ esẹ-esẹ rai ọ ya eyaa riẹ kẹ owhai na.+ 4 Nọ wha tẹ fa Jọdan vrẹ no, wha rẹ rọ itho nana vi Ugbehru Ibal,+ wha vẹ ralọ ae,* nwane wọhọ epanọ me bi jie uzi riẹ kẹ owhai nẹnẹ na. 5 Wha rẹ jẹ bọ agbada-idhe fihọ etẹe kẹ Jihova Ọghẹnẹ rai, agbada-idhe itho. Wha rẹ rọ ekwakwa ayọno ro bru rai hi.+ 6 Itho esoso wha rẹ rọ bọ agbada-idhe Jihova Ọghẹnẹ rai na, wha vẹ jọ ehru riẹ dhe idhe emahọ kẹ Jihova Ọghẹnẹ rai. 7 Wha re dhe idhe ọriẹyeri+ jẹ jọ etẹe re ae,+ wha vẹ ghọghọ evaọ aro Jihova Ọghẹnẹ rai.+ 8 Yọ wha re kere eme Uzi nana kpobi vevẹ fihọ itho na.”+

9 Kẹsena Mosis avọ izerẹ nọ e rrọ ahwo Livae na a tẹ ta kẹ ahwo Izrẹl nọ: “Wha fibo re wha gaviezọ, O Izrẹl. Nẹnẹ na wha zihe ruọ ahwo Jihova Ọghẹnẹ rai no.+ 10 Wha rẹ gaviezọ kẹ urru Jihova Ọghẹnẹ rai hrọ wha ve koko izi riẹ+ gbe ijaje riẹ nọ mẹ be kẹ owhai nẹnẹ na.”

11 Evaọ ẹdẹ yena Mosis o te jie uzi kẹ ahwo na nọ: 12 “Erua nana i ti dikihẹ Ugbehru Gẹrizim+ re a lẹ ẹro eghale kẹ ahwo na okenọ wha tẹ fa Jọdan vrẹ no: Simiọn, Livae, Juda, Isaka, Josẹf, gbe Bẹnjamin. 13 Yọ enana họ enọ i ti dikihẹ Ugbehru Ibal+ re a bọwo ehao na: Rubẹn, Gad, Asha, Zẹbulọn, Dan, gbe Naftalae. 14 Ahwo Livae a vẹ rọ urru oruarua ta kẹ ohwo Izrẹl kpobi nọ:+

15 “‘Uye u te* ohwo nọ ọ kare ẹmema+ hayo rehọ ayọno ru ẹmema,*+ oware nọ o rẹ tọtọ Jihova oma,+ oware nọ ọwena* ọ rehọ abọ ru, o je si ei no.’ (Ahwo na kpobi a ve yo nọ, ‘Ami!’*)

16 “‘Uye u te ohwo nọ o rri ọsẹ riẹ hayo oni riẹ vo.’+ (Ahwo na kpobi a ve yo nọ, ‘Ami!’)

17 “‘Uye u te ohwo nọ o fowo oka uwhru ọrivẹ riẹ.’+ (Ahwo na kpobi a ve yo nọ, ‘Ami!’)

18 “‘Uye u te ohwo nọ o ru ohwo otuaro vru no edhere nọ ọ be nya.’+ (Ahwo na kpobi a ve yo nọ, ‘Ami!’)

19 “‘Uye u te ohwo nọ ọ vẹ ẹdhọ ọrara nọ ọ be rria udevie rai tu,+ te ọrọ ọmọ nọ o wo ọsẹ hẹ,* hayo aye-uku.’+ (Ahwo na kpobi a ve yo nọ, ‘Ami!’)

20 “‘Uye u te ohwo nọ o lele aye ọsẹ riẹ wezẹ, keme o si ọghọ no ọsẹ riẹ oma.’*+ (Ahwo na kpobi a ve yo nọ, ‘Ami!’)

21 “‘Uye u te ohwo nọ o lele oghẹrẹ arao jọ kpobi wezẹ.’+ (Ahwo na kpobi a ve yo nọ, ‘Ami!’)

22 “‘Uye u te ohwo nọ o lele oniọvo-ọmọtẹ riẹ wezẹ, ọmọtẹ ọsẹ riẹ hayo ọmọtẹ oni riẹ.’+ (Ahwo na kpobi a ve yo nọ, ‘Ami!’)

23 “‘Uye u te ohwo nọ o lele oni-aye riẹ wezẹ.’+ (Ahwo na kpobi a ve yo nọ, ‘Ami!’)

24 “‘Uye u te ohwo nọ o dhere be hẹrẹ ọrivẹ riẹ, o te kpei.’+ (Ahwo na kpobi a ve yo nọ, ‘Ami!’)

25 “‘Uye u te ohwo nọ a hwosa kẹ re o kpe ohwo* ekueku.’*+ (Ahwo na kpobi a ve yo nọ, ‘Ami!’)

26 “‘Uye u te ohwo nọ o ru lele eme Uzi nana ha, nọ o koko i rai hi.’+ (Ahwo na kpobi a ve yo nọ, ‘Ami!’)

28 “Yọ otẹrọnọ wha ginẹ gaviezọ kẹ urru Jihova Ọghẹnẹ rai, re wha romatotọ koko izi riẹ kpobi nọ mẹ be vuẹ owhai nẹnẹ na, Jihova Ọghẹnẹ rai ọ te wọ owhai kpehru vi erẹwho efa kpobi nọ e rrọ otọakpọ na.+ 2 Eghale nana kpobi i ti bru owhai ze je hwẹ ku owhai,*+ keme wha ruabọhọ be gaviezọ kẹ urru Jihova Ọghẹnẹ rai:

3 “Oghale u ti te owhai evaọ okpẹwho na, yọ oghale u ti te owhai evaọ obọ ẹwọ.+

4 “Oghale u ti te emọ* rai+ gbe ibi otọ rai gbe emọ erao rai, iruẹ gbe igodẹ rai.+

5 “Oghale u ti te ekete rai+ gbe omodhe okokodo nọ wha rẹ jọ gua eflawa.+

6 “Oghale u ti te owhai okenọ wha tẹ ruọ eva yọ oghale u ti te owhai okenọ wha tẹ ruọ otafe.

7 “Jihova o ti ru nọ wha ti ro fi ewegrẹ rai nọ e be kpareso owhai kparobọ.+ Edhere ọvo a te rọ wọ ohọre bru owhai ze, rekọ idhere ihrẹ a te rọ dhẹ siọ owhai ba.+ 8 Jihova ọ te ta nọ jọ oghale u te iwou nọ wha rẹ jọ sẹro* eware+ gbe oware kpobi nọ wha bi ru, yọ ọ te ghale owhai hrọ evaọ ẹkwotọ nọ Jihova Ọghẹnẹ rai ọ be rọ kẹ owhai na. 9 Jihova o ti ru owhai dikihẹ re wha jọ ahwo ọrẹri nọ o wo,+ nwane wọhọ epanọ o duwu iyei riẹ kẹ owhai na,+ keme wha ruabọhọ bi koko izi Jihova Ọghẹnẹ rai jẹ be nya evaọ idhere riẹ. 10 Ahwo kpobi nọ a rrọ otọakpọ na a vẹ te ruẹ nọ a rọ odẹ Jihova se owhai,+ ozọ rai u ve ti mu ai.+

11 “Jihova o ti ru nọ wha ti ro yẹ emọ buobu je wo erao buobu je ru nọ etọ rai i ti ro wou eware ziezi+ evaọ ẹkwotọ nọ Jihova o duwu iyei riẹ rọkẹ esẹ-esẹ rai inọ ọ te rọ kẹ owhai na.+ 12 Jihova o ti rovie uwou eware iwoma riẹ,* idhiwu na rọkẹ owhai, re o ru oso rrọ fihọ otọ rai evaọ ezi riẹ+ jẹ ghale oware kpobi nọ wha bi ru. Wha ti momo kẹ erẹwho buobu, rekọ o te gwọlọ nọ whai omarai wha re momo ho.+ 13 Jihova o ti ru owhai fihọ uzou, orọnikọ uweli hi; yọ wha rẹ te jọ obọ ehru+ orọnikọ obotọ họ, otẹrọnọ wha ruabọhọ bi koko izi Jihova Ọghẹnẹ rai nọ mẹ be vuẹ owhai nẹnẹ na re wha ru lele ai. 14 Wha rẹ nyasiọ eme nana kpobi nọ mẹ be ta kẹ owhai nẹnẹ na ba vievie he re wha kpohọ obọze hayo ẹkpẹlobọ,+ re wha lele eghẹnẹ efa, re wha nyae gọ ae.+

15 “Rekọ otẹrọnọ wha gbẹ gaviezọ kẹ urru Jihova Ọghẹnẹ rai hi, re wha romatotọ koko ijaje riẹ gbe izi riẹ kpobi nọ mẹ be vuẹ owhai nẹnẹ na ha, iye* nana kpobi i ti bru owhai ze je hwẹ ku owhai:+

16 “Uye u ti* te owhai evaọ okpẹwho na, yọ uye u ti te owhai evaọ obọ ẹwọ.+

17 “Uye u ti te ekete rai+ gbe omodhe okokodo nọ wha rẹ jọ gua eflawa.+

18 “Uye u ti te emọ* rai+ gbe ibi otọ rai gbe iruẹ gbe igodẹ rai.+

19 “Uye u ti te owhai okenọ wha tẹ ruọ eva yọ uye u ti te owhai okenọ wha tẹ ruọ otafe.

20 “Jihova o ti vi ekela se owhai, ru owhai reghe jẹ kẹ owhai uye evaọ oware kpobi nọ wha bi ru bẹsenọ whai kpobi wha re ro whu no vẹrẹ vẹrẹ, fiki eware iyoma nọ wha bi ru jẹ be nyasiọ omẹ ba.+ 21 Jihova o ti ru nọ ẹyao o gbe ti ro no owhai oma ha bẹsenọ o re kpe owhai kpobi no ẹkwotọ nọ wha be nyae rehọ na.+ 22 Jihova ọ te kẹ owhai owọre ogaga,* ifiva egaga,+ ohọroma nọ u fu, ẹrrorro ifiva, ọgbọdọ,+ ẹrrorro ọgaga nọ o re kpe ekakọ, gbe izuzu;+ eware nana i ti te* owhai bẹsenọ wha re whu muotọ. 23 Idadeghe rai e te jọ ekọpa, yọ otọ rai o te jọ ayọno.+ 24 Jihova o ti ru oso nọ ọ be rrọ fihọ otọ rai zihe ruọ oware nọ o rrọ whowhowho gbe ovu nọ ọ te rrọ fihọ owhai no obọ ehru* ze bẹsenọ whai kpobi wha re whu no. 25 Jihova o ti ru nọ ewegrẹ rai a ti ro fi owhai kparobọ.+ Edhere ọvo wha te rọ wọ ohọre bru rai, rekọ idhere ihrẹ wha te rọ dhẹ siọ ae ba; wha ve ti zihe ruọ oware idudu kẹ ekwotọ-ivie kpobi nọ e rrọ otọakpọ na.+ 26 Iri rai i ti zihe ruọ emu kẹ evra kpobi nọ e be jọ obọ ehru rra, gbe erao nọ e rrọ otọ na, yọ ohwo ọvo ọ te jariẹ nọ o ti le ai hi.+

27 “Jihova ọ te rọ eruẹso obọ Ijipti te owhai, uvinẹ nọ u wolo ze, ewe, gbe emezẹ,* enọ a rẹ sai siwi kpo ho. 28 Jihova o ti ru owhai mu ru, tu owhai aro+ je ru owhai reghe.* 29 Wha te gwọlọ edhere bẹ evaọ uvo kekeke, nwane wọhọ epanọ ohwo nọ o tuaro ọ rẹ gwọlọ edhere bẹ fiki ebi nọ ọ rrọ na,+ yọ oware ovo nọ wha ti ru nọ u ti woma kẹ owhai o te jariẹ hẹ; yọ kẹse kẹse a te hai fi owhai iwhayo je tho eware rai, yọ ohwo ọvo o ti siwi owhai hi.+ 30 Whọ te sa ọmọtẹ họ otọ, rekọ ọzae ọfa ọ te gbai du. Whọ te bọ uwou, rekọ whọ te rriae he.+ Whọ te kọ ọgbọ evaene rekọ whọ te kọrọ ibi riẹ hẹ.+ 31 A te jọ iraro ra kpe eruẹ ra, rekọ whọ te jariẹ re he. A te jọ iraro ra tho eketekete ra, rekọ o ti zihe bru owhẹ ze he. A te rehọ igodẹ ra kẹ ewegrẹ ra, rekọ who ti wo osiwi ọvuọvo ho. 32 A te rehọ emezae ra gbe emetẹ ra kẹ amọfa,+ yọ who bi rri ọvo, whọ te daoma ẹsikpobi re whọ ruẹ e rai, rekọ who ti wo ogaga nọ who re ro ru oware ovuovo ho. 33 Ahwo nọ whọ riẹ hẹ a te re ibi nọ who wo no otọ ra ze gbe eware kpobi nọ whọ ruẹ uye fihọ,+ yọ ẹsikpobi a te hai fi owhẹ iwhayo je kienyẹ owhẹ. 34 Eware nọ ibiaro ra e te ruẹ i ti ru owhẹ reghe no.

35 “Jihova o ti ru nọ eruẹso nọ e rẹ da gaga, nọ a rẹ sai siwi hi i ti ro mu owhai ighilawọ gbe awọ, no evawọ rite oko uzou. 36 Jihova o ti le owhai avọ ovie nọ wha ro mu kẹ omarai kpohọ orẹwho nọ te owhai te esẹ-esẹ rai wha riẹ hẹ,+ wha vẹ te jọ obei gọ eghẹnẹ efa, eghẹnẹ ire gbe erọ itho.+ 37 Wha ve ti zihe ruọ oware idudu gbe oware nọ a re ro jijehwẹ* gbe oware nọ a re ro se ẹkoko evaọ udevie ahwo kpobi nọ Jihova o ti le owhai bru na.+

38 “Wha te kọ ibi buobu fihọ obọ ẹwọ, rekọ umutho wha ti vu,+ keme ebaka-ẹkpẹ e te re ae no. 39 Wha te kọ jẹ rẹrote egbọ evaene, rekọ wha te da enwaene ọvo ho, yọ oware ovo u ti te owhai obọ họ,+ keme ihoi e te re ae no. 40 Ire olivi e te vọ ẹkwotọ rai kpobi, rekọ wha te ruẹ udẹ ovuovo wholo ho, keme ibi olivi rai i ti kie kufiẹ. 41 Wha ti yẹ emezae gbe emetẹ, rekọ e te gbẹ jọ erai hi, keme a ti mu ai kpohọ igbo.+ 42 Owa emera* e te tafru ire rai gbe ekakọ otọ rai kpobi. 43 Eware i ti dhe ewewoma kẹ ọrara nọ ọ be rria udevie rai rekọ eware i ti dhe eyeyoma kẹ owhai.* 44 O ti momo kẹ owhẹ rekọ who ti momo kẹe he.+ Ọ te jọ uzou, whọ vẹ te jọ uweli.+

45 “Iye* nana kpobi+ i ti bru owhai ze, i ti le owhai je hwẹ ruru owhai bẹsenọ wha re whu muotọ,+ keme wha gaviezọ kẹ urru Jihova Ọghẹnẹ rai hi re wha koko ijaje gbe izi riẹ nọ o jie kẹ owhai.+ 46 Yọ e te jọ owhai gbe emọ rai oma wọhọ oka gbe unuovẹvẹ bẹdẹ bẹdẹ,+ 47 keme wha rehọ udu oghọghọ avọ evawere gọ Jihova Ọghẹnẹ rai hi okenọ wha wo oware kpobi dafia.+ 48 Jihova o ti vi ewegrẹ rai ze te họre owhai, wha vẹ te gbodibo kẹ ae+ yọ ohọo+ avọ uruame u bi kpe owhai, yọ wha be ruẹ iwu ku họ họ, oware kpobi o vẹ te kare owhai. O ti fi owhowha ayọno họ uriohọ rai bẹsenọ o re kpe owhai muotọ.

49 “Jihova o ti vi orẹwho ugbothabọ+ jọ no obọ oka otọakpọ na ze te họre owhai; ọ te duọ owhai nyaotọ wọhọ ugo,+ orẹwho nọ wha ti yo ẹvẹrẹ riẹ hẹ,+ 50 orẹwho nọ u re muozọ, nọ u wo adhẹẹ kẹ ọkpako ho, yọ ọ rẹ re ohrọ ọmaha ha.+ 51 A te re emọ erao rai gbe ekakọ otọ rai no bẹsenọ wha re whu muotọ. A te nyasiọ okakọ ovuovo, enwaene ọkpokpọ hayo ewhri, ọmọ eruẹ hayo ogodẹ ba kẹ owhai hi bẹsenọ a rẹ raha owhai no.+ 52 A ti ko owhai họ, kare owhai dhe eva ikpewho* rai kpobi nọ e rrọ ẹkwotọ rai bẹsenọ igbẹhẹ ikpekpehru nọ wha ro di ogba wariẹ oma họ nọ wha be rẹroso na i re kie. Ẹhẹ, a ti ko owhai họ eva ikpewho rai kpobi nọ e rrọ ẹkwotọ rai nọ Jihova Ọghẹnẹ rai ọ rọ kẹ owhai na.+ 53 Kẹsena wha vẹ te re emọ obọrai,* uwo-oma emezae gbe emetẹ rai+ nọ Jihova Ọghẹnẹ rai ọ rọ kẹ owhai, fiki epanọ ekohọ na ọ ga te gbe oja nọ ọwegrẹ rai o ti gbe kẹ owhai.

54 “Makọ ọzae nọ udu riẹ o mae lọhọ, nọ ọ mai wou evaọ udevie rai ọ te re ohrọ oniọvo riẹ hẹ hayo aye riẹ nọ o you gaga ha, hayo emezae riẹ nọ i kiọkọ họ, 55 yọ ọ te kẹ ae uwo ovuovo orọ emezae riẹ nọ ọ te re na ha, keme o wo oware ofa ha fiki epanọ ekohọ na ọ ga te gbe oja nọ ọwegrẹ rai o ti gbe kẹ owhai evaọ ikpewho rai.+ 56 Yọ aye nọ udu riẹ o mae lọhọ, nọ ọ mai wou evaọ udevie rai nọ ọ rẹ sae tubẹ rehọ evawọ riẹ thihi otọ họ fiki epanọ udu riẹ o lọhọ te,+ ọ te re ohrọ ọzae riẹ nọ o you gaga na ha, hayo ọmọzae riẹ hayo ọmọtẹ riẹ, 57 makọ uwou-ọmọ nọ u no agada riẹ ze, hayo emezae nọ o yẹ, keme ọ te lẹlẹ re ae no fiki epanọ ekohọ na ọ ga te gbe oja nọ ọwegrẹ rai o ti gbe kẹ owhai evaọ ikpewho rai.

58 “Wha gbẹ romatotọ ru lele eme kpobi nọ e rrọ Uzi nana nọ a kere fihọ obe nana ha,+ nọ wha gbẹ dhozọ odẹ ulogbo nana nọ u wo ọwhewhe na ha,+ orọ Jihova+ Ọghẹnẹ rai hi, 59 Jihova ọ vẹ te kẹ owhai avọ emọ rai iye egaga, iye ilogbo nọ e rẹ jọ otọ krẹkri,+ gbe eyao egaga nọ e rẹ kaki kpo ho. 60 Ọ te rehọ eyao obọ Ijipti nọ wha jẹ dhozọ rai na kpobi ze te owhai, yọ e te jọ owhai oma rifihọ. 61 U te no ere no, Jihova ọ te rehọ oghẹrẹ ẹyao gbe uye kpobi nọ a kere fihọ obe Uzi nana ha te owhai bẹsenọ wha re whu muotọ. 62 Dede nọ wha bu gaga no wọhọ isi obọ ehru,+ umutho rai jọ ọvo i ti kiọkọ,+ keme wha gaviezọ kẹ urru Jihova Ọghẹnẹ rai hi.

63 “Yọ wọhọ epanọ o jẹ were Jihova vẹre re o ru eware woma kẹ owhai je ru owhai vihọ na, ere o te were Jihova re ọ raha owhai je kpe owhai kpobi no; a ve ti wolo* owhai no otọ nọ wha be te rehọ na.

64 “Jihova ọ te vaha owhai fihọ erẹwho na kpobi, no oka otọakpọ na jọ rite oka otọakpọ na ọdekọ,+ wha vẹ te jọ obei gọ eghẹnẹ ire gbe erọ itho, enọ te owhai te esẹ-esẹ rai wha riẹ hẹ.+ 65 Wha te jọ erẹwho yena wo udhedhẹ hẹ,+ hayo ruẹ oria eriosehọ kẹ evawọ rai hi. Ukpoye, Jihova o ti ru owhai wo udu nọ o rrọ awawa+ gbe ibiaro nọ i bi dhe no, gbe ọkora.*+ 66 Uzuazọ rai o te jọ ọza, yọ ozọ u ti mu owhai te aso te uvo; wha te riẹ sọ wha te zọ họ. 67 Evaọ ohiohiẹ wha te ta nọ, ‘Dodokọ owọwọ u te no!’ evaọ owọwọ wha vẹ te ta nọ, ‘Dodokọ ohiohiẹ u te no!’ fiki ozọ nọ o te jọ owhai oma* gbe fiki eware nọ wha te rọ ibiaro rai ruẹ. 68 Jihova ọ te rehọ okọ fa owhai zihe kpobọ Ijipti hrọ, evaọ edhere nọ mẹ ta kẹ owhai nọ, ‘Wha te gbẹ ruẹ e riẹ ofa ha’ na, wha vẹ te jọ obei zẹ omarai kẹ ewegrẹ rai re wha jọ erigbo ezae gbe erigbo eyae, rekọ wha te ruẹ ohwo dẹ owhai hi.”

29 Enana họ eme ọvọ nọ Jihova o jie uzi riẹ kẹ Mosis inọ ọ re kugbe ahwo Izrẹl evaọ ẹkwotọ Moab, fiba ọvọ nọ ọ re kugbe ae evaọ Horẹb.+

2 Mosis o te se ahwo Izrẹl kpobi kokohọ ọ tẹ ta kẹ ae nọ: “Wha rọ ẹro ruẹ eware kpobi nọ Jihova o ru evaọ iraro rai evaọ obọ ẹkwotọ Ijipti nọ o ru Fẹro avọ idibo riẹ kpobi gbe ẹkwotọ riẹ kpobi,+ 3 ẹdhoguo ologbo* nọ wha rọ ibiaro rai ruẹ, eware eka ilogbo avọ iruo igbunu yena.+ 4 Rekọ rite inẹnẹ na, Jihova ọ re kẹ owhai udu nọ a re ro wo otoriẹ hẹ gbe ibiaro nọ a rẹ rọ ruẹ ude gbe ezọ nọ a re ro yo ẹme.+ 5 ‘Nọ me su owhai ikpe udhuvẹ evaọ udhude na,+ iwu rai e bẹre dhe owhai oma ha, yọ eviẹ nọ wha ku họ awọ e raha ha.+ 6 Wha re ebrẹdi hi, yọ wha da enwaene hayo oghẹrẹ udi ogaga ovuovo ho, re wha ruẹse riẹ nọ mẹ họ Jihova Ọghẹnẹ rai.’ 7 Kẹsena wha te ti te oria nana, Saehọn ovie Hẹshbọn+ gbe Ọg ovie Beshan+ a tẹ wọ ẹmo bru omai ze rekọ ma fi rai kparobọ.+ 8 Ma te mi ai ẹkwotọ rai jẹ rehọ iẹe kẹ orua Rubẹn, orua Gad gbe abọvo orua Manasẹ re o jọ ukuoriọ rai.+ 9 Fikiere, wha ru lele eme ọvọ nana je koko ae re oware kpobi nọ wha bi ru u woma kẹ owhai.+

10 “Whai kpobi wha dikihẹ aro Jihova Ọghẹnẹ rai nẹnẹ, whai enọ i wuzou erua rai, ekpako rai, iletu rai gbe ọzae Izrẹl kpobi, 11 emọ rai, eyae rai,+ gbe erara rai+ nọ e be rria evuẹ rai, no ahwo nọ a re hwe ire kẹ owhai rite enọ i re vo ame kẹ owhai. 12 Wha rrọ etenẹ re wha ruẹse re ọvọ kugbe Jihova Ọghẹnẹ rai ẹkwoma iyei iduwu, onọ Jihova Ọghẹnẹ rai ọ be re kugbe owhai nẹnẹ+ 13 re ọ ruẹsi ru owhai dikihẹ nẹnẹ re wha jọ ahwo riẹ+ re ọyomariẹ ọ ruẹse jọ Ọghẹnẹ rai,+ nwane wọhọ epanọ ọ ya eyaa riẹ kẹ owhai jẹ wọhọ epanọ o duwu iyei riẹ kẹ esẹ-esẹ rai, Abraham,+ Aiziki,+ gbe Jekọp.+

14 “Whaọ orọnikọ whai ọvo me bi lele re ọvọ nana je duwu iyei nana ha, 15 rekọ te enọ i dikihẹ etenẹ kugbe omai nẹnẹ na evaọ aro Jihova Ọghẹnẹ mai gbe enọ e rrọ etenẹ kugbe omai nẹnẹ na ha. 16 (Keme wha riẹ vevẹ epanọ uzuazọ o jọ okenọ ma jọ ẹkwotọ Ijipti gbe oghẹrẹ nọ ma rọ nya erẹwho sa-sa vrẹ evaọ erẹ mai.+ 17 Yọ wha jẹ hae ruẹ eware etọtọ rai gbe emedhọ etọtọ* rai+ erọ ire gbe itho, erọ isiliva gbe igoru nọ e jọ udevie rai.) 18 Wha yọroma re ọzae ọvuọvo hayo aye ọvuọvo, uviuwou ovuovo hayo orua ovuovo evaọ udevie rai nẹnẹ na o gbe si udu riẹ no Jihova Ọghẹnẹ mai hi re ọ nyae gọ eghẹnẹ erẹwho yena,+ re owọ-ure nọ o rẹ ta ze o vẹ mọ ibi enua jẹ ta ẹbe ọyayare o gbẹ jọ udevie rai hi.+

19 “Rekọ otẹrọnọ ohwo jọ o yo eme iyei iduwu nana o je bi seha evaọ udu riẹ nọ, ‘Me ti wo udhedhẹ ghele o tẹ make rọnọ me ru oware nọ udu mẹ o ta kẹ omẹ,’ re o wha ọraha sei evaọ oware kpobi nọ o bi ru,* 20 Jihova ọ te rọvrẹ riẹ hẹ.+ Ukpoye, Jihova o ti mu ofu ọgaga kẹ ohwo yena, iye* kpobi nọ a kere fihọ obe nana i ti tei hrọ,+ yọ Jihova o ti voro odẹ riẹ no otọ idhiwu na no. 21 Jihova ọ vẹ te rehọ iẹe no udevie erua Izrẹl kpobi ze re uye u tei wọhọ epaọ iye kpobi nọ e rrọ ọvọ na nọ a kere fihọ obe Uzi nana.

22 “Nọ oge emọ rai nọ ọ be tha evaọ obaro gbe ohwo orẹwho ọfa nọ o no orẹwho uthethabọ ze, a tẹ ruẹ iye nọ i te ẹkwotọ na, okpẹtu* nọ Jihova o ro tei, 23 isọ-ọre gbe uwhei gbe ebruerae, nọ u ti ru nọ a gbẹ te sae rọ kọ oware ovo fihọ otọ na ha, hayo nọ oware ovo o gbẹ te dhẹ noi ze he, nọ ẹbe ọvuọvo ọ gbẹ te ta noi ze he, wọhọ Sọdọm avọ Gomora nọ a raha,+ Adma avọ Zeboyẹm,+ enọ Jihova ọ rehọ evedha gbe ofu riẹ rọ raha, 24 te ai te erẹwho na kpobi a vẹ te ta nọ, ‘Fikieme Jihova o ro ru ẹkwotọ nana enẹ?+ Eme ọ wha ofu ọgaga nana ze?’ 25 Kẹsena a vẹ te ta nọ, ‘Fikinọ a nyasiọ ọvọ Jihova,+ Ọghẹnẹ esẹ-esẹ rai ba, onọ ọ re kugbe ae okenọ ọ rehọ ai no ẹkwotọ Ijipti ze.+ 26 A tẹ nyae gọ eghẹnẹ efa je guzou kpotọ kẹ ae, eghẹnẹ nọ a riẹ hẹ nọ ọ kẹ rai uvẹ nọ a gọ họ.*+ 27 Kẹsena Jihova o te mu ofu ọgaga riẹ kẹ ẹkwotọ na ọ tẹ rehọ iye kpobi nọ a kere fihọ obe nana ro tei.+ 28 Fikiere, Jihova ọ tẹ rehọ evedha,+ ofu, gbe ofu ọgaga riẹ vi ai no otọ rai, ọ tẹ wọ ai kpohọ ẹkwotọ ọfa, oria nọ a rrọ nẹnẹ na.’+

29 “Eware nọ a ko dhere e rrọ kẹ Jihova Ọghẹnẹ mai,+ rekọ eware nọ a dhesẹ via e rrọ kẹ omai gbe emọ mai bẹdẹ bẹdẹ, re ma ruẹsi ru lele eme kpobi nọ e rrọ eva Uzi nana.+

30 “Nọ eware* nana kpobi e tẹ via kẹ owhai no, eghale gbe eka* nọ me fihọ aro rai na,+ wha jẹ kareghẹhọ ae*+ evaọ erẹwho kpobi nọ Jihova Ọghẹnẹ rai ọ vaha owhai kpohọ,+ 2 nọ wha jẹ rọ udu rai kpobi gbe uzuazọ* rai kpobi zihe bru Jihova Ọghẹnẹ rai+ jẹ gaviezọ kẹ urru riẹ evaọ eware kpobi nọ me bi jie uzi riẹ kẹ owhai nẹnẹ na, te owhai te emọ rai,+ 3 Jihova Ọghẹnẹ rai o ve ti zihe ahwo rai nọ a mu kpohọ igbo ze+ jẹ re ohrọ rai,+ ọ vẹ te wariẹ koko owhai họ no udevie ahwo kpobi nọ Jihova Ọghẹnẹ rai ọ vaha owhai fihọ ze.+ 4 O tẹ make rọnọ oka idhiwu a vaha ahwo rai kpohọ, Jihova Ọghẹnẹ rai o ti koko owhai họ jẹ rehọ owhai zihe ze.+ 5 Jihova Ọghẹnẹ rai ọ te rọ owhai ziọ ẹkwotọ nọ esẹ rai a rehọ na, wha vẹ te rriae; o ve ti ru eware woma kẹ owhai je ru owhai vihọ vi esẹ rai.+ 6 Jihova Ọghẹnẹ rai o ti ru udu rai gbe udu emọ rai fo,*+ re wha ruẹse rọ udu rai kpobi gbe uzuazọ* rai kpobi you Jihova Ọghẹnẹ rai, re wha ruẹse jọ uzuazọ.+ 7 Kẹsena Jihova Ọghẹnẹ rai o ve ti ru re iye* nana kpobi i te ewegrẹ rai, enọ i mukpahe owhai je bi kpokpo owhai.+

8 “Wha ve ti zihe ze jẹ gaviezọ kẹ urru Jihova je koko izi riẹ kpobi nọ mẹ be vuẹ owhai nẹnẹ na. 9 Jihova Ọghẹnẹ rai o ti ru eware woma kẹ owhai gaga evaọ iruo abọ rai kpobi,+ ru emọ rai vihọ, te erao rai gbe ekakọ otọ rai, keme o te were Jihova re ọ wariẹ ru eware woma kẹ owhai, nwane wọhọ epanọ o were riẹ inọ o re ru kẹ esẹ-esẹ rai.+ 10 Wha vẹ te gaviezọ kẹ urru Jihova Ọghẹnẹ rai je koko ijaje riẹ gbe izi riẹ nọ a kere fihọ obe Uzi nana, wha vẹ te rọ udu rai kpobi gbe uzuazọ* rai kpobi zihe bru Jihova Ọghẹnẹ rai.+

11 “Whaọ uzi nana nọ mẹ be rọ kẹ owhai nẹnẹ na o ga hrọ kẹ owhai hi, yọ u kpehru* hrọ kẹ owhai hi.+ 12 Orọnikọ obọ idhiwu na o rrọ họ, re wha ta nọ, ‘Ono o ti kpobọ idhiwu na re ọ rehọ iẹe se omai, re ma yo uzi na je koko iei?’+ 13 Yọ orọnọ abọdekọ abade na ọ rrọ họ, re wha ta nọ, ‘Ono ọ te fa vrẹ kpohọ abọdekọ abade na re ọ rehọ iẹe se omai, re ma yoi je koko iei?’ 14 Keme ẹme na ọ kẹle owhẹ gaga, o rrọ unu ra gbe eva udu ra,+ re whọ ruẹsi ru lele iei.+

15 “Rri, me fi uzuazọ avọ ewoma, gbe uwhu avọ eyoma họ aro rai nẹnẹ.+ 16 Wha tẹ gaviezọ kẹ izi Jihova Ọghẹnẹ rai nọ mẹ be vuẹ owhai nẹnẹ na, ẹkwoma Jihova Ọghẹnẹ rai nọ wha re you,+ idhere riẹ nọ wha rẹ nya, gbe ijaje riẹ avọ izi riẹ gbe izi oziẹobro riẹ nọ wha re koko, wha vẹ te jọ uzuazọ+ je vihọ, Jihova Ọghẹnẹ rai ọ vẹ te ghale owhai evaọ otọ nọ wha be nyae rehọ na.+

17 “Rekọ otẹrọnọ wha si udu rai noi+ wha gbẹ gaviezọ họ, a je su owhai thọ, nọ wha jẹ nyai guzou kpotọ kẹ eghẹnẹ efa jẹ gọ ae,+ 18 mẹ be vuẹ owhai nẹnẹ na inọ wha te seba ewhu hu.+ Wha te rria tọ họ evaọ ẹkwotọ nọ wha be fa Jọdan vrẹ nyae rehọ na. 19 Mẹ rehọ idhiwu na avọ otọakpọ na re e jọ isẹri kẹ owhai nẹnẹ na inọ me fi uzuazọ gbe uwhu họ aro rai, eghale gbe eka na;+ wha rẹ salọ uzuazọ hrọ re wha ruẹse jọ uzuazọ,+ te owhai te emọ rai,+ 20 ẹkwoma Jihova Ọghẹnẹ rai nọ wha re you,+ urru riẹ nọ wha rẹ gaviezọ kẹ, gbe ọyomariẹ nọ wha rẹ talamu,+ keme ọye o wo uzuazọ rai, yọ ọye ọ rẹ sai ru nọ wha rẹ rọ rria oke krẹkri evaọ ẹkwotọ nọ Jihova o duwu iyei nọ ọ te rọ kẹ esẹ-esẹ rai Abraham, Aiziki, gbe Jekọp na.+

31 Kẹsena Mosis ọ tẹ nya ọ tẹ ta eme nana kẹ ahwo Izrẹl kpobi, 2 ọ ta kẹ ae nọ: “Ikpe udhozeza (120) mẹ rrọ nẹnẹ na.+ Mẹ rẹ gbẹ sai su owhai hi,* keme Jihova ọ ta kẹ omẹ nọ, ‘Whọ te fa Jọdan nana vrẹ hẹ.’+ 3 Jihova Ọghẹnẹ rai họ ọnọ ọ be fa vrẹ karo kẹ owhai, yọ ọ te raha erẹwho nana no kẹ owhai, wha ve ti le ai no.+ Joshua họ ọnọ o ti su owhai fa vrẹ+ nwane wọhọ epanọ Jihova ọ ta na. 4 Jihova o ti ru ae nwane wọhọ epanọ o ru Saehọn+ avọ Ọg,+ ivie ahwo Amọ na, gbe ẹkwotọ rai, nọ ọ rọ raha ae no.+ 5 Jihova o ti fi ae kparobọ kẹ owhai, wha ve ru ae wọhọ epaọ eware kpobi nọ e rrọ uzi nọ mẹ rọ kẹ owhai na.+ 6 Wha wo udu je kru oma ga.+ Jọ ozọ u mu owhai hi yọ wha guegue fiki rai hi,+ keme Jihova Ọghẹnẹ rai họ ọnọ ọ be karo kẹ owhai. Ọ te nyasiọ owhai ba hayo gbabọkẹ owhai hi.”+

7 Kẹsena Mosis o te se Joshua ọ tẹ ta kẹe evaọ iraro ahwo Izrẹl kpobi nọ: “Wo udu je kru oma ga,+ keme whẹ họ ọnọ o ti su ahwo nana ruọ eva ẹkwotọ nọ Jihova o duwu iyei kẹ esẹ-esẹ rai nọ ọ te rọ kẹ ae na, yọ whọ te rehọ iẹe kẹ ae re o jọ ukuoriọ rai.+ 8 Jihova họ ọnọ ọ be karo kẹ owhẹ, yọ ọ te jọ kugbe owhẹ ẹsikpobi.+ Ọ te nyasiọ owhẹ ba hayo gbabọkẹ owhẹ hẹ. Jọ ozọ u mu owhẹ hẹ, who guegue gbe he.”+

9 Kẹsena Mosis o te kere Uzi nana+ ọ tẹ rehọ iẹe kẹ izerẹ na, ahwo Livae na, nọ e rẹ wọ etehe ọvọ Jihova na, gbe ekpako Izrẹl kpobi. 10 Mosis o te jie uzi kẹ ae nọ: “Evaọ urere ikpe ihrẹ kpobi, evaọ oke nọ a fihọ evaọ ukpe obusino na,+ evaọ etoke Ehaa Iwou-Owhre* na,+ 11 nọ ahwo Izrẹl kpobi a tẹ nyaziọ aro Jihova+ Ọghẹnẹ rai no evaọ oria nọ ọ salọ na, wha re se Uzi nana kẹ ahwo Izrẹl kpobi re a yoi.+ 12 Wha koko ahwo na họ,+ ezae na, eyae na, emaha na,* gbe erara nọ e be rria kugbe owhai evaọ ikpewho* rai, re a ruẹse gaviezọ je wuhrẹ kpahe Jihova Ọghẹnẹ rai jẹ dhozọ riẹ, re a romatotọ ru lele eme kpobi nọ e rrọ evaọ Uzi nana. 13 Re emọ* rai nọ e re riẹ Uzi nana ha a vẹ gaviezọ+ je wuhrẹ epanọ a rẹ rọ dhozọ Jihova Ọghẹnẹ rai evaọ edẹ kpobi nọ wha te rria ẹkwotọ nọ wha be fa Jọdan vrẹ nyae rehọ na.”+

14 Jihova ọ tẹ ta kẹ Mosis nọ: “Rri! Oke uwhu ra o kẹle no.+ Se Joshua, re wha kpobọ* uwou-udhu omakugbe na, re mẹ rehọ iẹe mu.”+ Fikiere Mosis avọ Joshua a tẹ nya kpobọ uwou-udhu omakugbe na. 15 Kẹsena Jihova ọ tẹ romavia ẹkwoma ukulu ẹgho* evaọ uwou-udhu na, ukulu ẹgho na u te dikihẹ akotọ unuẹthẹ uwou-udhu na.+

16 Jihova ọ tẹ ta kẹ Mosis nọ: “Rri! Whọ kẹle uwhu no,* yọ ahwo nana a te nyai lele eghẹnẹ efa bru igberẹ,* enọ e wariẹ e rai họ evaọ ẹkwotọ nọ a bi kpohọ na.+ A te nyasiọ omẹ ba+ jẹ raha ọvọ mẹ nọ mẹ re kugbe ae na.+ 17 Evaọ oke yena, me ti mu ofu kẹ ae gaga,+ mẹ te nyasiọ ae ba,+ jẹ kuọ ovao mẹ dhere ae+ bẹsenọ a rẹ raha ae no. Kẹsena nọ uye gbe eware okpẹtu buobu i je te ae no,+ a vẹ te ta nọ, ‘Kọ ogbẹrọnọ fikinọ Ọghẹnẹ mai ọ rrọ kugbe omai hi, iye nana kpobi i ro te omai na?’+ 18 Rekọ mẹ te kuọ ovao mẹ dhere evaọ ẹdẹ yena fiki eware imuomu kpobi nọ a ru nọ a rọ nyabru eghẹnẹ efa.+

19 “Whaọ obọnana, wha kere ole nana fihotọ kẹ omarai+ re wha rehọ iẹe wuhrẹ ahwo Izrẹl.+ Wha ruẹ nọ a wuhrẹ i rie* re ole nana o jọ isẹri mẹ kẹ ahwo Izrẹl.+ 20 Nọ mẹ tẹ rehọ ae ziọ ẹkwotọ nọ me duwu iyei riẹ kẹ esẹ-esẹ rai na no,+ onọ ame-ivie gbe ọnyọ i bi jo su na,+ nọ a jẹ re eva rai vọ nọ eware i je woma kẹ ae* no,+ a vẹ te nyabru eghẹnẹ efa a vẹ gọ ae, a gbe ti wo adhẹẹ kẹ omẹ hẹ a vẹ te raha ọvọ mẹ.+ 21 Nọ uye avọ eware okpẹtu buobu i te te ai no,+ ole nana ọ vẹ te jọ isẹri rọkẹ ae (keme u fo nọ o rẹ thọrọ emọ rai ẹro ho), keme mẹ riẹ oware nọ o rrọ iroro rai no vẹre,+ makọ taure mẹ tẹ te rehọ ae ziọ ẹkwotọ nọ me duwu iyei kpahe na.”

22 Fikiere Mosis o te kere ole nana fihotọ evaọ ẹdẹ yena, ọ tẹ rehọ iẹe wuhrẹ ahwo Izrẹl.

23 Kẹsena ọ* tẹ rehọ Joshua+ ọmọzae Nọn mu ọ tẹ ta nọ: “Wo udu je kru oma ga,+ keme whẹ họ ọnọ o ti su ahwo Izrẹl ruọ eva ẹkwotọ nọ me duwu iyei riẹ kẹ ae na,+ yọ mẹ te jọ kugbe owhẹ ẹsikpobi.”

24 Nọ Mosis ọ nwani kere eme Uzi nana kpobi fihọ obe re no,+ 25 Mosis ọ tẹ ta kẹ ahwo Livae nọ e rẹ wọ etehe ọvọ Jihova na nọ: 26 “Wha rehọ obe Uzi na+ re wha fi ei họ akotọ etehe+ ọvọ Jihova Ọghẹnẹ rai, u ve ti se isẹri kpahe owhai. 27 Mẹ omamẹ mẹ riẹ vevẹ kpahe ọwọsuọ rai+ gbe uzou ogaga rai.*+ Otẹrọnọ wha be wọso Jihova ga te enẹ evaọ oke nana nọ mẹ gbẹ rrọ uzuazọ kugbe owhai na, kọ ẹvẹ wha te wọso ẹe te nọ me te whu no! 28 Koko ekpako kpobi nọ e rrọ erua rai gbe iletu rai kpobi họ bru omẹ ze, re mẹ ta ẹme nana evaọ iraro rai re a yo, re mẹ rehọ idhiwu na avọ otọakpọ na se isẹri kpahe ae.+ 29 Keme mẹ riẹ nọ me te whu no, wha te siọ oware umuomu ba eru hu,+ yọ wha ti no edhere nọ me jie uzi riẹ kẹ owhai nọ wha nya na. Yọ okpẹtu o te siọ owhai ba ete he+ evaọ obaro,* keme wha ti ru oware nọ u yoma evaọ aro Jihova, yọ wha te rọ iruo abọ rai ru ei eva dha.”

30 Kẹsena Mosis ọ tẹ wariẹ eme ole na no emuhọ rite ekuhọ nọ ukoko ahwo Izrẹl soso a yo, inọ:+

 3 Keme me ti whowho odẹ Jihova.+

Wha ta kpahe oruaro Ọghẹnẹ mai!+

 5 Ae họ ahwo nọ a ru umuomu.+

A rrọ emọ riẹ hẹ, ẹthọthọ na obọ rai u no ze.+

Oge omuomu nọ ọ vọ avọ uzioraha a rrọ!+

15 Nọ Jẹshurọn* ọ rro fihọ fuẹfu no, o te thihi omẹ.

Whọ rro fihọ fuẹfu no, whọ rro fihọ gbẹkẹ gbẹkẹ no, who fu fihọ no.+

29 Dodokọ a wo areghẹ!+ A hae ti roro didi kpahe onana.+

A hai ti roro kpahe oware nọ u ti no oware nọ a bi ru na ze.+

Jọ a kpama re a fiobọhọ kẹ owhai.

Jọ a jọ oria adhẹzọ kẹ owhai.

Me re kpe, je siwi ziọ uzuazọ.+

44 Mosis ọ tẹ nyaze ọ tẹ wariẹ eme ole nana kpobi nọ ahwo na a yo,+ tei te Hoshia*+ ọmọzae Nọn. 45 Nọ Mosis o ku eme nana kpobi nọ ọ jẹ ta kẹ ahwo Izrẹl kpobi họ no, 46 ọ tẹ ta kẹ ae nọ: “Wha fi eme nana kpobi nọ mẹ rọ vẹvẹ owhai unu nẹnẹ na họ udu rai,+ re wha ruẹse ta* kẹ emezae rai re a romatotọ ru lele eme kpobi nọ e rrọ evaọ Uzi nana.+ 47 Keme enana yọ eme evere kẹ owhai hi, eye uzuazọ rai o roma hwa,+ yọ eme nana nọ wha re ru lele wha sae rọ rria tọ evaọ ẹkwotọ nọ wha be fa Jọdan vrẹ nyae rehọ na.”

48 Jihova ọ tẹ ta kẹ Mosis evaọ ẹdẹdẹ yena nọ: 49 “Gadiẹ ugbehru orọ Abarim nana,+ Ugbehru Nibo,+ onọ o rrọ ẹkwotọ Moab, nọ o rẹriẹ ovao ku Jẹriko, re who rri ẹkwotọ Kenan na, onọ mẹ be rọ kẹ ahwo Izrẹl re a rọ reuku na.+ 50 Kẹsena who ve ti whu evaọ ehru ugbehru nọ whọ be te gadiẹ na, a ve koko owhẹ họ bru ahwo ra,* nwane wọhọ epanọ Erọn oniọvo ra o whu evaọ Ugbehru Họr,+ nọ a je koko iei họ bru ahwo riẹ na, 51 keme whai imava wha ru oware nọ mẹ ta ha evaọ udevie ahwo Izrẹl, kpahe ame Mẹriba+ nọ ọ rrọ Kedẹsh evaọ udhude Zin, yọ wha kẹ omẹ orro* evaọ aro ahwo Izrẹl he.+ 52 Ugbo whọ te jọ ruẹ ẹkwotọ na, rekọ whọ te ruọ eva ẹkwotọ nọ mẹ be rọ kẹ ahwo Izrẹl na ha.”+

33 Whaọ enana họ ẹro eghale nọ Mosis ohwo Ọghẹnẹ uzẹme na ọ lẹ kẹ ahwo Izrẹl taure o te ti whu.+ 2 Ọ ta nọ:

 7 Ọ tẹ lẹ ẹro eghale nana kẹ Juda:+

 8 Ọ lẹ ẹro kẹ Livae nọ:+

12 Ọ lẹ ẹro kẹ Bẹnjamin nọ:+

13 Ọ lẹ ẹro kẹ Josẹf nọ:+

18 Ọ lẹ ẹro kẹ Zẹbulọn nọ:+

19 A ti se ahwo kpobọ ugbehru na.

A vẹ te jọ obei dhe idhe ẹrẹreokie.

20 Ọ lẹ ẹro kẹ Gad nọ:+

“Jọ oghale u te ọnọ o bi ru iwhru* Gad kẹre.+

Enọ i wuzou ahwo na a ti kokohọ.

22 Ọ lẹ ẹro kẹ Dan nọ:+

“Dan yọ ọmọ okpohrokpo.+

Ọ te la no Beshan ze.”+

23 Ọ lẹ ẹro kẹ Naftalae nọ:+

Rehọ ofẹ ukiediwo-ọre gbe obọze ovatha-ọre na re o jọ ora.”

24 Ọ lẹ ẹro kẹ Asha nọ:+

“A rọ emezae ghale Asha.

29 Jọ eva e were owhẹ, O Izrẹl!+

34 Kẹsena Mosis o te no udhude opraprara Moab kpohọ Ugbehru Nibo,+ kpobọ ehru Pisga,+ onọ o rẹriẹ ovao ku Jẹriko.+ Jihova o te dhesẹ ẹkwotọ na kpobi kẹe, no Giliad rite Dan,+ 2 gbe ẹkwotọ Naftalae kpobi avọ ẹkwotọ Ifremu avọ Manasẹ, gbe ẹkwotọ Juda kpobi rite abade obọ ukiediwo-ọre* na,+ 3 gbe ofẹ Negẹb*+ avọ Ubrotọ na,+ ukiekpotọ opraprara orọ Jẹriko, okpẹwho iriẹ na, rite Zoa.+

4 Jihova ọ tẹ ta kẹe nọ: “Ọnana họ ẹkwotọ nọ me duwu iyei riẹ rọkẹ Abraham, Aiziki, gbe Jekọp inọ, ‘Mẹ te rehọ iẹe kẹ emọ* ra.’+ Mẹ kẹ owhẹ uvẹ re whọ rọ ibiaro ra ruẹ e riẹ, rekọ whọ te fa vrẹ ruọ eva riẹ hẹ.”+

5 Kẹsena Mosis odibo Jihova o te whu evaọ etẹe, evaọ ẹkwotọ Moab nwane wọhọ epanọ Jihova ọ ta.+ 6 O ki rie fihọ ukiekpotọ nọ o rrọ ẹkwotọ Moab, nọ o rẹriẹ ovao ku Bẹt-piọ, yọ ohwo ọvo ọ riẹ oria nọ uki riẹ o rrọ rite inẹnẹ hẹ.+ 7 Mosis ọ jọ ikpe udhozeza (120) okenọ o whu.+ Evaọ oke yena yọ ibiaro riẹ i ri dhe he, yọ ẹgba ọ gbẹ jariẹ oma.* 8 Ahwo Izrẹl a tẹ viẹ Mosis evaọ udhude opraprara Moab na edẹ ọgba.+ Kẹsena edẹ nọ a rọ viẹ je weri Mosis i te kuhọ.

9 Joshua ọmọzae Nọn ọ jọ ohwo nọ ẹzi areghẹ ọ vọ oma, keme Mosis ọ rọ obọ riẹ kpahe iẹe no;+ ahwo Izrẹl a te je yoẹme kẹe, yọ nwane wọhọ epanọ Jihova ọ ta kẹ Mosis a ru.+ 10 Rekọ Izrẹl ọ gbẹ wariẹ wo ọruẹaro ọfa nọ ọ wọhọ Mosis hi,+ ọnọ Jihova ọ riẹ ovao dhe ovao.+ 11 O ru eware eka gbe iruo igbunu kpobi nọ Jihova o vi rie nọ o ru evaọ ẹkwotọ Ijipti, kẹ Fẹro gbe idibo riẹ kpobi gbe ẹkwotọ riẹ soso,+ 12 avọ obọ ogaga gbe ogaga ulogbo nọ Mosis o dhesẹ evaọ aro ahwo Izrẹl kpobi.+